Leksyon 23: Ang Pagkatibulaag ug Pagpundok sa Israel
23
Ang Pagkatibulaag ug Pagpundok sa Israel
Pasiuna
Gitibulaag sa Ginoo ang balay sa Israel tungod kay mipatig-a sila sa ilang kasingkasing batok Kaniya, apan misaad Siya nga pundukon sila sa katapusang mga adlaw. Ang mga panagna diha sa Basahon ni Mormon nagpatin-aw nga ang dugay nang gisaad nga pagpundok nagsugod na. Ang mga miyembro sa Simbahan dunay responsibilidad sa pagpanalangin sa mga pamilya sa kalibutan pinaagi sa pagpaambit sa ebanghelyo ni Jesukristo.
Background nga Basahunon
Russell M. Nelson, “Ang Pagpundok sa Nagkatibulaag nga Israel,”Liahona, Nob. 2006, 79–82.
C. Scott Grow, “Ang Basahon ni Mormon, Instrumento sa Pagpundok sa Nagkatag nga Isreal,”Liahona, Nob. 2005, 33-35.
Dapita ang usa ka estudyante nga usa ka nakabig sa Simbahan o nakatabang og tawo nga mopasakop sa Simbahan sa pagpaambit sa iyang kasinatian. Awhaga ang mga estudyante sa paghunahuna mahitungod sa tawo nga ilang nailhan nga tingali ganahan nga maminaw sa mensahe sa ebanghelyo. Hangyoa ang mga estudyante sa pagpangita og mga kamatuoran sa ebanghelyo sa tibuok leksyon karon nga makaawhag ug makatabang nila sa ilang paningkamot nga makapaambit sa ebanghelyo ngadto sa uban.
Ipabasa sa mga estudyante ang 1 Nephi 22:3–5 aron makita kon unsay gipanagna ni Nephi mahitungod sa balay ni Israel.
Unsay buot ipasabut sa “nagkatibulaag” ang balay ni Israel?
Ipasabut nga ang pagkatibulaag sa balay ni Israel usa ka importanting hilisgutan para kang Nephi tungod kay ang iyang pamilya usa man ka bahin sa pagkatibulaag. Nagkatibulaag sila gikan sa Jerusalem, tungod sa kadautan sa mga tawo sa yuta sa Judah.
Sultihi ang mga estudyante nga daghan sa mga panagna nga naa sa Basahon ni Mormon naglangkob sa makahupay nga kasiguroan nga sa ulahing mga adlaw ang balay ni Israel pundukon pag-usab. Isulat sa pisara ang mosunod nga mga pakisayran, ug i-assign ang matag estudyante sa pagbasa og usa sa mga tudling. Siguroa nga mabasa ang matag tudling. Ipapangita sa klase kon unsay gikinahanglan sa mga indibidwal alang sa pagkat-on ug pagbuhat aron mapundok kauban sa balay ni Israel.
Unsa ang pipila ka butang nga kinahanglang kat-unan ug buhaton sa mga indibidwal aron mapundok kauban sa balay ni Israel? (Ang pipila ka mga kamatuoran tingali nahibaloan na sa mga estudyante, lakip sa mga mosunod: Ang Ginoo nagpundok sa mga sakop sa balay ni Israel kon sila motuo Kaniya, maghinulsol, ug moduol Kaniya.)
Aron matabangan ang mga estudyante nga makasabut niini nga kamatuoran, mahimo nimong basahon ang mosunod nga pamahayag ni Elder Bruce R. McConkie (1915–85) sa Korum sa Napulog Duha ka mga Apostoles:
Imahe
Elder Bruce R. McConkie
“Ngano nga ang Israel nagkatibulaag? Ang tubag klaro; yano; walay pagduhaduha. Ang atong mga katigulangan nga Israelite nagkatibulaag tungod kay ilang gisalikway ang ebanghelyo, mihugaw-hugaw sa priesthood, mibiya sa simbahan, ug mibiya gikan sa gingharian. …
“Nan, unsa man, ang nalakip sa pagpundok sa Israel? Ang pagpundok sa Israel naglangkob sa pagtuo ug pagdawat ug pagpuyo nga nahisubay sa tanang gitanyag sa Ginoo sa iyang napili nga karaang katawhan. … Naglangkob kini sa pagtuo sa ebanghelyo, pagpasakop sa Simbahan, ug sa pagsulod sa gingharian. … Naglakip usab kini sa pagpundok ngadto sa usa ka gipili nga dapit o yuta sa pagsimba” (A New Witness for the Articles of Faith [1985], 515).
Sumala ni Elder McConkie, unsay angayang buhaton sa tawo aron mapundok kauban sa balay ni Israel?
Dapita ang mga estudyante sa pagpamalandong sa unsang paagi napundok sila sa balay ni Israel samtang mituo sila sa Manluluwas, naghinulsol, ug miduol Kaniya.
Sa katapusang mga adlaw, ang mga miyembro sa Simbahan modala sa ebanghelyo ngadto sa mga pamilya sa kalibutan
Pahinumdumi ang mga estudyante nga migamit si Lehi og pasumbingay gamit ang kahoy nga oliba sa pagtudlo sa iyang pamilya mahitungod sa pagkatibulaag ug pagpundok sa Israel (tan-awa sa 1 Nephi 10:12–14). Gisultihan ni Laman ug Lemuel si Nephi nga wala sila makasabut sa buot ipasabut sa gipangtudlo sa ilang amahan. (Tan-awa sa 1 Nephi 15:7).
Hangyoa ang pipila ka estudyante nga magpuli-puli sa pagbasa og kusog sa 1 Nephi 15:12–16. Dapita ang klase sa pagpangita kon unsay atong makat-unan gikan sa pagpasabut ni Nephi bahin sa balay ni Israel.
Sa unsang paagi ang pasumbingay mahitungod sa kahoyng oliba makatabang sa atong pagsabut sa pagkatibulaag ug pagpundok sa Israel?
Sumala sa bersikulo 13, kinsa man ang modala sa kahingpitan sa ebanghelyo ngadto sa mga salin sa mga binhi ni Lehi? (Ang mga Hentil nga nakadawat sa kahingpitan sa ebanghelyo.)
Ipasabut sa mga estudyante nga sa Basahon ni Mormon, ang pulong nga mga Hentil sa kasagaran nagpasabut niadtong wala maggikan sa tribu ni Judah o gikan sa yuta sa Judah. Ang Basahon ni Mormon naglangkob sa mga panagna nga sa katapusang mga adlaw ang uban niining mga Hentil makadawat og kahingpitan sa ebanghelyo (tan-awa sa 1 Nephi 15:13) ug mamahimong mga miyembro sa Simbahan ni Kristo. Ang mga propeta sa Basahon ni Mormon nagtudlo nga kini nga mga Hentil dunay responsibilidad sa pagdala sa ebanghelyo sa tibuok kalibutan.
Aron matabangan ang mga estudyante nga makasabut sa kahulugan sa pulong nga mga Hentil, i-display ug basaha ang mosunod nga mga pagpasabot gikan ni Elder Bruce R. McConkie:
Imahe
Elder Bruce R. McConkie
“Dinhi atong naila ang mga Judeo isip [nanagpuyo] sa gingharian sa Judah ug isip ilang direktang mga kaliwatan. … Ug miingon kami, nga ang pagamit niini nga mga termino, nga ang uban nga katawhan mga Hentil, lakip ang nawala ug nagkatibulaag nga mga salin sa gingharian sa Israel. … Sa ingon niana si Joseph Smith, nga gikan sa tribu ni Ephraim, … usa ka Hentil kang kinsang kamot mitungha ang Basahon ni Mormon, ug ang mga miyembro sa Ang Simbahan ni Jesukristo sa mga Santos sa Ulahing mga Adlaw … mao ang mga Hentil nga nagdala sa kaluwasan sa mga Lamanite ug sa mga Judeo” (The Millennial Messiah [1982], 233).
Dapita ang pipila ka estudyante nga magpuli-puli sa pagbasa og kusog sa 1 Nephi 22:8-12 samtang mangita ang klase niadtong mga tawo kinsa mapanalanginan ug maalimahan sa mga Hentil (mga miyembro sa Simbahan) sa katapusang mga adlaw. Samtang magbasa ang mga estudyante, makatabang ang pagpasabut nga ang mga pulong nga “magpadayon sa pagpakita sa iyang gahum diha sa mga mata sa tanan nga kanasuran” sa mga bersikulo 10–11 nagpasabut sa Ginoo nga nagpakita sa Iyang gahum sa tibuok kalibutan.
Kinsa man ang mapanalanginan ug maalimahan sa mga Hentil sa katapusang mga adlaw? (Ang kaliwatan ni Lehi, ang tanan sa balay ni Israel, ug “ang tanan nga mga kaliwatan sa yuta.”)
Sumala sa mga bersikulo 9–11, sa unsang paagi mopanalangin ang Ginoo sa “mga kaliwatan” (mga pamilya) sa yuta sa katapusang mga adlaw? (Tabangi nga mahibaloan sa mga estudyante ang mosunod nga kamatuoran: Sa katapusang mga adlaw, makigtambayayong ang Ginoo sa mga miyembro sa Iyang Simbahan sa pagpanalangin sa mga pamilya sa kalibutan pinaagi sa Iyang ebanghelyo ug mga pakigsaad.)
I-display ang mosunod nga pamahayag ni Presidente Russel M. Nelson sa Korum sa Napulog Duha ka mga Apostoles, ug ipabasa kini og kusog sa usa ka estudyante:
Imahe
Presidente Russell M. Nelson
“Ato ang responsibilidad sa pagtabang og tuman sa pakigsaad ni Abraham. Ang atong kaliwat giorden nang daan ug giandam sa pagpanalangin sa tanang katawhan sa kalibutan. … Human sa mga 4,000 ka tuig sa pagpinaabut ug pagpangandam, kini mao ang gitakda nga panahon kanus-a pagadad-on ang ebanghelyo ngadto sa mga kaliwatan dinhi sa yuta. Kini mao ang panahon sa gisaad nga pagpundok sa Israel. Ug kinahanglan kitang moapil! Dili ba kana kulbahinam? Ang Ginoo nagsalig nato ug sa atong anak nga mga lalaki—ug mapasalamaton kaayo Siya ngadto sa atong anak nga mga babaye—kinsa takus nga nagserbisyo isip mga misyonaryo niining importanting panahon sa pagpundok sa Israel” (“Mga Pakigsaad”Liahona, Nob. 2011, 88).
Unsa kaha ang bation niadtong kinsa nagpundok (kinabig) ngadto sa mipundok kanila (niadtong mipaambit sa ebanghelyo ngadto kanila)?
Unsa ang ubang paagi nga makaapil kita sa buhat sa Dios pinaagi sa pagpaambit sa ebanghelyo ngadto sa mga pamilya sa kalibutan?
Ang tahas sa Basahon ni Mormon sa pagpundok sa Israel
Dapita ang mga estudyante sa pagbasa og hilum sa 3 Nephi 21:1–7 ug sa pagpangita sa mga timailhan nga nagtimaan sa sinugdanan sa ulahing adlaw nga pagpundok sa Israel.
Namulong ang Manluluwas “kini nga mga butang diin Ako mipahayag nganha kaninyo” (bersikulo 2). Asa man girekord ang Iyang mga pulong ngadto sa mga Nephite? (Sa Basahon ni Mormon.)
Unsa man ang timailhan nga nagtimaan sa pagsugod sa ulahing adlaw nga pagpundok sa Israel? (Kinahanglang mahibaloan sa mga estudyante ang mosunod nga kamatuoran: Ang pagtungha sa Basahon ni Mormon usa ka timailhan nga ang Dios nagtuman sa Iyang pakigsaad sa pagpundok sa Israel sa ulahing mga adlaw.)
Ipabasa og kusog sa usa ka estudyante ang 3 Nephi 16:4–5, ug dapita ang klase sa pagpangita sa mga epekto sa Basahon ni Mormon ug sa mensahe sa ebanghelyo sa katapusang mga adlaw.
Sa unsang paagi ang Basahon ni Mormon makatabang sa pagtuman sa pagpundok sa katawhan sa Dios sa katapusang mga adlaw? (Usa sa mga kamatuoran nga tingali makita sa mga estudyante mao ang mosunod: Ang Basahon ni Mormon magtabang sa pagdala sa mga tawo ngadto sa kahibalo sa Manunubos aron mapundok sila ngadto Kaniya.)
Dapita ang usa ka estudyante sa pagbasa og kusog sa mosunod nga pamahayag ni Presidente Russel M. Nelson. Ipapaminaw sa mga estudyante ang tahas sa Basahon ni Mormon sa pagpundok sa Israel.
Imahe
Presidente Russell M. Nelson
“Ang pag-abut sa Basahon ni Mormon usa ka timailhan ngadto sa tibuok kalibutan nga ang Ginoo nagsugod na sa pagpundok sa Israel ug sa pagtuman sa mga pakigsaad nga Iyang gihimo ngadto ni Abraham, Isaac ug Jacob. Wala lamang nato gitudlo kini nga doktrina, misalmot pa kita niini. Ato kining gibuhat samtang nagtabang kita sa pagpundok sa pinili sa Ginoo dinhi sa kalibutan ug didto sa mga kalibutan sa mga espiritu.
“Ang Basahon ni Mormon maoy sentro niini nga buhat. Nagpadayag kini sa doktrina sa pagpundok. Nakapahimo kini sa mga tawo nga makat-on kabahin ni Jesukristo, nga motuo sa Iyang ebanghelyo, ug mopasakop sa Iyang Simbahan. Gani, kon wala pa ang Basahon ni Mormon, ang gisaad nga pagpundok sa Israel dili unta mahitabo” (“Ang Pagpundok sa Nagkatibulaag nga Israel,”Liahona, Nob. 2006, 80).
Hangyoa ang mga estudyante sa pagpaambit sa bisan unsang kasinatian nga ilang nakita ang Basahon ni Mormon nga nagtabang sa ubang mga tawo sa pagkat-on mahitungod ni Jesukristo ug magkapundok sa Iyang Simbahan.
Hagita ang mga estudyante sa pagtabang sa proseso sa pagpundok sa Israel pinaagi sa pagpaambit sa Basahon ni Mormon ngadto sa tawo nga dili nato kauban sa atong tinuohan.