Dihang si Jacob ang propeta sa Basahon ni Mormon miawhag sa iyang katawhan sa pagpangita sa ginghangrian sa Dios (tan-awa sa Jacob 2:18), gibuhat niya kini sa panahon dihang grabe kaayo ang suliran sa sala nga garbo, gugma sa katigayunan, ug imoralidad. Kini nga mga sala maoy hulga sa paghiusa ug pag-uswag sa gingharian sa Dios dinhi sa yuta. Ang pagpangita sa gingharian sa Dios mao ang paghimo sa ebanghelyo nga unang prayoridad sa atong kinabuhi. Kini nga leksyon makatabang nga mopasalig ang mga estudyante sa pagbiya sa sala ug mas hingpiton ang pagpangita sa gingharian sa Dios.
Background nga Basahunon
Dieter F. Uchtdorf, “Garbo ug ang Priesthood,”Liahona, Nob. 2010, 55–58.
“Dili Ka Magbaton og Lain nga Dios sa Atubangan Ko,” kapitulo 14 sa Mga Pagtulun-an sa mga Presidente sa Simbahan: Spencer W. Kimball (2006), 181–192.
“Ang Dakong Sugo—Higugmaa ang Ginoo,” kapitulo 1 sa Mga Pagtulun-an sa mga Presidente sa Simbahan: Ezra Taft Benson (2014), 43–52.
Nagtudlo kanato ang Basahon ni Mormon kon unsaon sa pagsubay ang dalan padulong sa gingharian sa Dios
Ipahunahuna sa mga estudyante ang mga butang nga kinahanglang regular nga ma-check aron magpadayon ang maayong kondisyon (sama pananglit, pag-check sa asyite sa makina o sa aso, magpa-check-up sa doktor o dentista).
Unsa ang mga benipisyo kon regular ang pag-check niini? (Makasulbad kita og mga problema ug makalikay sa kasamok sa umaabut nga panahon.)
Ipasabut nga kita sa samang paagi nagkinahanglan nga padayong makaribyu sa kahimtang sa espiritwal nato nga kinabuhi aron atong makarkulo ang mga kahuyang ug malikay sa peligro.
Sultihi ang mga estudyante nga dihang nagserbisyo si Alma nga Batan-on isip high priest, gibisitahan niya ang katawhan sa Simbahan sa Gideon ug giawhag nga susihon nila ang espiritwal nilang kahimtang. Hangyoa ang mga estudyante sa pagbasa og hilum sa Alma 7:19, nga mangita sa espiritwal nga kahimtang sa katawhan sa Gideon.
Giunsa sa paghulagway ni Alma ang espiritwal nga kahimtang sa katawhan sa Gideon? (Ang katawhan “anaa sa dalan padulong sa gingharian sa Dios.”)
Ipasabut nga ang “gingharian sa Dios” dunay pinakaminus duha ka managlahing kahulugan—ang usa kalibutanon ug ang usa celestial. Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie (1915–85) sa Korum sa Napulog Duha ka mga Apostoles, ug tabangi ang mga estudyante sa pagsabut nga diha sa Alma 7:19 ang “gingharian sa Dios” nag-refer sa celestial nga gingharian:
Imahe
Elder Bruce R. McConkie
“Ang Simbahan ni Jesukristo sa mga Santos sa Ulahing mga Adlaw nga naorganisar karon mao ang gingharian sa Dios dinhi sa yuta. … Sa mga kalibutan nga walay katapusan, ang celestial nga gingharian mao ang gingharian sa Dios. … Gidesinyo ang ebanghelyo aron maandam ang mga tawo sa pagsulod sa celestial nga gingharian sa Dios” (Mormon Doctrine, 2nd ed. [1966], 415–17.)
Ipabasa sa mga estudyante ang Alma 7:14–16 ug ipapangita unsay gisugo ni Alma sa katawhan nga angay nilang buhaton aron mapanunod ang kinabuhing dayon.
Ngano kaha nga gidapit man ni Alma ang katawhan sa paghinulsol nga naa na man sila sa dalan sa pagkamatarung? (Ang mga tawo sa Gideon nagkinahanglang magpabilin sa dalan sa pagkamatarung.)
Dapita ang pipila ka estudyante nga magpuli-puli sa pagbasa og kusog sa Alma 7:21–24. Hangyoa ang klase sa pagpangita sa mga aksyon ug mga hiyas nga makatabang aron makasulod kita sa gingharian sa Dios.
Unsay angay natong buhaton ug kab-uton aron masubay ang dalan padulong sa gingharian sa Dios? (I-summarize ang tubag sa mga estudyante pinaagi sa pagsulat sa mosunod nga baruganan diha sa pisara: Pinaagi sa pagsunod sa mga baruganan sa ebanghelyo, masubay nato ang dalan padulong sa gingharian sa Dios.)
Dapita ang mga estudyante nga ikonsiderar sa unsang paagi ang ilang mga buhat nakatabang aron mas mahisama sila ni Jesukristo ug mouswag padulong sa gingharian sa Dios. Hangyoa sila sa paghunahuna kon unsay ilang gibati mahitungod sa pag-uswag nga ilang gibuhat sa kasamtangan.
Ang gugma sa mga katigayunan, garbo, ug imoralidad magpalayo kanato sa pagpangita sa gingharian sa Dios
Ipasabut nga sa tibuok Basahon ni Mormon, mipahimangno ang mga propeta sa Dios sa katawhan batok sa sala. Sama pananglit, gisugo si Jacob sa Ginoo sa pagbadlong sa iyang katawhan bahin sa mga sala nga “salawayon ngadto sa Dios” (Jacob 2:5).
Isulat sa pisara ang mosunod nga mga reference: Jacob 2:12–14, Jacob 2:20–21, ug ang Jacob 2:23–28. Ipapakli sa mga estudyante kini nga mga tudling, nga mangita sa piho nga mga sala nga gihisgutan ni Jacob. Isugyot nga markahan sa mga estudyante ang mga pulong nga naghulagway niini nga mga sala. Human sa igong panahon, dapita ang mga estudyante sa pagpaambit sa gihisgutan ni Jacob nga mga sala nga naa sa matag tudling. Isulat sa pisara ang matag sala nga ilang nahibaloan sa ibabaw nga may kalabutan nga pakisayran sama sa mosunod:
Dapita ang usa ka estudyante sa pagbasa og kusog sa Jacob 3:10–12, ug hangyoa ang klase sa pagpangita sa mga pulong nga gigamit ni Jacob sa paghulagway sa kaseryuso sa mga sala sa katawhan.
Unsa nga mga pulong ang naghulagway sa kaseryuso sa mga sala sa katawhan?
Migamit si Jacob sa mga pulong nga “makalilisang nga mga sangputanan” sa sala (bersikulo 12). Dapita ang mga estudyante sa pag-cross reference sa Jacob 3:12 ngadto sa 2 Nephi 9:39 ug sa 1 Nephi 10:21. Ipabasa sa usa ka estudyante og kusog kini nga mga bersikulo. Hangyoa ang klase sa pagpangita sa dugang nga mga sangputanan sa sala. Dapita ang klase sa pag-ila sa kamatuoran gikan niini nga mga tudling kon sa unsang paagi ang mga sala sama sa garbo, imoralidad, ug gugma sa mga katigayunan makaapekto sa tawo nga nangita sa gingharian sa Dios. (Kinahanglang mahibaloan sa mga estudyante ang kamatuoran sama sa mosunod: Ang sala mosangput sa espiritwal nga kamatayon ug magpugong kanato sa pagsulod sa gingharian sa Dios.)
Idugang diha sa pisara ang mosunod nga mga reference:
Dapita ang mga estudyante sa pagpili ug pagbasa sa usa sa bag-ong mga tudling. Hangyoa sila sa pagpangita og mga paagi nga malikayan ang mga sala nga gugma sa mga katigayunan, garbo, ug imoralidad. Human sa igong panahon, hangyoa sila sa pagpaambit unsay ilang nakit-an.
Sa unsang paagi ang pagsunod sa gitambag niini nga mga tudling makatabang sa miyembro sa Simbahan sa pagpangita sa gingharian sa Dios ug paglig-on sa Simbahan sa Ginoo dinhi sa kalibutan?
Kinahanglan nga pangitaon nato ang gingharian sa Dios labaw sa tanang butang
Ipasabut nga agig dugang sa pagpasidaan sa iyang katawhan mahitungod sa gugma sa mga katigayunan, garbo, ug imoralidad, mitambag si Jacob aron matabangan sila sa pagbuntog sa dili matarung nilang mga tinguha. Ipabasa og kusog sa usa ka estudyante ang Jacob 2:17–19 samtang mangita ang klase sa tambag nga gihatag ni Jacob.
Unsay atong makat-unan gikan sa tambag ni Jacob aron makatabang nga malikay kita sa sala? (Kinahanglang mahibaloan sa mga estudyante ang mosunod: gisugo kita sa Dios sa pagpangita sa Iyang gingharian labaw sa tanang butang.)
Unsay ipasabut diha ninyo sa pagpangita sa gingharian sa Dios?
I-display ang mosunod nga pamahayag ni Presidente Ezra Taft Benson (1899–1994), ug dapita ang usa ka estudyante sa pagbasa niini og kusog:
Imahe
President Ezra Taft Benson
“Kon atong unahon ang Dios, ang tanang mga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pag-angkon alang sa atong pagbati, sa gipangayo sa atong panahon, sa mga kaayohan nga atong gitinguha, ug sa pagpahimutang sa atong mga prayoridad” (Mga Pagtulun-an sa mga Presidente sa Simbahan: Ezra Taft Benson [2014], 47).
Unsa ang pipila ka ehemplo sa mga butang nga “mapahimutang sa tukma nilang dapit o mawala sa atong kinabuhi” kon himoon nato nga unang prayoridad ang Dios?
Unsa ang usa ka ehemplo sa butang nga napahimutang sa tukma nga dapit o nawala sa atong kinabuhi dihang giuna nimo ang Langitnong Amahan ug ang Iyang gingharian sa inyong kinabuhi?
Unsay epekto ngari kanato sa pagbutang og una sa Dios kon tintalon kita sa garbo, gugma sa mga katigayunan, imoralidad, o ubang mga sala?
Dapita ang usa ka estudyante sa pagbasa og kusog sa Mateo 6:33. Sultihi ang mga estudyante nga ang Hubad ni Joseph Smith mabasa sama sa mosunod: “Busa, ayaw pangita sa mga butang niini nga kalibutan apan paninguha kamo sa pagtukod ug una sa gingharian sa Dios, ug sa pagpatunhay sa iyang pagkamatarung, ug kining tanan nga mga butang igadugang ra kaninyo” (Hubad ni Joseph Smith, Mateo 6:38).
I-display ang mosunod nga pamahayag ni Elder Dallin H. Oaks, sa Korum sa Napulog Duha ka mga Apostoles:
Imahe
Elder Dallin H. Oaks
“Ang ‘Unaha sa … pagtukod ang gingharian sa Dios’ nagpasabut nga himoon nga unang prayoridad ang Dios ug ang Iyang buhat. Ang buhat sa Dios mao ang pagpahinabo sa kinabuhing dayon sa Iyang mga anak (tan-awa sa Moises 1:39), ug tanan nga hinungdan niini. … Ang uban bisan unsa pa mas ubos nga prayoridad. … Sama sa giingon sa usa ka tawo, kon dili nato pilion og una ang gingharian sa Dios, aduna kini kalainan sa umaabut kon kadto pa unta ang atong gipili” (“Focus and Priorities,” Ensign, Mayo 2001, 83–84).
Unsa ang ubang paagi diin ang usa ka young adult nga miyembro sa Simbahan “makatukod sa gingharian sa Dios”?
Dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:
Imahe
Elder Robert D. Hales
“Pinaagi sa pagpili nga maanaa sa gingharian sa [Dios], mibulag kita—wala mopalayo—sa atong kaugalingon sa kalibutan. Tarung ang atong sininaan, lputli ang atong hunahuna, limpyo ang atong pinulongan. Ang mga salida ug telebisyon nga atong tan-awon, ang muskita nga atong paminawon, ang mga basahon, mga magasin, ug mga newspaper nga atong basahon makabayaw. Mopili kita’g mga higala nga modasig sa mahangturon natong mga tumong, ug tagdon nato ang uban sa kamabination. Makapugong kita sa mga bisyo sa pagka-imoral, pagpanugal, pagpanabako, sa pag-inom, ug sa ilegal nga drugas. Ang Dominggo natong mga kalihokan mohaum sa mga sugo sa Dios sa paghinumdom sa adlawng Igpapahulay ug pagbalaan niini. Atong masunod ang ehemplo ni Jesukristo kon unsaon nato sa pagtagad ang uban. Magpakabuhi kitang takus nga makasulod sa balay sa Ginoo” (“The Covenant of Baptism: To Be in the Kingdom and of the Kingdom,” Ensign, Nob. 2000, 8).
Sa unsang paagi ang pagpangita sa gingharian sa Dios makaimpluwensya og dako sa matag aspeto sa atong kinabuhi?
Sa unsang paagi ang pagpangita sa gingharian sa Dios makaimpluwensya sa inyong kinabuhi o sa kinabuhi sa sakop sa pamilya o sa mga kaila?
Awhaga ang mga estudyante nga pamalandungan unsa kahay ilang buhaton aron makapadayon sa pagpangita sa gingharian sa Dios. Awhaga sila sa pagpaminaw sa mga pag-aghat sa Espiritu ug pagsulat sa unsay giplano nilang buhaton. Ipamatuod ang mga panalangin nga moabut gumikan sa pagbutang og una sa Dios sa atong kinabuhi.