Pag-ampo ug Pagpadayag

Pasiuna

Ang pag-ampo usa ka sagradong pribilehiyo ug sugo nga magtugot kanato sa pagpakigsulti sa mahigugmaong Langitnong Amahan. Maminaw Siya ug motubag sa atong mga pag-ampo. Kadtong magkugi sa pagpangita og giya sa Ginoo mapanalanginan og personal nga pagpadayag. Nag-highlight kini nga leksyon kon unsay atong mahimo aron maandam ang atong kasingkasing ug hunahuna sa pagdawat og mga tubag sa atong mga pag-ampo.

Background nga Basahunon

Boyd K. Packer, “The Candle of the Lord,” Ensign, Ene. 1983, 51–56.
Richard G. Scott, “Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 45–47.
David A. Bednar, “Ang Espiritu sa Pagpadayag,” Liahona, Mayo 2011, 87–90.

Mga Sugyot alang sa Pagtudlo

2 Nephi 32:8–9; 3 Nephi 14:7–11

Nakadungog ang Dios sa atong mga pag-ampo

Ipalista sa mga estudyante ang pipila ka mga paagi diin makagamit kita sa teknolohiya sa pagpakigsulti sa uban. Isulat sa pisara ang tubag sa mga estudyante.

Samtang motugot ang teknolohiya nga atong makaistorya si bisan kinsa nga atong pilion, nganong usahay lisud man ang pagpakigsulti sa epektibong paagi sa atong Langitnong Amahan?

Dapita ang usa ka estudyante sa pagbasa og kusog sa 3 Nephi 14:7–11 samtang mangita ang klase sa gitudlo sa Manluluwas mahitungod sa kaandam sa Langitnong Amahan sa pagtubag sa atong mga pag-ampo.

Unsa nga baruganan ang gitudlo sa Manluluwas mahitungod sa kaandam sa Langitnong Amahan sa pagtubag sa atong mga pag-ampo? (Ang tubag sa mga estudyante kinahanglang maglakip sa mosunod nga baruganan: Ang Langitnong Amahan makadungog ug mosanong nato kon mangutana kita, mangayo ug manuktok.)

Aron mapalawman pa ang panabut sa mga estudyante bahin niini nga baruganan, ipaambit ang mosunod nga pamahayag ni Presidente James E. Faust (1920–2007) sa Unang Kapangulohan:

“Walay kalibutanong awtoridad ang makabulag kanato sa direkta natong pag-akses sa atong Tiglalang. Wala gayuy kapakyas sa mekanikal o sa electronik kon mag-ampo kita. Walay limit kon kapila kita pweding mag-ampo matag adlaw. Walay kota sa gidaghanon ang pwede natong iampo sa kada pag-ampo. Dili na kinahanglang moadto ka pa og mga secretary o mag-set pa og appointment aron maabut ang trono sa grasya. Makab-ot ra siya bisan kanus-a ug bisan asa” (“The Lifeline of Prayer,” Ensign, Mayo 2002, 59).

Unsa kahay angay ninyong isulti nga makatabang sa mga tawo nga dili kanunayng mag-ampo tungod kay wala sila motuo nga makadungog ang Dios o motubag sa ilang mga pag-ampo?

Dapita ang usa ka estudyante sa pagbasa og kusog sa 2 Nephi 32:8–9, ug ipapangita sa klase kon unsay gitudlo ni Nephi mahitungod sa pag-ampo. Mahimo kang mangutana sama sa mosunod:

Unsa kaha ang gipasabut sa “mag-ampo sa kanunay”?
Unsa ang inyong nakita nga ehemplo sa usa ka tawo nga nag-ampo kanunay? Sa unsang paagi napanalanginan kining tawhana tungod niini nga buhat?
Unsay ipasabut niini diha ninyo nga “mopahinungod” ang Ginoo sa inyong mga paningkamot alang sa kaayohan sa inyong kalag kon mag-ampo kamo sa Iyang tabang? (Makatabang ang pagpasabut nga ang pagpahinungod og butang nagpasabut sa paghalad niini alang sa usa ka espesyal o sagradong katuyoan o paghimo niining balaan.)

Awhaga ang mga estudyante nga magkugi sa kanunay nga pag-ampo. Ipaniguro diha nila nga ang Langitnong Amahan makadungog sa ilang mga pag-ampo ug magtinguha gayud sa pagpanalangin kanila.

1 Nephi 10:17–19; 15:1–3, 7–11; Jacob 4:6; Alma 26:22

Ang tanan nga sumusunod ni Jesukristo makadawat og personal nga pagpadayag

Ipalista sa mga estudyante ang pipila ka mga pangutana o kahimtang diin ang mga young adult tingali magtinguha og pagpadayag gikan sa Dios.

Pahinumdumi ang mga estudyante sa damgo ni Lehi sa kahoy sa kinabuhi, ug ipasabut nga human nadungog ni Nephi kining dinasig nga damgo, nagtinguha siya nga makahibalo pa og dugang mahitungod niini. Papuli-puliha sa pagbasa og kusog ang pipila ka estudyante sa 1 Nephi 10:17–19. Ipapangita sa klase kon unsay gitudlo niini nga mga bersikulo mahitungod sa pagpadayag, lakip kon si kinsa ang may katungod sa pagpadayag.

Unsa ang gitudlo niini nga mga bersikulo mahitungod sa personal nga pagpadayag? (Siguroha nga mahibaloan ang mosunod nga doktrina: Mopadayag ang Dios sa kamatuoran pinaagi sa gahum sa Espiritu Santo ngadto sa tanang magkugi sa pagpangita aron mahibalo.)

I-display ang mosunod nga mensahe ni Elder David A. Bednar sakop sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“[Ang espiritu sa pagpadayag] dili ra kutob sa kapangulohan nga mga awtoridad sa Simbahan; hinoon, kini gipanag-iya ug kinahanglan nga maglihok diha sa kinabuhi sa matag lalaki, babaye, ug bata kinsa moabut sa panuigon sa pagkamay-tulubagon ug mosulod ngadto sa sagrado nga mga pakigsaad. Ang sinsero nga tinguha ug pagkatakus nagdapit sa espiritu sa pagpadayag nganhi sa atong mga kinabuhi” (Ang Espiritu sa Pagpadayag,” Liahona, Mayo 2011, 88).

Ngano nga makadasig diha ninyo kini nga panabut gikan ni Elder Bednar?

Ipasabut nga tungod sa mga tinguha ni Nephi, iyang katakus, ug iyang pagtuo, siya usab nakakita og panan-awon sa kahoy sa kinabuhi (tan-awa sa 1 Nephi 11–14). Ipasabut usab nga ang reaksyon ni Laman ug Lemuel sa panan-awon sa ilang amahan daw lahi ra kang Nephi. Ipabasa og kusog sa duha ka estudyante ang 1 Nephi 15:1–3, 7–9, ug dapita ang klase sa pagsunod ug pagkonsiderar unsay ilang nakat-unan gikan niini nga mga bersikulo.

Unsa ang pinakaimportante kaninyo niini nga mga bersikulo?

Ipabasa og kusog sa laing estudyante ang 1 Nephi 15:10–11. Ikonsiderar ang pagpasabut ngadto sa mga estudyante nga ang bersikulo 11 usa ka ehemplo sa “kon-dayon” nga pamahayag sa mga kasulatan. Isulat sa pisara ang mosunod ug pangutan-a ang mga estudyante unsaon nila sa pagsulat ang mga blangko basi sa unsay ilang nabasa sa mga bersikulo 10–11:

Kon , niana ang .

Dapita ang mga estudyante sa pag-cross-reference sa bersikulo 11 ngadto sa Alma 26:22, ug dayon pangutan-a:

Unsaon kaha ninyo sa paggamit ang gitudlo sa 1 Nephi 15:10–11 ug sa Alma 26:22 sa pagtudlo sa usa ka tawo kon unsaon sa pagpangita og tubag sa iyang mga pag-ampo?

Ipabasa og kusog sa usa ka estudyante ang Jacob 4:6, ug dapita ang klase sa pagpangita kon unsay gipangbuhat sa katawhan ni Jacob, agig dugang sa pagpangutana uban sa pagtuo, aron madapit ang pagpadayag. Mahimo nimong ipasabut nga ang “kami nangita sa mga propeta” nag-refer sa pagbasa sa pulong sa mga propeta nga naa sa mga kasulatan.

Ngano kaha nga ang pagtuon sa mga pulong sa karaan ug sa ulahing adlaw nga mga propeta mosangput man sa pagkadawat og pagpadayag gikan sa Ginoo?

I-display ug basaha ang mosunod nga pamahayag ni Elder Robert D. Hales sa Korum sa Napulog Duha ka mga Apostoles:

“Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan; kay ang Iyang mga pulong gisulti pinaagi sa Iyang mga propeta. Unya siya dayon motudlo kanato samtang kita maminaw sa mga pag-aghat sa Balaang Espiritu.

“Kon kamo wala makadungog sa Iyang tingog nga misulti karong bag-o pa, balik ngadto sa mga kasulatan nga morag primero pang nakakita ug morag primero pang nakadungog. Sila mao ang atong espiritwal nga sumpay sa atong kinabuhi” (“Balaan nga mga Kasulatan: Ang Gahum sa Dios alang sa Atong Kaluwasan,” Liahona, Nob. 2006, 26).

Dapita ang mga estudyante sa paghunahuna sa mga hagit nga ilang giatubang. Hangyoa sila sa pagkonsiderar kon nangutana ba sila sa Ginoo pinaagi sa pag-ampo ug miadto sa kasulatan para sa mga tubag.

Aron matabangan nga makita sa mga estudyante ang mga ehemplo sa unsang paagi mohatag og personal nga pagpadayag ang Ginoo kanato, isulat sa pisara ang mga pakisayran sa kasulatan.

I-assign ang pipila ka estudyante ngadto sa matag tudling. Hangyoa ang mga estudyante sa pagbasa sa na-assign sa ilaha nga tudling, ug mangita og usa ka paagi diin ang Dios mohatag og personal nga pagpadayag sa Iyang mga anak. Dapita ang mga estudyante sa pagpaambit sa unsay ilang nadiskubrihan. Samtang ikonsiderar nimo ang panginahanglan sa imong mga estudyante, mahimo nimong ipaambit ang mosunod nga mga pamahayag ni Presidente Boyd K. Packer (1924–2015) ug ni Elder Richard G. Scott sakop sa Korum sa Napulog Duha ka mga Apostoles:

“Ang Espiritu dili mokuha sa atong atensyon pinaagi sa pagsinggit o pag-uyog kanato gamit ang bug-at nga kamot. Hinoon kini mohung-hong. Hinay kini nga mohapuhap nga kon kita busy kaayo mahimong dili gayud nato kini mabati. …

“Usahay moduso lang kini nga igo kitang makapatalinghug. Apan kasagaran, kon dili kita mopatalinghug sa malumo nga pagbati, ang Espiritu moatras ug mohulat nga kita mangita ug maminaw ug mosulti sa atong kaugalingong sinultihan, sama kang Samuel sa karaang panahon, ‘Sulti [Ginoo], kay ang imong sulugoon namati.’ (1 Sam. 3:10.)” (“The Candle of the Lord,” Ensign, Ene. 1983, 53).

“Ang iyang mga tubag tagsa rang moabut samtang nagluhod pa kamo sa pag-ampo, bisan naghangyo kamo og diha-diha nga tubag. Hinoon, modasig Siya kaninyo sa hilum sa higayon nga ang Espiritu igo kaayo nga motandog sa inyong hunahuna ug kasingkasing. Mao nga, kinahanglang mangita kamo og panahon sa kahilum aron mahibaloan nga kamo gitudloan ug gilig-on” (“Ang Paggamit sa Langitnon nga Gasa sa Pag-ampo,” Liahona, Mayo 2007, 9).

Pahinumdumi ang mga estudyante nga dili kita ang mopili unsaon sa pagpadayag sa Dios ang kamatuoran ngari kanato, apan kon molihok kita uban sa pagtuo, mas maayong maandam nato ang atong kasingkasing ug hunahuna sa pagdawat og pagpadayag. Dapita ang pipila ka estudyante sa pagpaambit kon sa unsang paagi sila nakadawat og personal nga pagpadayag, kon ang kasinatian dili kaayo personal o sagrado.

1 Nephi 18:1–3; 2 Nephi 28:30; Alma 12:9–11

Ang pagdawat ug paglihok sa pagpadayag

Hangyoa ang mga estudyante sa pagkumpara og hilom sa 2 Nephi 28:30 ug sa Alma 12:9–11 ug sa pag-ila sa mga baruganan nga makatabang nila sa pagdawat og dugang pang personal nga pagpadayag.

Unsa ang gitudlo niini nga mga tudling nga maoy makatabang nato aron makadawat og dugang pa nga personal nga pagpadayag? (Bisan og mogamit sila og lahi nga mga pulong, kinahanglang mahibaloan sa mga estudyante ang mosunod nga mga baruganan: Mopadayag ang Ginoo sa kamatuoran ngari kanato sumala sa gihatag natong kakugi sa pagpatalinghug sa Iyang mga pulong. Moabut sa kasagaran ang pagpadayag diha kanato pagtulun-an human sa usa ka pagtulun-an.)
Ngano kaha nga gikinahanglan man sa Ginoo kanato ang pagkamasulundon sa unsay Iya nang gipadayag kanato sa dili pa Niya ipadayag ang dugang nga kahibalo?
Unsay ipasabut nga ang pagpadayag moabut kanato “pagtulun-an human sa usa ka pagtulun-an”?

Kon itugot pa sa oras, mahimo nimong hisgutan ang 1 Nephi 18:1–3 sa klase sa paghulagway kon sa unsang paagi nadawat ni Nephi ang nagkadako nga pagpadayag aron makat-unan kon unsaon sa pagbuhat ang barko.

I-display ug ipabasa sa usa ka estudyante ang mosunod nga pamahayag ni Elder David A. Bednar:

“Labing kasagaran, ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakus, ug pagpangandam. Ang ingon nga komunikasyon gikan sa Langitnong Amahan sa hinay-hinay ug sa kalumo ‘motuhop diha sa [atong mga kalag] ingon sa mga yamog nga gikan sa langit’ (D&P 121:45). Kini nga sumbanan sa pagpadayag may kalagmitan nga mahimong mas kasagaran kay sa panagsa ra” (Ang Espiritu sa Pagpadayag,” 88).

Samtang hinumduman ninyo ang nangagi sa inyong kinabuhi, sa unsang paagi gigiyahan kamo sa Ginoo aron molambo sa paghimo og mga desisyon o pagpangita og panabut gikan Kaniya?

Tapusa ang leksyon pinaagi sa pag-display ug paghangyo nga basahon og kusog sa usa ka estudyante ang mosunod nga pamahayag ni Presidente Thomas S. Monson:

“Kon bisan kinsa kanato nahinay sa pagpatalinghug ngadto sa tambag nga mag-ampo kanunay, walay mas maayo nga panahon sa pagsugod kay sa karon. Si William Cowper namahayag, ‘Si Satanas magkurog kon siya makakita sa pinakahuyang nga santos nga nagluhod nga nag-ampo’ [‘Exhortation to Prayer,’ sa Olney Hymns]” (“Usa ka Harianong Priesthood,” Liahona, Nob. 2007, 61).

Pahunahunaa ang mga estudyante mahitungod sa paningkamot nga bag-o lang nilang gihimo sa pag-ampo sa inadlaw nilang kinabuhi. Awhaga ang mga estudyante sa pagsunod sa mga baruganan nga gihisgutan niini nga leksyon aron madapit ang paglambo sa personal nga pagpadayag pinaagi sa pag-ampo ug pagtuon sa kasulatan. Dapita ang mga estudyante sa pagpaambit sa unsang paagi nila nahibaloan nga ang Langitnong Amahan motubag sa mga pag-ampo. Ipaambit ang imong pagpamatuod nga modasig kanato sa salabutan ug direksyon ang mapinanggaong Langitnong Amahan kon kita mismo mangandam sa atong kaugalingon sa pagdawat niini.

Mga Basahunon sa Estudyante

1 Nephi 10:17–19; 15:1–3, 7–11; 18:1–3; 2 Nephi 28:30; 32:8–9; Jacob 4:6; Alma 12:9–11; 26:22; 3 Nephi 14:7–11.
Richard G. Scott, “Unsaon Pag-angkon og Pagpadayag ug Inspirasyon alang sa Inyong Personal nga Kinabuhi,” Liahona, Mayo 2012, 45–47.
David A. Bednar, “Ang Espiritu sa Pagpadayag,” Liahona, Mayo 2011, 87–90.