Leksyon 1: ‘Ang Pag-abut sa Ang Pamilya: Usa ka Pamahayag ngadto sa Kalibutan’
1
Ang Pag-abut sa “Ang Pamilya: Usa ka Pamahayag ngadto sa Kalibutan.”
Pasiuna
Niadtong Septyembre 1995 ang Unang Kapangulohan ug ang Korum sa Napulog Duha ka mga Apostoles miisyu og pamahayag ngadto sa Simbahan ug ngadto sa kalibutan nga giulohan og “Ang Pamilya: Usa ka Pamahayag ngadto sa Kalibutan” ( Liahona, Nob. 2010, 129). Kining mapanagnaong deklarasyon nagtudlo sa balaang tahas sa pamilya sa mahangturong plano sa Dios. Kini nga leksyon makatabang sa mga estudyante nga mas makasabut ngano nga ang mga propeta, manalagna, mga tigpadayag sa ulahing adlaw miisyu niining dinasig nga dokumento.
“Ang Pamilya: Usa ka Pamahayag ngadto sa Kalibutan,” gisulat sa mga manalagna
Dapita ang usa ka estudyante sa pagbasa og kusog sa Moises 6:26–27, ug hangyoa ang klase sa pagsunod, mangita kon unsay gisulti sa Ginoo bahin sa mga kasingkasing, mga dunggan, ug mga mata sa mga tawo.
Sa unsa nga paagi nga ang Ginoo mihulagway sa pagkadautan sa mga tawo?
Unsay buot ipasabut sa dihang ang “mga kasingkasing sa mga tawo nag-anam pagkatig-a, ug ang ilang mga dunggan dili makadungog, ug ang ilang mga mata dili makakita sa layo”?
Dapita ang usa ka estudyante sa pagbasa og kusog sa Moises 6:31–34.
Kon kamo si Enoch, unsay inyong nakit-an nga mapasaligon sa mga pulong sa Ginoo?
Unsa ang gitudlo niini nga mga bersikulo bahin kon unsaon sa Ginoo pagsuporta ang Iyang mga propeta?
Hatagi og panahon ang mga estudyante sa pagbasa sa Moises 6:35–36.
Unsay nakita ni Enoch sa dihang iyang gihugasan og lapok ang iyang mga mata?
Unsa kaha ang gipasabut sa lapok? (Tingali ang lapok nagsimbolo sa pagkakalibutanon. Hangyoa ang mga estudyante sa paghunahuna unsa kahay ilang makita kon mahugasan ang kalibutanon nga mga butang gikan sa ilang mga mata.)
Sa unsa nga paagi ang bersikulo 36 makatabang sa pagpasabut unsa ang manalagna? (Ang mga tubag kinahanglang maglakip sa mosunod nga kamatuoran: Ang usa ka manalagna makakita sa mga butang nga dili makita sa natural nga mga mata. Ikonsiderar sa paghangyo sa mga estudyante sa pag-cross-reference sa bersikulo 36 sa Mosiah 8:15–17.)
Dugang pagpasabut sa manalagna, ipakita ang mosunod nga pamahayag ni Elder John A. Widtsoe (1872–1952) sa Korum sa Napulog Duha ka mga Apostoles ug hangyoa ang usa ka estudyante sa pagbasa niini og kusog:
Imahe
Elder John A. Widstoe
“Ang manalagna mao ang tawo nga makakita gamit ang espirituhanong mga mata. Masabtan niya ang kahulugan sa butang nga dili maklaro sa uban; mao nga usa siya ka tighubad ug tigpatin-aw sa mahangturong kamatuoran. … Tawo siya nga makakita, naglakaw uban sa kahayag sa Ginoo nga buka ang mga mata [tan-awa sa Mosiah 8:15–17]” (Evidences and Reconciliations, arr. G. Homer Durham, 3 vols. in 1 [1960], 258).
Isugyot nga isulat sa mga estudyante kini nga depenisyon diha sa ilang mga kasulatan tupad sa Moises 6:35–36. Ipasabut nga ang mga manalagna mga propeta usab.
I-summarize ang Moises 7:16–21 aron matabangan ang mga estudyante nga makasabut unsay nahitabo niadtong kinsa midawat ni Enoch isip usa ka manalagna ug misunod sa iyang mga pulong.
Sa unsa nga paagi nga kini nga mga bersikulo naghulagway sa kaimportante sa pagpatalinghug sa moderno nga mga propeta ug mga manalagna? (Siguroha nga ang mga estudyante makasabut sa mosunod nga doktrina: Ang mga propeta makatabang nato nga makakita sa mga butang gikan sa panglantaw sa Dios, ug mapanalanginan kita kon mosalig sa ilang mga pulong.)
Basaha ang mosunod nga istorya ni Elder Russell M. Ballard, sa Korum sa Napulog Duha ka mga Apostoles:
Imahe
Elder M. Russell Ballard
“Mga kaigsoonan, kining tuiga nagtimaan sa ika-10 nga anibersaryo sa pamahayag ngadto sa kalibutan bahin sa pamilya, nga giisyu sa Unang Kapangulohan ug sa Korum sa Napulog Duha ka mga Apostoles niadtong 1995 [tan-awa sa ‘Ang Pamilya: Usa ka Pamahayag ngadto sa Kalibutan,’ Liahona, Nob. 2010, 129]. Mao kini kaniadto ug karon usa kini ka pangamuyo sa pagpanalipod ug pagpalig-on sa mga pamilya. …
“Ang pamahayag usa ka mapanagnaong dokumento, dili lamang tungod kay kini giisyu sa mga propeta pero tungod kay mapuslanon kini sukad masukad. Kini nagpasidaan sa daghang mga butang nga nakahulga ug nakapahuyang sa mga pamilya sa miaging dekada ug nagtawag alang sa prayoridad ug pagpasabot og maayo sa panginahanglan sa pamilya kon sila molahutay sa usa ka palibot nga tingali mas makaguba sa tradisyunal nga kaminyoon ug sa relasyon sa ginikanan ug anak.
“Ang klaro ug yanong pinulongan sa pamahayag makita nga lahi kaayo tali sa naglibog ug komplikado nga pagtuo sa katilingban nga dili gani magkauyon sa kahulugan sa pamilya” (“Ang Pinakamahinungdanon Mao ang Molungtad og Dugay,”Liahona, Nob. 2005, 41).
Unsa kaha ang gipasabut ni Elder Ballard sa dihang siya miingon nga ang pamahayag sa pamilya “mapuslanon kini sukad masukad”?
Sa unsa nga paagi nga ang pamahayag sa pamilya nakakumpirmar sa inyong pagtuo nga ang Unang Kapangulohan ug ang Napulog Duha ka mga Apostoles mga propeta, mga manalagna, ug mga tigpadayag?
Ipamatuod nga tungod kay ang Langitnong Amahan nahigugma nato ug gusto nga kita mahimong sama Kaniya, mipadala Siya kanato og mga propeta ug mga manalagna.
“Ang Pamilya: Usa ka Pamahayag ngadto sa Kalibutan”
Ang pag-abut sa pamahayag sa pamilya
Siguroha nga ang matag estudyante adunay access sa kopya sa “Ang Pamilya: Usa ka Pamahayag ngadto sa Kalibutan” (lds.org/topics/family-proclamation). (Mahimo kang mohatag og giprinta nga kopya alang sa mga estudyante nga nagkinahanglan niini.) Awhaga ang mga estudyante sa pagdala og giprinta o digital copy sa pamahayag sa pamilya ngadto sa matag sesyon sa klase sa tibuok kurso. Ipasabut nga ang “Ang Pamilya: Usa ka Pamahayag ngadto sa Kalibutan,” unang gipresentar ngadto sa Simbahan ni Presidente Gordon B. Hinckley (1910–2008) niadtong Septyembre 23, 1995, sa kinatibuk-ang miting sa Relief Society.
Unsa ang gisulti sa ulohan ngari nato bahin sa gitumong nga audience niini nga pamahayag?
Ngano kaha nga kini nga pamahayag giisyu ngadto sa tibuok kalibutan kay sa mga miyembro sa Simbahan lamang? (Human sa tubag sa mga estudyante, isulat ang mosunod nga kamatuoran diha sa pisara: Ang Dios nagtawag og mga propeta nga modeklara sa Iyang mga kamatuoran alang sa Iyang mga anak.)
Ipasabut nga sukad maorganisar ang Simbahan, ang mga lider sa Simbahan miisyu lamang og lima ka mga pamahayag. Ang usa giisyu sa Unang Kapangulohan, ang usa sa Korum sa Napulog Duha ka mga Apostoles, ug ang uban sa Unang Kapangulohan ug sa Napulog Duha ka mga Apostoles. Ang mga pamahayag mao ang gigahin nga pahayag nga importante kaayo. (Kon ang mga estudyante mangutana bahin niining lima ka mga pamahayag, i-refer sila ngadto sa Encyclopedia of Mormonism, 5 vols. [1992], “Proclamations of the First Presidency and the Quorum of the Twelve Apostles,” 3:1151, eom.byu.edu.)
Sultihi ang mga estudyante nga sa dili pa mobasa sa pamahayag sa pamilya, mipadayag si Presidente Hinckley og pipila ka rason ngano nga ang mga lider sa Simbahan mibati nga nadasig sa pagmantala niining importante nga dokumento. I-display ang mosunod nga pamahayag ni Presidente Hinckley ug dapita ang usa ka estudyante sa pagbasa niini:
Imahe
President Gordon B. Hinckley
“Dili na kinahanglan nga mopahinumdom pa ako kaninyo nga ang kalibutan nga atong gipuy-an mao ang usa ka kalibutan sa kaguliyang, sa mausabon nga mga hiyas. Hait nga mga tingog nanawag alang sa usa ka butang o sa lain aron sa paglimbong sa nasulayan na sa panahon nga mga sumbanan sa pamatasan. Ang moral nga mga sumbanan sa atong katilingban ngil-ad na kaayo” (“Stand Strong against the Wiles of the World,” Ensign, Nob. 1995, 99).
Unsa kaha ang gipasabut ni Presidente Hinckley sa dihang miingon siya nga “Ang moral nga mga sumbanan sa atong katilingban ngil-ad na kaayo”? (Mahimo nimong ipasabut nga ang moral nga mga sumbanan mao ang mga kadena o mga pisi nga naggunit sa mga butang.)
Unsaon ninyo sa paghulagway unsay nahitabo sa “moral nga mga sumbanan” sa katilingban sukad niadtong 1995, sa dihang si Presidente Hinckley namulong bahin sa seryoso nga pagkunhod sa moral?
Ipakita ang mosunod nga paragraph gikan sa pakigpulong ni Presidente Hinckley. Hatagi ang mga estudyante og higayon sa pagbasa niini ug pagtimaan sa mga pulong nga dugang mipasabut sa mga problema nga nakita sa mga lider sa Simbahan sa kalibutan ug sa mga rason nga ilang giisyu kini nga pamahayag.
Imahe
President Gordon B. Hinckley
“Uban sa daghang hiwi nga pangatarungan nga gipakatap nga isip tinuod, uban sa daghang panglingla kabahin sa mga sumbanan ug mga hiyas, uban sa daghang pangdani ug tintasyon nga anam-anam nga nagmantsa sa kalibutan, among gibati nga mopasidaan ug mopahimangno. Sa pagpadayon niini, kami sa Unang Kapangulohan ug ang Konseho sa Napulog Duha ka mga Apostoles karon mopagawas niini nga pamahayag ngadto sa Simbahan ug sa kalibutan isip usa ka pamahayag ug pagpalanog pag-usab sa mga sumbanan, mga doktrina, ug mga buhat nga may kalabutan sa pamilya diin ang mga propeta, mga manalagna, ug mga tigpadayag niini nga simbahan mibalik-balik sa pagpahayag niini sa tibuok kasaysayan” (“Stand Strong against the Wiles of the World,” 100).
Samtang ang mga estudyante mopakigbahin sa unsay ilang nakit-an, isulat ang ilang mga tubag sa pisara. Ingon ani tan-awon ang pisara:
Unsa ang nakita sa mga lider sa Simbahan nga problema sa kalibutan?
Hiwi nga pangatarungan nga gipakatap nga isip tinuod
Panikas mahitungod sa mga sumbanan ug mga mithi
Ang pagkamadanihon ug pagkamabihagon nga mahisama sa kalibutan
Unsa ang pipila ka mga rason nga giisyu sa mga lider sa Simbahan niini nga pamahayag?
Sa pagpasidaan ug pagpahimangno
Sa pagdeklarar ug pagsubli sa mga sumbanan, mga doktrina, ug mga praktises nga gitudlo sa mga lider karon ug sa unang panahon
Unsa ang “hiwi nga pangatarungan”? (Ang hiwi nga pangatarungan mao ang bakak nga rason nga gipresentar nga kamatuoran.) Nakakita ba kamo og bakak nga mga ideya nga gitudlo nga kamatuoran kalabut sa pamilya? (Mahimo kamong mo-refer sa D&P 89:4 isip usa ka ehemplo sa hiwi nga pangatarungan.)
Unsay atong makat-unan bahin sa mga responsibilidad sa mga propeta ug mga apostoles sa ulahing adlaw gikan sa pamahayag ni Presidente Hinckley? (Ang mga tubag sa estudyante kinahanglang maglakip sa mosunod nga kamatuoran: Ang mga propeta adunay sagrado nga mga responsibilidad sa pagdeklarar sa mga sumbanan, mga doktrina, ug mga praktises sa Ginoo kalabut sa pamilya.”)
Pagtudlo og mga estudyante nga mogahin og pipila ka minuto sa pagbasa sa pamahayag sa pamilya ug sa pag-ila sa pipila ka tubag nga gihatag niini ngadto sa moderno nga mga pangutana bahin sa pamilya. Human sa igong panahon, hangyoa ang mga estudyante sa pagpakigbahin unsay ilang nakit-an. Tungod kay ang ubang mga leksyon detalyeng naghisgot sa pamahayag, ayaw paggahin og daghang panahon niini nga kalihokan.
Ipamatuod ang mosunod nga mga kamatuoran: Ang pamahayag sa pamilya puno sa dinasig nga mga tubag sa mga problema sa katilingban. Ang pamahayag mao ang lig-on nga tinubdan sa mga indibidwal ug mga pamilya sa usa ka kalibutan nga mausabon ang mga mithi.
Ipasabut nga human basaha ni Presidente Hinckley ang pamahayag sa pamilya, mideklarar siya:
Imahe
President Gordon B. Hinckley
“Moawhag kami sa tanan sa mainampingon, mahunahunaon, ug mainampoon nga pagbasa niini nga pamahayag. Ang kalig-on sa bisan unsa nga nasud anaa sa sulod sa mga panimalay. Among giawhag ang atong mga katawhan bisan asa sa paglig-on sa ilang mga pamilya sa pagsunod sa dugay nang gitahud nga mga mithi” (“Stand Strong against the Wiles of the World,” Ensign, Nob. 1995, 101).
Unsa ang kahulugan niini nganha kaninyo sa pagbasa sa mainampoong paagi sa pamahayag sa pamilya?
Sa unsa nga mga paagi nga ang mga baruganan nga nakita diha sa pamahayag sa pamilya nakaimpluwensya sa inyong mga pagbati bahin sa kaminyoon ug sa pamilya?
Tabangi ang mga estudyante sa pagkonsiderar ug pagpakigbahin kon sa unsa nga paagi ilang magamit ang awhag ni Presidente Hinckley sa pagkat-on ug sa paggamit sa mga doktrina ug mga baruganan nga nakita sa pamahayag sa pamilya (pananglitan, pagmemorya sa mga bahin sa pamahayag). Isulat ang mga tubag sa mga estudyante diha sa pisara, ug dapita sila sa pagkonsiderar sa mainampoong paagi unsaon nila sa pagpalig-on sa ilang mga kaugalingon ug sa ilang mga pamilya pinaagi sa paggamit “niining mga mithi nga dugay na kaayo.”