Leksyon 10: Ang Balaang mga Tahas ug mga Responsibilidad sa Kababayen-an
10
Ang Balaang mga Tahas ug mga Responsibilidad sa Kababayen-an
Pasiuna
Isip usa ka importanting bahin sa Iyang plano sa kalipay, ang Langitnong Amahan mihatag sa kababayen-an sa balaan nga tahas nga mahimong mga asawa ug mga inahan. “Ang Pamilya: Usa ka Pamahayag ngadto sa Kalibutan” nagtudlo nga ang “ Ang unang mga kapangakohan sa mga inahan mao ang pag-atiman sa ilang mga anak” ug ang mga amahan ug mga inahan adunay katungdanan sa “pagtabang sa usag usa ingon nga magkauban” ( Liahona, Nob. 2010, 129).
Background nga Basahunon
Dieter F. Uchtdorf, “Ang Impluwensya sa Matarung nga Babaye,” Liahona, Sept. 2009, 3–7.
“Sabta ang Balaan nga mga Tahas sa nga Babaye,” Liahona, Peb. 2009, 28.
“Ang Kababayen-an sa Simbahan,” kapitulo 20 sa Mga Pagtulun-an sa mga Presidente sa Simbahan: Spencer W. Kimball (2006), 268–81.
Ang dakong impluwensya sa matarung nga kababayen-an nga Santos sa Ulahing mga Adlaw
I-display ang mosunod nga pamahayag ni Presidente Spencer W. Kimball (1895–1985) ug dapita ang usa ka estudyante sa pagbasa niini og kusog:
Imahe
President Spencer W. Kimball
“Ang dakong pagtubo nga moabut sa Simbahan sa katapusang mga adlaw moabut tungod kay daghang buotang mga babaye sa kalibutan … mapaduol sa Simbahan sa tumang kadaghan. Kini mahitabo sa kahimtang nga ang mga babaye sa Simbahan mopakita sa pagkamatarung ug sa ilang pagkamaayo og abilidad sa pagpahayag sa ilang mga kaugalingon ug … makita nga talagsaon ug lahi—sa malipayong paagi—gikan sa mga babaye sa kalibutan” (Mga Pagtulun-an sa mga Presidente sa Simbahan: Spencer W. Kimball [2006], 279).
Ngano sa inyong hunahuna nga ang matarung nga kababayen-an nga Santos sa Ulahing mga Adlaw mao ang rason sa dakong pagtubo sa Simbahan?
Sa pagpalapad niini nga ideya, hangyoa ang mga estudyante sa pagsiksik sa Doktrina ug mga Pakigsaad 25:1–3, 10, 13–16, mangita sa mga pulong nga nagpakita sa unsa nga paagi nga ang kababayen-an nga Santos sa Ulahing mga Adlaw malipayon nga “talagsaon ug lahi” gikan sa kababayen-an sa kalibutan. Tabangi ang mga estudyante nga makasabut sa konteksto niini nga pagpadayag pinaagi sa pagpasabut nga personal kini nga pagpadayag alang ni Emma Smith, apan alang kini sa tanang kababayen-an sa Simbahan.
Unsa man ang atong makat-unan gikan niini nga mga bersikulo mahitungod sa kinaiya nga kinahanglang batunan sa matarung nga kababayen-an?
Unsaon ninyo sa pagpahayag ang usa ka doktrina o baruganan nga gitudlo sa Doktrina ug mga Pakigsaad 25? (Samtang motubag ang mga estudyante, itudlo kini nga baruganan: Isip mga tinun-an sa Ginoo, ang kababayen-an makagamit sa ilang balaang mga gasa ug mga talento aron pagtabang sa pagtukod sa gingharian sa Dios.)
Ipakigbahin ang mosunod nga mga pamahayag ni Presidente Spencer W. Kimball ug ni Elder M. Russell Ballard sa Korum sa Napulog Duha ka mga Apostoles:
Imahe
President Spencer W. Kimball
“Ang mahimong matarung nga babaye usa ka mahimayaong butang sa bisan unsang panahon. Ang mahimong matarung nga babaye sa panahon sa katapusang dispensasyon niini nga yuta, sa dili pa ang ikaduhang pag-anhi sa Manluluwas, usa ka talagsaong balaanong nga tawag. Ang kalig-on ug impluwensya sa matarung nga babaye karon mahimong kapulo pil-on sa unsa kini sa mas malinawong mga panahon.” (Mga Pagtulun-an sa mga Presidente sa Simbahan: Spencer W. Kimball,272).
Imahe
Elder M. Russell Ballard
“Mga sister, ang inyong luna sa pag-impluwensya usa ka lahi nga luna—luna nga dili masundog sa mga lalaki. Walay makahimo sa pagpanalipod sa atong Manluluwas sa mas labaw nga pag-aghat o gahum kay kaninyo—anak nga mga babaye sa Dios kamo nga adunay kalig-on sa kahiladman ug pagsalig. Ang impluwensya sa tingog sa usa ka nakabig nga babaye dili masukod, ug ang Simbahan mas nagkinahanglan sa inyong mga tingog karon kay sa kaniadto” (M. Russell Ballard, “Mga Lalaki ug mga Babaye ug ang Gahum sa Priesthood,” Liahona, Sept. 2014, 33).
Pangutan-a ang kababayen-an sa inyong klase unsa ang ilang mga hunahuna ug mga pagbati samtang ilang ikonsiderar ang ilang impluwensya sa ilang panimalay, sa Simbahan, ug sa ilang mga komunidad. Hatagi og gibug-aton ang importante nga mga tahas sa mga babaye isip mga lider sa Simbahan.
Mahimo nimong pangutan-on ang mga lalaki sa klase sa pagpakigbahin sa unsa nga paagi ilang nakita ang kalig-on ug impluwensya sa kababayen-an sa ilang ward o branch nga nakapaduol sa mga indibidwal ngadto sa Langitnong Amahan.
Ang balaang pagkatudlo nga tahas sa mga babaye isip mga inahan sa Zion
Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles:
Imahe
Elder M. Russell Ballard
“Ang mga lalaki ug babaye adunay lain-laing mga gasa, lain-laing mga kalig-on, ug lain-laing mga punto sa panan-aw ug mga kagustuhan. Kana mao ang usa sa mga sukaranang rason nganong nagkinahanglan ta sa usag usa. Nagkinahanglan og lalaki ug babaye sa pagmugna og pamilya, ug nagkinahanglan og mga lalaki ug babaye sa paghimo sa buhat sa Ginoo” (“Mga Lalaki ug mga babaye ug ang Gahum sa Priesthood,” 36).
Kay sa klaro nga pisikal nga mga kalainan, unsa ang pipila ka mga paagi nga inyong naobserbahan nga ang mga lalaki ug mga babaye sa kinatibuk-an lahi gikan sa usag usa?
Ipasabut nga gawas niining kinatibuk-ang mga kalainan, ang mga lalaki ug mga babaye adunay gitudlo nga balaanong mga tahas, sumala sa gihulagway sa “Ang Pamilya: Usa ka Pamahayag ngadto sa Kalibutan” (tan-awa sa ikapito nga paragraph). Basaha ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles:
Imahe
Elder Russell M. Nelson
“Ug kamong mga sister gipili na sa wala pa ang katukuran sa kalibutan sa pagpanamkon ug pag-atiman sa mga anak sa Dios; sa pagbuhat sa ingon, inyong gihimaya ang Dios (tan-awa sa D&P 132:63)” (“Unsay Inyong Pilion?” Liahona, Ene. 2015, 19).
Sa unsa nga paagi nga ang kababayen-an makahimaya sa Dios samtang sila manganak ug mag-amuma sa mga anak sa Dios? (Samtang ang mga estudyante mopakigbahin sa ilang mga hunahuna, tabangi sila nga makasabut niini nga baruganan: Samtang ang kababayen-an modawat sa ilang balaang gitudlo nga tahas isip mga inahan sa pagpanganak ug pag-atiman sa mga anak sa Dios, ilang gihimaya Siya ug nahimong mas sama sa atong Balaang mga Ginikanan. Ipasabut nga ang pagdala og mga anak nganhi sa kalibutan usa ka importante nga bahin sa plano sa Langitnong Amahan sa kaluwasan.)
Basaha ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles:
Imahe
Elder Neil L. Andersen
“Daghang tingog sa kalibutan karon ang mibaliwala sa importansya sa pagbaton og anak o nagsugyot sa paglangay o paglimit sa mga anak sa pamilya. Ang akong mga anak nga babaye bag-o lang nga mi-refer kanako sa usa ka blog nga sinulat sa usa ka Kristiyanong inahan (dili sa atong tinuohan) nga may lima ka anak. Mikomentaryo siya: ‘[Ang magdako] niini nga kultura, lisud kaayo ang pagkuha og biblikal nga panglantaw sa pagkainahan. … Ang mga bata dili makaabut og college. Siguradong dili makasuroy sa mga dapit sa kalibutan. Walay kahigayunan sa paggawas inig kagabii aron maglingaw-lingaw. … Dili makatrabaho sa gipangandoy ninyong trabaho.’ Siya dayon midugang: ‘Ang pagkainahan dili usa ka kalingawan, usa kini ka tawag’” (“Mga Bata,” Liahona, Nob. 2011, 28).
Unsa ang gipasabut sa “ipagamay” ang kaimportante nga magbaton og mga anak?
Unsa nga mga nakapugos nga inyong nakita sa kababayen-an sa “pagpagamay” sa kaimportante nga magbaton og anak?
Unsa ang mahimo sa mga young adult sa Simbahan nga magbaton og tukma nga panglantaw sa kaimportante sa pagpanganak?
Ipaniguro sa mga estudyante nga ang mga desisyon bahin kanus-a manganak ug pila ang mga anak pribado nga butang tali sa bana ug asawa ug sa Dios. Ang umaabut nga leksyon maghisgot niini nga mga butang sa mas detalye.
Dapita ang mga estudyante sa pagbasa ug pagtandi sa 2 Timoteo 1:5; 3:14–15 ug Alma 56:47–48; 57:21, mangita sa matarung nga impluwensya nga ikahatag sa mga inahan sa ilang mga anak. (Ang pagkat-on sa pagtandi sa mga scripture passage mao ang kahanas sa pagtuon sa kasulatan nga magamit sa mga estudyante sa ilang tibuok kinabuhi.)
Unsa ang gitudlo niini nga mga tudling bahin sa tahas sa usa ka inahan? (Hatagi og gibug-aton ang mosunod nga baruganan: Kon ang mga inahan motudlo sa ebanghelyo ngadto sa ilang mga anak, gitabangan nila ang ilang mga anak nga makaangkon og hugot nga pagtuo ug giandam sila nga magpuyo nga matarung.)
Sa unsa nga paagi nga kini nga mga tudling makatabang nga mapasabut ngano nga si Satanas naningkammot pag-ayo sa pagpaubos sa tahas sa mga inahan?
Unsa nga kinaiya sa mga babaye nga makatabang nila nga molampus sa ilang tahas isip mga inahan?
Pagsensitibo sa kamatuoran nga ang pipila ka batan-ong mga babaye sa inyong klase tingali dili gayud makaminyo, ug kon sila minyo, dili tingali sila makahimo sa pagpanganak. Gamita ang mosunod nga istorya ni Sister Sheri L. Dew, usa ka kanhi magtatambag sa kinatibuk-ang kapangulohan sa Relief Society, aron matabangan ang imong mga estudyante nga makasabut nga ang tahas sa inahan mao ang balaan nga kabilin sa tanang mga babaye:
Imahe
Sheri L. Dew
“Sama sa takus nga mga lalaki nga gi-orden nang daan nga maghupot sa priesthood dinhi sa pagkamortal, ang matarung nga mga babaye gitugahan sa wala pa kini nga kinabuhi sa pribilehiyo sa pagkainahan. Ang pagkainahan labaw pa sa pagpanganak, bisan og mao gayud kana. Mao kini ang lintunganay kon kinsa kita isip mga babaye. Naghulagway kini sa atong pagka-indibidwal, sa atong balaang pagkatawo ug kinaiya ug talagsaong mga hiyas nga gihatag sa atong Amahan kanato. …
“… Ang pipila ka mga babaye kinahanglang maghulat nga makabaton og mga anak. … Apan ang panahon sa Ginoo alang sa matag usa kanato dili makapaubos sa atong kinaiyahan. Busa, pipila kanato, kinahanglan lang nga mangitag laing paagi nga mainahan. Ug anaa sa tibuok natong palibut mao kadtong nagkinahanglan nga higugmaon ug magiyahan” (“Are We Not All Mothers?” Ensign, Nob. 2001, 96–97).
Sa unsa nga paagi nga ang pamahayag ni Sister Dew makapalapad sa inyong pagsabut bahin sa pagkainahan?
Hangyoa ang mga estudyante kon duna ba nila ang gusto nga mopakigbahin sa ilang mga hunahuna ug mga pagbati bahin sa matarung nga impluwensya sa ilang kaugalingon inahan.
I-display ang mosunod nga pamahayag ni Sister Julie B. Beck, kanhi kinatibuk-ang presidente sa Relief Society, kinsa namulong ngadto sa mga babaye bahin sa ilang panginahanglan sa pagtuman sa mga tahas nga gihatag sa Dios kanila. Hangyoa ang usa ka estudyante sa pagbasa og kusog niini, ug dapita ang mga estudyante sa pagkonsiderar unsay mahitabo kon ang mga babaye mapakyas sa pagtuman sa ilang mga tahas.
“Kon kita dili mohimo sa atong bahin, walay laing tawo nga mohimo niini alang kanato. … Kita dili makatugyan [sa atong bahin sa plano sa Langitnong Amahan sa kalipay]. Kita dili makapasa niini ngadto ni bisan kinsa. Atoa kini. Kita mahimong mobalibad niini, kita mahimong molimud niini, apan ato gihapon kining bahin, ug manubag kita alang niini. Moabut ang adlaw nga kitang tanan makahinumdom unsay atong nahibaloan sa wala pa kita matawo. Kita makahinumdom nga kita nakig-away diha sa usa ka dakong panagsumpaki alang niini nga pribilihiyo. Unsaon man nato sa pagtubag niini nga responsibilidad? Sa inadlaw-adlaw atong ibutang ang atong mga kusog ngadto sa buhat nga talagsaon nga atong pagabuhaton” (“Sabta ang Balaang mga Tahas sa mga Babaye,” Liahona, Peb. 2009, 25).
Unsa ang inyong mga hunahuna ug mga pagbati bahin sa mga pulong “Kon kita dili mohimo sa atong bahin, walay laing tawo nga mohimo niini alang kanato”?
Unsa ang mawala gikan sa pamilya, gikan sa inyong ward o branch, o gikan sa kalibutan kon ang mga babaye dili na mohimo sa ilang “bahin”?
Unsa ang pipila ka mga paagi nga ang mga young adult nga mga babaye makatuman sa ilang balaang mga tahas isip mga babaye sa gingharian sa Langitnong Amahan?
Ipamatuod ang sagrado ug importante nga mga tahas sa kababayen-an nga mahimong matarung nga mga asawa ug mga inahan, ug hatagi og gibug-aton nga ang atong Amahan sa Langit sa umaabut mohatag sa tanang mga panalangin ngadto sa Iyang matarung nga mga anak. Dapita ang mga estudyante sa pagkonsiderar sa pagsulti sa usa ka inahan nga ilang nailhan nga midayeg kaayo sila niya sa iyang paagi sa pagtuman sa iyang balaang tahas.
Tapusa pinaagi sa pagpangutana sa mga estudyante kon aduna bay gusto nila nga mopakigbahin sa ilang mga pagpamatuod sa mga panalangin nga moabut kon ang kababayen-an nakahibalo kinsa sila sa plano sa Langitnong Amahan sa kaluwasan ug molihok subay niana nga kahibalo.