Leksyon 20: Pag-amping sa Hugot nga Pagtuo ug Pagpamatuod
20
Pag-amping sa Hugot nga Pagtuo ug Pagpamatuod
Pasiuna
Ang mga pamilya ug mga indibidwal adunay sagrado nga katungdanan sa pagpalambo og hugot nga pagtuo kang Jesukristo ug sa pagpadayon paglig-on sa pagpamatuod. Ang Manluluwas mipasidaan nga sa katapusang mga adlaw, bisan “ang pinili” malingla (Joseph Smith—Mateo 1:22). Kini nga leksyon nagtutok sa pagpalig-on sa pagpamatuod aron maampingan batok sa mga gahum sa kaaway, nga nagtinguha sa paglaglag sa hugot nga pagtuo.
Background nga Basahunon
Dieter F. Uchtdorf, “Dali, Pakig-uban Kanamo,” Liahona, Nob. 2013, 21–24.
Jeffrey R. Holland, “Ginoo, Nagatuo Ako,” Liahona, Mayo 2013, 93–95.
Ang lig-on nga mga pagpamatuod naghatag og panalipod gikan sa kaaway
Ipasabut nga si Elder Joseph B. Wirthlin (1917–2008) sa Korum sa Napulog Duha ka mga Apsotoles sa makausa namulong bahin sa daghang mga lobo nga nagsuroy-suroy sa kaumahan sa Ukraine daghang mga tuig na ang milabay. Ang bugtong butang nga makapahadlok nila mao ang kalayo. Kon magbiyahe layo sa mga siyudad, ang mga tawo maghimo og dako nga mga bonfire ug pasigaon sa tibuok gabii aron moabug sa mga lobo.
Dapita ang usa ka estudyante sa pagbasa sa mosunod nga pamahayag:
Imahe
Elder Joseph B. Wirthlin
“Ang mga biyahidor nakasabut nga ang paghimo ug pagpadayon niini nga dako nga bonfire dili lang alang sa kahayahay o kahupayan; alang kini sa kaluwasan. …
“Dili kinahanglan nga panalipdan nato ang atong kaugalingon gikan sa daghang mga lobo sa atong pagbiyahe sa dalan sa kinabuhi karon, apan, sa espirituhanong pagsabut, nag-atubang kita og malinglahon nga mga lobo ni Satanas sa dagway sa tintasyon, dautan, ug sala. Nagpuyo kita sa makuyaw nga mga panahon nga kining manunukob nga lobo nagsuroy-suroy sa espirituhanong kaumahan sa pagpangita niadtong huyang sa pagtuo o luya sa ilang kombiksyon. … Kitang tanan bantang sa pang-ataki. Hinoon, makapalig-on kita sa atong kaugalingon uban sa panalipod nga gihatag sa mainit nga pagpamatuod nga, sama sa bonfire, giayo paghimo ug gibantayan nga magpadayon sa pagsiga” (“Spiritual Bonfires of Testimony,” Ensign, Nob. 1992, 34).
Ngano nga ang pagpadayon og lig-ong pagpamatuod “usa ka butang sa kaluwasan” sa kalibutan karon? (Human sa pipila ka panaghisgot, isulat ang mosunod sa pisara: Kon lig-unon nato ang atong mga pagpamatuod, dili na kaayo kita bantang sa mga pang-ataki sa atong pagtuo.)
Sa unsa nga paagi nga ang pagbaton og lig-on nga pagpamatuod makatabang ninyo sa paglig-on sa mga sakop sa pamilya ug sa uban batok sa mga pang-ataki sa ilang pagtuo?
I-display o isulat sa pisara ang mosunod nga tsart. Ayaw ilakip ang gipabaga nga mga baruganan sa sulod sa parenthesis; kini nga mga barugan gihatag alang sa kaayohan sa magtutudlo. Hangyoa ang mga estudyante sa pagbasa sa mga bersikulo sa usa sa mga kolum, mangita sa mga baruganan nga makatabang sa pagpanalipod batok sa mga gahum nga makapahuyang sa pagtuo. Dapita ang mga estudyante sa pag-summarize unsay ilang nabasa sa klaro nga pamahayag sa doktrina o baruganan ug dayon mopakigbahin sa ilang mga pamahayag.
(Kon mopadayon kita uban sa pagkamakanunayon sa pagtuo kang Jesukristo, makapadayon kita sa higpit ug pig-ot nga dalan nga padulong sa kinabuhing dayon.)
(Kon sundon nato ang mga apostoles sa Ginoo, mga propeta, ug ubang mga lider sa Simbahan, mapanalipdan kita gikan sa mga pagpanglimbong.)
(Pinaagi sa Espiritu Santo, ang Ginoo makapadala og kalinaw ug direksyon kon atakihon ang atong pagtuo.)
(Ang pagpuasa, pag-ampo, ug pagtuon sa kasulatan makapalig-on sa hugot nga pagtuo ug pagpamatuod ug makahimo nato nga makabarug sa mga hagit.)
Sa unsa nga paagi nga kini nga mga baruganan nakapalig-on kaninyo o sa usa ka tawo nga inyong nailhan batok sa mga pang-ataki sa pagtuo?
Unsaon ninyo paggamit kini nga impormasyon sa paglig-on sa usa ka tawo nga inyong nailhan nga nakigbisog sa iyang pagtuo?
Pahinumdumi ang mga estudyante sa mosunod: “Ang pagtuo usa ka gasa sa Dios nga gihatag isip ganti sa personal nga pagkamatarung. Kini kanunay nga gihatag kon ang pagkamatarung anaa, ug kon mas dako ang sukod sa pagkamasulundon sa mga balaod sa Dios, mas dako ang paghatag sa pagtuo” (Bruce R. McConkie, Mormon Doctrine, 2nd ed. [1966], 264). Ipamatuod nga ang pagbaton og pagtuo kang Jesukristo, pagsunod sa mga propeta, ang pagtinguha sa Espiritu, ug pagtuon sa mga kasulatan, maampingan ug malig-on ang mga pagpamatuod. Kon mapayas kita sa pagbuhat niining mga butanga, ang pagtuo mahimong mahuyang ug mawala ang mga pagpamatuod.
Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles sa paghulagway niini nga punto:
Imahe
Elder M. Russell Ballard
“Usa sa akong buotan nga mga misyonaryo kinsa miserbisyo dungan kanako sa dihang ako presidente sa misyon sa Toronto [Canada] nakigkita kanako pipila ka tuig ang milabay. Gipangutana ko siya, ‘Elder, sa unsa nga paagi ako makatabang kanimo?’
“‘President,’ miingon siya, ‘ako nagtuo nga nagkawala ang akong pagpamatuod.’
“Dili ako makatuo niini. Gipangutana ko siya kon sa unsang paagi kini naingon niana.
“‘Sa unang higayon ako nakabasa og pipila ka supak sa Mormon nga basahon,’ miingon siya. ‘Diha akoy pipila ka mga pangutana, ug walay motubag niini alang kanako. Naglibug ko, ug sa akong hunahuna nagkawala ang akong pagpamatuod.’
“Gipangutana ko siya unsay iyang mga pangutana, ug misulti siya kanako. Kini mao ang kasagarang mga isyu nga supak sa Simbahan, apan gusto ko og gamay nga panahon sa pagpangita og mga basahon aron makahatag ko og makahuluganong mga tubag. Busa nagtakda kami nga magkita human sa 10 ka adlaw, diin niana nga panahon gisultihan ko siya nga akong tubagon ang kada usa sa iyang mga pangutana. Sa dihang mobiya na siya, gipahunong ko siya.
“‘Elder, daghan ka og gipangutana kanako dinhi karon,’ miingon ko. ‘Karon aduna koy usa ka pangutana kanimo.’
“‘Oo, President?’
“‘Unsa na kadugay sukad mibasa ka sa Basahon ni Mormon?’ Nangutana ko.
“Miduko siya. Mitan-aw siya sa salog sa makadiyot. Dayon mitan-aw siya kanako. ‘Dugay na kaayong panahon, President,’ mikumpisal siya.
“‘Sige,’ ako miingon. ‘Mihatag ka kanako sa akong assignment. Patas lang nga akong ihatag ang imo. Gusto ko nga ikaw mosaad nga imong basahon ang Basahon ni Mormon sa dili mominos og usa ka oras kada adlaw gikan karon ug sa atong sunod nga gitakda nga panagkita.’ Miuyon siya nga iya kanang buhaton.
“Human sa napulo ka adlaw mibalik siya sa akong opisina, ug ako andam na. Gikuha ko ang mga papel aron sa pagsugod og tubag sa iyang mga pangutana, apan gihunong ako niya.
“‘President,’ miingon siya, ‘kana dili na kinahanglan.’ ‘Nasayud ko nga ang Basahon ni Mormon tinuod. Nasayud ko nga si Propeta Joseph Smith usa ka propeta sa Dios.’
“‘Aw, kana maayo kaayo,’ miingon ko. ‘Apan ikaw makakuha sa mga tubag sa imong pangutana sa gihapon. Giayo ko kini og buhat, busa lingkod lang diha ug paminaw.’
“Ug busa gitubag ko ang iyang tanang mga pangutana ug dayon nangutana, ‘Elder, unsay imong nakat-unan gikan niini?’
“Ug miingon siya, ‘Hatagi ang Ginoo og patas nga panahon.’
“Hinaut nga matisok kana sa atong mga hunahuna ug dad-on uban nato samtang maglakaw kita subay niining proseso sa pagkamortal. Atong hatagan ang Ginoo og patas nga panahon” (When Shall These Things Be?” Ensign, Dis. 1996, 60).
Unsay inyong nakat-unan sa kasinatian nga gipakigbahin ni Elder Ballard?
Sa unsa nga paagi nga ang paghatag sa Ginoo og “patas nga panahon” sa inyong personal ug pamilya nga kinabuhi makapalig-on kaninyo ug sa inyong pamilya batok ni Satanas?
Sa unsa nga paagi nga ang paghimo niini nga mga baruganan karon makaandam ninyo nga mahimong mas maayo nga kapikas ug ginikanan?
Tapusa kining porsyon sa leksyon pinaagi sa paghangyo sa usa ka estudyante sa pagbasa sa mosunod nga pamahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Kon padayon kitang mag-ampo sa buntag ug gabii, magtuon sa kasulatan matag adlaw, mag-family home evening matag semana, ug motambong sa templo pirme, aktibo kitang mitubag ni [Jesukristo] sa Iyang pagdapit nga “moduol ngadto Kaniya.” Kon mas mapalambo nato kining mga butanga, mas gusto ni Satanas nga sakiton kita apan mas minus ang iyang abilidad sa pagbuhat niini. Pinaagi sa paggamit niining mga himan, atong gigamit ang atong kabubut-on sa pagdawat sa tibuok nga mga gasa sa Iyang maulaong sakripisyo.
“… Ako mopamatuod nga samtang kita aktibong moduol ngadto Kaniya, makalahutay kita sa matag tintasyon, matag kasakit, matag hagit nga atong giatubang” (“Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 94).
Pangutan-a ang mga estudyante kon aduna ba nila ang mopakigbahin og kasinatian nga dili kaayo personal diin ilang nabuntog ang mga hagit sa iyang pagtuo.
Hangyoa ang mga estudyante sa pagpataas sa ilang mga kamot kon nakaila ba sila og usa ka tawo nga nakigbisog nga magpadayon ang iyang pagpamatuod.
Hangyoa ang mga estudyante ug ipatandi ang Lucas 22:31–32; 3 Nephi 18:32; ug Doktrina ug mga Pakigsaad 108:7–8 aron mahibaloan ang katungdanan nato isip matinud-anon nga mga miyembro sa Simbahan, ilabi na ngadto sa mga sakop sa pamilya. Human sa igong panahon, dapita ang mga estudyante sa pagpakigbahin sa unsay ilang nakat-unan. Kinahanglang masabtan sa mga estudyante ang mosunod nga mga baruganan: Kon kita nakabig ngadto sa ebanghelyo ni Jesukristo, kita adunay katungdanan sa paglig-on sa pagtuo sa uban.
Ipakigbahin ang mosunod nga pamahayag ni Presidente Thomas S. Monson:
Imahe
President Thomas S. Monson
“Ako nakakaplag og duha ka mahinungdanong rason nga makaapekto gayud sa pagkaaktibo og balik ug sa mga kausaban sa kinaiya, mga batasan ug mga lihok. Una, ang mga indibidwal maaktibo og balik tungod kay may usa ka tawo nga nagpakita kanila sa ilang mahangturong mga posibilidad ug nagtabang nila sa pagdesisyon sa pagkab-ut niini. Ang dili kaayo aktibo nga miyembro sa kadugayan dili makontento sa ordinaryong binuhatan kon ilang makita nga ang kalampusan hapit na nilang makab-ut.
“Ikaduha, ang uban mobalik tungod kay may mga minahal o ‘mga katagilungsod sa mga balaan’ [Mga Taga-Efeso 2:19] misunod sa tambag sa Manluluwas, naghigugma sa ilang mga silingan sama sa ilang kaugalingon, ug nagtabang sa uban aron matuman ang ilang mga damgo ug makab-ut ang ilang mga ambisyon.
“Ang pinakaimportante niini nga proseso sa una pa—ug magpadayon pa—mao ang baruganan sa gugma” (“Ang Atong Responsibilidad sa Pagluwas,” Liahona, Okt. 2013, 5).
Ngano kaha nga ang gugma mao ang pinakaimportante sa pagpalig-on sa pagtuo sa uban?
Unsay nahimo ninyo o sa usa ka tawo nga inyong nailhan sa pagtabang sa pagpalig-on sa pagtuo sa usa ka tawo nga nakigbisog sa espirituhanon?
Unsa nga mga lakang ang inyong mahimo aron mas mahimong epektibo sa pagpalig-on sa pagtuo sa uban?
Tapusa pinaagi sa paghatag sa imong pagpamatuod nga ang mga estudyante makatabang sa pagpahiuli ug pagpalig-on sa pagtuo sa ilang mga higala ug pamilya kon magpakita sila og gugma ug mosunod sa mga baruganan nga gihisgutan niini nga leksyon.