Ang mga Kahimtang sa Pagka-mortal

Pasiuna

Didto sa kinabuhi sa wala pa dinhi sa yuta kita “midawat sa plano [sa Langitnong Amahan] nga naghatag og higayon sa Iyang mga anak nga makaangkon og pisikal nga lawas ug makaangkon og yutan-on nga kasinatian sa paglambo ngadto sa kahingpitan” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Ang atong mortal nga mga lawas dako nga panalangin; bisan pa man, kini ubos sa daghan nga mga tintasyon ni Satanas. Pinaagi sa Pag-ula ni Jesukristo, mabuntog nato kini nga mga tintasyon ug makabalik ngadto sa atong Langitnong Amahan.

Background nga Basahunon

David A. Bednar, “Mga Butang ingon nga Sila Gayud Mao,” Liahona, Hunyo 2010, 22–31.
David A. Bednar, “Ang Pag-ula ug ang Panaw sa Pagka-mortal,” Liahona, Apr. 2012, 12–19.

Mga Sugyot alang sa Pagtudlo

2 Nephi 2:27–29; Abraham 3:25

Ang atong mortal nga kasinatian importante alang sa kinabuhing dayon

Ipakita ang mosunod nga mensahe ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Nakahunahuna ba gayud kita ngano nga importante kaayo ang makabaton og pisikal nga lawas?… Nakasabut ba gayud kita ngano nga ang lawas mahinungdanon kaayo ngadto sa plano sa Amahan sa kalipay? Gi-recite ba nato kini nga tubag kanunay ug gibalik-balik nga napakyas man kita sa pagkahibalo sa tinuod nga kaimportante niini? Gusto ko palawman pa nato og gamay kining mahangturong pangutana kon ngano ang lawas importante kaayo. Sa katapusan ang tubag makaapekto sa tanan natong buhaton” (“Ye Are the Temple of God,” Ensign, Sept. 2001, 14).

Sumala ni Elder Bednar, nganong maningkamot man kita sa pagsabut ngano nga ang atong pisikal nga lawas importante kaayo?

Dapita ang mga estudyante sa pagsulat og tubag sa mosunod nga pangutana. Samtang magpadayon ang leksyon, awhaga sila sa pagsulat og dugang nga mga hunahuna ug mga ideya.

Ngano nga ang atong pisikal nga mga lawas importante kaayo sa plano sa Langitnong Amahan sa kalipay?

Dapita ang mga estudyante sa pagbasa og hilum sa ikatulo nga paragraph sa “Ang Pamilya: Usa ka Pamahayag ngadto sa Kalibutan” ug pangitaa ang pamahayag nga nagklaro ngano nga ang pisikal nga lawas importante sa atong mahangturong kauswagan.

Dapita ang usa ka estudyante sa pagbasa og kusog sa mosunod nga pamahayag ni Elder David A. Bednar. Hangyoa ang mga sakop sa klase sa pagpaminaw ngano nga ang atong mga lawas importante kaayo sa plano sa Langitnong Amahan. Ikonsiderar ang paghatag sa matag estudyante og kopya niini nga pamahayag sa dili pa kini basahon.

“Ang atong pisikal nga lawas naghimong posible alang sa lain-lain, lawom, ug daghan gayud nga mga kasinatian nga dili mahimo sa atong kinabuhi sa wala pa dinhi sa yuta. Si Presidente Boyd K. Packer Presidente sa Korum sa Napulog Duha ka mga Apostoles, mitudlo, ‘Ang atong espiritu ug ang atong lawas gihiusa sa paagi nga ang atong lawas nahimong instrumento sa atong hunahuna ug pundasyon sa atong kinaiya’ [“The Instrument of Your Mind and the Foundation of Your Character” (Brigham Young University fireside address, Peb. 2, 2003), speeches.byu.edu]. Mao nga, ang atong relasyon sa ubang mga tawo, ang atong kapasidad sa pag-ila ug pagbuhat sumala sa kamatuoran, ug ang atong abilidad sa pagsunod sa mga baruganan ug mga ordinansa sa ebanghelyo ni Jesukristo napalapad pinaagi sa atong pisikal nga lawas. Niining lugar sa pagkat-on sa pagka-mortal, makasinati kita og kalumo, gugma, kamabination, kalipay, kaguol, kapakyasan, kasakit, ug bisan gani mga hagit sa pisikal nga limitasyon sa mga paagi nga nag-andam kanato alang sa kahangturan. Sa yanong pagkasulti, adunay mga leksyon nga kinahanglan natong makat-unan ug mga kasinatian nga nga kinahanglan natong maangkon, sama sa gihulagway sa mga kasulatan, ‘sumala sa unod’ (1 Nephi 19:6; Alma 7:12–13)” (“Mga Butang nga Ingon nga Sila Gayud Mao,” Liahona, Hunyo 2010, 23).

Unsa ang gitudlo ni Elder Bednar ngano nga ang pisikal nga lawas gikinahanglan alang sa atong mahangturong kauswagan? (Bisan og ang mga tubag magkalahi, ipasabut kini nga kamatuoran: Uban sa pisikal nga lawas, masinati nato ang kahimtang sa pagkamortal nga makaandam nato alang sa kahangturan.)
Sa unsa nga mga paagi nga ang atong mga lawas “nahimong instrumento sa atong hunahuna ug pundasyon sa atong karakter”?
Sa unsa nga paagi nga ang “atong abilidad sa pagsunod sa mga baruganan ug mga ordinansa sa ebanghelyo … napalapad pinaagi sa atong pisikal nga lawas”? (Ang posible nga mga tubag maglakip sa mosunod: Ang usa ka lawas makapahimo nato sa pagsunod sa sugo sa pagsanay ug pagpuno sa yuta. Ang usa ka lawas makapahimo nato nga makasinati sa kalipay nga magpuyo isip mga pamilya, diin kita makat-on ug magsunod sa mga baruganan sa ebanghelyo diha sa panimalay—pananglit, makat-on kita unsaon sa pagkontrol sa atong pagkadaling masuko uban sa atong mga pamilya.)

Dapita ang pipila ka mga estudyante sa pagpuli-puli sa pagbasa og kusog sa Abraham 3:25 ug 2 Nephi 2:27–29 samtang ang klase mangita kon sa unsa nga paagi kini nga mga tudling sa kasulatan magkahiusa sa pagtabang nato nga mas makasabut sa mga katuyoan sa pagbaton og usa ka lawas.

Bisan og ang pagbaton og lawas dako nga panalangin, sa unsa nga paagi nga ang pagbaton og lawas kabahin sa atong mortal nga pagsulay? (Daghan sa mga tintasyon ni Satanas mokusog tungod kay kita adunay lawas.)
Sa unsa nga paagi nga ang pagpili sa “kabubut-on sa tawo” makahatag sa yawa og “gahum sa pagbihag”?

Mosiah 3:19; Moises 6:49, 53–55

“Ang kinaiyanhon nga tawo usa ka kaaway sa Dios”

Dapita ang usa ka estudyante sa pagbasa og kusog sa Moises 6:53–54, ug hangyoa ang klase sa pagpangita ug dayon sa pagpasabut unsa ang gitudlo niini nga mga bersikulo bahin sa atong kondisyon sa panahon sa atong pagkahimugso. Timan-i nga ang pulong “walay sala” niini nga konteksto nagpasabut nga gawasnon gikan sa mga epekto sa kalapasan ni Adan.

Dayon hangyoa ang mga estudyante sa pagbasa sa Moises 6:49 ug 55, ug pangutan-a ang mga sakop sa klase:

Unsa ang gitudlo niini nga mga bersikulo bahin sa Pagkapukan ni Adan ug Eva nga makaapekto nato sa atong tibuok mortal nga kinabuhi? (Kon magpadala kita sa mga tintasyon ni Satanas makasinati kita sa negatibo nga mga sangputanan sa atong mga pagpili nga mahimong kalibutanon, mahilayon, ug yawan-on. Mahimo kang mo-refer sa Ether 3:2, nga nagtudlo nga “tungod sa pagkapukan ang atong mga kinaiyahan nahimo nga mangil-ad sa kanunay.”)

Hangyoa ang usa ka estudyante sa pagbasa og kusog sa pipila ka linya sa Mosiah 3:19. Isulat ang mosunod nga mga pangutana sa pisara:

Unsa ang kinaiyanhon nga tawo?

Ngano nga ang kinaiyanhon nga tawo kaaway sa Dios?

Hatagi ang mga estudyante og pipila ka minuto sa pagsiksik sa mga tubag niini nga mga pangutana ug sa pagpalapad sa ilang pagsabut sa termino “kinaiyanhon nga tawo” pinaagi sa pagtuon sa mga footnote alang sa bersikulo 19. Human sa igong panahon, hisguti ang mga nakit-an sa mga estudyante. Itudlo nga kini nga termino naghulagway sa kondisyon nga magamit sa mga lalaki ug sa mga babaye.

Kon ang usa ka tawo adunay timaan sa usa ka kinaiyanhon nga tawo, unsa ang epekto niini sa kaminyoon o pamilya?

Hangyoa ang samang estudyante sa paghuman og basa sa Mosiah 3:19, ug dapita ang klase sa pagpangita sa baruganan kon unsaon nato sa pagbuntog sa kinaiyanhon nga tawo. (Samtang motubag ang mga estudyante, isulat sa pisara kini nga baruganan: Pinaagi sa pagdawat sa Pag-ula ni Jesukristo ug pagtugyan sa mga pagdani sa Balaang Espiritu, masalikway nato ang kinaiyanhon nga pagkatawo ug mahimo nga usa ka santos.)

Ipasabut nga niini nga konteksto, ang pagtugyan nagpasabut nga pagsumiter ngadto sa mga pag-aghat sa Espiritu Santo.

Unsaon sa tawo nga makaila unsay gi-aghat sa Balaang Espiritu nga iyang buhaton?
Makapaambit ba kamo og kasinatian nga dili kaayo personal diin ang Balaang Espiritu mi-aghat kaninyo sa pagsalikway sa kinaiyanhon nga pagkatawo?

Ipamatuod nga kon motugyan kita ngadto sa mga pag-aghat sa Balaang Espiritu, makaangkon kita sa gahum sa Pag-ula.

Mosiah 3:19; 16:3–6

Ang Paggamit sa Pag-ula ni Kristo

Dapita ang usa ka estudyante sa pagbasa og kusog sa Mosiah 16:3–6 samtang magsunod ang klase, mangita unsay makatabang nato sa pagbuntog sa mga epekto sa Pagkapukan sa atong mga kinabuhi.

Unsa nga bahin sa plano ang gihatag sa Langitnong Amahan nga makapahimo nato sa pagbuntog sa napukan nga kahimtang? (Isulat ang mosunod nga doktrina diha sa pisara: Pinaagi sa Pag-ula ni Jesukristo, matubos kita gikan sa atong nawala ug napukan nga kondisyon.)

Ipakita ang mosunod nga pamahayag ni Elder David A. Bednar, ug hangyoa ang usa ka estudyante sa pagbasa niini og kusog:

“Tanang gana, tinguha, hilig, ug diha-diha nga gusto sa kinaiyanhon nga tawo mabuntog pinaagi sa Pag-ula ni Jesukristo. Kita ania sa kalibutan aron sa pagpalambo og diosnong kinaiya ug pugngan ang tanang kahigal” (“Kita Nagtuo sa Pagkaputli,” Liahona, Mayo 2013, 43).

Ipasabut ngadto sa mga estudyante nga kon kita dunay hugot nga pagtuo sa Pag-ula, madawat nato ang grasya ni Jesukristo, nga nahimong posible pinaagi sa Iyang maulaong sakripisyo. Ang importante nga ideya sa pulong grasya mao ang “balaang paagi sa tabang o kalig-on, nga gihatag pinaagi sa buhong nga kalooy ug gugma ni Jesukristo.” Mao kini ang “makapahimo nga gahum” nga makatabang nato sa paghinulsol ug sa pagpalambo sa mga hiyas nga dili nato mapalambo sa atong kaugalingon (tan-awa sa Giya sa mga Kasulatan, “Grasya”). Sa pagtabang sa mga estudyante sa pag-ila sa Kristohanong mga hiyas nga kinahanglan natong mapalambo, hangyoa sila sa pagribyu sa lista sa mga hiyas nga mosangpot nga mahimong mga santos, nga makita sa Mosiah 3:19.

Giunsa ka pagtabang sa Manluluwas nga mapalambo ang usa sa mga hiyas nga gilista sa Mosiah 3:19?
Sa unsa nga paagi ninyo nakita ang mga indibidwal nga adunay usa o daghan niini nga mga hiyas nga nahimong panalangin sa ilang mga pamilya?
Sa unsa nga paagi nga ang pagpalambo sa usa o daghan niini nga mga hiyas pinaagi sa makapahimo nga gahum sa grasya sa Manluluwas makatabang ninyo nga mahimong mas maayo nga bana o asawa, amahan o inahan?

Ipasabut ngadto sa mga estudyante nga ang matag usa nato gibinlan og importante nga pangutana nga tubagon isip resulta sa leksyon karon. Ipakita ang mosunod nga pamahayag ni Elder David A. Bednar ug hangyoa ang mga estudyante sa pagbasa niini sa hilum:

“Ang tukmang matang sa pagsulay sa mortalidad, ma-summarize sa mosunod nga pangutana: Ako ba mosunod sa mga hilig sa kinaiyanhon nga tawo, o motugyan ba ko sa mga pagdani sa Balaang Espiritu ug mosalikway sa kinaiyanhon nga pagkatawo ug mahimo nga usa ka santos pinaagi sa Pag-ula ni Kristo ang Ginoo (tan-awa sa Mosiah 3:19)? Kana mao ang pagsulay” (“Kita Nagtuo sa Pagkaputli,” 43).

Hatagi ang mga estudyante og pipila ka minuto sa pagsulat og tubag ngadto sa pangutana ni Elder Bednar. Dapita sila sa pagpamalandong sa Kristohanong mga hiyas nga makita sa Mosiah 3:19 ug paghimo og plano sa pagsugod sa pagpalambo sa hingpit sa usa niadtong mga hiyas.

Mga Basahunon sa Estudyante

2 Nephi 2:27–29; Mosiah 3:19; 16:3–6; Moises 6:49, 53–55; Abraham 3:25.
David A. Bednar, “Ang Pag-ula ug ang Panaw sa Pagka-mortal,” Liahona, Apr. 2012, 12–19.