“Ang bana ug asawa adunay ligdong nga kapangakohan sa paghigugma ug pag-amuma sa usag usa” (“Ang Pamilya: Usa ka Pamahayag ngadto sa Kalibutan,”Liahona, Nob. 2010, 129). Pinaagi sa paglakip sa Langitnong Amahan ug ni Jesukristo sa ilang mga relasyon ug ang nagkahiusa sa pagsunod sa mga baruganan sa ebanghelyo ni Jesukristo, ang mga bana ug mga asawa makaangkon og malungtarung kalipay nga mao ang tumong sa plano sa Dios.
Background nga Basahunon
Russell M. Nelson, “Pag-amuma sa Kaminyoon,” Liahona, Mayo 2006, 36–38.
David A. Bednar, “Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 50–55.
L. Whitney Clayton, “Kaminyoon: Tan-awa ug Pagkat-on,” Liahona, Mayo 2013, 83–85.
Ipakita ang mosunod nga pamahayag ni President Russel M. Nelson sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
Imahe
Presidente Russell M. Nelson
“Ang kaminyoon nagdala og dagkong kahigayunan sa kalipay kay sa bisan unsa pang laing tawhanon nga pakigrelasyon. Gani ubang managtiayon wala makakab-ot sa ilang hingpit nga potensyal. Gipasagdan nila ang ilang gugma nga mawalay pulos, nagbaliwala sa usag-usa, gitugutan ang laing tinguha o ang dag-om sa pagpasagad mopahanap sa panan-aw kon unsa ang angay sa ilang kaminyoon. Ang kaminyoon mas malipayon kon maamumahan pag-ayo” (“Pag-amuma sa Kaminyoon,” Liahona, Mayo 2006, 36).
Unsa nga mga batasan o kinaiya sa inyong hunahuna maoy hinungdanan nga ang kaminyoon “matay-an”?
Ipasabut nga ang mga magtiayon kinsa motugot sa ilang mga kaminyoon nga matay-an usahay mopili sa pagtapos sa ilang kaminyoon pinaagi sa panagbulag. Sultihi ang mga estudyante nga sa panahon sa mortal nga pangalagad sa Manluluwas, ang pipila ka Pariseo nakiglalis nga ang diborsyo makatarunganon bisan sa dili importante nga mga rason, ug nagtinguha sila nga iapil si Jesus sa kontrobersiya pinaagi sa pagpangutana sa Iyang opinyon bahin sa panagbulag. Hangyoa ang usa ka estudyante sa pagbasa og kusog sa Mateo 19:3–8, ug dapita ang mga estudyante sa pagpangita sa kalainan tali sa mga kinaiya sa Manluluwas ug sa mga Pariseo kabahin sa kaminyoon. Kon gikinahanglan, ipasabut nga ang sulat sa panagbulag usa ka legal nga dokumento nga ihatag sa usa ka lalaki ngadto sa iyang asawa sa dili pa kini bulagan.
Unsa nga mga pulong sa bersikulo 3 ang naghulagway sa kinaiya sa Pariseo bahin sa kaminyoon ug panagbulag? (Gitugutan ang “pagpakigbulag,” o deborsyo, “sa bisan unsang hinungdan.”)
Unsa ang gitudlo ni Jesus sa bersikulo 8 nga misalikway niini nga panghunahuna ug nagmatuod sa ligdong nga matang sa kaminyoon? (Gikan sa panahon ni Adan ug Eva, tumong sa Dios nga ang kaminyoon mohangtud sa kahangturan. Sa pagpalig-on niini nga doktrina, ikonsiderar ang paghangyo sa mga estudyante sa pag-cross-reference sa bersikulo 8 sa Ecclesiastes 3:14 ug Moises 4:18.)
Ipakigbahin ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Ang matang sa kaminyoon nga gikinahanglan sa kahimayaan—mahangturong ang gidugayon ug diosnon ang kahamili—dili makahunahuna og deborsyo. Sa mga templo sa Ginoo, ang magtiayon pagakaslon nga molungtad sa kahangturan. Apan may pipila ka mga kaminyoon wala mouswag paingon ngadto niana nga sumbanan. Tungod ‘sa pagkatig-a sa [atong] mga kasingkasing’ [Mateo 19:8], ang Ginoo sa pagka karon wala mopatuman sa mga sangputanan sa celestial nga sumbanan. Siya mitugot sa deborsyado nga tawo sa pagminyo pag-usab nga walay mansa sa pagkamakasasala nga gihisgutan sa mas taas nga balaod” (“Deborsyo,” Liahona, Mayo 2007, 70).
Aron matabangan ang mga estudyante nga makasabut unsa ang mahimo sa mga bana ug asawa sa pagkab-ot sa matang sa kaminyoon nga gikinahanglan alang sa kahimayaan, hangyoa ang mga estudyante sa pagbasa sa unang sentence sa ikaunom nga paragraph sa pamahayag sa pamilya.
Unsay obligasyon sa mga bana ug asawa sa usag usa? (Samtang motubag ang mga estudyante, isulat sa pisara kini nga mga pulong gikan sa pamahayag sa pamilya: “Ang bana ug asawa adunay ligdong nga kapangakohan sa paghigugma ug pag-amuma sa usag usa.”)
Unsay kahulugan niini nganha kaninyo nga ang magtiayon nga minyo adunay “ligdong nga kapangakohan sa paghigugma ug pag-amuma sa usag usa ”?
Aron matabangan ang mga estudyante nga makasabut niini nga kapangakohan, dapita ang katunga sa klase sa pagbasa sa Doktrina ug mga Pakigsaad 25:5, 13–15, ug ang laing katunga sa pagbasa sa Doktrina ug mga Pakigsaad 42:22 ug Mga Taga-Efeso 5:25, 28–31. Hangyoa ang mga estudyante sa pagpangita sa mga baruganan nga nagtudlo unsaon sa pag-amuma ang kaminyoon ug dayon isulat unsay ilang nakit-an diha sa pisara. Human sa igong panahon, hangyoa ang mga estudyante sa pagpili og usa sa mga item nga gisulat sa pisara ug ipasabut unsay kahulugan niini ngadto kanila.
Ipakigbahin ang mosunod nga pamahayag ni Elder L. Whitney Clayton sa Kapangulohan sa Seventy ug hangyoa ang klase sa pagpaminaw sa piho nga mga pagpasabut sa mga pulong unong ug mobiya:
Imahe
Elder L. Whitney Clayton
“Sa pinakamalipayong kaminyoon akong nakita ang kamasulundon diha sa usa sa makalipay nga kasugoan—nga kita ‘maghiusa sa gugma.’ [D&P 42:45]. Ngadto sa mga bana, ang Ginoo misugo, ‘Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain’ [D&P 42:22]. Ang handbook sa Simbahan nagtudlo: ‘Ang pulong nga unong nagpasabut sa hingpit nga kamaunungon ngadto sa usa ka tawo. Ang kinasal nga magtiayon kinahanglang mounong sa Dios ug sa usag usa pinaagi sa pagserbisyo ug paghigugmaay ug pagtuman sa pakigsaad sa hingpit nga kaligdong sa usag usa ug sa Dios.’ Ang bana ug asawa ‘mobiya sa ilang pagka-single ug magminyo isip [ilang] unang prayoridad. … Dili motugot nga maapektahan sa ubang tawo o butang ang ilang prayoridad kay sa pagtuman sa mga pakigsaad nga ilang gihimo uban sa Dios ug sa usag usa’ [Handbook 2: Administering the Church (2010), 1.3.1]. Tan-awa ug pagkat-on: ang malampusong magtiayon maghigugmaay uban sa hingpit nga debosyon” (“Kaminyoon: Tan-awa ug Pagkat-on,” Liahona, Mayo 2013, 84–85).
Unsa ang pipila ka mga butang nga kinahanglan nga “biyaan” sa mga bana o mga asawa aron “mounong” ngadto sa usag usa?
Giunsa sa magtiayon nga minyo nga inyong nailhan pagpakita sa gugma ug pag-amuma sa ilang mga kapikas?
Unsay inyong gibuhat karon nga makatabang nga makaandam kaninyo nga mahigugma ug moamuma nga dili hinakog sa inyong umaabut nga kapikas?
Dapita ang usa ka estudyante sa pagbasa og kusog sa Abraham 5:15–18. Hangyoa ang klase sa pagsunod, nga mangita unsa ang gitudlo niini nga bersikulo bahin sa relasyon tali sa mga bana ug mga asawa.
Sumala niini nga mga bersikulo, unsa nga tumong nga kinahanglan nga tambayayongan sa bana ug asawa? (Mahimong “usa ka unod.”)
Drowinga ang mosunod nga diagram diha sa pisara:
Imahe
triangulo sa kaminyoon
Hatagi ang matag estudyante og kopya sa mosunod nga pamahayag ni Elder David A. Bednar sa Korum sa Napulog Duha ka mga Apostoles, ug hangyoa ang usa ka estudyante sa pagbasa og kusog sa unang paragraph samtang ang klase mangita sa unsay giprepresentaran sa diagram:
Imahe
Elder David A. Bednar
“Ang Ginoong Jesukristo mao ang sentro sa pakigsaad nga relasyon sa kaminyoon. Palihug tan-awa ang pagkabutang sa Manunubos sa kinatumyan niini nga triangulo, ang babaye anaa sa ubos sa usa ka suuk ug ang lalaki sa ubos sa laing suuk. Karon hunahunaa unsay mahitabo sa relasyon tali sa lalaki ug babaye kon sila tagsa-tagsa ug makanunayon nga ‘moduol ngadto kang Kristo’ ug maningkamot nga ‘mahingpit diha Kaniya’ (Moroni 10:32). Tungod sa Manluluwas, ang lalaki ug babaye magkasuod.
“Samtang ang bana ug asawa magpaduol sa Ginoo (tan-awa sa 3 Nephi 27:14), samtang sila nagkat-on sa pag-alagad ug pagmahal sa usag usa, samtang sila nag-ambitay sa mga kasinatian sa kinabuhi ug nagtubo og dungan ug mahimong usa, ug samtang sila mapanalanginan pinaagi sa paghiusa sa ilang managlahi nga mga kinaiyahan, magsugod sila sa pagkakita sa katumanan nga gitinguha sa atong Langitnong Amahan alang sa Iyang mga anak. Ang hingpit nga kalipay, nga mao gayud ang tumong sa plano sa Amahan, madawat pinaagi sa paghimo ug pagtahud sa mahangturong mga pakigsaad sa kaminyoon(“Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 54).
Sumala ni Elder Bednar, unsay nakapaposible nga magkasuod ang bana ug asawa? (Samtang motubag ang mga estudyante, hatagi og gibug-aton ang mosunod nga baruganan: Kon mga bana ug mga asawa maningkamot sa pagduol ngadto ni Kristo, mahimo silang usa sa ilang kaminyoon.)
Ngano sa inyong hunahuna nga ang pagduol ngadto ni Kristo makatabang sa bana ug asawa nga magkasuod?
Hangyoa ang usa ka estudyante sa pagbasa og kusog sa ikaduhang paragraph sa pamahayag ni Elder Bednar. Dayon ipangutana:
Sumala ni Elder Bednar, unsay angay buhaton sa magtiayon aron madawat ang “malungtarung kalipay” nga gusto sa Dios alang kanila?
Unsa nga matang sa mga butang nga inyong nakita nga gibuhat sa mga magtiayon aron makab-ot ang panaghiusa ug kalipay sa kaminyoon?
Basaha ug dayon ipamatuod ang kamatuoran sa mosunod nga pamahayag ni Presidente Ezra Taft Benson (1899–1994):
Imahe
President Ezra Taft Benson
“Ang kaminyoon mismo kinahanglan gayud nga isipon nga usa ka sagradong pakigsaad diha sa atubangan sa Dios. Ang magtiayon nga minyo adunay obligasyon dili lamang sa usag usa, apan ngadto sa Dios. Siya adunay gisaad nga mga panalangin ngadto niadtong kinsa mopasidungog niana nga pakigsaad” (Mga Pagtulun-an sa mga Presidente sa Simbahan: Ezra Taft Benson [2014], 219–220).
Unsa ka lahi ang linihokan sa mga kapikas kon ilang isipon ang kaminyoon nga usa ka sagrado nga pakigsaad nga gihimo dili lamang sa usag usa apan uban usab sa Dios?
Unsa man ang inyong mahimo karon aron maandam alang sa kaminyoon sa templo?
Awhaga ang mga estudyante sa pagsulat diha sa ilang mga personal journal bahin kon unsay ilang gibuhat karon ug unsay ilang buhaton sa umaabut sa pag-andam alang sa mahangturon nga kaminyoon.