Mga Seminary ug mga Institute
Leksyon 27: Mapanagnaon nga mga Pasidaan Mahitungod sa Pamilya

27

Mapanagnaon nga mga Pasidaan Mahitungod sa Pamilya

Pasiuna

Ang moderno nga mga propeta nagpasidaan nga “ang pagkabungkag sa pamilya makadala sa tagsatagsa, sa mga komunidad, ug sa nasud sa mga katalagman nga gipanagna sa karaan ug sa bag-o nga mga propeta” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Kini nga leksyon naghatag og gibug-aton nga ang mga pamilya mapanalipdan kon sila masulundon ngadto sa mga sugo sa Dios. Ang espirituhanon nga gahum gisaad sa pagtabang sa matarung nga mga ginikanan nga magpadako sa ilang mga anak sa katapusang mga adlaw.

Background nga Basahunon

  • Russell M. Nelson, “Faith and Families,” Ensign, Mar. 2007, 36–41.

  • Quentin L. Cook, “Mga Lamentaciones ni Jeremias: Pagbantay sa Pagkaulipon” Liahona, Nob. 2013, 88–91.

  • Bonnie L. Oscarson, “Mga Tigpanalipod sa Pamahayag bahin sa Pamilya,” Liahona, Mayo 2015, 14–17.

Mga Sugyot alang sa Pagtudlo

2 Timoteo 3:1–7, 13

Ang mga sangputanan moabut kon ang pamilya gibaliwala

Dapita ang mga estudyante sa pagpakigbahin og mga ehemplo sa mga sitwasyon o mga dapit diin ang usa ka tawo makapaabut nga makakita sa gipaskin nga pasidaan (mga ehemplo maglakip sa timaan sa trapiko, mga botelya sa tambal, o mga peligro nga materyal nga sudlanan.)

  • Unsa man ang pipila ka posibling mga sangputanan sa pagbaliwala niini nga mga pasidaan?

  • Unsa ang pipila sa mga pasidaan nga gihatag sa mga propeta bahin sa temporal ug espirituhanong mga kakuyaw nga ania sa atong panahon?

Hangyoa ang usa ka estudyante sa pagbasa og kusog sa 2 Timoteo 3:1–7 ug 13 samtang ang klase mangita sa mga kakuyaw nga gipasidaan ni Apostol Pablo nga motunga sa katapusang mga adlaw.

  • Hain sa mga kakuyaw nga gihulagway ni Pablo ang inyong nakita o nadungog?

  • Unsa kaha ang epekto niini nga mga kakuyaw sa mga indibidwal, mga kaminyoon, ug mga pamilya?

Dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. Dapita ang klase sa pagpaminaw sa mga rason nga gitutukan pag-ayo ni Satanas sa pagguba sa mga pamilya.

Elder Robert D. Hales

“Tungod sa kaimportante sa pamilya ngadto sa mahangturon nga plano sa kalipay, si Satanas naningkamot pag-ayo sa pagguba sa kabalaan sa pamilya, gipakaubos ang kaimportante sa tahas sa mga lalaki ug mga babaye, nag-awhag og moral nga kahugawan ug mga pagsupak sa sagrado nga balaod sa kaputli, ug nga ang mga ginikanan dili ganahan nga manganak ug moamuma sa mga anak isip usa sa ilang pinakataas nga mga prayoridad.

“Importante kaayo ang unit sa pamilya sa plano sa kaluwasan nga ang Dios mipasidaan nga … ang pagkabungkag sa pamilya makadala sa tagsatagsa, sa mga komunidad, ug sa nasud sa mga katalagman nga gipanagna sa karaan ug sa bag-o nga mga propeta” (“The Eternal Family,” Ensign, Nob. 1996, 65).

Hatagi og gibug-aton ang mosunod nga baruganan: “Ang pagkabungkag sa pamilya makadala sa tagsatagsa, sa mga komunidad, ug sa nasud sa mga katalagman nga gipanagna sa karaan ug sa bag-o nga mga propeta” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Pahinumdumi ang mga estudyante nga kini nga pasidaan gikan sa pamahayag sa pamilya.

Isulat ang mosunod diha sa pisara:

Ang pagkabungkag sa pamilya

Mga Sangputanan

Dapita ang mga estudyante sa paghunahuna bahin sa mga ebidensya nga ilang nakita sa “pagkabungkag sa pamilya” nga nahitabo sa tibuok kalibutan. (Kini tingali maglakip sa mosunod: nagkadaghan nga diborsyo, mga aborsyon, ug abuso; nagkagamay nga mga kaminyoon ug nagkagamay nga mga anak nga matawo sa naminyo nga mga magtiayon; ug mas daghan nga mga pamilya nga wala magkahiusa.) Hangyoa sila sa paglista sa mga ebidensya diha sa pisara ubos sa ulohan nga “Pagkabungkag sa pamilya.”

Dapita ang mga estudyante sa paghunahuna bahin sa mga ehemplo sa mga sangputanan nga moabut sa indibidwal ug sa katilingban isip resulta sa pagkabungkag sa pamilya. (Kini tingali maglakip sa mosunod: pagkawala sa Espiritu, kasubo ug walay kalipay, nagkataas nga gidaghanon sa krimen, badlungon nga mga anak, ug pagkawala sa kalinaw ug kalig-on sa katilingban.) Hangyoa sila sa paglista og mga ehemplo diha sa pisara ubos sa ulohan nga “Mga Sangputanan.”

Dayon ipangutana ang mosunod:

  • Sa unsa nga paagi nga ang pagsunod sa doktrina ug mga baruganan sa pamahayag sa pamilya makatabang sa mga indibidwal, mga pamilya, mga komunidad, ug mga nasud nga makalikay niining mga sangputanan?

1 Nephi 14:14–17; 22:16–17; Doktrina ug mga Pakigsaad 97:22–28

Dunay paglaum alang sa mga pamilya

Ipasabut ngadto sa mga estudyante nga bisan pa sa kadautan nga nagpatigbabaw sa kalibutan karon, dili pa ulahi kaayo ang pagpalig-on sa mga pamilya. Makahimo sila og kalainan sa ilang kaugalingong mga pamilya, mga ward o mga branch, ug mga komunidad. Ipamatuod nga adunay paglaum alang sa mga indibidwal ug mga pamilya nga mosunod sa mga sugo sa Ginoo.

Hangyoa ang mga estudyante sa pagbasa og hilum sa Doktrina ug mga Pakigsaad 97:22–28, mangita unsay atong mahimo nga makalingkawas sa panimalos sa Ginoo ug sa mga sangputanan nga moabut tungod sa sala. (Ipasabut nga niini nga mga bersikulo ang Zion nagpasabut sa Ang Simbahan ni Jesukristo sa mga Santos sa Ulahing mga Adlaw ug sa miyembro niini.) Mahimo nimong isugyot nga markahan sa mga estudyante ang pulong nga kon sa higayon nga makita niini nga mga bersikulo. (Tabangi ang mga estudyante nga makasabut nga ang pag-ila sa mga pamahayag nga hinungdan-ug-epekto o kon/nan usa ka mapuslanon nga kahanas sa pagtuon sa kasulatan.)

  • Unsaon ninyo sa pag-summarize kini nga mga bersikulo sa yanong pamahayag sa baruganan? (Ang mga tubag sa estudyante kinahanglan nga magpakita sa mosunod nga baruganan: Kon kita masulundon sa tanang mga sugo, makadawat kita sa daghang mga panalangin ug makalikay sa panimalos sa Ginoo.)

Basaha ang mosunod nga pamahayag gikan ni Elder Bruce R. McConkie (1915–85) sa Korum sa Napulog Duha ka mga Apostoles:

Elder Bruce R. McConkie

“Wala kita mag-ingon nga ang tanang mga Santos makalikay ug maluwas sa pag-abut sa adlaw sa pagkaawaaw. Apan mosulti kita nga walay saad sa kasiguroan ug walay saad sa seguridad gawas niadtong nahigugma sa Ginoo ug naningkamot sa pagbuhat sa tanan nga iyang gisugo. …

“Ug mao nga among ipataas ang tingog sa pasidaan ug moingon: Patalinghug, pangandam; pagbantay ug pag-andam. Walay seguridad sa bisan unsa nga dalan gawas sa pagkamasulundon ug pag-uyon ug pagkamatarung.

“Kay sa ingon miingon ang Ginoo: ‘Ang silot sa Ginoo moagi sa magabii ug maadlaw, ug ang taho niini makapahasol sa tanan nga mga katawhan; oo, kini dili mohunong hangtud moabut ang Ginoo. …

“‘Bisan pa niana, ang Zion makalingkawas kon siya mosunod sa pagbuhat sa tanan nga mga butang nga bisan unsa Ako misugo kaniya.’ [D&P 97:23, 25]” (“Stand Independent above All Other Creatures,” Ensign, Mayo 1979, 93–94).

  • Sa unsa nga paagi nga kini nga pamahayag makatabang sa pagdasig sa pamilya nga magmasulundon sa mga sugo sa Ginoo?

Pahinumdumi ang mga estudyante nga si Nephi nakakita og mga panan-awon sa katapusang mga adlaw. Niadto nga mga panan-awon, nakita niya nga ang matarung mapanalipdan.

Hangyoa ang mga estudyante sa pagbasa sa 1 Nephi 14:14–17 ug 22:16–17, nga mangita sa mga paagi diin ang mga Santos mapanalipdan. (Pahinumdom: Kini nga mga tudling naghatag og gibug-aton sa komon nga tema sa kasulatan nga ang pagkamasulundon maghatag sa saad sa Ginoo nga panalipod. Si Elder David A. Bednar mihatag og gibug-aton sa kaimportante sa pagsiksik sa maong “mga koneksyon, mga sumbanan, ug mga tema” [“A Reservoir of Living Water” (Church Educational System fireside for young adults, Feb. 4, 2007), 3, lds.org/media-library]. Kini nga tema o sumbanan komon kaayo sa Basahon ni Mormon.)

  • Sa unsa nga paagi nga ang mga sinulat ni Nephi makahatag ninyo og paglaum?

Basaha ang mosunod nga pamahayag ni Elder Bruce D. Porter sa Seventy. Dapita ang mga estudyante sa pagpaminaw sa mga panalangin nga ihatag ngadto sa matinud-anong mga ginikanan sa katapusang mga adlaw:

Elder Bruce D. Porter

“Bisan pa unsay umaabut, ang Dios mi-orden nga sa dispensasyon sa kahingpitan sa mga panahon, ang mga ginikanan sa Simbahan hatagan og gahum sa pagtabang sa pagluwas sa ilang mga anak gikan sa kangitngit nga naglibut kanila. Samtang ang mga kasingkasing sa mga amahan ug mga inahan mobalik ngadto sa ilang mga anak, ug ang mga kasingkasing sa mga anak ngadto sa ilang mga ginikanan, kita sa katapusan makasaksi sa pagtungha sa henerasyon nga buotan ug andam nga mosugat sa Manluluwas sa Iyang pag-anhi. Ang kadaugan sa gingharian sa Dios sa ulahing mga adlaw mao ang kadaugan dili lamang sa Simbahan isip usa ka organisasyon apan sa napulo ka libo nga indibidwal nga mga pamilya kinsa pinaagi sa pagtuo nakabuntog sa kalibutan” (“Defending the Family in a Troubled World,” Ensign, Hunyo 2011, 18).

  • Unsa nga mga panalangin ang gisaad ngadto sa mga ginikanan niini nga dispensasyon nga naningkamot sa pagpadako sa ilang mga anak diha sa pagkamatarung?

  • Sa unsa nga paagi ninyo nakita ang Ginoo nga mihatag og kalig-on sa mga ginikanan sa ilang mga paningkamot sa pagpalig-on ug pagpanalipod sa ilang mga anak gikan sa kangitngit sa kalibutan?

Dapita ang mga estudyante sa pagkonsiderar unsa nga mga impluwensya o mga gahum ang naningkamot sa pagguba sa ilang kaugalingong mga pamilya, ug sa unsa nga paagi si Satanas misulay sa pagpugong nila nga makaangkon sa ilang kaugalingong mga pamilya sa umaabut. Awhaga ang mga estudyante sa pagpamalandong unsay ilang mahimo aron maangkon ang tabang sa Ginoo sa paglig-on sa ilang kaugalingon ug sa pagpanalipod sa ilang mga pamilya.

Mga Basahunon sa Estudyante