Leksyon 12: Ang mga Ordinansa ug mga Pakigsaad sa Templo
12
Ang mga Ordinansa ug mga Pakigsaad sa Templo
Pasiuna
Ang mga propeta sa Ulahing mga Adlaw mipahayag, “Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Niini nga leksyon, ang mga estudyante makakat-on nga pinaagi sa pagdawat og mga ordinansa sa templo matagamtaman nila ang sagrado nga mga panalangin panahon sa pagkamortal ug makaangkon og kinabuhing dayon.
Background nga Basahunon
Boyd K. Packer, “Ang Balaan nga Templo,” Liahona, Okt. 2010, 29–35.
D. Todd Christofferson, “Ang Gahum sa mga Pakigsaad,” Liahona, Mayo 2009, 19–23.
Ipakita sa klase ang usa ka litrato sa imong paborito nga templo, ug ipakigbahin ngano nga paborito nimo kini.
Ngano nga kita adunay mga templo?
Aron matabangan nga matubag kini nga pangutana, isulat ang mosunod nga mga tudling diha sa pisara. Dapita ang mga estudyante sa pagbasa sa usa sa mga tudling, mangita sa mga rason ngano nga ang Langitnong Amahan mihatag og mga templo:
Sumala niini nga mga bersikulo, unsa ang pipila ka mga rason ngano nga ang Langitnong Amahan mihatag og mga templo? (Samtang motubag ang mga estudyante, tabangi sila nga makasabut sa mosunod nga baruganan: Ang Langitnong Amahan mihatag og mga templo aron ang Iyang mga anak makadawat sa importante nga mga ordinansa ug kahibalo ug mangandam sa pagpuyo sa Iyang presensya.)
Unsa nga mga pulong dinhi niini nga mga bersikulo ang nagtudlo nga ang mga templo makatabang sa pag-andam nato nga mopuyo sa presensya sa Dios?
Sultihi ang mga estudyante nga ang Doktrina ug mga Pakigsaad 109 naglakip sa pag-ampo sa pagpahinungod alang sa Templo sa Kirtland. Hangyoa ang mga estudyante sa pagbasa sa Doktrina ug mga Pakigsaad 109:12–21 ug sa paghimo og lista sa mga paagi diin ang mga templo makaandam nato nga mopuyo sa presensya sa Dios.
Sumala niini nga mga bersikulo, sa unsa nga paagi nga ang mga templo moandam nato sa pagpuyo uban sa Dios? (Ang mga estudyante tingali mosugyot sa mosunod: diha sa mga templo mabati nato ang gahum sa Ginoo, makat-on og kaalam, ug makadawat sa kahingpitan sa Espiritu Santo; giawhag kita nga maghinulsol dayon sa templo; ug gikinahanglan nga kita limpyo kon mosulod kita sa templo. Kon aduna pay panahon, mahimo nimong i-refer ang mga estudyante ngadto sa Exodo 19:10–14, nga naghulagway sa unsa nga paagi nga si Moises nagtinguha sa pag-andam sa karaang Israel sa pisikal ug espirituhanong paagi nga makaabut ngadto sa presensya sa Ginoo.)
I-display ang mosunod nga pamahayag ni Elder Robert D. Hales sa Korum sa Napulog Duha ka mga Apostoles ug ni Presidente Brigham Young (1801–1877):
Imahe
Elder Robert D. Hales
“Ang nag-unang katuyoan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian. Ang mga ordinansa sa templo mogiya kanato ngadto sa atong Manluluwas ug mohatag kanato sa mga panalangin nga moabut pinaagi sa Pag-ula ni Jesukristo” (Robert D. Hales, “Mga Panalangin sa Templo,” Liahona, Okt. 2009, 14).
Imahe
President Brigham Young
“Ang inyong endowment [sa templo] mao, ang pagdawat sa tanan niadtong mga ordinansa diha sa balay sa Ginoo, nga inyong gikinahanglan, human kamo mobiya niini nga kinabuhi, aron kamo makabalik ngadto sa presensya sa Amahan, moagi sa mga anghel kinsa nagbarug isip mga bantay” (Mga Pagtulun-an sa mga Presidente sa Simbahan: Brigham Young [1997], 349).
Sa unsa nga paagi nga kini nga mga pamahayag makatabang kaninyo nga makapasalamat sa kaimportante sa pagdawat sa mga ordinansa sa templo?
Ang mga ordinansa sa priesthood nga madawat gikan sa mga templo makatabang nato nga mahimong mas sama sa Dios
I-display ang mosunod nga pamahayag ug dapita ang usa ka estudyante sa pagbasa niini og kusog:
“Sa Simbahan, ang ordinansa sagrado, pormal nga buhat nga gipahigayon pinaagi sa katungod sa priesthood. Pipila ka mga ordinansa gikinahanglan sa atong kahimayaan. Kini nga mga ordinansa gitawag og makaluwas nga mga ordinansa. Naglakip kini sa bunyag, pagkumpirma, ordinasyon ngadto sa Melchizedek Priesthood (alang sa kalalakin-an), endowment sa templo, ug sealing sa kaminyoon” (Matinud-anon sa Tinuohan [2004], 116).
Sa unsa nga paagi nga ang “makaluwas nga mga ordinansa lahi gikan sa ubang mga ordinansa sa ebanghelyo? (Ang ubang mga ordinansa, sama sa panalangin sa mga bata ug pangalagad ngadto sa masakiton, wala kinahanglana sa kahimayaan.)
Sa dili pa mopadayon, itudlo nga ang pipila ka makaluwas nga mga ordinansa, sama sa bunyag ug ordinasyon ngadto sa Melchizedek Priesthood, mahitabo sa dili pa kita makadawat sa mga ordinansa sa templo; hinoon, kining bahina sa leksyon nag-focus sa makaluwas nga mga ordinansa nga gipahigayon diha sa templo. Dapita ang usa ka estudyante sa pagbasa og kusog sa Doktrina ug mga Pakigsaad 84:19–21. Hangyoa ang klase sa pagpangita unsay atong madawat kon kita moapil sa mga ordinansa nga gipangalagad sa Melchizedek Priesthood.
Unsa sa inyong hunahuna ang gipasabut sa mga pulong “gahum sa pagka-diosnon”? (Ikonsiderar ang pagpasabut nga ang “gahum sa pagka-diosnon” mao ang gahum aron mahimong diosnon o sama sa dios.)
Unsaon sa pagpahayag ang baruganan nga gitudlo sa Doktrina ug mga Pakigsaad 84:20–21? (Samtang motubag ang mga estudyante, isulat ang mosunod diha sa pisara: Pinaagi sa mga ordinansa ug mga pakigsaad sa templo mahimo kita nga sama sa Dios.)
Hatagi ang matag estudyante og kopya sa mosunod nga pamahayag ni Elder Robert D. Hales sa Korum sa Napulog Duha ka mga Apostoles. Hangyoa ang mga estudyante sa pagmarka sa mga pulong nga nagtudlo kon sa unsa nga paagi nga ang pag-apil sa mga ordinansa sa templo makatabang nato nga mahimong mas sama sa dios.
Imahe
Elder Robert D. Hales
“Ang pinakamahinungdanon sa tanang mga panalangin sa priesthood nga alang sa [bata-ong mga lalaki ug babaye] makita sa templo. Sa templo, masabtan nimo ang balaang mga butang. … Ang kalipay sa kahangturan, nga ingon og layo ra kaayo kon wala kita sa sulod sa templo, ingon og makab-ot na.
“Sa templo, ang plano sa kaluwasan gipasabut ug ang sagrado nga mga pakigsaad gihimo. Kini nga mga pakigsaad, uban sa pagsul-ob sa sagrado nga mga temple garment, makapalig-on ug makapanalipod sa na-endowed nga tawo batok sa mga gahum sa kaaway. …
“Sa panapos nga ordinansa sa templo—ang mahangturong kaminyoon—ang pangasaw-unon ug ang pamanhunon gisaaran nga, kon magmatinud-anon sila, matagamtaman nila ang panaghiusa sa pamilya uban sa usag usa, uban sa ilang mga anak, ug uban sa Ginoo hangtud sa tibuok kahangturan. Gitawag kini nga kinabuhing dayon” (“Blessings of the Priesthood,” Ensign, Nob. 1995, 34).
Hisguti unsay gimarkahan sa mga estudyante.
Sa unsang paagi ang pag-apil sa mga ordinansa sa templo mipanalangin kaninyo sa mga pamaagi nga susama niadtong gihulagway ni Elder Hales?
Hatagi og pipila ka gutlo ang mga estudyante sa pagsulat unsay ilang buhaton sa paghimo sa pagsimba sa templo nga mas makahuluganon ug mas naka-focus sa pagtabang kanila nga mahimong sama sa Dios.
Pahibaloa ang mga estudyante nga adunay laing importante nga katuyoan sa pagsimba sa templo nga may kalabutan sa pagdawat og mga ordinansa sa templo. Hangyoa sila sa pagpaminaw samtang imong ipakigbahin ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:
Imahe
Elder D. Todd Christofferson
“Ako mopamatuod nga diha sa Ang Simbahan ni Jesukristo sa mga Santos sa Ulahing mga Adlaw makita ang katungod sa priesthood aron sa pagdumala sa mga ordinansa diin kita makasulod ngadto sa mabugkusong mga pakigsaad uban sa atong Langitnong Amahan diha sa pangalan sa Iyang Balaan nga Anak. Ako mopamatuod nga Ang Dios motuman sa Iyang mga saad nganha kaninyo samtang kamo motahud sa inyong mga pakigsaad ngadto Kaniya.” (“Ang Gahum sa mga Pakigsaad,” Liahona, Mayo 2009, 22).
Kon modawat kita sa makaluwas nga mga ordinansa sa ebanghelyo, unsay atong gisudlan?
Ipakita ang mosunod nga pamahayag nila ni Elder David A. Bednar ug Jeffrey R. Holland sa Korum sa Napulog Duha ka mga Apostoles, ug dapita ang mga estudyante sa pagpangita sa importante nga mga bahin sa atong mga pakigsaad uban sa Ginoo:
Imahe
Elder David A. Bednar
“Ang pakigsaad usa ka kasabutan tali sa Dios ug sa Iyang mga anak sa yuta, ug importante nga masabtan nga ang Dios maoy modeterminar sa mga kondisyon sa tanang mga pakigsaad sa ebanghelyo. Kamo ug ako dili maoy modisider sa klase o mga elemento sa pakigsaad. Kondili, sa paggamit sa atong moral nga kabubut-on, kita modawat sa termino ug mga kinahanglanon sa usa ka pakigsaad samtang ang atong Mahangturong Amahan moestablisar niini” (David A. Bednar, “Nga Kita Unta sa Kanunay Makabaton sa Iyang Espiritu uban Kanato,” Liahona, Mayo 2006, 28–29).
Imahe
Elder Jeffrey R. Holland
“Ang pagkigsaad usa ka kinahanglanon nga espirituhanong kontrata, usa ka sagrado nga saad ngadto sa Dios atong Amahan nga kita magpakabuhi ug maghunahuna ug maglihok sa usa ka piho nga paagi—ang paagi sa Iyang Anak, ang Ginoong Jesukristo. Isip ganti, ang Amahan, ang Anak, ug ang Espiritu Santo nagsaad kanato sa talagsaong kanindot sa kinabuhing dayon” (Jeffrey R. Holland, “Pagtuman sa mga Pakigsaad: Usa ka Mensahe alang Niadtong Moserbisyo og Misyon,” Liahona, Ene. 2012, 49).
Unsay namatikdan ninyo niini nga mga pamahayag bahin sa mga pakigsaad?
Ngano nga importante man nga ang Dios maoy motino sa mga kondisyon sa tanang mga pakigsaad sa ebanghelyo? (Tungod kay Siya mao ang nagtanyag nato sa kinabuhing dayon, Siya ang dunay katungod sa pag-establisar sa mga kondisyon diin kini gidawat. Ang bugtong tanyag nga atong ikahatag Kaniya mao ang atong kabubut-on samtang mopili kita sa pagsunod. Isip kabahin niini nga panaghisgutan, hatagi og gibug-aton ang mosunod: Kon tumanon nato ang atong mga pakigsaad uban sa Ginoo, mapanalanginan kita dinhi sa pagkamortal ug makabaton og kinabuhing dayon.)
Hangyoa ang mga estudyante nga magparis-paris. Hangyoa ang usa ka estudyante sa matag paris sa pagtuon sa Exodo 19:3–6 ug ang uban sa pagtuon sa Doktrina ug mga Pakigsaad 109:22–26. Dapita ang mga estudyante sa pagpangita sa mga panalangin nga anaa niadtong kinsa motuman sa ilang mga pakigsaad, ilabi na sa mga pakigsaad sa templo. Human sa igo nga panahon, dapita ang mga paris sa paghisgot unsay ilang nakit-an. (Kalabut sa mga bersikulo sa Exodo, mahimo nimong siguroon nga ang mga estudyante nakasabut nga sa balaang mga templo diha kita magsugod nga mokwalipay nga mga hari ug mga rayna kinsa sa umaabut mahimong balaan nga nasud ug magpuyo sa atubangan sa Dios; tan-awa usab sa Pinadayag 1:6; 5:10; 19:16; D&P 76:55–56.)
Sa unsa nga paagi nga ang inyong mga pakigsaad uban sa Ginoo usa ka panalangin o usa ka panalipod nganha kaninyo?
Dapita ang usa ka estudyante sa pagbasa og kusog sa mosunod nga pamahayag ni Presidente Joseph Fielding Smith (1876–1972):
Imahe
President Joseph Fielding Smith
“Kon moadto kita sa templo atong iisa ang atong kamot ug makigsaad nga atong serbisyuhan ang Ginoo ug sundon ang iyang mga sugo ug ilayo ang kaugalingon sa mga buling sa kalibutan. “Kon nakahibalo kita sa atong gibuhat nan ang endowment mahimo nga panalipod sa atong kinabuhi—usa ka panalipod nga wala sa tawo kinsa dili moadto og templo.
“Nakadungog ko sa akong papa nga miingon nga sa oras sa pagsulay, sa oras sa tintasyon, hunahunaon niya ang mga saad, mga pakigsaad nga iyang gihimo sa Balay sa Ginoo, ug kini iyang mga panalipod. … Kini nga panalipod usa ka bahin sa tuyo niini nga mga seremonyas. Makaluwas nato karon ug mohimaya kanato sa umaabut, kon kini atong tahuron” (Mga Pagtulun-an sa mga Presidente sa Simbahan: Joseph Fielding Smith [2013], 269).
Unsay inyong mga hunahuna o mga impresyon panahon niini nga leksyon nga gusto ninyong ipakigbahin sa klase?
I-display ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
President Boyd K. Packer
“Ang kinabuhi mao ang panaw pauli alang natong tanan, balik ngadto sa presensya sa Dios sa iyang celestial nga gingharian.
“Ang mga ordinansa ug mga pakigsaad mao ang atong mga kredensyal aron makasulod ngadto sa Iyang presensya. Ang takus nga pagdawat niini mao ang tibuok kinabuhi nga tinguha; ang paghupot niini human sa pagdawat mao ang hagit sa pagkamortal”(“Covenants,” Ensign, Mayo 1987, 24).
Ipamatuod nga ang pagdawat og mga ordinansa sa templo mao “ang tibuok kinabuhi nga tinguha.” Ang mga ordinansa sa templo makatabang nato nga makaangkon sa mga kredensyal nga gikinahanglan aron dawaton ngadto sa presensya sa Langitnong Amahan.
Dapita ang mga estudyante sa pagpamalandong kon prayoridad ba nila ang pagsimba ug pagdawat og mga ordinansa sa templo. Hangyoa sila sa pagsulat unsay ilang mahimo nga mas mo-focus sa mga pakigsaad nga ilang gihimo o himoon sa templo.