Leksyon 2: Mga Propeta ug mga Apostoles Ligdong nga Namahayag
2
Mga Propeta ug mga Apostoles Ligdong nga Namahayag
Pasiuna
“Ang Pamilya: Usa ka Pamahayag ngadto sa Kalibutan” nagsugod niini nga pamahayag: “Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag …” (Liahona, Nob. 2010, 129). Ang mga propeta sa matag dispensasyon adunay responsibilidad sa pagdeklarar sa kabubut-on sa Ginoo ug sa pagpasidaan sa mga sangputanan sa sala. Kini nga leksyon makatabang sa mga estudyante nga makasabut sa tahas sa mga propeta isip magbalantay kinsa mopasidaan kanato sa nakita nga umaabot nga mga kalamidad.
Background nga Basahunon
M. Russell Ballard, “Pabilin sa Sakayan ug Manggunit!” Liahona, Nob. 2014, 89–92.
Henry B. Eyring, “Finding Safety in Counsel,” Ensign, Mayo 1997, 24–26.
Carol F. McConkie, “Pagpuyo sumala sa mga Pulong sa mga Propeta,” Liahona, Nob. 2014, 77–79.
Ipakita sa mga estudyante ang litrato sa usa ka tore, ug hangyoa sila sa pag-ila sa estraktura diha sa imahen. Ipasabut nga ang estraktura kinopya sa karaan nga tore. (Isip usa ka alternatibo nga paagi, kon anaa sa inyong pinulongan, ipakita ang unang minuto sa video nga “Watchman on the Tower,” lds.org/media-library.) Pangutan-a ang mga estudyante unsa nga mga matang sa mga butang ang tan-awon sa mga magbalantay ug ngano nga importante nga himoon nila ang ilang mga katungdanan.
Dapita ang mga estudyante sa pagbasa sa Ezequiel 33:1–3 ug ipapangita ang responsibilidad sa usa ka magbalantay.
Unsa ang responsibilidad sa magbalantay? (Sa pagpasidaan sa katawhan sa nagsingabut nga kakuyaw.)
Dapita ang usa ka estudyante sa pagbasa og kusog sa Ezequiel 33:4–7.
Unsa nga katungdanan ang gihatag sa Ginoo ngadto ni Ezequiel?
Sa unsang paagi nga ang mga propeta sama sa magbalantay diha sa tore? (Tingali makatabang alang sa mga estudyante sa pagbasa sa Doktrina ug mga Pakigsaad 1:4–5, 11, 14 aron matabangan sila nga makasabut nga ang moderno nga mga propeta magsilbi nga magbalantay. Mahimo kang mosugyot nga ang mga estudyante mo-cross-reference niini nga mga bersikulo ngadto sa Ezequiel 33:4–7. Ikonsiderar ang pagpasabut nga si Elder M. Russell Ballard sa Korum sa Napulog Duha ka mga Apostoles mideklarar, “Isip mga Apostoles ni Ginoong Jesukristo, katungdanan namo nga mahimong magbalantay sa tore” [“Beware of False Prophets and False Teachers,” Ensign, Nob. 1999, 62].)
Ipamatuod ang mosunod nga doktrina: Mitawag ang Langitnong Amahan og mga propeta sa ulahing mga adlaw aron sa pagpasidaan nato sa nagsingabut nga kakuyaw.
Sa pagpalig-on niini nga doktrina, ipakita ang mosunod nga pahayag ni Presidente Henry B. Eyring sa Unang Kapangulohan, ug ipabasa kini og kusog sa usa ka estudyante:
Imahe
President Henry B. Eyring
“Ingon og walay katapusan ang tinguha sa Manluluwas nga mogiya kanato ngadto sa kaluwasan. Ug adunay kamakanunayon diha sa paagi nga Siya magtultol kanato sa dalan. Siya magtawag sa daghan nga pamaagi aron nga kini moabut niadtong andam nga modawat niini. Ug kadto nga mga pamaagi kanunayng naglakip sa pagpadala sa mensahe pinaagi sa ba-ba sa Iyang mga propeta bisan asang dapit nga ang katawhan angayan nga adunay propeta sa Dios diha kanila. Kadtong awtorisado nga mga sulugoon kanunay nga gisangunan sa pagpasidaan sa mga katawhan, nagsulti kanila sa dalan padulong sa kahilwasan” (“Finding Safety in Counsel,” Ensign, Mayo 1997, 24).
Kanus-a kamo mibati nga gipanalipdan sa mosunod nga mapanagnaon nga tambag?
Unsa nga tambag ang inyong nadunggan gikan sa moderno nga mga apostoles ug mga propeta nga makahatag og espirituhanong panalipod ngadto sa mga pamilya?
Sa unsa nga mga paagi nga ang pamahayag sa pamilya usa ka tingog sa pagpasidaan gikan sa atong Amahan sa Langit?
Ang mga propeta ug mga apostoles makatabang nato nga makasabut sa panglantaw sa Ginoo sa pamilya
Ipakigbahin ang mosunod nga pahayag ni Elder M. Russell Ballard sa Korum sa Napulog Duha ka mga Apostoles. Hangyoa ang mga estudyante sa pagpangita og mga paagi diin ang mga propeta nakahibalo sa mga kakuyaw sa kalibutan karon.
Imahe
Elder M. Russell Ballard
“Nakadungog ko nga ang ubang mga tawo naghunahuna nga ang mga lider sa Simbahan ‘walay nahibaloan mahitungod sa kalibutan.’ Unsay ilang nakalimtan mao nga kami may daghang mga kasinatian, ug nakapuyo sa daghang mga dapit ug nakatrabaho uban sa daghang mga tawo gikan sa nagkalain-laing mga kahimtang. Ang among bag-ong mga buluhaton karon sa tinuod nagdala kanamo sa tibuok kalibutan, diin among gikahimamat ang politikanhon, relihiyoso, negosyante, ug humanitarian nga mga lider sa kalibutan. Bisan tuod og kami nakabisita sa [mga lider sa] White House sa Washington, D.C., ug mga lider sa mga nasud [ug mga relihiyon] sa tibuok kalibutan, kami usab nakabisita sa labing kabus nga [mga pamilya ug katawhan] sa kalibutan. …
“Kon inyong hunahunaon pag-ayo ang among mga kinabuhi ug pagpangalagad, kamo kasagaran mouyon nga kami nakakita ug nakasinati sa kalibutan sa mga paagi nga diyutay ra ang nakasinati. Inyong masabtan nga kami ‘daghan og nahibaloan’ kay sa kadaghanan. …
“… Hinoon, adunay butang kabahin sa indibidwal ug sa tinipon nga kaalam sa mga [lider sa Simbahan] nga kinahanglan nga mohatag og gamayng kahupayan. Among nasinati kining tanan, lakip ang mga sangputanan sa lain-laing mga balaod ug mga polisiya sa publiko, pagkawala sa kadasig, mga trahedya, ug kamatayon diha sa atong kaugalingong pamilya. Nasabtan namo ang mga panghitabo sa inyong mga kinabuhi” (“Pabilin sa Sakayan ug Manggunit!”Liahona, Nob. 2014, 90–91).
Sa unsa kaha nga paagi nga ang daghang mga kasinatian sa mga lider sa Simbahan makatabang nila sa ilang tahas isip magbalantay?
Ipasabut nga ang mga propeta adunay access sa mas importante pa kay sa kasinatian sa kinabuhi aron sa pagtabang nila nga makatuman sa ilang balaang gihatag nga mga katungdanan. Dapita ang usa ka estudyante sa pagbasa og kusog sa Amos 3:6–7. Itudlo sa mga estudyante nga ang Hubad ni Joseph Smith miusab sa pulong nga “nahuman” ngadto sa “nahibaloan” sa bersikulo 6 ug ang pulong nga “apan” ngadto sa “hangtud” sa bersikulo 7. Kini nga panaghisgutan nindot tingali kaayo nga oportunidad alang nimo sa pag-awhag sa mga estudyante sa paggamit sa mga footnotes atol sa ilang personal nga pagtuon sa kasulatan.
Unsa ang gitudlo sa Amos 3:6–7 bahin sa mga propeta?
Ipakigbahin ang mosunod nga depenisyon ngadto sa mga estudyante: Ang usa ka propeta mao ang “usa ka tawo nga gitawag ug mamulong alang sa Dios. Isip usa ka sinugo sa Dios, ang propeta makadawat og mga sugo, mga panagna, ug mga pagpadayag gikan sa Dios. … Ang propeta misaway sa sala ug nanagna sa mga sangputanan” (Giya ngadto sa mga Kasulatan, “Propeta,” scriptures.lds.org).
Kopyaha ang mosunod nga diagram diha sa pisara:
Imahe
perspective diagram
Hatagi ang mga estudyante og pipila ka gutlo sa pagpamalandong ug paghisgot sa diagram. Mahimo usab nga imong ipasabut nga ang diagram naghulagway kon sa unsa nga paagi nga ang panglantaw sa Dios sa pamilya naglakip sa premortal nga kinabuhi, mortal ug kinabuhi nga human sa kamatayon. Pinaagi sa pagpadayag, ang mga propeta makadawat og mas lapad nga panglantaw, ug sila usab motabang nato nga molambo ang atong panglantaw ug pagsabut.
Sa unsa nga paagi naghulagway kini nga diagram ngano nga kita maalamon kon magtuon sa pamahayag sa pamilya? (Isulat ang mosunod diha sa pisara: Pinaagi sa pagtuon sa pamahayag sa pamilya, makat-unan nato ang panglantaw sa Langitnong Amahan bahin sa pamilya.)
Hangyoa ang mga estudyante sa pagkuha sa ilang mga kopya sa “Ang Pamilya: Usa ka Pamahayag ngadto sa Kalibutan.” Ipasabut ang mga pulong sa sinugdanan: “Kami, ang Unang Kapangulohan ug Konseho sa Napulog Duha ka mga Apostoles sa Ang Simbahan ni Jesukristo sa mga Santos sa Ulahing mga Adlaw, sa maligdong nga paagi mopahayag. …” Hatagi ang mga estudyante og pipila ka minuto sa pagsiksik sa pamahayag sa pamilya, mangita og ebidensya nga ang panglantaw sa Dios sa kaminyoon ug sa pamilya lahi kay sa kalibutan. Dapita ang mga estudyante sa pagpakigbahin sa unsay ilang nakit-an, ug isulat ang mga tubag sa estudyante diha sa pisara.
Ang pagsunod sa tambag sa mga propeta diha sa pamahayag sa pamilya makahimo nato nga luwas
Dapita ang mga estudyante sa pagsiksik sa Doktrina ug mga Pakigsaad 90:1–3 sa pag-ila unsay gihatag sa Ginoo ngadto ni Propeta Joseph Smith.
Unsa ang gihatag sa Ginoo ngadto ni Joseph Smith? (Ang mga yawe sa gingharian, nga nagrepresentar sa mga katungod sa kapangulohan, o sa awtoridad sa paggiya sa gingharian sa Dios dinhi sa yuta.)
Kinsa man ang naghupot niining sama nga mga yawe karon? (Ang matag usa sa Unang Kapangulohan ug Korum sa Napulog Duha ka mga Apostoles.)
Dapita ang usa ka estudyante sa pagbasa og kusog sa Doktrina ug mga Pakigsaad 90:4–5. Hangyoa ang klase sa pagpangita unsay gisaad sa Ginoo nga moabut sa Simbahan pinaagi sa Propeta. (Ang Ginoo miingon nga ang Simbahan modawat og “mga orakulo.” Sultihi ang mga estudyante nga ang “mga orakulo” nagpasabut nga mga “pagpadayag.”)
Unsa nga pasidaan ang gihatag sa Ginoo sa mga Santos sa bersikulo 5?
Unsa nga baruganan ang atong makat-unan gikan niini nga pasidaan? (Ang mga tubag kinahanglang magpakita sa pagsabut sa mosunod nga baruganan: Kon taphaw lang ang atong pagtagad sa mga pagpadayag nga gihatag sa Dios pinaagi sa Iyang mga propeta, kita mahagba ug mapukan. Ikonsiderar ang pagsulat sa pisara niini nga baruganan.)
Ipakita ang mosunod nga pahayag ni Sister Carol F. McConkie sa kinatibuk-ang kapangulohan sa Young Women ug ni Elder M. Russell Ballard sa Korum sa Napulog Duha ka mga Apostoles:
“Mahimo kitang mobaliwala, magtiaw-tiaw, motamay, o mosukol batok sa mga pulong ni Kristo nga gipamulong pinaagi sa Iyang gi-orden nga mga sulugoon. Apan ang Manluluwas nagtudlo nga kadtong mobuhat sa ingon isalikway gikan sa Iyang mga katawhan sa pakigsaad [tan-awa sa 3 Nephi 20:23]” (Carol F. McConkie, “Pagpuyo sumala sa mga Pulong sa mga Propeta,” Liahona, Nob. 2014, 79).
Imahe
Elder M. Russell Ballard
“Akong nadiskubrihan sa akong pagpangalagad nga kadtong nahisalaag ug anaa sa kalibug mao kadtong sa kasagaran … nakalimot nga kon ang Unang Kapangulohan ug ang Korum sa Napulog Duha mamulong uban sa hiniusa nga tingog, mao kini ang tingog sa Ginoo nianang higayona. Gipahinumduman kita sa Ginoo, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra’ [D&P 1:38]” (M. Russell Ballard, “Pabilin sa Sakayan ug Manggunit!” 90).
Unsa kaha ang mga timailhan nga dunay mibaliwala sa tambag nga makita sa pamahayag sa kalibutan?
Unsa nga mga panalangin ang nadawat ninyo o sa uban tungod sa pagpatalinghug sa tambag diha sa pamahayag sa pamilya?
Unsa ang inyong mga hunahuna ug mga pagbati kabahin sa mga propeta sa ulahing mga adlaw nga inyong ikapakigbahin sa klase?
Ipamatuod nga ang pamahayag sa pamilya usa ka dinasig nga deklarasyon gikan sa nagkahiusang tingog sa kinse ka mga propeta, mga manalagna, ug mga tigpadayag. Awhaga ang mga estudyante sa pagpahimulos sa oportunidad sa tibuok kurso sa pag-ampo alang sa mas lawom nga pagpamatuod sa mga kamatuoran nga anaa sa pamahayag sa pamilya.