Leksyon 25: Paggamit sa Hugot nga Pagtuo sa Malisud nga mga Kahimtang sa Pamilya
25
Paggamit sa Hugot nga Pagtuo sa Malisud nga mga Kahimtang sa Pamilya
Pasiuna
“Ang Pamilya: Usa ka Pamahayag ngadto sa Kalibutan” nag-ingon nga ang “kakulangan, kamatayon, o laing mga kahimtang [sa pamilya] mahimong manginahanglan sa pagsagop. Ang uban nga mga kapamilya kinahanglan nga motabang kon gikinahanglan” (Liahona, Nob . 2010, 129). Sa dihang ang malisud nga mga kahimtang moabut, ang ebanghelyo ni Jesukristo naghatag og panglantaw ug kalig-on sa paghimo og gikinahanglan nga mga kausaban.
Background nga Basahunon
David A. Bednar, “Ang Pag-ula ug ang Panaw sa Pagka-mortal,” Liahona, Apr. 2012, 12–19.
“Strengthening the Family: Adapting to Circumstances,” Liahona, Dis. 2005, 34–35.
Pagpahiangay sa mahagitong mga kahimtang sa pamilya
Sugdi ang klase pinaagi sa pagpasabut nga ang mga lider sa Simbahan sa kinatibuk-an nagtudlo kanato unsaon sa pagkab-ot ug pagpadayon sa sulundon—lakip sa sulundon nga kaminyoon ug pamilya. Sa pipila ka higayon, hinoon, ang kahimtang sa kinabuhi makapugong nato sa pagkab-ot niana nga sitwasyon. Hangyoa ang usa ka estudyante sa pagbasa og kusog sa mosunod nga pahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Pinaagi sa gipahiuli nga ebanghelyo nahibaloan nato nga adunay sumbanan nga pamilya. Pamilya kini nga naglangkob sa matarung nga naghupot sa Melchizedek Priesthood uban sa matarung nga asawa nga na-seal ngadto kaniya ug mga anak nga natawo sa pakigsaad o na-seal ngadto kanila. Uban sa usa ka inahan sa panimalay sa kahimtang sa gugma ug pag-alagad, ang mga ginikanan motudlo sa ilang mga anak,pinaagi sa ehemplo ug lagda, sa mga paagi sa Ginoo ug Iyang kamatuoran. Tumanon nila ang ilang balaan nga gitudlo nga mga tahas nga gihisgutan sa pamahayag sa pamilya. Ang ilang mga anak magdako pinaagi sa pagsunod sa mga pagtulun-an nga gitudlo gikan sa pagkahimugso. Makapalambo sila og mga kinaiya sa pagkamasulundon, kaligdong, gugma sa Dios, ug hugot nga pagtuo sa Iyang balaan nga plano” (“First Things First,” Ensign, Mayo 2001, 7).
Unsa ang pipila ka mga panghitabo o mga kahimtang nga makapugong nato, tingali sa pipila ka higayon, sa pagkab-ot sa sumbanan nga sitwasyon sa pamilya? (Ang mga tubag mahimong maglakip sa mosunod: kamatayon, kakulangan, panagbulag, dili makapanganak, nawad-an og trabaho, ug mga ginikanan nga daghan og trabaho.)
Dapita ang mga estudyante sa pagsiksik sa ikapito nga paragraph sa pamahayag sa pamilya, mangita unsay gipaabut sa Langitnong Amahan nga atong buhaton kon ang sitwasyon sa pamilya dili sulundon:
“Kakulangan, kamatayon, o laing mga kahimtang mahimong manginahanglan sa pagsagop. Ang uban nga mga kapamilya kinahanglan nga motabang kon gikinahanglan” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).
Dayon basaha ang mosunod nga pamahayag ug hangyoa ang mga estudyante sa pagpangita sa mga matang sa pagsagop nga tingali gikinahanglan sa mga pamilya nga himoon kon moabut ang mga hagit:
“Sa usa ka sulundon nga kalibutan ang tanang mga hamtong malipayon nga naminyo, ang tanang kaminyoon mapanalanginan og mga anak, ug ang tanang mga sakop sa pamilya himsog, masulundon ug mosuporta sa usag usa. Apan ang kinabuhi panagsa ra nga sulundon. Ang matag indibidwal makasinati og kalisdanan, ug walay pamilya nga nagpuyo sa pagka-mortal nga kanunay nga walay kasamok. …
“Sakit, kakulangan, kamatayon, panagbulag, ug ubang makabalda nga mga hinungdan makahatag og mga hagit. Sa mao nga mga sitwasyon, ‘ang indibidwal nga pagsagop’ sa mga tahas tingali gikinahanglan. Ang usa ka amahan tingali moangkon og dugang nga mga responsibilidad sa balay ug pag-amuma, o ang usa ka inahan nga full-time nga asawa kinahanglang nga motrabaho. Bisan ang mga anak kinahanglan nga modawat og bag-ong mga responsibilidad.
“Kon ang makasamok nga mga panghitabo moabut, ang kabanay kinahanglan usab nga motabang. Ang suporta tingali maglangkob sa paghatag og tabang sa kwarta ngadto sa pagdonar og oras sa pagbantay sa mga bata, pagtabang sa buluhaton sa balay, o pag-atiman sa masakiton o may kakulangan sa sakop sa pamilya. Ang gidak-on sa pag-apil sa kabanay magdepende sa sitwasyon ug sa mga panginahanglan sa pamilya” (“Strengthening the Family: Adapting to Circumstances,” Liahona, Dis. 2005, 34–35).
Unsa ang pipila ka mga pagsagop nga tingali kinahanglang himoon sa mga pamilya ug mga indibidwal kon moabut ang mga hagit?
Unsa ang pipila ka mga butang nga inyong nakita nga gibuhat sa mga pamilya o mga indibidwal sa pagsagop ug pagpabilin nga lig-on kon mag-atubang sa malisud o makabalda nga mga kahimtang?
Kanus-a kamo nakakita sa kabanay nga mga sakop sa pamilya nga mitanyag og tabang kon gikinahanglan?
Dapita ang usa ka estudyante sa pagbasa og kusog sa mosunod nga pamahayag ni Elder Merrill J. Bateman sa Seventy. Hangyoa ang klase sa pagpaminaw sa unsay gisulti ni Elder Bateman nga makatabang sa mga pamilya nga nag-atubang sa malisud nga mga kahimtang.
Imahe
Elder Merrill J. Bateman
“Ang mga pagsulay ug mga kalisdanan moabut sa daghang matang: ang kamatayon sa minahal, ang kaminyoon nga lahi kay sa gipaabut, walay kaminyoon, panagbulag, bata nga natawo nga dunay kakulangan, walay anak, nawad-an og trabaho, mga ginikanan nga nakahimo og mga sayop, badlungon nga anak nga lalaki o babaye, sakit. Walay kahumanan ang lista. Ngano nga ang Dios sa Iyang plano naghatag og higayon sa kahigawad, kasakit, pag-antus, ug kamatayon? …
“Ang pagsabut sa plano sa kaluwasan, sa premortal nga kinabuhi, kinabuhi sa yuta, ug kinabuhi human sa kamatayon makahatag og panglantaw” (“Living a Christ-Centered Life,” Ensign, Ene. 1999, 13).
Sa unsa nga paagi nga ang pagsabut sa plano sa Dios makapaandam sa mga pamilya nga moatubang sa mga hagit? (Isulat ang mosunod nga baruganan sa pisara: Ang pagsabut sa plano sa Ginoo makatugot sa mga pamilya sa pag-atubang sa yutan-ong mga hagit uban sa nagkadako nga pagtuo ug mahangturong panglantaw.)
Sa unsa nga paagi nga ang panglantaw sa ebanghelyo makahatag nato og dakong kaisug sa paghimo og mga pagsagop o bisan pag-angkon og bag-ong mga responsibilidad sa atong mga pamilya kon gikinahanglan?
Pangutan-a ang mga estudyante kon makahunahuna ba sila og bisan kinsa nga pamilya diha sa mga kasulatan kinsa nag-atubang og mga hagit ug nakadawat og balaang tabang sa pagbuntog o paglahutay niadtong mga hagit. Pahinumdumi ang mga estudyante sa mga pamilya nila ni Lehi ug Ishmael, kinsa mipanaw agi sa awaaw nga kamingawan human sila mibiya sa Jerusalem. Dapita ang mga estudyante sa paghunahuna sa pipila ka hagit nga giatubang niini nga mga pamilya sa ilang pagpanaw padulong sa gisaad nga yuta ug dayon ipakigbahin ang ilang hunahuna diha sa klase.
Dapita ang pipila ka mga estudyante nga magpuli-puli sa pagbasa og kusog sa 1 Nephi 16:34–39 ug 17:1–4. Hangyoa ang klase sa pagpaminaw sa mga ehemplo kon sa unsa nga paagi nga ang lain-lain nga sakop sa pamilya ni Lehi ug Ismael mitubag sa mga hagit nga ilang giatubang.
Ngano sa inyong hunahuna nga ang pipila ka sakop sa mga pamilya nila ni Lehi ug Ishmael nakahimo sa paglahutay uban sa pagtuo ug pagsalig sa Dios, samtang ang uban nagbagulbol tungod sa ilang mga kalisud?
Sa unsa nga paagi nga inyong nakita nga ang kahibalo ug pagpamatuod sa ebanghelyo nakapanalangin sa mga pamilya nga nakasinati og mga hagit?
Sumala sa pag-aghat sa Espiritu ug sa mga panginahanglan sa imong mga estudyante, mahimo nimong ipakigbahin ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Sa inyong tibuok kinabuhi sa yuta, paningkamuti pag-ayo ang pagtuman sa sukaranang mga katuyoan niini nga kinabuhi pinaagi sa sulundon nga pamilya. Samtang wala pa ninyo maabut kana nga sumbanan, buhata ang tanan pinaagi sa pagkamasulundon ug pagtuo sa Ginoo sa kanunay nga pagpaduol ngadto niini kutob sa mahimo. Ayaw itugot nga dunay mopugong ninyo gikan niana nga tumong. … Ayaw gayud pagbuhat og bisan unsa nga makahimo nga dili takus. Kon nawala ang imong tinguha sa mahangturon nga kaminyoon, dasiga kini pag-usab. Kon ang inyong damgo nagkinahanglan og pailub, ihatag kini” (“First Things First,” 7).
Pahinumdumi ang mga estudyante sa istorya sa Basahon ni Mormon diin si Alma ug ang iyang katawhan milayas gikan sa kasundalohan ni Haring Noah ug mi-establisar og matarung nga siyudad. Human magpuyo og malinawon nga kahimtang sa makadiyot, si Alma ug ang iyang katawhan nadiskubrehan sa kasundalohan nga Lamanite, kinsa mihimo nila nga ulipon. Samtang si Alma ug ang iyang mga katawhan nagpakita og hugot nga pagtuo og pagpailub, gipagaan sa Ginoo ang ilang mga palas-anon ug sa wala madugay giluwas sila gikan sa pagkaulipon.
Dapita ang pipila ka estudyante nga magpuli-puli sa pagbasa og kusog sa Mosiah 24:8–16. Hangyoa ang klase sa paghanduraw kon sa unsa nga paagi ang mga kalisud nga nakita niini nga mga bersikulo nakaapekto sa mga pamilya ni Alma ug sa iyang katawhan. (Pahinumdomi nga ang paghanduraw usa ka kahanas sa pagtuon sa kasulatan nga makapahimo sa istorya sa kasulatan nga mas tinuod ug klaro sa mga magbabasa.) Hangyoa usab ang klase sa pagpangita unsay gibuhat ni Alma ug sa iyang katawhan sa pag-atubang sa ilang mga kalisud.
Samtang nakahanduraw na sa mga panghitabo niini nga mga bersikulo, sa unsa kaha nga paagi naapektahan ang mga pamilya sa ilang mga kahimtang?
Unsay gibuhat ni Alma aron makaangkon sa tabang sa Ginoo? (Bisan og ang mga estudyante moila og pipila ka importante nga mga baruganan, hatagi og gibug-aton ang mosunod: Kon magpakita kita og pagtuo ug pailub sa atong mga kasakit ug motawag sa Dios, makalig-on Siya kanato nga makadaug sa atong mga alantuson uban ang kasayon.)
Sa inyong hunahuna giunsa sa Ginoo paglig-on kanila aron nga “sila makadaug sa ilang mga alantuson uban sa kasayon”?
Hangyoa ang usa ka estudyante sa pagbasa og kusog sa pamahayag, diin si Elder David A. Bednar sa Korum sa Napulog Duha ka mga Apostoles nga naghisgot sa istorya sa katawhan ni Alma:
Imahe
Elder David A. Bednar
“Unsa man ang nausab dinhi niini nga sitwasyon? Dili ang palas-anon maoy nausab; ang mga hagit ug mga kalisdanan sa pagpanggukod wala wagtanga diha-diha sa atubangan sa katawhan. Apan si Alma ug ang iyang mga sumusunod gilig-on, ug ang ilang nagkadugang nga kapasidad ug kalig-on mipagaan sa palas-anon nga ilang gipas-an. Kining maayo nga mga tawo gihatagan sa gahum pinaagi sa Pag-ula sa paglihok isip instrumento ugtiglihok sa ilang mga kahimtang. Ug ‘sa kalig-on sa Ginoo’ si Alma ug ang iyang katawhan gigiyahan ngadto sa luwas nga dapit sa Zarahemla” (“ Ang Pag-ula ug ang Panaw sa Pagka-mortal,” Liahona, Abr. 2012, 16).
Ngano nga importante nga makahibalo nga ang Ginoo dili kanunay mokuha sa mga alantuson sa mga indibidwal ug mga pamilya, mokuha sa atong mga hagit, o mohimo nato nga makasinati og sulundon nga mga kahimtang?
Sa unsa nga paagi nga ang atong kahibalo ni Jesukristo ug sa Iyang Pag-ula nagtugot nato sa paglihok inubanan sa pagtuo kon kita mag-atubang sa kalisud sa mga kahimtang sa pamilya?
Aron matabangan nga matubag kini nga pangutana, ipakita ang mosunod nga pamahayag ni Elder Steven E. Snow sa Seventy, ug hangyoa ang usa ka estudyante sa pagbasa niini og kusog:
Imahe
Elder Steven E. Snow
“Ang atong paglaum sa Pag-ula mohatag kanato og gahum pinaagi sa paghatag kanato og mahangturong panglantaw. Ang ingon nga panglantaw motugot kanato sa pagtan-aw lapas pa niining kinabuhia ug paingon ngadto sa saad sa kahangturan” (“Paglaum,” Liahona, Mayo 2011, 54).
Isulat sa pisara ang mosunod nga mga pakisayran sa kasulatan. Dapita ang mga estudyante sa pagtuon niini nga mga tudling ug ipapangita ang mga saad nga gihimo niadtong matinud-anong milahutay sa mga pagsulay:
Sa unsa nga paagi nga ang paghinumdom niini nga mga saad makatabang sa mga pamilya nga nag-atubang og mga hagit?
Sa imong pagtapos, dapita ang mga estudyante sa paghunahuna og panahon sa dihang, bisan pa sa mga kalisud, ang ilang mga pamilya mibati nga nalig-on pinaagi sa pagtuo sa Dios o napanalanginan tungod sa ilang kahibalo sa ebanghelyo ni Jesukristo. Dapita si bisan kinsa nga estudyante nga mibati nga nadasig sa pagbuhat sa ingon sa pagpakigbahin sa angay nga mga kasinatian uban sa klase. Awhaga ang mga estudyante sa pagsulat sa ilang mga pagpamatuod kon sa unsa nga paagi ang Dios makapanalangin ug makapalig-on sa mga pamilya diha sa personal nga journal.