Leksyon 4: Ang Pamilya ug ang Mahinungdanon nga Plano sa Kalipay
4
Ang Pamilya ug ang Mahinungdanon nga Plano sa Kalipay
Pasiuna
Sa paglalang ni Adan ug Eva, ang tawhanong pamilya naestablisar sa yuta. Ang Pagkapukan ni Adan ug Eva maoy nakahimong posible nga ang mga anak matawo sa kalibutan, ug ang Pag-ula nakapahimo nato nga makabuntog sa negatibong mga epekto sa Pagkapukan. Kini nga leksyon makatabang sa mga estudyante nga mas makasabut kon sa unsa nga paagi nga ang Paglalang, Pagkapukan, ug Pag-ula magkahiusa alang sa kaluwasan sa mga pamilya.
Background nga Basahunon
M. Russell Ballard, “Ang Pag-ula ug ang Bili sa usa Ka Kalag,” Liahona, Mayo 2004, 84–87.
Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 32–37.
Nakat-unan ni Moises ang katuyoan sa paglalang sa yuta
Pagdala og gamay nga sudlanan nga naay balas ug baso nga naay tubig diha sa klase. Dapita ang usa ka estudyante sa pagtuslob sa tudlo ngadto sa tubig ug dayon ngadto sa balas. Dayon hangyoa ang estudyante sa pagbana-bana pila ka buok bonbon sa balas ang mipilit sa tudlo.
Pila ka buok bonbon sa balas sa inyong hunahuna ang anaa sa sudlanan? Sa kabaybayunan sa kadagatan?
Hangyoa ang mga estudyante sa pagpakli ngadto sa Moises 1, nga nagrekord og sunod-sunod nga mga panan-awon nga nakita ni Moises. Hangyoa ang usa ka estudyante sa pagbasa og kusog sa Moises 1:27–29, ug dapita ang mga estudyante sa pagpangita unsay gipakita sa Ginoo ngadto ni Moises.
Sumala niini nga mga bersikulo, unsay nakita ni Moises sa panan-awon?
Unsa kaha nga hunahuna ang moabut ninyo kon nakasinati kamo niini nga panan-awon?
Hangyoa ang mga estudyante sa pagbasa sa Moises 1:30 ug sa pagmarka sa duha ka pangutana nga gipangutana ni Moises sa Ginoo (ngano ug giunsa ang yuta ug ang mga lumulupyo niini pagkalalang). Tabangi ang mga estudyante nga makapalambo sa ilang personal nga mga kahanas sa pagtuon sa kasulatan pinaagi sa pag-awhag kanila sa pagpangita sa mga pangutana ug sa ilang mga tubag diha sa mga kasulatan samtang sila magtuon.
Dapita ang mga estudyante sa pagbasa sa Moises 1:31–33 ug mangita kon giunsa pagtubag sa Ginoo ang duha ka pangutana ni Moises.
Sumala sa bersikulo 31, ngano nga gilalang sa Dios ang kalibutan?
Unsa nga doktrina ang gitudlo sa mga bersikulo 32–33 bahin kon giunsa paglalang sa Langitnong Amahan ang mga kalibutan? (Kinahanglang makita sa mga estudyante ang mosunod nga doktrina: Ubos sa direksyon sa Amahan, gilalang ni Jesukristo ang yuta ug mga kalibutan nga dili maihap.)
Dapita ang mga estudyante sa pagbasa sa Moises 1:36–39 ug ipapangita ang dugang nga tinguha ni Moises ug ang tubag sa Ginoo.
Unsa ang katuyoan sa Langitnong Amahan sa paglalang sa yuta ug sa mga lumulupyo niini? (Kinahanglang makita sa mga estudyante ang mosunod nga doktrina: Gilalang ang yuta aron matabangan nga mahitabo ang pagka-imortal ug kinabuhing dayon sa tawo. Hinumdumi nga ang pagka-imortal mao ang pagpuyo sa kahangturan sa kahimtang nga nabanhaw, samtang ang kinabuhing dayon mao ang pagpuyo sama sa pagpuyo sa Dios, nagpasabut nga pagpuyo sa kahangturan isip kabahin sa mahangturong pamilya.)
Sa unsa nga paagi nga ang paglalang sa yuta makatabang sa pagtuman sa buhat ug himaya sa Langitnong Amahan? (Gamita ang Doktrina ug mga Pakigsaad 49:15–17 sa pagpakita nga ang yuta gilalang isip usa ka dapit nga kapuy-an alang sa mga pamilya.)
Ipamatuod nga ang yuta gilalang aron sa pagtabang sa pagpahinabo sa pagkaimortal ug kinabuhing dayon sa mga anak sa Dios. Ang unit sa pamilya gihimo aron sa pagtabang nato nga makakab-ot og kinabuhing dayon, nga nagpasabut nga kita magpuyo sa kahangturan isip kabahin sa usa ka mahangturong pamilya—ang kinabuhi nga gipuy-an sa Dios.
Ang Pagkapukan ni Adan ug Eva usa ka importante nga bahin sa plano sa Dios
Ipasabut nga ang Dios mihatag ni Adan ug Eva og piho nga mga instruksyon didto sa Tanaman sa Eden. Hangyoa ang mga estudyante sa pagbasa sa Moises 3:16–17, ug dayon pangutana:
Unsa ang gisulti sa Ginoo nga mahitabo ngadto ni Adan ug Eva kon sila mokaon sa gidili nga bunga?
Ipasabut nga sa dihang si Adan ug si Eva mikaon sa gidili nga bunga gidala nila ngadto sa mga tawo ang duha ka matang sa kamatayon.
Isulat ang mosunod diha sa pisara:
Ang espirituhanong kamatayon = ang pagkabulag gikan sa Dios
Ang pisikal nga kamatayon = ang pagkabulag sa espiritu gikan sa pisikal nga lawas
Dapita ang mga estudyante sa pagtuon sa 2 Nephi 2:19–25 ug paghimo og lista sa dugang nga mga sangputanan sa Pagkapukan.
Sa unsa nga paagi nga ang pag-ambit sa gidili nga bunga nakapahimo ni Adan ug Eva ug sa tanang mga tawo nga mas mahisama sa Langitnong Amahan?
Ipakita ang mosunod nga pahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Ang Pagkapukan usa ka mahinungdanong bahin sa plano sa Langitnong Amahan sa kaluwasan. Kon wala kini walay mortal nga mga anak ang natawo unta ngadto ni Adan ug Eva, ug wala untay tawhanong pamilya nga makasinati og oposisyon ug pagtubo, moral nga kabubut-on, ug kalipay sa pagkabanhaw, katubsanan, ug kinabuhing dayon” (“Ang Pag-ula ni Jesukristo,” Liahona, Mar. 2008, 35).
Basaha ang Moises 5:9–11 uban sa mga estudyante. Tabangi sila sa pagsulti sa mga kamatuoran nga narekord niini nga mga bersikulo pinaagi sa pagpangutana:
Unsa nga mga kamatuoran ang nakat-unan ni Adan ug Eva human sila gisalikway gikan sa Tanaman sa Eden? (Kinahanglang masabtan sa mga estudyante ang mosunod nga mga kamatuoran: Tungod sa Pagkapukan, si Adan ug si Eva mahimong manganak, ug ang ilang kaliwat mouswag ngadto sa kinabuhing dayon.)
Dapita ang usa ka estudyante sa pagbasa og kusog sa pamayahag ni Elder Richard G. Scott sa Korum sa Napulog Duha ka mga Apostoles. Hangyoa ang mga estudyante sa pagpangita sa mga rason kon nganong ganahan ta nga moanhi sa yuta:
Imahe
Elder Richard G. Scott
“Usa sa labing makapalipay nga mga gutlo sa inyong kinabuhi—sa dihang napuno kamo sa panglantaw, kadasig, ug pasalamat—wala na ninyo mahinumdumi. Kana nga kasinatian nahitabo didto sa premortal nga kinabuhi sa dihang kamo gipahibalo nga sa katapusan ang inyong panahon miabut aron mobiya sa kalibutan sa espiritu aron mopuyo sa yuta uban sa mortal nga lawas. Nasayud kamo nga makakat-on kamo pinaagi sa personal nga kasinatian sa mga leksyon nga makahatag og kalipay dinhi sa yuta, mga leksyon nga sa katapusan mohatud ninyo sa kahimayaan ug kinabuhing dayon isip nahimaya, celestial nga binuhat sa presensya sa inyong Balaan nga Amahan ug sa Iyang Hinigugma nga Anak” (“First Things First,” Ensign, Mayo 2001, 6).
Sa unsa nga paagi nga ang pagsabut sa mga katuyoan sa Pagkapukan ug pagka-mortal makaapekto sa mga pagpili nga inyong himoon niini nga kinabuhi?
Ang Pag-ula nakabuntog sa mga epekto sa Pagkapukan
Basaha og kusog ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:
Imahe
Elder M. Russell Ballard
“Niadtong Enero ang among pamilya miantus sa subo nga pagkawala sa among apo nga si Nathan tungod sa paghagsa sa eroplano. Si Nathan nakaserbisyo sa Baltic Mission nga Russian ang pinulongan. Nahigugma siya sa katawhan ug nasayud nga kadto usa ka pribilehiyo sa pagserbisyo sa Ginoo. Tulo ka bulan human ako mipahigayon sa iyang mahangturon nga kaminyoon ngadto sa iyang pinalangga, si Jennifer, kini nga aksidente mikutlo sa iyang kinabuhi” (“Ang Pag-ula ug ang Bili sa Usa ka Kalag,” Liahona, Mayo 2004, 84).
Ipasabut nga tungod sa Pagkapukan ni Adan ug Eva, kitang tanan ubos sa walay palad ug masulub-on nga mga kasinatian sama niadtong nahitabo sa pamilya ni Elder Ballard. Maayo gani, ang Langitnong Amahan mihatag og paagi nga mabuntog ang mga epekto sa Pagkapukan.
Dapita ang mga estudyante sa pagtuon sa 2 Nephi 9:6–12, mangita kon sa unsa nga paagi nga ang Pag-ula ni Jesukristo makatabang sa matag usa kanato nga mabuntog ang pisikal ug espirituhanon nga kamatayon. Mahimo nimong awhagon ang mga estudyante sa pagkonsiderar sa pagmarka sa importante nga mga pulong diha sa ilang mga kasulatan samtang sila magbasa. Dayon dapita ang mga estudyante sa pagpakigbahin sa ilang mga nakaplagan.
Unsa nga doktrina ang gitudlo niini nga mga bersikulo bahin sa relasyon tali sa Pagkapukan ni Adan ug sa Pag-ula ni Jesukristo? (Siguroha nga ang mga estudyante makasabut sa mosunod: Ang Pag-ula ni Jesukristo naghatag og paagi sa tanang mga anak sa Langitnong Amahan sa pagbuntog sa pisikal ug espirituhanong kamatayon. Mahimo nimong awhagon ang mga estudyante sa pagtimaan sa kanunay nga koneksyon sa kasulatan tali sa Pagkapukan ug sa Pag-ula samtang sila magtuon sa ilang mga kasulatan. Ikonsiderar ang pagpakigbahin niini nga kinutlo “Ang usa ka koneksyon maoy usa ka relasyon o sumpay tali sa mga ideya, katawhan, mga butang, o mga panghitabo. … Sa mainampoong paagi ang pag-ila, pagkat-on ug pagpamalandong sa maong mga koneksyon … makakuha og dinasig nga mga panabut ug mga bahandi sa natago nga kahibalo” [David A. Bednar, “A Reservoir of Living Water” (Church Educational System fireside alang sa young adults, Peb. 4, 2007), 4, lds.org/media-library].)
Hangyoa ang usa ka estudyante sa pagbasa og kusog sa mosunod, nga ang sumpay sa pamahayag ni Elder M. Russell Ballard:
Imahe
Elder M. Russell Ballard
“Ang kalit kaayo nga pagkuha kang Nathan gikan sa among mortal nga presensya mipatumong sa among mga kasingkasing ug hunahuna ngadto sa Pag-ula ni Ginoong Jesukristo. …
Ang bililhon nga pagkatawo, kinabuhi, Pag-ula diha sa Tanaman sa Getsemani, pag-antus diha sa krus, paglubong sa lubnganan ni Jose, ug mahimayaon nga Pagkabanhaw sa Manluluwas tanan nahimo alang kanamo nga usa ka nabag-o nga reyalidad. Ang Pagkabanhaw sa Manluluwas nagsiguro kanatong tanan nga sa umaabut kita usab mosunod Kaniya ug makasinati sa atong kaugalingon nga pagkabanhaw. Unsa nga kalinaw, unsa nga kahupayan kining mahinungdanon nga gasa nga moabut pinaagi sa mahigugmaong grasya ni Jesukristo, ang Manluluwas ug Manunubos sa tanang katawhan. Tungod Kaniya kami nasayud nga makauban namo pag-usab si Nathan” (“Ang Pag-ula ug ang Bili sa Usa ka Kalag,” 84).
Sa unsa nga paagi nga ang tubag sa pamilya ni Elder Ballard sa kamatayon sa ilang sakop sa pamilya naghulagway nga ang Pag-ula ni Jesukristo makatabang sa mga pamilya nga makasagubang sa dakong epekto sa Pagkapukan?
Unsay nahimo sa Pag-ula nga posible alang sa pamilya ni Nathan ug sa matag usa sa atong mga pamilya sa kahangturan?
Tuguti ang mga estudyante sa pagpalandong sa mosunod nga pangutana sa dili pa motawag kanila sa pagtubag:
Sa unsa nga mga paagi nga ang Pag-ula ni Kristo nakatabang sa inyong pamilya nga makabuntog sa pipila ka mga epekto sa Pagkapukan? (Isip kabahin sa panaghisgutan, ipasabut nga kadto lamang kinsa nahimong hingpit pinaagi sa gahum sa Pag-ula ni Jesukristo ang makahimo sa pagpuyo sa kahangturan sa mga kaminyoon ug mga pamilya.)
Tapusa pinaagi sa pagpakita ug pagdapit og usa ka estudyante sa pagbasa niini nga pamahayag ni Sister Julie B. Beck, kanhi kinatibuk-ang presidente sa Relief Society:
“Sa Ang Simbahan ni Jesukristo sa mga Santos sa Ulahing mga Adlaw, kita adunay teyolohiya sa pamilya nga nakabase sa Paglalang, sa Pagpakapukan, ug sa Pag-ula. Ang Paglalang sa yuta naghatag og dapit diin ang mga pamilya makapuyo. Ang Dios milalang sa lalaki ug babaye kinsa mao ang duha ka importanting kaparis sa usa ka pamilya. Kini kabahin sa plano sa Langitnong Amahan nga sila si Adan ug Eva ma-sealed ug mahimong mahangturong pamilya.
“Ang Pagkapukan mihatag og paagi alang sa pamilya nga motubo. Sila si Adan ug Eva mga lider sa pamilya kinsa mipili nga makasinati og mortal nga kasinatian. Ang Pagkapukan nakapahimong posible alang kanila sa pagbaton og mga anak nga lalaki ug mga anak nga babaye.
“Ang Pag-ula nagtugot sa pamilya nga ma-sealed sa kahangturan. Kini nagtugot sa mga pamilya nga makabaton og mahangturong paglambo ug pagkahingpit. Ang plano sa kalipay, nga gitawag usab og plano sa kaluwasan, maoy usa ka plano nga gimugna alang sa mga pamilya” (“Pagtudlo sa Doktrina kabahin sa Pamilya,” Liahona, Mar. 2011, 32).
Awhaga ang mga estudyante sa pagpamalandong sa ilang mga pagpamatuod sa Paglalang, sa Pagkapukan, ug sa Pag-ula ug unsay ilang mahimo sa pagdapit sa gahum sa Pag-ula nga mahimong mas epektibo kaayo sa ilang kaugalingong mga kinabuhi ug sa mga kinabuhi sa ilang mga pamilya.