Ang pagsimba sa balaang mga templo nag-andam nato nga mahimong mas maayo nga mga tinun-an ni Jesukristo, ug ang “sagrado nga mga ordinansa ug mga pakigsaad nga anaa [didto] makapahimo alang sa tagsa-tagsa sa pagbalik ngadto sa atubangan sa Dios” (“Ang Pamilya: Usa ka Pamahayag sa Kalibutann,” Liahona, Nob. 2010, 129). Si Presidente Howard W. Hunter (1907–95) miawhag sa mga miyembro sa Simbahan sa paghimo sa templo nga “ang importante nga simbolo sa ilang pagkamiyembro” (“The Great Symbol of Our Membership,” Ensign, Okt. 1994, 2). Niini nga leksyon ang mga estudyante makat-on sa mga paagi sa pagpalambo sa ilang pagsimba sa templo, sa ingon nagdala og mas dako nga mga panalangin ngadto sa mga kinabuhi sa ilang mga pamilya.
Background nga Basahunon
Richard G. Scott, “Pagsimba diha sa Templo: Ang Tinubdan sa Kalig-on ug Gahum sa mga Panahon sa Panginahanglan,” Liahona, Mayo 2009, 43–45.
L. Lionel Kendrick, “Enhancing Our Temple Experience,” Ensign, Mayo 2001, 78–79.
Pagpangandam sa Pagsulod sa Balaan nga Templo (booklet, 2002).
I-display ang litrato sa templo nga labing duol sa inyong balay. Itudlo nga ang mga pulong Pagkabalaan ngadto sa Ginoo gikulit sa gawas nga bahin sa matag templo. Dapita ang mga estudyante sa pagbasa sa Juan 2:13–16 ug ikonsiderar sa unsa nga paagi nga kini nga istorya naghulagway sa balaang matang sa mga templo.
Sa unsa nga paagi nga kini nga istorya naghulagway sa kinaiya nga kinahanglan natong ipakita ngadto sa templo?
Sa unsa nga mga paagi nga ang mga tawo karon magpakita og walay pagtahud sa templo?
Hangyoa ang usa ka estudyante sa pagbasa sa Doktrina ug mga Pakigsaad 109:20, nga kabahin sa gipahinungod nga pag-ampo alang sa Templo sa Kirtland:
Unsa nga baruganan ang atong makat-unan gikan niini nga bersikulo? (Ang mga tubag sa mga estudyante kinahanglang maglakip niini nga baruganan: Ang Dios misugo nga walay mahugaw nga butang nga tugutan nga makasulod sa Iyang balay. Itudlo nga sa mga kasulatan, ang mga templo kanunay nga gihulagway nga mga dapit sa kalimpyo, kaputli, kabalaan, ug katakus. Mahimo nimong awhagon ang mga estudyante sa pagbantay niini nga koneksyon kon magbasa sila bahin sa mga templo.)
Unsa ang pipila ka mga sumbanan sa katakus nga kinahanglang anaa sa mga indibidwal sa dili pa sila makasulod sa templo?
Hatagi ang mga estudyatne og pipila ka minuto sa pagtuon sa Doktrina ug mga Pakigsaad 109:10–13, 21–22, ug Salmo 24:3–5 ug ipapangita ang mga panalangin nga may kalabutan sa pagsimba sa templo nga takus. Mahimo nimong isugyot nga markahan nila ang ilang nakit-an.
Unsa nga mga saad ang gihatag niini nga mga bersikulo ngadto niadtong kinsa mosulod sa templo sa takus nga paagi? (Ang himaya sa Ginoo mosulod diha sa Iyang katawhan; kadtong kinsa mosulod sa templo mobati sa gahum sa Ginoo ug moila nga kini usa ka gibalaan nga dapit; sa mga templo, ang Ginoo mobutang sa iyang ngalan ngari nato, ug kita mobiya nga gisangkapan sa Iyang gahum; ug sa mga templo madawat nato ang mga panalangin ug pagkamatarung gikan sa Ginoo.)
Ngano sa inyong hunahuna nga kini nga mga saad nagdepende sa atong katakus?
Unsay inyong isulti ngadto sa usa ka tawo nga naghunahuna kon ang pagkakwalipay alang sa rekomend sa templo bililhon ba nga paningkamot?
Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:
Imahe
President Thomas S. Monson
“ Kadtong nakasabut sa mahangturong mga panalangin nga magagikan sa templo nasayud nga walay sakripisyo nga dako kaayo, walay kantidad nga bug-at kaayo, walay paningkamot nga lisud kaayo, aron makadawat niana nga mga panalangin. … Nakasabut sila nga ang makaluwas nga mga ordinansa nga madawat sa templo nga magtugot kanato nga makabalik sa atong Langitnong Amahan diha sa mahangturong relasyon sa pamilya ug aron matugahan sa mga panalangin ug gahum gikan sa kahitas-an bililhon sa tanang sakripisyo ug tanang paningkamot” (“Ang Balaan nga Templo—ang Suga sa Kalibutan,” Liahona, Mayo 2011, 92).
Unsa nga mga panalangin ang inyong madawat samtang kamo moapil sa mga ordinansa sa templo?
Awhaga ang mga estudyante sa pagkuha ug paghupot og magamit nga rekomend sa templo alang sa nahibilin sa ilang mga kinabuhi. Ipasabut nga kon mapainubsanon silang mosimba sa Ginoo diha sa Iyang templo, makadawat sila sa mga panalangin nga anaa lamang sa matinud-anon diha sa Iyang balaan nga balay.
Isulat ang mosunod sa pisara ug pangutan-a ang mga estudyante unsaon nila sa pagkompleto ang han-ay sa mga pulong:
Unsay atong makuha gikan sa templo magdepende sa .
Human sa pipila ka mga tubag, i-display ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
President Boyd K. Packer
“Unsay atong makuha gikan sa templo magdepende kaayo kon unsay atong gidala ngadto sa templo sa paagi sa pagpaubos ug balaang pagtahud ug tinguha nga makat-on. Kon kita matudloan tudloan kita sa Espiritu, diha sa templo” (Ang Balaan nga Templo [1980], 42).
Sa unsa nga paagi nga ang inyong kasinatian sa templo maapektahan kon kamo moadto uban sa espiritu sa “pagpaubos ug balaang pagtahud ug tinguha nga makat-on”? (Samtang motubag ang mga estudyante, isulat ang mosunod nga baruganan diha sa pisara: Kon moadto ta sa templo uban ang pagpaubos, balaang pagtahud, ug tinguha nga makat-on, tudloan kita sa Espiritu.)
Ipasabut ngadto sa mga estudyante nga sa dihang ang Manluluwas mibisita sa mga Nephite, gitudloan Niya sila og sumbanan sa pagsabut sa sagrado nga mga butang nga atong masunod kon motambong sa templo. Dapita ang usa ka estudyante sa pagbasa og kusog sa 3 Nephi 17:1–3.
Unsa ang gitudlo sa Manluluwas nga buhaton sa Iyang mga tigpaminaw nga makatabang kanila nga makaandam nga makasabut sa sagrado nga mga butang?
Unsaon nato sa pagsunod niini nga sumbanan aron mapalambo ang kalidad sa atong mga kasinatian didto sa templo? (Kinahanglan nga atong palandungon unsay atong masinati didto sa templo, mag-ampo alang sa pagsabut, mangandam sa pagtambong sa sunod higayon, ug mobalik kanunay kon motugot ang sirkumstansya.)
Basaha ang mosunod nga pamahayag ni Elder L. Lionel Kendrick sa Seventy, ug hangyoa ang mga estudyante sa pagpaminaw sa mga pulong nga nagsugyot og mga paagi nga makapalambo sa atong pagsimba sa templo.
Imahe
Elder L. Lionel Kendrick
“Adunay kalainan sa pagtambong lang sa templo ug pag-angkon og buhong nga espirituhanong kasinatian. Ang tinuod nga mga panalangin sa templo moabut kon palamboon nato ang atong kasinatian sa templo. Sa pagbuhat sa ingon, kinahanglan nga mobati kita sa espiritu sa balaang pagtahud alang sa templo ug sa espiritu sa pagsimba. …
“Ang pagpakita og balaang pagtahud dili lang pagpakahilum. Naglakip kini sa pagkahibalo unsay nahitabo. Naglakip kini sa balaang tinguha sa pagkat-on ug magmauyunon sa mga aghat sa Espiritu. Naglakip kini sa pagpaningkamot og dugang nga kahayag ug kahibalo. Ang walay balaang pagtahud dili lamang buhat nga walay tahud sa Dios, apan nakapahimo kini nga imposible alang sa Espiritu sa pagtudlo nato sa mga butang nga atong gikinahanglan nga mahibaloan” (“Enhancing Our Temple Experience,” Ensign, Mayo 2001, 78).
Unsa nga mga pulong niini nga pamahayag ang adunay kahulugan nganha kaninyo? Ngano man?
Basaha ang mosunod nga tambag ni Elder Richard G. Scott sa Korum sa Napulog Duha ka mga Apostoles, ug hangyoa ang mga estudyante sa pagpaminaw sa mga sugyot nga ilang magamit sa ilang pagbisita sa templo:
Imahe
Elder Richard G. Scott
“• Sabta ang doktrina nga may kalabutan sa mga ordinansa sa templo, ilabi na ang kamahinungdananon sa Pag-ula ni Jesukristo.
“• Samtang nag-apil sa mga ordinansa sa templo, hunahunaa ang inyong kalabutan ni Jesukristo ug ang Iyang kalabutan sa atong Langitnong Amahan. Kining yano nga buhat mosangput ngadto sa mas dako nga pagsabut sa balaanong kinaiyahan sa mga ordinansa sa templo.
“• Mainampuon nga magpahayag og pasalamat kanunay alang sa dili ikatandi nga mga panalangin nga midagayday gikan sa mga ordinansa sa templo. Pagpakabuhi sa matag adlaw aron sa paghatag og ebidensya ngadto sa Amahan sa Langit ug sa Iyang Pinalanggang Anak kon unsa gayud kamakahuluganon kadto nga mga panalangin nganha kaninyo.
“• Pag-iskedyul og regular nga mga pagbisita sa templo.
“• Paggahin og igong panahon nga dili magdali-dali sulod sa templo.
“• Pulipuliha ang mga kalihokan aron kamo makaapil sa tanang mga ordinansa sa templo.
“• Tangtanga ang inyong relo kon kamo mosulod sa balay sa Ginoo.
“• Paminaw og maayo sa pagpresentar sa matag elemento sa ordinansa uban sa bukas nga hunahuna ug kasingkasing.
“• Paghunahuna sa indibidwal kang kinsa ninyo gipahigayon ang mahinungdanon nga ordinansa. Usahay pag-ampo nga iyang mahibaloan ang kamahinungdanon sa mga ordinansa ug magmahimong takus o pag-andam nga mahimong takus aron makabenepisyo niini” (“Pagsimba diha sa Templo: Ang Tinubdan sa Kalig-on ug Gahum sa mga Panahon sa Panginahanglan,” Liahona, Mayo 2009, 43–44).
Hain niini nga mga ideya ang makahatag ninyo og dakong benepisyo nga inyong gamiton?
Unsa ang nabuhat ninyo o sa uban sa paghimo sa pagsimba diha sa balay sa Ginoo nga mas makahuluganon? Unsa nga kalainan ang mahimo niini kon buhaton ninyo kining mga butanga? (Isip kabahin sa panaghisgutan, ikonsiderar ang paghisgot sa mosunod nga pamahayag gikan sa Unang Kapangulohan: “Kon ang mga miyembro sa Simbahan makakita sa mga pangalan sa ilang mga katigulangan ug modala niini nga mga pangalan ngadto sa templo alang sa pagbuhat sa ordinansa, ang kasinatian sa templo buhong nga mapalambo” [sulat sa Unang Kapangulohan, Okt. 8, 2012].)
Awhaga ang mga estudyante sa pagsulat unsay ilang gibati nga buhaton aron mapalambo ang ilang kasinatian sa templo. Awhaga sila sa pagtuman sa unsay ilang gisulat.
Ipasabut nga ang pag-ampo sa pagpahinungod sa Templo sa Kirtland, si Propeta Joseph Smith mihulagway sa pipila ka mga katuyoan sa mga templo. Hangyoa ang usa ka estudyante sa pagbasa sa Doktrina ug mga Pakigsaad 109:8. Itudlo nga usa sa mga katuyoan mao nga mahimo kini nga “balay sa pagkat-on.”
Unsay atong mapaabut nga makat-unan sa mga templo?
I-display ang mosunod nga pamahayag ni Presidente Gordon B. Hinckley (1910–2008), ug hangyoa ang usa ka estudyante sa pagbasa niini og kusog:
Imahe
President Gordon B. Hinckley
“Kining sagrado nga building nahimong usa ka eskwelahan sa panudlo sa matam-is ug sagradong mga butang sa Dios. Dinhi atong gi-outline ang plano sa usa ka mahigugmaong Amahan alang sa Iyang mga anak sa tanang mga henerasyon. Dinhi kita adunay gihulagway nga odyssey [panimpalad] sa mahangturong panaw sa tawo gikan sa kinabuhi nga wala pa dinhi sa yuta hangtud sa kinabuhi human ang kamatayon. Ang labing mahinungdanon ug sukaranang mga kamatuoran gitudlo og maayo sa katin-aw ug kayano nga masabtan sa tanang naminaw” (“The Salt Lake Temple,” Ensign, Mar. 1993, 5–6).
Sa unsa nga paagi nga ang pag-apil sa mga ordinansa sa templo makatabang nato nga makat-on sa mga kamatuoran sa plano sa Langitnong Amahan?
Sa unsa nga paagi nga ang pagsunod sa sumbanan nga narekord sa 3 Nephi 17:1–3 makatabang nato nga makat-on pa og dugang samtang anaa kita sa templo?
I-display kini nga pahayag ni Presidente Gordon B. Hinckley:
Imahe
President Gordon B. Hinckley
“Daghan niadtong kinsa sa panahon sa kabug-at, kon ang malisud nga mga desisyon kinahanglan gayud nga himoon ug makalibug nga mga problema kinahanglan gayud nga atubangon, moadto sa templo sa espiritu sa pagpuasa ug pag-ampo aron mangayo og balaan nga direksyon. Daghan ang mipamatuod nga samtang ang mga tingog sa pagpadayag wala madungog, mga hunahuna kalabut sa dalan nga sundon nasinati niana nga panahon o sa kadugayan nga nahimong mga tubag sa ilang mga pag-ampo” (“The Salt Lake Temple,” Ensign, Mar. 1993, 6).
Tapusa pinaagi sa pagpangutana sa mga estudyante kon aduna ba kanila ang gustong mopakigbahin sa ilang mga pagbati ug mga pagpamatuod bahin sa templo. Hatagi og gibug-aton nga ang mga estudyante anaa sa importante kaayo nga panahon sa ilang kinabuhi, nga daghang mga desisyon kinahanglang himoon. Ipamatuod nga sa balay sa Ginoo, ang mga estudyante makabati sa Espiritu, kahupayan, ug giya sa Dios.