Ang atong sekso naestablisar sa wala pa kita matawo sa pagkamortal ug usa ka importante nga bahin sa atong mahangturong pagkatawo. Ang mga lider sa Simbahan mipaila sa kalainan sa pagkaibog sa managsama og sekso, nga dili sala, ug sa homosexual nga kinaiya, nga giisip nga sala kay supak kini sa plano sa Amahan sa atong kahimayaan. Kini nga leksyon makatabang sa mga estudyante nga makakita sa mapanagna nga gibasihan niining kalainan ug miila usab nga ang tanang mga anak sa Dios pareho nga hinigugma ug angayan nga tagdon uban sa gugma ug pagtahud.
Background nga Basahunon
Robert D. Hales, “Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015.
Jeffrey R. Holland, “Pagtabang Niadtong Nanglimbasug sa Pagkaibog sa Sama og Sekso,” Liahona, Okt. 2007, 42–45.
Dallin H. Oaks, “Same-Gender Attraction,” Ensign, Okt. 1995, 7–14.
Mga Hilisgutan sa Ebanghelyo, “Same-Sex Attraction,” lds.org/topics.
“Love One Another: A Discussion on Same-Sex Attraction,” mormonsandgays.org. Kon ang mga estudyante mangutana bahin sa polisiya sa Simbahan kabahin sa homosexuality, palihug i-refer sila niining opisyal nga website sa Simbahan.
Unsaon ninyo sa pag-summarize unsa ang gitudlo niini nga mga tinubdan bahin sa atong mahangturong pagkatawo? (Ang mga estudyante kinahanglang makakita sa mosunod: Ang atong sekso usa ka importante nga bahin sa atong mahangturong pagkatawo ug katuyoan.)
Ngano nga makatabang alang nato ang pagsabut nga anaa na kitay sekso sa wala pa kita moanhi sa yuta? (Samtang ang mga estudyante motubag, mahimo nimong ipakigbahin ang mosunod nga pamahayag ni Presidente Joseph Fielding Smith [1876–1972]: “Sa Genesis mabasa nato: … ‘Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila.’ [Genesis 1:27; italics gidugang.] Dili ba mahimo ang pagtuo nga ang babaye nga mga espiritu gilalang subay sa dagway sa usa ka ‘Inahan sa Langit’?” [Answers to Gospel Questions, comp. Joseph Fielding Smith Jr., 5 vols. (1957–66), 3:144].)
Sa unsa nga paagi nga ang pagsabut sa mahangturong kinaiya sa sekso makatabang nato nga magpuyo nga nahiuyon sa plano sa Langitnong Amahan sa kalipay, bisan kon ang katilingban usahay dili manumbaling sa lahi kaayo nga mga sumbanan sa kinaiya?
Aron matabangan ang pangutana sa ibabaw, ipakigbahin ang mosunod nga doktrinal nga mga pamahayag ni Elder Dallin H. Oaks sa Korum sa Napulog Duha ka mga Apostoles. Ikonsiderar ang tagsa-tagsa nga pagbasa sa matag paragraph ug maghisgot unsa ang gitudlo niini kon sa unsa nga paagi nga ang homosexual nga kinaiya supak sa plano sa Amahan sa kahimayaan sa Iyang mga anak.
Imahe
Elder Dallin H. Oaks
“Ang katuyoan sa mortal nga kinabuhi ug ang misyon sa Ang Simbahan ni Jesukristo sa mga Santos sa Ulahing mga Adlaw mao ang pag-andam sa mga anak sa Dios alang sa ilang kapalaran—nga mahimong sama sa atong langitnong mga ginikanan.
“Ang atong mahangturong kapalaran—kahimayaan didto sa celestial nga gingharian—nahimo lamang nga posible pinaagi sa pag-ula ni Jesukristo (pinaagi niini kita mahimo ug magpabilin nga ‘walay sala sa atubangan sa Dios’ [D&P 93:38]) ug anaa lamang sa usa ka lalaki ug usa ka babaye kinsa nakigsaad ug nagmatinuod-anun sa mga pakigsaad sa usa ka mahangturong kaminyoon diha sa templo sa Dios (tan-awa sa D&P 131:1–4; 132). …
“Tungod kay si Satanas nagtinguha nga ang ‘tanan nga mga tawo unta mahimo nga mauyamot sama ngadto kaniya’ (2 Ne. 2:27), ang iyang grabe nga paningkamot gidirekta sa pag-awhag niadto nga mga pagpili ug mga aksyon nga makapugong sa plano sa Dios alang sa iyang mga anak. Nagtinguha siya sa pagbaliwala sa baruganan sa indibidwal nga tulubagon, sa pagdani nato nga gamiton sa dili saktong paagi ang atong sagrado nga mga gahum sa paglalang, sa pagkawala sa kadasig sa takus nga mga lalaki ug babaye nga magminyo ug manganak, ug sa paglibog unsay gipasabut nga mahimong lalaki o babaye” (“Same-Gender Attraction,” Ensign, Okt. 1995, 7–8).
Ang Simbahan nag-ila sa kalainan tali sa sama nga sekso nga pagkaibog ug homosexual nga kinaiya
Hatagi ang mga estudyante og kopya sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Dapita ang mga estudyante sa pagtuon sa pamahayag, mangita sa mga baruganan nga gitudlo ni Elder Holland bahin niadtong mga tawo nga maibog sa sama og sekso ug unsaon sa pagtabang nila uban ang gugma.
Imahe
Elder Jeffrey R. Holland
“Usa ka maayo og panagway nga lalaki sa iyang bag-ohay pa lang nga pagka-20 milingkod atbang kanako. Siya adunay madanihon nga pahiyom, bisan og dili siya kanunay nga mopahiyom sa panahon sa among pag-istoryahanay. Unsa ang nakapakuha sa akong pagtagad mao ang kasakit nga iyang gibati nga akong nakita pinaagi sa iyang mga mata.
“‘Wala ako masayud kon ako magpabilin pa nga miyembro sa Simbahan,’ siya miingon. ‘Ako naghunahuna nga dili ko takus.’
“‘Nganong dili man ka mahimong takus?’ Nangutana ko.
“Ako usa ka bayot.”
“Siya nagtuo nga ako makuratan. Apan wala. ‘Ug … ?’ Ako nangutana.
“Ako nakakita og pagkahupay sa iyang nawong sa dihang iyang nabantayan ang akong padayon nga kalooy. ‘Dili ko madani sa mga babaye. Ako madani sa mga lalaki. Ako naningkamot nga dili tagdon kini nga mga pagbati o usabon kini, apan …’
“Nanghupaw siya. ‘Nganong ingon ani man ko? Ang mga pagbati tinuod gayud.’
“Ako mihunong og kadiyot, dayon miingon, ‘ako nagkinahanglan og mas daghang impormasyon una ako motambag nimo. Kon imong tan-awon, ang pagkaibog sa sama sekso dili usa ka sala, apan ang pagsunod niadtong mga pagbati mao ang sala—managsama ra kini sa heterosexual nga mga pagbati. Nakalapas kaba sa balaod sa kaputli?’
“Siya naglingo-lingo sa iyang ulo. ‘Wala, wala ko makalapas.’
“Niining higayuna nakaginhawa ko og luag. ‘Salamat sa imong tinguha sa pag-atubang sa imong problema,’ ako miingon. ‘Kini nagkinahanglan og kaisug nga istoryahan ang kabahin niini, ug ikaw akong gipasidunggan nga imong napadayon ang imong kaugalingon nga limpyo.
“‘Sa hinungdan nganu nga ingon niana ang imong pagbati, dili ko makatubag kana pangutana. Pipila ka mga hinungdan ang sigurong nalakip, ug sila mahimong managlahi, sama nga ang mga tawo managlahi. Ang ubang mga butang, lakip na ang rasonsa imong mga pagbati, mahimong dili gayud nato mahibaloan niini nga kinabuhi. Apan ang pagkahibalo ngano nga ingon niana ang imong pagbati dili sama kaimportante sa pagkahibalo nga ikaw wala makasala. Kon ang imong kinabuhi nahiuyon sa mga kasugoan,dayon ikaw takus nga moalagad diha sa Simbahan, adunay tanang mga katungod sa pagka-miyembro sama sa ubang mga miyembro, moadto sa templo, ug modawat sa tanang mga panalangin sa Pag-ula sa Manluluwas.’
“Siya milingkod nga mas tul-id og gamay. Ako mipadayon, ‘Wala nimo tagda og maayo ang imong kagualingon sa diha nga imong nahibaloan nga ikaw madani sa sama nimo og sekso. Dili lamang kana ang imong kinaiya, busa ayaw kini hatagi og sobrang pagtagad. Ang pinka una ug pinakaimportante nga mao nga ikaw usa ka anak sa Dios ug siya nahigugma kanimoIkaw una ug labing importante usa ka anak nga lalaki sa Dios, ug Siya nahigugma nimo’” (“Pagtabang Niadtong Nanglimbasug sa Pagkaibog sa Sama og Sekso,” Liahona, Okt. 2007, 40).
Unsa nga mga baruganan ang inyong nakita sa tambag ni Elder Holland?
Isulat ang mosunod nga mga baruganan diha sa pisara samtang ang mga estudyante mopakigbahin niini, ug hisguti uban nila nga may pagkasensitibo:
Mabati nato ang gugma sa Dios kon kita mo-focus sa atong pagkatawo isip Iyang mga anak.
Ang pagkaibog sa mga tawo sa managsama og sekso dili supak sa balaod sa kaputli, apan ang pagpaundayon niana nga kaibog mao ang sala. Ikonsiderar ang pagpakigbahin sa Doktrina ug mga Pakigsaad 59:6: “Dili kamo … manapaw … ni magbuhat sa bisan unsa nga butang nga sama niini” magpasabut nga ang “bisan unsa nga butang nga sama niini” nagpasabut sa sekswal nga kasuod nga gawas sa talikala sa kaminyoon. Ang homosexual nga kinaiya usa ka sala, sama nga ang heterosexual nga mga relasyon nga gawas sa kaminyoon sala. Si bisan kinsa nga moapil sa bisan unsang matang sa sekswal nga sala mapasaylo pinaagi sa paghinulsol.
Bisan unsa pa ang mga rason nga ang pipila ka mga tawo maibog sa sama og sekso, ang tanang mga tawo makapili nga magpuyo nga nahiuyon sa mga sugo sa Dios. Ipasabut ang mosunod nga pamahayag ni Dallin H. Oaks sa Korum sa Napulog Duha ka mga Apostoles: “Daghan kaayo ang wala nato masabti bahin niini nga hilisgutan, nga mas maayo nga magpabilin kita nga duol sa unsay atong nahibaloan gikan sa gipadayag nga pulong sa Dios. Unsay atong nahibaloan mao nga ang doktrina sa Simbahan, kanang sekswal nga kalihokan kinahanglang mahitabo lang tali sa usa ka lalaki ug usa ka babaye kinsa naminyo, wala mausab ug dili mausab” (“What Needs to Change,” mormonsandgays.org).
Kon kita magpuyo nga nahiuyon sa mga sugo sa Dios, matagamtaman nato ang tanang mga pribilehiyo sa pagkamiyembro sa Simbahan ug sa mga panalangin sa Pag-ula sa Manluluwas. Bisan tuod og ang mga indibidwal wala magpili sa pagbaton niana nga kaibug sa mga tawo sa sama og sekso, sila makapili unsaon pagtubag niana nga kaibug.
Human malista kini nga mga baruganan diha sa pisara, pangutana:
Sa unsang mga paagi nga kini nga mga baruganan makahatag og paglaum niadtong kinsa nakasinati og kaibog sa sama og sekso?
Unsa ang ubang mga baruganan nga atong makat-unan gikan sa mga pamahayag ni Elder Holland?
Kinahanglang tagdon nato ang uban pinaagi sa gugma ug pagtahud
(Pahinumdom: Sa inyong pagtudlo niini nga seksyon sa leksyon, siguroha ang pagpasabut nga kadtong mga tawo nga maibog sa sama og sekso nga walay gihimo niana nga kaibog dili sala sama sa babaye nga nanapaw. Bisan pa niana, ang aksyon ni Kristo ngadto sa babaye usa ka ehemplo kon unsaon nato sa pagtagad ang tanang mga tawo—miapil man sila o wala sa imoral nga kinaiya.)
Sultihi ang mga estudyante nga si Apostol Juan mirekord og usa ka okasyon sa dihang ang Manluluwas nag-atubang og usa ka sensitibo kaayo nga sitwasyon. Hatagi ang mga estudyante og pipila ka minuto sa pagtuon sa Juan 8:1–11, mangita kon giunsa pagtagad sa Manluluwas ang babaye nga nanapaw. Tabangi ang mga estudyante nga ipahisama kini nga istorya ngadto sa ilang kaugalingong mga kinaiya ug mga aksyon ngadto niadtong kinsa naghimo og homosexual ug ubang imoral nga kinaiya pinaagi sa pagpangutana sa mosunod nga mga pangutana:
Unsay gitudlo sa mga aksyon sa Manluluwas kanato bahin kon unsaon nato sa pagtagad ang uban? (Bisan og wala Niya palabya ang sala sa babaye, gitagad Niya ang babaye uban sa kamabination ug pagtahud, dili kabangis.)
Unsaon nato paggamit ang ehemplo sa Manluluwas ngadto sa atong kaugalingong mga kinaiya ngadto sa bayot ug tomboy nga mga kaigsoonan, bisan pa og miapil sila o wala sa imoral nga mga kinaiya? Samtang motubag ang mga estudyante, isulat ang mosunod nga baruganan diha sa pisara: Nagsunod kita sa ehemplo sa Manluluwas kon kita mosabut sa tanang mga anak sa Dios ug motagad nila uban ang pagkasensitibo ug kamabination. (Tan-awa usab sa Mateo 7:12; Juan 15:12.)
Ikonsiderar ang pagpakita sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug paghangyo sa usa ka estudyante sa pagbasa niini og kusog:
Imahe
Elder Dallin H. Oaks
“Klaro nga ang Ginoo wala mohatag og katarungan sa sala sa babaye. Gisultihan lang Niya siya nga wala Siya manghimaraut kaniya—mao nga, dili Siya makahatag og katapusang paghukom kaniya nianang higayuna. Kini nga panabot gikumpirmar sa unsay Iyang gisulti ngadto sa mga Pariseo: ‘Kamo nagahukom pinasubay sa tawhanong paagi; apan wala ako maghukom ni bisan kinsa’ (Juan 8:15). Ang babaye nga nanapaw gihatagan og panahon sa paghinulsol, panahon nga dili unta ihatag niadtong gusto nga mobato kaniya” (“‘Judge Not’ and Judging,” Ensign, Ago. 1999, 8).
Tingali ang mga estudyante makabenepisyo gikan sa pagkat-on niana, sumala sa Hubad ni Joseph Smith sa Juan 8:11, human sa iyang inter-aksyon sa Manluluwas “ang babaye mihimaya sa Dios nianang taknaa, ug mituo sa iyang ngalan” (sa Juan 8:11).
I-display ang mosunod nga pamahayag ni Elder Quentin L. Cook sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Quentin L. Cook
“Isip usa ka Simbahan, walay laing mas mahigugmaon ug maloloy-on. Kinahanglan nga kita ang mag-una sa pagpadayag og gugma, kalooy ug pagtabang. Dili nato tugutan nga ang mga pamilya mosalikway o dili motahud niadtong kinsa mopili og lahi nga estilo sa kinabuhi isip resulta sa ilang mga pagbati sa ilang kaugalingong sekso” (“Love One Another: A Discussion on Same-Sex Attraction,” mormonsandgays.org).
Dapita ang mga estudyante sa pagtimbang-timbang sa ilang kaugalingong mga kinaiya ug mga aksyon ngadto sa mga tawo nga maibog sa sama og sekso. Kadto bang mga kinaiya ug mga aksyon nahiuyon sa mga pagtulun-an ug ehemplo sa Ginoo?
Unsay inyong buhaton kon kamo anaa sa grupo nga mohimo og panginsulto nga mga komentaryo bahin sa mga tawo nga nakasinati og kaibog sa sama og sekso?
Ipamatuod nga kon kita mopakita og mas dako nga gugma ug kamabination ngadto sa atong mga igsoon nga bayot ug tumboy, ang mga kinabuhi mausab, mga pamilya maayo, ug ang mga tawo nga mibati nga gisalikway gikan sa Simbahan mobati nga mas welcome sa mga miyembro sa Simbahan. Pahinumdumi ang mga estudyante nga ang mga panalangin sa Pag-ula ni Jesukristo anaa alang ni bisan kinsa nga nagtinguha sa pagsunod sa mga sugo ug magpabilin nga matinud-anon sa mga pakigsaad sa ebanghelyo.
Dapita ang mga estudyante sa paghunahuna sa mga indibidwal nga ilang nailhan nga naibog sa sama og sekso ug pagpamalandong unsay ilang mahimo aron mas maloloy-on ngadto nila samtang matinud-anong nagsunod sa balaod sa Ginoo sa kaputli.