Mahangturon nga Kaminyoon

Pasiuna

Ang mahangturon nga kaminyoon importante sa kahimayaan sa labing taas nga ang-ang sa celestial nga gingharian, ug makab-ot lamang kini kon na-seal pinaagi sa tukma nga awtoridad diha sa templo ug dayon magpuyo sumala sa mga pakigsaad nga gisudlan nianang higayuna. Kini nga leksyon momatuod pag-usab ngadto sa mga estudyante nga ang pagminyo sa sakto nga tawo sa sakto nga lugar ug sa sakto nga awtoridad mao ang labing importante nga desisyon nga ilang mahimo.

Background nga Basahunon

Russell M. Nelson, “Celestial nga Kaminyoon,” Liahona, Nob. 2008, 92–95.
“Dungganon, Malipayon, Malampuson nga Kaminyoon,” Hugna 18 sa Mga Pagtulun-an sa mga Presidente sa Simbahan: Spencer W. Kimball (2006), 237–252.
Cree-L Kofford, “Marriage in the Lord’s Way, Part One,” Ensign, Hunyo 1998, 7–12.

Mga Sugyot alang sa Pagtudlo

Doktrina ug mga Pakigsaad 132:1–24

Ang doktrina sa mahangturon nga kaminyoon

Ipasabut nga ang kaimportante sa kaminyoon gitudlo na sukad pa sa labing unang mga adlaw sa Simbahan. Hinoon, ang doktrina sa mahangturon nga kaminyoon, wala pa kaayo matudlo ni Propeta Joseph Smith hangtud sa panahon sa Nauvoo. Ipakita ang mosunod nga pamahayag ni Elder Parley P. Pratt (1807–57) sa Korum sa Napulog Duha ka mga Apostoles, nga naghulagway unsay iyang gibati sa dihang iyang nahibaloan sa unang higayon nga ang kaminyoon mohangtud sa kahangturan. Dapita ang usa ka estudyante sa pagbasa niini og kusog:

“Kini gikan ni [Joseph Smith] nga ako nakakat-on nga ang asawa sa akong dughan mahimong mahuptan nako karon ug sa tanang kahangturan. … Kini gikan kaniya nga ako nakakat-on nga mahimo natong ugmaron kini nga mga pagbati, ug patubuon ug palamboon ngadto sa tanang kahangturan; samtang ang resulta sa atong panaghiusa mao ang kaliwatan ingon ka daghan sa mga bitoon sa langit, o sa balas sa baybayon sa dagat. … Nahigugma ako kaniadto, apan wala ko masayud kon ngano. Apan karon ako nahigugma—uban sa usa ka lunsay—labihan ka kusog nga pagtuboy, gibayaw nga pagbati” (Autobiography of Parley P. Pratt, ed. Parley P. Pratt Jr. [1938], 297–98).

Unsay epekto ngadto ni Elder Pratt ang bag-ong nasabtan bahin sa kaminyoon sa iyang mga pagbati alang sa iyang asawa?

Ipasabut nga daghan sa mga pagtulun-an sa Ginoo bahin sa mahangturon nga kaminyoon makita sa Doktrina ug mga Pakigsaad 132. Dapita ang usa ka estudyante sa pagbasa og kusog sa Doktrina ug mga Pakigsaad 132:19. Hangyoa ang klase sa pagsunod ug pag-ila sa mga kondisyon nga kinahanglang buhaton aron ang kaminyoon mahimong mahangturon.

Unsa nga kondisyon ang kinahanglang buhaton aron ang kaminyoon mahimong mahangturon? (Kinahanglang masabtan sa mga estudyante ang mosunod: Ang kaminyoon mahangturon alang niadtong naminyo pinaagi sa pulong sa Dios, kansang kaminyoon gi-seal sa Balaang Espiritu sa Saad, ug kinsa magpabilin diha sa pakigsaad.)
Unsay gipasabut sa “magpabilin diha sa pakigsaad”? (Sa pagtuman sa mga kasabutan ug mga kondisyon sa pakigsaad sa kaminyoon. Samtang ang usa ka lalaki ug usa ka babaye mosulod ngadto sa mahangturon nga kaminyoon, mohimo sila og ligdong nga mga saad ngadto sa usag usa ug ngadto sa Dios. Ngadto sa kapikas, mosaad sila nga maghigugmaay ug magserbisyo sa usag usa nga walay pagkapakyas uban sa hingpit nga pagkamaunungon. Ngadto sa Dios, ligdong silang mosaad sa pagtuman sa mga kasabutan ug mga kondisyon sa mga pakigsaad nga gihimo sa templo.)
Unsay gipasabut nga ang kaminyoon “gi-seal ngadto kanila pinaagi sa Balaan nga Espiritu sa saad”? (Ikonsiderar ang pagpasabut nga ang Balaan nga Espiritu sa Saad mao ang usa sa mga titulo sa Espiritu Santo. Ang Espiritu Santo adunay daghang mga titulo, lakip sa Maghuhupay o Tigpadayag. Ang matag usa niini nga mga titulo nagpasabut sa usa sa Iyang piho nga mga responsibilidad o mga kalihokan.)

Aron matabangan ang mga estudyante nga makasabut sa titulo sa Balaan nga Espiritu sa Saad, i-display ang mosunod nga pamahayag ug hangyoa ang usa ka estudyante sa pagbasa niini og kusog:

“Ang Espiritu Santo mao ang Balaan nga Espiritu sa Saad (Mga Buhat 2:33). Nagmatuod Siya nga madawat sa Dios ang matarung nga mga buhat, ordinansa, ug mga pakigsaad sa mga tawo. Ang Balaan nga Espiritu sa Saad mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan” (Giya ngadto sa mga Kasulatan, Balaan nga Espiritu sa Saad,” scriptures.lds.org).

Sa unsa nga paagi nga kini nga pamahayag makatabang sa pagpasabut ngano nga ang kahimayaan nagkinahanglan og mas labaw pa sa pagka-seal diha sa templo? Unsa pay angay nga mahitabo? (Kinahanglan usab kita nga magpuyo og matarung nga kinabuhi ug magpabilin nga matinud-anon sa tanang makaluwas nga mga ordinansa, lakip sa bunyag, sa sakrament, sa mga ordinasyon sa priesthood, ug sa mga ordinansa sa templo. Kon magpabilin lamang kita nga matinud-anon nga ang Espiritu Santo mosaksi ngadto sa Amahan nga ang mga pakigsaad natuman.)

Tabangi ang mga estudyante nga mas makasabut sa mahangturon nga kaminyoon pinaagi sa pagkomparar ug pagtandi niini sa sibil nga kaminyoon gamit ang mosunod nga diagram. Kopyaha ang mosunod nga diagram diha sa pisara:

Pares-parisa ang klase. Hangyoa ang usa ka estudyante sa matag pares sa pagtuon sa Doktrina ug mga Pakigsaad 132:15–18 ug ang laing estudyante sa pagtuon sa Doktrina ug mga Pakigsaad 132:19–24. Dapita ang mga estudyante sa pagtimaan sa mga pulong nga naghulagway sa mga kahimtang nga naghulat niadtong magminyo sa sibil nga paagi ug sa mga panalangin nga naghulat niadtong kinsa magminyo sa kahangturan.

Human sa igong panahon, hangyoa ang mga estudyante sa pagpakigbahin sa ilang nakit-an sa usag usa. Dayon ipangutana:

Human sa kamatayon, sa unsa nga paagi nga ang mga kahimtang niadtong nagminyo sa sibil nga paagi lahi gikan niadtong kinsa naminyo alang sa kahangturan? (Samtang motubag ang mga estudyante, mahimo nimong idugang ang ilang mga tubag ngadto sa diagram diha sa pisara. Mahimo nimong ipasabut nga ang mga kahimtang nga gihulagway sa mga bersikulo 20–24 susama sa mga panalangin nga gisaad sa pakigsaad sama kang Abraham [tan-awa sa Genesis 17:1–7; 22:17].)

Aron matabangan nga matubag kini nga pangutana, ikonsiderar ang pagpakigbahin sa mosunod nga pamahayag ni Elder Cree‑L Kofford sa Seventy:

“Ang awtoridad sa mga saad sa celestial nga kaminyoon nagagikan sa Dios, ug ang mga sangputanan sa inyong pagkapakyas sa pagtuman niadto nga mga saad magagikan usab sa Dios. Sa usa ka sibil nga kaminyoon, ang awtoridad sa mga saad tali sa pangasaw-unon ug pamanhunon mao ang kaligdong sa duha ka tawo. Mao ra kana ang mahitungod sa sibil nga kaminyoon. Dili kini. Ang awtoridad niini gikan sa tawo ug dili gikan sa Dios” (“Marriage in the Lord’s Way, Part One,” Ensign, Hunyo 1998, 9).

Unsay inyong mga hunahuna samtang inyong gikomparar ang mga kahimtang nga gilista diha sa pisara?
Unsa nga mga panalangin ang inyong naobserbahan sa mga panimalay niadtong nagminyo sa templo ug naningkamot nga magpuyo nga matinud-anon sa ilang mga pakigsaad? Unsay inyong nakita nga gibuhat niini nga mga magtiayon sa pagtuman sa ilang mga pakigsaad? (Isip kabahin niini nga panaghisgutan, mahimo nimong ipakigbahin kini nga pamahayag bahin sa kaminyoon pinaagi ni Elder L. Whitney Clayton sa Seventy: “Walay laing relasyon nga makahatag og dakong kalipay, momugna og kaayo, o dakong personal nga kalamboan” [“Kaminyoon: Tan-awa ug Pagkat-on,” Liahona, Mayo 2013, 83].)

Ipasabut ngadto sa klase nga sa Doktrina ug mga Pakigsaad 132 naglakip usab sa pipila ka instruksyon sa Ginoo sa paghimo sa dinaghan nga kaminyoon. Misugo ang Ginoo sa mga Santos sa pagsunod sa balaod sa dinaghan nga kaminyoon isip kabahin sa pagpahiuli sa tanang mga butang (tan-awa sa Mga Buhat 3:21; D&P 132:45). Ang mga miyembro sa Simbahan nagsunod niini nga balaod hangtud 1890, sa dihang gipadayag sa Ginoo ngadto ni Presidente Wilford Woodruff nga wala na Niya kinahanglana gikan sa mga miyembro sa Simbahan ang pagbuhat sa ingon. Aron maklaro ang posisyon sa Simbahan bahin sa dinaghan nga kaminyoon karon, dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley (1910–2008):

“Kon si bisan kinsa sa among mga miyembro makita nga nagpraktis og dinaghan nga kaminyoon, sila i-excommunicate, ang labing seryoso nga silot nga ikapahamtang sa Simbahan. … Labaw sa usa ka siglo ang milabay klaro nga gipadayag sa Dios ngadto sa Iyang propeta nga si Wilford Woodruff nga kinahanglang hunongon na ang pagbuhat sa dinaghan nga kaminyoon, nagpasabut nga kini supak na sa balaod sa Dios. Gani diha sa mga nasud diin ang sibil o relihiyuso nga balaod nagtugot sa dinaghan nga kaminyoon [polygamy], ang Simbahan nagtudlo nga kinahanglan ang kaminyoon usa ray bana ug usa ray asawa ug kini dili modawat sa pagkamiyembro niini niadtong nagbuhat sa dinaghan nga kaminyoon” (“What Are People Asking about Us?” Ensign, Nob. 1998, 71–72).

Kon adunay mga pangutana ang mga estudyante bahin sa dinaghan nga kaminyoon, i-refer sila ngadto sa Gospel Topics, “Plural Marriage The Church of Jesus Christ of Latter-day Saints,” [Dinaghan nga Kaminyoon sa Ang Simbahan ni Jesukristo sa mga Santos sa Ulahing mga Adlaw] lds.org/topics.

Doktrina ug mga Pakigsaad 131:1–4

Ang kaimportante sa pagpili sa mahangturon nga kaminyoon

Dapita ang usa ka estudyante sa pagbasa og kusog sa Doktrina ug mga Pakigsaad 131:1–4. Hangyoa ang klase sa pagpangita kon nganong importante kanato nga magminyo sa paagi nga gitakda sa Ginoo.

Unsa nga panalangin ang naghulat niadtong mosulod ngadto sa bag-o ug walay katapusan nga pakigsaad sa kaminyoon? (Siguroha nga ang mga estudyante makasabut niini nga baruganan: Kon mosulod kita ngadto sa bag-o ug walay katapusan nga pakigsaad sa kaminyoon, mahimaya kita sa labing taas nga ang-ang sa celestial nga gingharian. Ipasabut nga niini nga konteksto ang pulong bag-o nagpasabut nga kini nga pakigsaad bag-ong gipahiuli sa atong dispensasyon. Ang pulong nga walay katapusan nagpasabut nga kini nga pakigsaad molahutay sa kahangturan ug gi-orden sa premortal nga kinabuhi sa kalibutan sa espiritu isip kabahin sa plano sa kaluwasan. Kabahin kini sa ebanghelyo ni Jesukristo gikan sa panahon ni Adan. Bahin sa pulong nga makabaton og anak, si Propeta Joseph Smith mitudlo nga kadtong makaangkon sa labing taas nga ang-ang sa celestial nga gingharian “magpadayon sa pagpanganak sa celestial nga himaya” [sa History of the Church, 5:391].)

Ipakita ang mosunod nga pamahayag ni Presidente Russell M. Nelson ug hangyoa ang usa ka estudyante sa pagbasa niini og kusog:

“Ang [kaluwasan] nagpasabut nga maluwas gikan sa pisikal ug espirituhanon nga kamatayon. … Ang [kahimayaan] nagpasabut sa kinatas-ang kahimtang sa kalipay ug himaya sa celestial nga gingharian” (“Kaluwasan ug Kahimayaan,” Liahona, Mayo 2008, 8).

“Samtang ang kaluwasan maoy usa ka indibidwal nga butang, ang kahimayaan mao ang usa ka butang nga may kalabutan sa pamilya. Kadto lamang kinsa naminyo didto sa templo ug kansang kaminyoon gibugkos pinaagi sa Balaan nga Espiritu sa Saad magpadayon isip mga kapikas human sa kamatayon ug makadawat sa labing taas nga ang-ang sa celestial nga himaya o kahimayaan” (“Celestial nga Kaminyoon,” Liahona, Nob. 2008, 92).

Ngano nga ang mahangturon nga kaminyoon importante kaayo? (Samtang motubag ang mga estudyante, ug sumala sa giya sa Espiritu, mahimo nimong hatagan og gibug-aton ang makaguba nga uso sa kalibutan karon sa mga tawo nga mopili nga dili magminyo tungod kay giisip nila nga importante ang panarbaho kay sa pagtuman sa plano sa Dios alang kanila. Pinaagi sa pagsalikway sa kaminyoon, nawala ang mga panalangin nga gustong ihatag karon sa Dios kanila ug sa kahangturan.)
Ngano kaha nga ang kaminyoon sa templo makahatag sa magtiayon og dakong mga posibilidad sa kalipay kay sa sibil nga kaminyoon o pagpuyo-puyo?

Aron matabangan ang mga estudyante nga makasabut nga ang tanang mga Santos sa katapusan makadawat sa panalangin sa mahangturon nga kaminyoon basta di nila ibutang sa kompromiso ang ilang mga sumbanan sa bisan unsang paagi, hangyoa ang usa ka estudyante sa pagbasa og kusog sa mosunod nga pamahayag ni Presidente Howard W. Hunter (1907–95):

“Walay panalangin, ang gilakip nianang mahangturong kaminyoon ug mahangturong pamilya, nga dili ihatag ngadto ni bisan kinsang takus nga indibidwal. Samtang kini ingon og madugay—gani lapas pa niining mortal nga kinabuhi—alang sa uban ang pagkab-ot niini nga panalangin, dili kini ikawang” (“The Church Is for All People,” Ensign, Hunyo 1989, 76).

Pila ninyo ang nakaila sa mga tawo kinsa nagtinguha nga maminyo sa templo apan wala niini nga oportunidad? Sa unsa nga paagi nga ang saad sa pamahayag ni Presidente Hunter makatabang niini nga mga tawhana?

Tapusa pinaagi sa pagdapit sa mga estudyante sa pagsulat sa tubag sa usa o duha sa mosunod nga mga pangutana:

Unsa nga mga desisyon ang akong gihimo nga mogiya nako ngadto sa pagka-seal sa templo?
Unsa nga mga bahin sa akong kinabuhi ang nagkinahanglan og kausaban o pagtubo aron nga andam ako nga ma-seal sa templo?

Dapita ang pipila ka estudyante sa pagpakigbahin unsay ilang gibuhat sa pag-andam alang sa kaminyoon sa templo. Ipakigbahin ang imong pagpamatuod nga kon ang bana o asawa motuman sa mga pakigsaad nga ilang gihimo sa dihang na-seal sila sa templo, pagahiusahon sila sa kahangturan. Ipakigbahin sa unsa nga paagi nga kini nga kahibalo usa ka panalangin sa imong kinabuhi.

Mga Basahunon sa Estudyante

Doktrina ug mga Pakigsaad 131:1–4; 132:1–24.
Russell M. Nelson, “Celestial nga Kaminyoon,” Liahona, Nob. 2008, 92–95.