Leksyon 19: Pagtukod og mga Kinabuhi ug mga Panimalay nga Nakasentro ni Kristo
19
Pagtukod og mga Kinabuhi ug mga Panimalay nga Nakasentro ni Kristo
Pasiuna
Si propeta Helaman mitudlo sa iyang mga anak nga lalaki nga kon ilang tukuron ang ilang mga kinabuhi diha sa tinuod nga tukuranan ni Jesukristo, si Satanas walay gahum sa paglaglag kanila (tan-awa sa Helaman 5:12). Niini nga leksyon, ang mga estudyante maghisgot unsaon sa pagtukod sa ilang mga pamilya diha sa tukuranan ni Jesukristo. Kon ang mga sakop sa pamilya mosentro sa ilang kinabuhi sa mga pagtulun-an ni Jesukristo, ilang maayo ug mapalig-on ang mga relasyon ug makakita og mas dako nga kalipay.
Background nga Basahunon
Henry B. Eyring, “Ang Atong Hingpit nga Ehemplo,” Liahona, Nob. 2009, 70–73.
Richard G. Scott, “Alang sa Kalinaw sa Panimalay,” Liahona, Mayo 2013, 29–31.
Pagtukod og mga kinabuhi ug mga panimalay nga nakasentro ni Kristo
Sugdi ang klase pinaagi sa pagdrowing og yanong balay o ubang mga building diha sa pisara. Hisguti ang mosunod uban sa mga estudyante:
Unsay bili sa usa ka tukuranan ngadto sa balay o estraktura?
Ngano nga ang ubang mga materyal sa building makahimo og mga tukuranan nga mas lig-on kay sa uban?
Pahinumdumi ang mga estudyante nga ang tanang mga pamilya makasinati og mga kalisud sa lain-laing ang-ang, ug si Satanas nagtinguha sa paglaglag sa tanang mga pamilya. Gikan sa Basahon ni Mormon makat-unan nato ang sigurado nga paagi nga maminusan ang mga impluwensya ni Satanas sa atong mga pamilya.
Hangyoa ang mga estudyante sa pagtuon sa Helaman 5:12, nga mangita kon unsay gitudlo niini bahin sa tukuranan.
Unsa kaha ang buot ipasabut sa pagtukod sa atong pundasyon diha kang Jesukristo?
Unsay mahimo sa usa ka pamilya sa pagtukod diha sa tukuranan ni Jesukristo? (Ang posible nga mga tubag maglakip sa mosunod: pagtuon ug pagsunod sa ebanghelyo ni Jesukristo, pagtinguha nga magsunod sa ehemplo ni Jesukristo, pagsunod sa mga sugo sa Dios, ug paggamit sa gahum sa Pag-ula ni Kristo.)
Sa unsa nga paagi nga ang mga saad sa Helaman 5:12 magamit sa mga pamilya nga nagtinguha sa pagtukod diha sa tukuranan nga bato ni Jesukristo? (Ang mga tubag kinahanglang magpakita sa mosunod nga baruganan: Samtang ang mga pamilya motukod sa ilang tukuranan diha ni Jesukristo, si Satanas walay gahum sa paglaglag kanila.)
Ipasabut nga sa wala pa ang Iyang kamatayon, ang Manluluwas mihatag sa sambingay nga makatabang sa mga pamilya nga makasabut unsaon sa pagtukod sa ilang mga tukuranan diha Kaniya. Dapita ang pipila ka mga estudyante sa pagbasa og kusog sa Juan 15:1–5, 10–11. Hangyoa ang klase sa pagsunod ug pagkonsiderar sa unsa nga paagi nga ang simbolo sa Manluluwas niini nga mga tudling magamit sa mga pamilya kinsa naningkamot sa pagtukod sa ilang mga tukuranan diha ni Jesukristo.
Kon si Jesukristo mao ang tanum nga parras ug kita ang mga sanga, unsa ang girepresentaran sa prutas? (Ang prutas mahimong magrepresentar sa matarung nga mga buhat ug linihukan nga kinahanglang maoy bunga sa mga disipulo ni Jesukristo.)
Tabangi ang mga estudyante nga makakita nga ang Manluluwas migamit sa pulong nga “pabilin” sa pipila ka higayon sa Juan 15:4–10. Ipasabut nga ang pulong pabilin niini nga konteksto nagpasabut nga magpabilin ug “magpabilin—apan magpabilin sa kahangturan,” nagpasabut nga kinahanglan kitang magpabilin ug permanenting nakasumpay ngadto ni Jesukristo ug sa Iyang Simbahan (Jeffrey R. Holland, “Pabilin Kanako,” Liahona, Mayo 2004, 32). Mahimo nimong ipasabut sa daklit ngadto sa mga estudyante nga ang pag-ila sa pagbalik-balik sa pulong mao ang usa ka kahanas sa pagtuon sa kasulatan nga ilang magamit sa ilang personal nga pagtuon. Ang pagbalik-balik sa usa ka pulong diha sa mga kasulatan sa kasagaran nagpasabut nga ang tagsulat naghatag og gibug-aton sa usa ka importante nga ideya.
Sumala sa bersikulo 5 ug 11, unsa ang mga panalangin kon magpabilin diha sa Manluluwas? (Kon magpabilin kita diha sa Manluluwas, makadala kita og daghang bunga ug makadawat og kahingpitan sa kalipay.)
Unsa nga mga panalangin sa inyong hunahuna ang moabut ngadto sa mga pamilya kon ang mga sakop sa pamilya maningkamot sa pagpabilin diha sa Manluluwas?
Basaha ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Bisan unsa pa ang inyong kahimtang, inyong masentro ang panimalay ug kinabuhi diha ni Ginoong Jesukristo, kay Siya ang tinubdan sa tinuod nga kalinaw niining kinabuhia” (“Alang sa Kalinaw diha sa Panimalay,” Liahona, Mayo 2013, 29).
Unsaon ninyo sa paghulagway ang usa ka panimalay nga nasentro diha ni Jesukristo? Unsa ang mga hiyas nga makahimo sa usa ka panimalay nga nasentro diha ni Kristo?
Awhaga ang mga estudyante sa pagpamalandong unsay ilang mahimo aron nga mas hingpit ang pagsunod diha sa Manluluwas, sa ingon nagdapit og dugang nga impluwensya sa Manluluwas diha sa ilang mga panimalay. Awhaga sila sa paghunahuna unsay mga kausaban nga ilang himoon sa ilang mga relasyon uban sa mga sakop sa pamilya.
Ang pagkontrolar sa mga emosyon pinaagi sa paggamit sa atong kabubut-on sa matarung nga paagi
Ang pagbalhin ngadto sa sunod nga porsyon sa leksyon pinaagi sa pagpasabut nga ang tanang mga pamilya mag-atubang og mga hagit. Bisan kon ang mga sakop sa pamilya maningkamot sa pagsentro sa ilang mga kinabuhi diha kang Jesukristo, mahimong mag-atubang sila og mga kahimtang nga makahagit sa ilang matarung nga mga tinguha. Isulat ang mosunod diha sa pisara:
“Gipalagot ko nimo!”
“Nawad-an ko og pailub nimo!”
Dapita ang mga estudyante sa pagpamalandong kon kini nga mga pamahayag gibase sa kamatuoran.
Dapita ang usa ka estudyante sa pagbasa og kusog sa Helaman 14:30–31. Dapita ang klase sa pagkonsiderar sa unsa nga paagi kini nga mga bersikulo may kalabutan sa mga pamahayag diha sa pisara.
Unsa nga importante nga kamatuoran ang makita niini nga mga bersikulo nga magamit sa atong mga relasyon ngadto sa uban? (Hatagi og gibug-aton ang mosunod nga kamatuoran: Tungod kay ang Langitnong Amahan mihatag kanato og kabubut-on, makapili kita nga masuko o dili. Ipasabut nga si Elder Lynn G. Robbins sa Seventy mitudlo, “Ang pagkasuko usa ka tinuyoan sa buot, usa ka desisyon; busa, makahimo kita sa pagpili nga mahimong masuko o dili. Kita mopili!” [“Agency and Anger,” Ensign, Mayo 1998, 80].)
Unsa nga mga problema ang moresulta gikan sa pagtuo nga ang mga aksyon o mga pulong sa uban “makahimo” nato nga masuko?
Dapita ang usa ka estudyante sa pagbasa og hilum sa 3 Nephi 11:29–30. Itudlo nga ang pagtulun-an sa Manluluwas mao nga ang panagbingkil “pagahunungon” (3 Nephi 11:30). Pahinumdumi nga ang pagsulti og binangis ug ubang dili matarung nga kinaiya, sama sa emosyunal ug pisikal nga pag-abuso, dili gayud madawat.
Dapita ang mga estudyante sa paghunahuna sa mga butang nga ilang mahimo sa pagtabang kanila sa paghinumdom sa pagpili nga dili masuko. Dapita sila sa pagpakigbahin sa ilang mga ideya. Hangyoa ang mga estudyante sa pagpasalig sa paggamit sa ilang kabubut-on sa matarung nga paagi pinaagi sa pagpili nga dili masuko, ilabi na diha sa pamilya.
Aron matabangan ang mga estudyante nga makahibalo sa pipila ka mga pagtulun-an ni Jesukristo nga makahatag og mas dakong kalipay ngadto sa mga pamilya, hangyoa ang mga estudyante sa pagbasa og hilum sa Doktrina ug mga Pakigsaad 88:119, 123–25. Isugyot nga ilang markahan o i-highlight ang importante nga mga pagtulun-an. Dayon hangyoa ang mga estudyante sa paghisgot sa unsa nga paagi nga ang mga pamilya malig-on pinaagi sa pagsunod sa mga pagtulun-an nga makita niini nga mga bersikulo.
Pahinumdumi ang mga estudyante nga ang mga problema ug mga kalisud sa kasagaran mahitabo sa mga pamilya nga gisalikway ang mga pagtulun-an ni Jesukristo. Ipakita ang mosunod nga pamahayag ni Presidente Dieter F. Uchtdorf sa Unang Kapangulohan, ug hangyoa ang usa ka estudyante sa pagbasa niini og kusog:
Imahe
Presidente Dieter F. Uchtdorf
“Ang ngil-ad ug nadaut nga relasyon sama ra kakaraan sa tawo mismo. … Nahunahuna nako nga ang matag tawo sa yuta naapektuhan sa lain-laing paagi sa makalaglag nga pagbati sa panagbingkil, kasilag, ug panimalos. Tingali may mga panahon nga mamatngunan nato kini sa atong kaugalingon” (“Ang Maloloy-on Magadawat og Kalooy,” Liahona, Mayo 2012, 70).
Unsa nga mga pagtulun-an ni Ginoong Jesukristo ang makatabang sa pag-ayo sa ngil-ad ug nadaut nga mga relasyon tali sa mga sakop sa pamilya?
Isulat sa pisara ang mosunod nga mga pakisayran sa kasulatan. Ipasabut nga kini nga mga bersikulo adunay mga kamatuoran nga gitudlo sa Manluluwas nga makapalig-on sa mga relasyon sa pamilya.
Dapita ang mga estudyante sa pagbasa niini nga mga tudling, ug dayon hisguti ang mosunod:
Unsa nga mga pagtulun-an gikan niini nga mga bersikulo ang makatabang sa pag-ayo sa mga relasyon sa pamilya nga nadaut tungod sa panagbingkil, pagkadili mabination, o sa ubang mga aksyon?
Sa unsa nga paagi ninyo nakita nga ang pagpasaylo makapalambo og mga relasyon sa pamilya?
Ngano nga usahay lisud ang pagpasaylo sa mga sakop sa pamilya kinsa nakasilo kanato kay sa ubang mga tawo?
Ipakita ang mosunod nga mga pamahayag ni Presidente Dieter F. Uchtdorf ug Presidente Howard W. Hunter (1907–95), ug hangyoa ang usa ka estudyante sa pagbasa niini og kusog:
Imahe
Presidente Dieter F. Uchtdorf
“Kitang tanan makasasala. Kitang tanan masayop, lakip nimo ug nako. Kitang tanan nasakitan. Kitang tanan nakapasakit sa uban.
“Pinaagi sa sakripisyo sa atong Manluluwas nga kita makaangkon og kahimayaan ug kinabuhing dayon. Sa atong pagdawat sa Iyang mga pamaagi ug pagbuntog sa atong garbo pinaagi sa pagpahumok sa atong mga kasingkasing, kita makahatag og balik sa maayong buot ug pagpasaylo sa atong pamilya ug sa atong personal nga kinabuhi” (Dieter F. Uchtdorf, “Usa ka Yawe para sa Malipayong Pamilya,” Liahona, Okt. 2012, 6).
Imahe
President Howard W. Hunter
“Bisan unsa ang tapionan ni Jesus sa iyang mga kamot mabuhi. Kon si Jesus motapion sa iyang mga kamot diha sa usa ka kaminyoon, kini magmalamboon. Kon tugutan siyang motapion sa iyang mga kamot diha sa pamilya, kini magmahangturon” (Mga Pagtulun-an sa mga Presidente sa Simbahan: Howard W. Hunter [2015], 170).
Sa unsa nga paagi nga ang pagsunod sa mga baruganan nga gihisgutan karon makapahimo sa Manluluwas sa pagtapion sa Iyang mga kamot diha sa usa ka pamilya?
Dapita ang mga estudyante sa pagkonsiderar sa unsa nga paagi nga ang mga baruganan sa paghinulsol ug pagpasaylo makatabang sa pag-ayo o pagpalig-on sa ilang kaugalingong mga relasyon sa pamilya. Awhaga sila sa paglihok dayon sa paggamit niini nga mga baruganan diha sa mga relasyon sa ilang pamilya.