Lesson 23: Paghatag alang sa Temporal nga mga Panginahanglan
23
Paghatag alang sa Temporal nga mga Panginahanglan
Pasiuna
Gisalig sa Dios sa mga indibidwal ang responsibilidad sa pagsangkap sa ilang kaugalingong temporal ug nag-unang mga panginahanglan sa ilang mga pamilya. Ang mga ginikanan adunay sagrado nga katungdanan sa pagsangkap sa ilang mga anak sa temporal nga “kinahanglanon sa kinabuhi” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Niini nga leksyon, ang mga estudyante makat-on sa unsa nga paagi nga ang baruganan sa pagpaningkamot sa kaugalingon makasalmot sa ilang temporal ug espirituhanong kalig-on karon ug sa umaabut.
Background nga Basahunon
M. Russell Ballard, “Becoming Self-Reliant—Spiritually and Physically,” Ensign, Mar. 2009, 50–55.
Robert D. Hales, “Pagkahimong Madaginuton nga mga Tigsangkap sa Temporal ug Espirituhanong Paagi,” Liahona, Mayo 2009, 7–10.
Marvin J. Ashton, “One for the Money,” Ensign, Sept. 2007, 37–39.
Isulat ang mosunod nga pangutana sa pisara: “Sa unsa nga paagi nga giandam ni Jesukristo ang Iyang Kaugalingon alang sa Iyang mortal nga pangalagad?” Dapita ang mga estudyante sa pagbasa sa Marcos 6:1–3 ug Lucas 2:51–52, nga mangita sa mga paagi nga ang Manluluwas miandam sa Iyang Kaugalingon sa Iyang unang mga tuig alang sa Iyang pangalagad sa kaulahian. Samtang mohatag ang mga estudyante sa ilang mga tubag, ilista ang mosunod sa pisara:
Nagtrabaho uban sa iyang amahan isip panday (panginabuhi)
Nadugangan ang kalaam (edukasyon)
Nadugangan ang gidak-on (pisikal)
Nadugangan ang pabor sa Dios (espirituhanon)
Nadugangan ang pabor sa tawo (sosyal)
Sa unsa nga paagi nga ang pagsunod sa ehemplo sa Manluluwas sa lima ka nailhan nga bahin makatabang ninyo sa pag-andam sa inyong kaugalingong mga panginahanglan ug sa inyong umaabut nga pamilya?
Basaha ang mosunod nga pamahayag ni Presidente Spencer W. Kimball (1895–1985), ug hangyoa ang mga estudyante sa pagpaminaw unsay giila ni Presidente Kimball nga responsibilidad sa matag Santos sa Ulahing mga Adlaw:
Imahe
Presidente Spencer W. Kimball
“Ang Simbahan ug ang mga miyembro niini gisugo sa Ginoo nga mahimong self-reliant ug makabarug sa kaugalingon. (Tan-awa sa D&C 78:13–14.)
“Ang responsibilidad sa sosyal, emosyonal, espiritwal, pisikal, o ekonomikanhong pagkabutang sa kada tawo mag-una diha sa iyang kaugalingon mismo, ikaduha diha sa iyang pamilya, ug ikatulo diha sa Simbahan kon matinud-anon siya nga miyembro.
Walay matinud-anon nga Santos sa Ulahing mga Adlaw, nga samtang makahimo pa sa pisikal ug emosyonal nga paagi ang buluntaryo nga motugyan sa responsibilidad sa pag-atiman sa iyaha mismo o sa iyang pamilya ngadto sa uban. Kutob sa iyang mahimo, ubos sa pagdasig sa Ginoo ug sa iya mismong pagbudlay, makasangkap siya sa iyang kaugalingon ug sa iyang pamilya sa esprituhanon ug temporal nga mga panginahanglan sa kinabuhi” (Mga Pagtulun-an sa mga Presidente sa Simbahan: Spencer W. Kimball [2006], 146).
Unsa nga responsibilidad ang gisulti ni Presidente Kimball nga anaa sa matag usa nato?
Ngano nga importante nga “mapaningkamuton sa kaugalingon ug dili magsalig”? (Kinahanglan nga ilhon sa mga estudyante ang mosunod: Kon mapaningkamuton na kita sa kaugalingon, makasangkap kita sa atong kaugalingon ug sa atong mga pamilya sa espirituhanon ug temporal nga mga kinahanglanon sa kinabuhi.)
Dapita ang mga estudyante sa pagpakigbahin unsa ang ilang pagsabut sa pagpaningkamot sa kaugalingon. Ipakita ang mosunod nga pamahayag ni Elder Robert D. Hales sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Robert D. Hales
“Ang pagpaningkamot sa kaugalingon mao ang pag-angkon og responsibilidad alang sa atong kaugalingon nga espiritwal ug temporal nga kaayohan ug alang niadtong mga gisalig kanato sa Langitnong Amahan nga atong ampingan. Diha lamang sa pagpaningkamot sa atong kaugalingon nga kita mahimong matinud-anon nga makasunod sa Manluluwas sa pagpangalagad ug pagpanalangin sa uban.
“Importante nga masabtan nga ang pagpaningkamot sa kaugalingon usa ka pamaagi aron makab-ot ang usa ka katuyoan. Ang atong katapusang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad madugangan o makunhuran depende sa ang-ang sa atong pagpaningkamot sa kaugalingon” (“A Gospel Vision of Welfare: Faith in Action,” Basic Principles of Welfare and Self-Reliance [booklet, 2009], 1–2).
Unsa gayud ang katuyoan sa pagpaningkamot sa kaugalingon?
Sa unsa nga paagi nga ang atong abilidad sa pag-alagad sa uban makunhuran kon dili kita mapaningkamuton sa kaugalingon?
Aron matabangan ang mga estudyante nga masabtan pa ang pagpaningkamot sa kaugalingon, i-display ang mosunod nga pamahayag ni Sister Julie B. Beck, kanhi kinatibuk-ang presidente sa Relief Society:
Imahe
Julie B. Beck
Busath.com
“Sa unsang paagi kita mahimong mapaningkamuton sa kaugalingon? Mahimo kitang mapaningkamuton sa kaugalingon pinaagi sa pag-angkon og igong kahibalo, edukasyon, ug literacy [kahibalo sa pagbasa ug pagsulat]; pinaagi sa maalamong pagdumala sa kwarta ug mga kapanguhaan, pagkalig-on sa espirituhanon, pagpangandam alang sa mga emerhensya ug mga katalagman; ug pinaagi sa pagbaton og pisikal nga kahimsog ug sosyal ug emosyonal nga kalig-on” (“The Welfare Responsibilities of the Relief Society President,” Basic Principles of Welfare and Self-Reliance,4).
Isulat ang mosunod nga mga pulong sa ibabaw sa pisara: edukasyon, panalapi, espirituhanon nga kalig-on, home production ug storage, panglawas, ug panarbaho. Tudloi ang mga estudyante nga ang pagpaningkamot sa kaugalingon naglakip niining unom ka bahin sa balanse nga kinabuhi (tan-awa sa Pagsangkap diha sa Pamaagi sa Ginoo: Katingbanan sa Giya sa usa ka Lider alang sa Welfare [booklet, 2009], 1–2). Paggahin og panahon isip usa ka klase aron hisgutan unsay mahimo sa mga young single adult aron mahimong mapaningkamuton sa kaugalingon sa matag usa niini nga mga bahin aron nga sila mas makasangkap sa temporal ug espirituhanon nga mga panginahanglan sa ilang umaabut nga mga pamilya ug sa pag-alagad sa Simbahan. Isulat diha sa pisara ang mga tubag sa mga estudyante. Ang mga ideya mahimong maglakip sa mosunod:
Edukasyon: Pagkuha og degree o certification gikan sa usa ka unibersidad o trade school, pagpalambo og nga kinaiya sa pagtuon, pagkat-on og dugang nga mga kahanas sa panarbaho, pagkat-on sa pag-ayo og ginagmay nga ayohunon sa balay ug sakyanan.
Panalapi: Bayad og matinuoron nga ikapulo ug halad sa puasa, pagkat-on sa paghimo og budget ug tumana kini, pagkat-on og disiplina sa kaugalingon, likaye ang wala kinahanglana nga utang, bayri ang mga utang, pagtigum og kwarta gikan sa matag suweldo.
Espirituhanon nga kalig-on: Pag-ampo, pagtuon sa mga kasulatan, pagpuasa uban sa katuyoan, tambong kanunay sa templo.
Home production ug storage: Pagkat-on unsaon sa pagpreserbar ug pagtipig og pagkaon, pananom (bisan pipila lang ka mga tanom).
Kahimsog: Sunda ang Pulong sa Kaalam, pag-ehersisyo kanunay, kaon og makapahimsog nga pagkaon, katulog og sakto, pagkuha og health insurance.
Panarbaho: Pagpalambo og bag-ong mga kahanas sa pagtrabaho, paningkamot nga makakuha og advanced certifications.
Unsay inyong nahimo nga madugangan ang inyong pagpaningkamot sa kaugalingon niini nga mga bahin? Sa unsa nga paagi nga kini nga paningkamot nakadugang sa inyong gibati sa pagpaningkamot sa kaugalingon ug bili sa kaugalingon? Sa unsa nga paagi kini nakadugang sa inyong abilidad sa pagsangkap sa inyong kaugalingon ug sa mas hingpit nga pag-alagad sa Simbahan?
Dapita ang mga estudyante nga maghimo og tumong sa pagpalambo sa usa niining unom ka mga bahin.
Pahinumdumi ang mga estudyante nga kon wala pa sila, nga sa umaabut nga adlaw sila ang responsable sa pagsangkap alang sa ilang kaugalingon ug posible alang sa usa ka pamilya. Busa, kinahanglang makat-on sila nga magmaalamon sa ilang temporal nga mga kapanguhaan.
I-assign ang matag estudyante sa pagbasa sa pipila sa mosunod nga mga tudling ug sa pagpangita sa mga baruganan nga may kalabutan sa maalamong pagdumala sa panalapi.
Human sa igo nga panahon, dapita ang pipila ka mga estudyante sa pagpakigbahin unsay ilang nakit-an uban sa klase. Siguroha nga ang mga estudyante makasabut sa mosunod nga baruganan: Pinaagi sa paggamit sa maalamong mga baruganan sa panalapi, ang mga indibidwal ug mga pamilya makadugang sa ilang kaugalingon nga kalig-on sa panalapi ug makaandam sa pagtabang sa uban. (Mahimo nimong itudlo nga sa mga kasulatan ang Ginoo kanunay mohisgot sa koneksyon sa pag-angkon og mga katigayunan ug sa obligasyon sa pagtabang sa kabus ug sa timawa. Pananglitan, tan-awa sa Jacob 2:18–19 ug D&P 104:18.)
Unsa nga mga panalangin ang inyong nasinati sa paggamit og maalamong mga baruganan sa panalapi sa inyong kinabuhi?
Basaha ang Doktrina ug mga Pakigsaad 104:78. Dayon ipakita ang mosunod nga pamahayag ni Elder Josph B. Wirthlin (1917–2008) sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Joseph B. Wirthlin
“Hinumdumi kini: ang utang usa ka matang sa pagkaulipon. Usa kini ka pinansyal nga anay. Kon kita mopalit pinaagi sa utang, kini makahatag lamang nato og malimbongon nga handurawan sa kauswagan. Nagtuo kita nga atong gipanag-iya ang mga butang, pero sa tinuod, ang mga butang maoy nanag-iya kanato.
“Ang ubang utang—sama sa kasarangan nga balay, mga galastohan alang sa edukasyon, tingali alang sa gikinahanglan nga unang sakyanan—siguro gikinahanglan. Pero kinahanglan nga dili gayud kita mosulod sa pinansyal nga pagkaulipon pinaagi sa mga utang nga wala timbang-timbanga pag-ayo ang gasto” (“Yutan-ong mga Utang, Langitnong mga Utang,” Liahona, Mayo 2004, 41).
Ngano nga ang utang usa ka matang sa pagkaulipon? (Samtang ang mga estudyante motubag, tabangi sila nga makasabut sa mosunod nga baruganan: Ang paglikay sa wala kinahanglana nga utang makatabang nga mahimong gawasnon ang mga indibidwal ug mga pamilya gikan sa pagkaulipon sa panalapi.) Si Presidente Gordon B. Hinckley (1910–2008) mitudlo, “Ang pagpaningkamot sa kaugalingon dili mahitabo kon dunay seryoso nga utang nga naghasol sa usa ka pamilya. Ang usa ka tawo walay kaugalingnan ni kagawasan gikan sa pagkaulipon kon siya obligado ngadto sa uban” (“To the Boys and to the Men,” Ensign, Nob. 1998, 53).
Dapita ang usa ka estudyante sa pagbasa og kusog sa tambag ni Presidente Thomas S. Monson:
Imahe
President Thomas S. Monson
“Likaye ang pilosopiya ug pamalibad nga ang kaharuhay kaniadto nahimo na karon nga mga gikinahanglan. Dili kini mga panginahanglan gawas kon gihimo nato kini sa atong mga kaugalingon mismo. Daghan nga mga batan-ong magtiayon karon gustong magsugod uban sa daghang mga sakyanan ug matang sa panimalay nga gitrabahoan sa Inahan ug Amahan sa tibuok nilang kinabuhi aron makaangkon niini. Ang resulta, nasulod sila ngadto sa taas og tagal nga utang nga gibasehan sa duha ka mga suweldo. Tingali ulahi na kaayo nilang mahibaloan nga ang kausaban moabut gayud, ang mga babaye manganak, pagkasakit nagpaluyo sa pipila ka mga pamilya, mawad-an og trabaho, natural nga mga katalagman ug uban nga mga kahimtang nahitabo, ug dili na sila makabayad sa utang, nga gibase sa kinitaan sa duha ka suweldo. Mahinungdanon nga magpakabuhi kita sumala sa atong mga kinitaan” (“Makanunayon nga mga Kamatuoran sa Nagkausab nga Panahon,” Liahona, Mayo 2005, 20).
Unsa ang pipila ka posible nga mga sangputanan alang sa mga indibidwal ug mga pamilya nga mapakyas sa pag-ila sa kalainan tali sa mga gusto ug mga panginahanglan?
Unsa ang pipila ka mga paagi sa pag-ila sa mga gusto ug mga panginahanglan?
Awhaga ang mga estudyante sa paghunahuna bahin sa mosunod nga mga pangutana ug pagpasulat sa ilang mga tubag diha sa ilang mga journal:
Sa unsa nga mga bahin sa kinabuhi nga mahimo kamong mas mapaningkamuton sa kaugalingon?
Sa unsa nga paagi nga kamo mas makadumala sa inyong temporal nga mga kapanguhaan?