Leksyon 24: Mga Miyembro sa Simbahan nga Single Adult
24
Mga Miyembro sa Simbahan nga Single Adult
Pasiuna
Ang ebanghelyo ni Jesukristo naghatag og gibug-aton sa mahangturong mga panalangin nga naangkon pinaagi sa kaminyoon ug mga relasyon sa pamilya. Apan daghang mga miyembro sa Simbahan nakakita sa ilang kaugalingon sa mga kahimtang diin sila karon walay oportunidad sa kaminyoon ug pamilya. Kini nga leksyon naghatag og gibug-aton nga ang mga miyembro sa Simbahan nga dili minyo makahimo og importante nga kontribusyon ngadto sa gingharian sa Ginoo. Samtang ang mga panalangin sa kaminyoon ug pamilya usahay malangan, dili gayud hikawan kadtong sa matarung nga paagi mituman sa ilang mga pakigsaad sa Dios.
Background nga Basahunon
Gordon B. Hinckley, “A Conversation with Single Adults,” Ensign, Mar. 1997, 58–63.
Spencer J. Condie, “Angkona ang Bililhon ug Dagko Uyamot nga mga Saad,” Liahona, Nob. 2007, 16–18.
Ang mga miyembro nga dili minyo sa family-oriented nga Simbahan
Dapita ang mga estudyante sa pagpakigbahin sa pipila ka mga hagit nga masinati sa mga miyembro sa Simbahan nga dili minyo kon moapil sa usa ka ward or branch diin daghang mga miyembro mga minyo ug adunay mga anak. (Ang mga miyembro sa Simbahan nga dili minyo mahimong mawad-an og kadasig, masulub-on, ug mapasagdan diha sa mga miting ug mga klase nga nagtudlo bahin sa kaminyoon ug pamilya.)
Sa unsa nga paagi kaha ang ubang mga miyembro sa Simbahan makatabang sa mga single adult nga mobati nga nahilakip ug gihatagan og bili sa mga miting ug mga kalihokan sa Simbahan?
Ipakita ang mosunod nga pamahayag ni Presidente Howard W. Hunter (1907–95), ug hangyoa ang usa ka estudyante sa pagbasa niini og kusog:
Imahe
President Howard W. Hunter
“Ang Simbahan alang sa tanang mga miyembro. … Kitang tanan, dili minyo o minyo, adunay indibidwal nga pagkatawo ug mga panginahanglan, apil niini mao ang tinguha nga makita isip bililhon nga indibidwal nga anak sa Dios. …
“Kini ang simbahan ni Jesukristo, dili simbahan sa mga minyo o sa mga single o bisan unsa nga ubang grupo o indibidwal” (“The Church Is for All People,” Ensign, June 1989, 76).
Ipasabut nga si Apostol Pablo mitandi sa Simbahan ngadto sa usa ka lawas sa tawo ug ang indibidwal nga mga miyembro sa Simbahan ngadto sa mga parte sa lawas. Dapita ang pipila ka mga estudyante sa pagpuli-puli og basa og kusog sa 1 Mga Taga-Corinto 12:12–20, samtang ang uban sa klase mangita kon giunsa ni Pablo pagtandi ang mga parte sa pisikal nga lawas ngadto sa mga miyembro sa Simbahan.
Unsa nga mga hagit ang atong atubangon kon usa o daghang parte sa atong lawas ang mawala?
Unsa nga baruganan ang gitudlo kanato sa analohiya ni Pablo bahin sa Simbahan ug sa mga miyembro niini? (Ang mga estudyante mahimong moila og pipila ka importating mga baruganan. Siguroha nga ang mosunod nga baruganan gihatagan og gibug-aton: Ang matag miyembro sa Simbahan adunay bili ug makahimo og importante nga kontribusyon ngadto sa Simbahan.)
Unsa nga mga kontribusyon ang inyong nakita nga nahimo sa mga miyembro nga dili minyo sa inyong ward o branch ngadto sa Simbahan?
Hangyoa ang usa ka estudyante sa pagbasa sa 1 Mga Taga-Corinto 12:25–27. Dapita ang klase sa pagpangita unsay mahimo sa mga miyembro sa Simbahan aron magkahiusa.
Unsay mahimo sa tanang mga miyembro sa Simbahan, minyo o dili minyo, sa pagtabang sa usag usa nga mobati nga nahiusa sa ubang mga miyembro sa ward o branch?
Ipakita ug basaha ang mosunod nga pamahayag ni Elder Robert D. Hales sa Korum sa Napulog Duha ka mga Apostoles:
Imahe
Elder Robert D. Hales
“Kitang tanan sakop sa komunidad sa mga Santos, nagkinahanglan kita sa usag usa, ug kitang tanan naningkamot sa sama nga tumong. Bisan kinsa nato mahimong modistansya sa atong kaugalingon gikan sa [atong ward o branch] nga pamilya sa katarungan sa atong mga kalahian. Apan kinahanglan nga dili nato ipahilayo o ipadistansya ang atong kaugalingon gikan sa mga oportunidad tungod sa mga kalainan nga atong nasabtan sa atong kaugalingon. Hinoon, atong ipakigbahin ang atong mga gasa ug mga talento ngadto sa uban, magdala og kahayag sa paglaum ug kalipay ngadto kanila, ug sa pagbuhat sa ingon mobayaw sa atong kaugalingong mga espiritu” (“Belonging to a Ward Family,” Ensign, Mar. 1996, 16).
Sa unsa nga paagi nga ang inyong mga paningkamot sa pagdawat og mga calling ug pag-apil sa inyong ward o branch nakatabang ninyo nga mobati nga mas nahiusa uban sa ubang mga miyembro?
Ipakita ang mosunod nga mensahe ni Elder Dallin H. Oaks sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Dallin H. Oaks
“Kadtong kinsa wala pa maminyo kinahanglan nga magtinguha nga maminyo didto sa templo ug maningkamot sa paghatag og prayoridad nga maangkon kini. Ang mga kabatan-onan ug mga batan-on nga wala pa maminyo kinahanglang makigbatok sa konsepto nga sakto sa politikanhong paagi apan sayop sa mahangturong paagi nga midaut sa kaimportante sa pagminyo ug pagbaton og mga anak” (“Tinguha,” Liahona, Mayo 2011, 45).
Ngano kaha sa inyong pagtuo nga ang pipila ka mga miyembro nga dili minyo mobati nga nawad-an og kadasig kon sila mamalandong sa doktrina nga “ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon ngadto sa plano sa Tiglalang alang sa walay katapusan nga destinasyon sa iyang mga anak”? (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).
Ipasabut nga bisan ang kaminyoon ug pamilya mao ang ideyal, daghang mga miyembro sa Simbahan nga single adult wala makasiguro kon makaminyo ba sila. Kadtong nagdiborsyo o nabiyuda naghunahuna kon makaminyo ba sila pag-usab.
Basaha og kusog ang mosunod nga pamahayag gikan ni Elder D. Todd Christofferson sa Korum sa Napulog Duha ka mga Apostoles, ug hangyoa ang mga estudyante sa pagpangita unsay gibuhat sa Manluluwas sa paghimo nga posible ang mahangturon nga mga panalangin alang niadtong walay panalangin sa kaminyoon ug pamilya:
Imahe
Elder D. Todd Christofferson
“Sa pagpahayag sa sukaranang mga kamatuoran kalabut sa kaminyoon ug pamilya mao ang dili pagbaliwala o pagpaubos sa sakripisyo ug kalampusan niadtong kansang ideyal dili maoy kasamtangang kamatuoran. Ang uban ninyo nahikawan sa panalangin sa kaminyoon sa mga rason nga naglakip sa kakulang sa takus nga kaminyuan, pagkaibug sa sama nga sekso, pisikal o mental nga kakulangan, o kahadlok nga mapakyas nga, sa pagkakaron, nakababag sa pagtuo. O tingali naminyo mo, apan kana nga kaminyoon natapos, ug nabilin mong nagdumala nga nag-inusara sa unsay lisud ipatunhay sa duha. Ang uban ninyo nga naminyo dili makaanak bisan pa sa dakong tinguha ug sa mga pangamuyo sa pag-ampo.
“… Uban sa pagsalig kami mopamatuod nga ang Pag-ula ni Jesukristo nagpaabut ug, sa katapusan, mobayad sa tanang paghikaw ug nawala alang niadtong modangup ngadto Kaniya. Walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak” (“Nganong Kaminyoon, Nganong Pamilya,” Liahona, Mayo 2015, 52).
Unsa nga doktrina ang gitudlo ni Elder Christofferson bahin kon si kinsa ang modawat sa labing dako nga mga panalangin sa Dios? (Isulat ang mosunod nga doktrina sa pisara: Ang Pag-ula ni Jesukristo nakapahimo nga posible sa matag usa nato sa pagdawat sa tanang gisaad nga mga panalangin sa Amahan sa Langit.)
Unsay kinahanglan nga buhaton sa usa ka tawo aron makaangkon sa paglaum nga gihulagway niini nga doktrina?
Ipakita ang mosunod nga kasiguroan nga gihatag ni Presidente Spencer W. Kimball (1895–1985), ug hangyoa ang usa ka estudyante sa pagbasa niini og kusog:
Imahe
Presidente Spencer W. Kimball
“Mosaad mi kaninyo kabahin sa mahangturon nga kondisyon, walay kalag ang hikawan sa buhong ug taas ug mahangturon nga mga panalangin alang sa bisan unsa nga dili mahimo niana nga tawo, nga ang Ginoo dili gayud mopakyas sa iyang mga saad, ug nga ang matag matarung nga tawo makadawat sa katapusan sa tanan nga siya adunay katungod ug nga wala mawala tungod sa bisan unsa nga sayop sa iyang kaugalingon” (“The Importance of Celestial Marriage,” Ensign, Okt. 1979, 5).
Ipamatuod nga samtang ang mga panalangin sa Dios usahay malangan, dili gayud sila hikawan sa kahangturan niadtong nagtinguha nga magpuyo nga matarung.
Hangyoa ang mga estudyante sa pagkonsiderar sa mga ehemplo ni Abraham ug Sarai, kinsa nakadawat og mga saad gikan sa Dios kabahin sa ilang pamilya nga nalangan o wala matuman panahon sa ilang mortal nga kinabuhi (tan-awa sa Genesis 13:14–17; 15:4–7; 17:1–8, 15–16). Pahinumdumi ang mga estudyante nga, sama ni Abraham ug Sarai, ang atong pagtuo usahay pagasulayan sa mga saad nga nalangan o wala matuman sa pagka-mortal.
Hangyoa ang usa ka estudyante sa pagbasa og kusog sa Mga Hebreohanon 11:1, 6, samtang ang klase mangita sa depenisyon sa pagtuo.
Unsa man ang gitudlo niini nga mga bersikulo bahin sa pagtuo? [NO TRANSLATION] Hinumdumi ang pagtabang sa mga estudyante nga makapalambo og mga kahanas sa personal nga pagtuon sa kasulatan pinaagi sa paggamit sa mga himan sa pagtuon panahon sa klase.)
Unsay gipasabut sa mga pulong “pagkaanaa sa mga butang nga dili nato makita”? (Ang pagtuo mao ang kasiguroan o pagpamatuod sa wala makita nga tinuod. Kining kasiguroan sa mga butang nga gilauman ug mga butang nga dili makita moabut lamang kon kita molihok ug mosunod sa mga baruganan sa ebanghelyo—ilabi na kon malisud kini nga buhaton. Ang pagtuo mao ang masulundon nga aksyon nga moresulta sa espirituhanong gasa sa pagpamatuod. Ang pagtuo ug pagsalig sa Ginoo igo sa pagsunod Kaniya nga dili una makita ang resulta.)
Dapita ang pipila ka estudyante sa pagpuli-puli pagbasa og kusog gikan sa Mga Hebreohanon 11:8–13, 16, samtang ang nahibilin sa klase mangita kon giunsa ni Abraham ug Sarai pagpakita og pagtuo panahon sa malisud nga mga kahimtang. Isugyot ngadto sa klase nga mahimo nilang badlisan ang mga pulong nga nagpakita kon giunsa ni Abraham ug Sarai pagpakita og pagtuo.
Sa Bersikulo 13 nag-ingon nga bisan og si Abraham, Sarai, ug daghan pang nangamatay na nga wala “makadawat sa mga saad,” nakita nila ang mga saad “sa halayo” ug nagbaton og pagtuo sa abilidad sa Dios sa pagtuman niini nga mga saad. Sa unsa nga paagi nga ang ehemplo niining karaan nga mga Santos makatabang sa moderno nga mga Santos kansang pagtuo nahagit tungod kay wala nila madawat ang gisaad nga mga panalangin dinhi sa pagka-mortal? (Kinahanglan kitang tanan makat-on sa panginahanglan sa paggamit og pagtuo ug pagsunod sa mga sugo sa Ginoo bisan kon ang mga panalangin nga atong gilauman ingon og dili moabut sa dihang nagtinguha kita niini.)
Unsa kaha ang gipasabut nga kining karaan nga mga Santos nagpuyo isip “mga dumuloong ug mga langyaw lamang dinhi sa yuta”? (Nasayud sila nga ang mortal nga kinabuhi temporaryo ug nga kini nga kalibutan dili ang ilang permanente nga panimalay.)
Ipakita ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Ang ubang panalangin moabut diha dayon, ang uban dugay, ug ang uban dili moabut hangtud didto sa langit; apan para niadtong mohangup sa ebanghelyo ni Jesukristo, moabut kini. Niana personal akong mopamatuod” (“An High Priest of Good Things to Come,” Ensign, Nob. 1999, 38).
Sa unsa nga paagi nga ang pagkahibalo nga walay panalangin ang ihikaw sa matinud-anon makatabang sa mga miyembro sa Simbahan kinsa mobati og kasubo o nawad-an sa paglaum tungod kay sila wala maminyo o wala makabaton og mga anak?
Makahunahuna ba kamo og higayon sa dihang mibati kamo nga nawad-an og kadasig apan mipili sa paglihok pinaagi sa pagtuo ug mipadayon sa inyong kinabuhi?
Kon duna pay panahon, ipakigbahin ang mosunod nga tambag gikan ni Elder Dallin H. Oaks:
Imahe
Elder Dallin H. Oaks
“Kon kamo naghulat lang alang sa kaminyoon, hunong sa paghulat. Basin og wala na gayud kamoy oportunidad alang sa angay nga kaminyoon niini nga kinabuhi, mao nga hunong sa paghulat ug sugod sa paglihok. Andama ang inyong kaugalingon alang sa kinabuhi—bisan sa kinabuhi nga dili minyo—pinaagi sa edukasyon, kasinatian, ug pagplano. Ayaw paghulat sa kalipay nga moabut kaninyo. Pangitaa kini pinaagi sa pagserbisyo ug pagkat-on. Planoha ang imong kinabuhi. Ug salig sa Ginoo” (“Dating versus Hanging Out,” Ensign, Hunyo 2006, 14).
Awhaga ang mga estudyante sa pagkonsiderar unsay ilang mahimo sa pagpalambo sa ilang pagtuo kang Jesukristo ug mosalig sa Iyang abilidad sa pagkahimo sa katumanan sa gisaad nga mga panalangin.