Ang Langitnong Amahan mihatag og plano nga makapahimo nato nga makabalik ngadto sa Iyang presensya ug mahimong sama Kaniya. Si Presidente Dieter F. Uchtdorf mitudlo: “Kita Iyang mga anak sa wala pa kita moanhi sa kalibutan, ug Iyang mga anak hangtud sa hangtud. Kini nga kamatuoran makausab sa atong pagtan-aw sa kaugalingon, sa atong kaigsoonan, ug sa kinabuhi mismo” (“Upat Ka Tawag,”Liahona, Mayo 2013, 58). Samtang ang mga estudyante mas makasabut sa ilang balaang potensyal, sila mas makaatubang sa tukmang paagi sa mga hagit nga ilang giatubang sa pagka-mortal.
Background nga Basahunon
Dieter F. Uchtdorf, “Upat ka mga Tawag,” Liahona, Mayo 2013, 58–61.
Gospel Topics, “Becoming Like God,” lds.org/topics.
Dapita ang mga estudyante sa paghunahuna og usa ka dili miyembro nga higala nangutana kanila unsay pagtuo sa atong Simbahan sa hitsura sa Langitnong Amahan. Hangyoa ang mga estudyante sa pagpakigbahin unsaon nila sa pagtubag.
Isulat ang mosunod nga mga pundok [set] sa mga kasulatan diha sa pisara, o iapud-apod kini sa usa ka handout:
Pag-assign og mga estudyante sa pagtuon niining mga pundok sa kasulatan ug pag-ila unsay gitudlo niini bahin sa atong Amahan sa Langit. Siguroha nga ang matag pundok sa kasulatan na-assign. Human sa igong panahon, dapita ang mga estudyante sa pagpakigbahin kon unsaon nila sa paggamit ang usa o daghan niini nga mga kasulatan aron ipasabut unsay ilang nahibaloan o gituohan bahin sa Langitnong Amahan.
Sa unsa nga paagi nga kini nga mga hiyas sa Langitnong Amahan makatabang ninyo sa pagsimba Kaniya?
Sa unsa nga paagi nga ang pagkahibalo nga ang Langitnong Amahan usa ka tinuod nga binuhat kinsa adunay nahimaya, nabanhaw nga lawas sa unod ug bukog ug mao ang Amahan sa inyong espiritu makaapekto sa inyong relasyon Kaniya?
Ngano nga makatabang kon magsimba sa Dios maghinumdom nga Siya mao ang Amahan sa atong mga espiritu? (Isip kabahin sa panaghisgutan, hatagi og gibug-aton nga tungod kay ang Dios mao ang Amahan sa atong mga espiritu, ang atong balaanong potensyal mao nga mahimong sama Kaniya. Makatabang usab ang pagpakigbahin sa pahayag nga giisyu sa Unang Kapangulohan niadtong 1909, ubos sa direksyon ni Presidente Joseph F. Smith [1838–1918]: “Ang tanang mga lalaki ug mga babaye may pagkasusama sa Amahan ug Inahan sa tanan ug literal nga mga anak sa Dios” [“Gospel Classics: The Origin of Man,” Ensign, Peb. 2002, 29].)
Pag-apud-apod og mga kopya sa mosunod nga pahayag ni Propeta Joseph Smith. Hangyoa ang mga estudyante sa pagbasa niini sa hilum ug pagtimaan sa mga pulong nga nagpakita sa kaimportante sa pagsabut kinsa ang Dios.
Imahe
Prophet Joseph Smith
“Kon ang mga tawo dili makasabut sa kinaiya sa Dios, sila wala makasabut sa ilang mga kaugalingon. …
“Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan! … Kon ang tabil pagabuksan karon, ug ang halangdong Dios kinsa nagkontrolar niini nga kalibutan pinaagi sa iyang pagtuyok, ug kinsa nagdumala sa tanang mga kalibutan ug sa tanang mga butang pinaagi sa Iyang gahum, magpakita sa Iyang kaugalingon,—ingnon ko, kon kamo makakita Kaniya karon, makakita kamo Kaniya sama sa porma sa usa ka tawo—sama sa inyong mga kaugalingon sa pagkatawo, imahen, ug sa porma gayud sa usa ka tawo; kay si Adan gilalang sama sa panagway, imahen ug hitsura sa Dios, ug nakadawat og instruksyon, ug nakalakaw ug nakigsulti uban Kaniya, sama sa usa ka tawo nga nakigsulti ug nakighimamat sa usag usa” (Mga Pagtulun-an sa mga Presidente sa Simbahan: Joseph Smith [2007], 46–47, 48).
Sa unsa nga paagi nga ang pagsabut kinsa ang Langitnong Amahan makatabang kanato sa pagsabut sa atong kaugalingon? (Samtang motubag ang mga estudyante, isulat ang mosunod diha sa pisara: Kon kita makasabut sa atong Langitnong Amahan, mas makasabut kita sa atong potensyal nga mahimong sama sa atong Langitnong mga Ginikanan.)
Ipakita ang mosunod nga pahayag ni Elder Dallin H. Oaks sa Korum sa Napulog Duha ka mga Apostoles, ug paghangyo og usa ka estudyante sa pagbasa niini og kusog.
Imahe
Elder Dallin H. Oaks
“Hunahunaa ang gahum sa ideya nga gitudlo sa atong minahal nga kanta ‘Ako Anak sa Dios’ [Mga Himno ug mga Awit sa mga Bata, nu. 58]. … Ania ang tubag sa usa sa importanting mga pangutana sa kinabuhi, ‘Kinsa ako?’ Ako anak sa Dios nga may espiritwal nga kagikan sa langitnong mga ginikanan. Kana nga pagkaginikanan nagpasabut sa atong mahangturong potensyal. Kana nga gamhanang ideya usa ka epektibong pagpawala sa tumang kasubo. Kini makapalig-on kanato sa paghimo og matarung nga mga pagpili ug sa pagtinguha sa labing maayo nga anaa kanato” (“Powerful Ideas,” Ensign, Nob. 1995, 25).
Isulat ang mosunod diha sa pisara:
Ang akong kahibalo nga ako anak sa Dios maka tabang nako kon .
Ang akong kahibalo nga ako anak sa Dios naka tabang nako kon .
Dapita ang pipila ka mga estudyante sa pagpakigbahin unsaon nila sa pagkompleto ang usa niini nga mga sentence.
Sultihi ang imong klase nga usahay makadungog kita nga ang usa ka tawo adunay “dakong potensyal.”
Unsa sa inyong hunahuna ang gipasabut niini nga mga pulong?
Isulat ang mosunod nga mga reference sa kasulatan diha sa pisara, ug hangyoa ang mga estudyante sa pagtuon niini aron makahibalo sa atong balaang potensyal: Mga Taga-Roma 8:16–17; 1 Juan 3:2; 3 Nephi 12:48. Mahimo kang mosugyot nga ang mga estudyante mo-cross-reference niini nga mga kasulatan pinaagi sa pagsulat sa laing duha ka mga reference sa daplin tupad sa matag kasulatan.
Base sa mga kasulatan nga gitun-an nato mahitungod sa kinaiya sa Dios, unsa ang gipasabut sa mga pulong “kita mahimong sama Kaniya” nganha kaninyo?
Unsa sa inyong hunahuna ang gipasabut nga mahimong “isig ka manununod” ni Jesukristo? (Isip ang Bugtong Anak sa Amahan diha sa unod, katungod ni Jesukristo nga makapanunod sa tanan nga anaa sa Amahan. Kadtong kinsa masulundon ug makadawat sa hingpit nga mga panalangin sa Pag-ula sa Manluluwas makapanunod usab sa tanan nga gipang-iya sa Amahan [tan-awa sa Mga Taga-Roma 8:14–18; Mga Taga-Galacia 3:26–29; D&P 84:38]. Hatagi og gibug-aton ang mosunod nga baruganan: Ang plano sa Langitnong Amahan naghatag og paagi aron mahimo kitang sama sa atong Langitnong mga Ginikanan. Itudlo nga bisan og ang pipila ka mga tawo mosaway sa atong pagtuo nga kita mahimong sama sa Dios, kini nga pagtuo gibase sa mga pagtulun-an sa Biblia.)
Isulat ang mosunod nga pangutana diha sa pisara:
Unsa ang gitudlo ni Elder Dallin H. Oaks bahin sa katuyoan sa atong mortal nga kinabuhi?
Basaha ang mosunod nga pahayag ni Elder Dallin H. Oaks ug hangyoa ang mga estudyante sa pagpangita sa mga tubag sa pangutana diha sa pisara:
Imahe
Elder Dallin H. Oaks
“Sa teyolohiya sa gipahiuli nga simbahan ni Jesukristo, ang katuyoan sa mortal nga kinabuhi mao ang pag-andam kanato aron mahibalo sa atong destinasyon isip mga anak nga lalaki ug mga anak nga babaye sa Dios—sa pagkahimong sama Kaniya. … Ang Biblia naghulagway sa mga mortal isip ‘mga anak sa Dios’ ug ‘mga manununod sa Dios,’ ug isigka-manununod uban kang Kristo’ (Mga Taga-Roma. 8:16–17). Namahayag usab kini nga ‘moantus man kita uban kaniya aron pagahimayaon usab kita uban kaniya’ (Mga Taga-Roma. 8:17) ug ‘sa igapadayag na siya, kita mahisama kaniya’ (1 Jn. 3:2). Gidawat nato kini nga mga pagtulun-an sa Biblia sa literal nga paagi. Mituo kita nga ang katuyoan sa mortal nga kinabuhi mao ang pag-angkon og pisikal nga lawas ug, pinaagi sa Pag-ula ni Jesukristo ug pinaagi sa pagkamasulundon ngadto sa mga balaod ug mga ordinansa sa ebanghelyo, aron sa pagkwalipay alang sa nahimaya, nabanhaw nga celestial nga kahimtang nga gitawag og kahimayaan o kinabuhing dayon. … (Kini nga kapalaran sa kinabuhing dayon o kinabuhi sa Dios kinahanglang nga pamilyar sa tanan kinsa nakatuon sa karaang Kristiyano nga doktrina ug pagtuo sa pagkadios o kahimayaan.) …
“… Ang atong teyolohiya nagsugod sa langitnong mga ginikanan. Ang atong pinakataas nga pangandoy mao nga mahisama kanila. Ubos sa maloloy-on nga plano sa Amahan, kining tanan posible pinaagi sa pag-ula sa Bugtong Anak sa Amahan, ang atong Ginoo ug Manluluwas, nga si Jesukristo” (“Apostasy and Restoration,” Ensign, May 1995, 86–87).
(Pahibalo: Kinahanglan tingali nga imong ipasabut nga ang pagkadios ug kahimayaan nagpasabut sa ideya nga ang usa ka tawo mahimong dios o mabayaw ngadto sa mas taas nga kahimtang.)
Hisguti ang mga tubag sa mga estudyante sa pangutana nga anaa sa pisara. Dayon pangutana:
Unsa ang inyong mga hunahuna samtang inyong ikonsiderar nga ang plano sa Langitnong Amahan makahatag ninyo og oportunidad nga mahimong sama Kaniya?
Ngano nga ang Pag-ula ni Kristo importante nato nga mahimong sama sa Dios?
Aron mapadayon kini nga panaghisgutan, ribyuha ang mosunod nga pahayag uban sa imong mga estudyante:
“Ang mga Santos sa Ulahing mga Adlaw nakasabut sa gidak-on sa Pag-ula ni Kristo mahitungod sa dakong potensyal sa tawo nga nakaposible niini. Ang Pag-ula ni Kristo wala lamang makahatag og kapasayloan sa sala ug kadaugan gikan sa kamatayon, nagtubos usab kini sa dili hingpit nga mga relasyon, nag-ayo sa espirituhanong mga samad nga makapugong sa pag-uswag, ug makapalig-on ug makapahimo sa mga indibidwal nga mopalambo og hiyas ni Kristo [tan-awa sa Alma 7:11–12]. Ang mga Santos sa Ulahing mga Adlaw nagtuo nga pinaagi lamang sa Pag-ula ni Jesukristo nga kita makabaton og sigurado nga paglaum sa mahangturong himaya ug nga ang gahum sa Iyang Pag-ula hingpit nga magamit lamang pinaagi sa hugot nga pagtuo kang Jesukristo, paghinulsol, bunyag, pagdawat sa gasa sa Espiritu Santo, ug paglahutay hangtud sa katapusan sa pagsunod sa instruksyon ug ehemplo ni Kristo [tan-awa sa 2 Nephi 31:20; Mga Artikulo sa Hugot nga Pagtuo 1:4]. Sa ingon, kadtong kinsa mahimong sama sa Dios ug mosulod ngadto sa kahingpitan sa Iyang himaya gihulagway nga mga tawo kinsa ‘nahimo nga hingpit pinaagi ni Jesus ang tigpataliwala sa bag-o nga pakigsaad, kinsa nagbuhat niini nga hingpit nga pag-ula pinaagi sa pagpaagas sa iyang kaugalingon nga dugo’ [D&P 76:69]” [Gospel Topics, “Becoming Like God,” lds.org/topics).
Iapud-apod ang mga kopya sa mosunod nga pamahayag ni Presidente Dieter F. Uchtdorf sa Unang Kapangulohan. Dapita ang mga estudyante sa pagbasa sa pahayag ug pagmarka og mga ideya nga makahatag nila og paglaum aron ilang makab-ot ang ilang balaanong potensyal. Itudlo nga si Presidente Uchtdorf mihatag niini nga pakigpulong sa sesyon sa priesthood sa kinatibuk-ang komperensya, apan ang mga ideya magamit sa tanan:
Imahe
Presidente Dieter F. Uchtdorf
“Usa ka tawag nga naghulagway nato nga labing importante mao ang anak nga lalaki [o anak nga babaye] sa Langitnong Amahan. Bisan unsa pa kita o atong gibuhat sa kinabuhi, dili gayud nato kalimtan nga kita tinuoray nga espiritu nga mga anak sa Dios. Kita Iyang mga anak sa wala pa kita moanhi sa kalibutan, ug Iyang mga anak hangtud sa hangtud. Kining kamatuoran makausab sa atong pagtan-aw sa kaugalingon, sa atong kaigsoonan, ug sa kinabuhi mismo. …
“Usahay makasagmuyo nga masayud nga kita [anak] sa Dios apan mapakyas sa pagkab-ot sa atong potensya. Ang kaaway ganahang mopahimulos niini nga pagbati. Si Satanas ganahang ihulagway ninyo ang kaugalingon pinaagi sa sala imbis sa balaanong potensyal. Mga kaigsoonan, ayaw siya paminawa.
“Nakakita kita sa usa ka bata nga nagkat-on og lakaw. Molakang siya og ginagmay ug mobarag. Siya matumba. Kasab-an ba nato tungod niana? Siyempre dili. Unsang klaseha sa amahan ang mosilot sa bata tungod kay natumba? Kita modasig, mopakpak, ug modayeg, kay sa ginagmay nga lakang, ang bata mas mahisama sa iyang ginikanan.
“Karon, mga kaigsoonan, kon itandi ang pagkahingpit sa Dios, kitang mortal morag susama ra sa bakikaw, katumbahon nga mga bata. Apan ang Langitnong Amahan gusto nga kita mahisama Niya, ug, mga kaigsoonan, kana mao usab unta ang atong mahangturong tumong. Ang Dios nakasabut nga makaabut kita didto dili diha-diha dayon apan pinaagi sa usa ka lakang sa matag higayon” (“Upat ka mga Tawag,”Liahona, Mayo 2013, 58).
Sa unsa nga paagi nga ang paghinumdom niining mahangturong mga kamatuoran makatabang ninyo sa pagkab-ot sa inyong balaang potensyal?
Sa unsa nga paagi nga ang paghinumdom niini nga mga kamatuoran makaapekto sa paagi sa inyong pagtagad sa mga sakop sa inyong pamilya?
Sa unsa nga paagi nga ang inyong kahibalo niini nga mga kamatuoran makaapekto sa inyong tinguha sa pagsiksik og impormasyon bahin sa inyong namatay nga mga sakop sa pamilya ug sa pagpahigayon og mga ordinansa sa templo alang kanila?
Awhaga ang mga estudyante sa pagpakigbahin unsay ilang nakat-unan ug gibati niini nga leksyon uban sa usa ka sakop sa pamilya o higala atol sa umaabut nga semana. Mahimo usab nga ilang ikonsiderar unsay ilang mahimo matag adlaw nga hinumduman gayud nga sila mga anak sa Langitnong Amahan ug sa pagplano sa pagrekord diha sa journal kon sa unsa nga paagi nga ang paghinumdom niining sagrado nga kamatuoran nakaapekto sa ilang mga aksyon.