Leksyon 7: Ang Kaminyoon tali sa Lalaki ug sa Babaye Gi-orden sa Dios
7
Ang Kaminyoon tali sa Lalaki ug sa Babaye Gi-orden sa Dios
Pasiuna
Ang Langitnong Amahan miestablisar sa balaang sundanan sa kaminyoon ni Adan ug ni Eva didto sa Tanaman sa Eden. Sa atong panahon, ang Unang Kapangulohan ug ang Korum sa Napulog Duha ka mga Apostoles mikumpirmar niini nga sundanan pinaagi sa pagpahayag, “Ang kaminyoon tali sa usa ka lalaki ug usa ka babaye gi-orden sa Dios” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Bisan og ang mga balaod sa mga tawo mosulay sa pag-usab sa depenisyon, ang mga balaod sa Dios magpabilin nga pareha ra sa kahangturan.
Background nga Basahunon
D. Todd Christofferson, “Nganong Kaminyoon, Nganong Pamilya,” Liahona, Mayo 2015, 50–53.
Dallin H. Oaks, “Dili Magbaton og Laing Dios,” Liahona, Nob. 2013, 72–75.
Sheri L. Dew, “It Is Not Good for Man or Woman to Be Alone,” Ensign, Nob. 2001, 12–14.
“The Divine Institution of Marriage,” mormonnewsroom.org/article/the-divine-institution-of-marriage.
Mga Hilisgutan sa Ebanghelyo, “Same-Sex Marriage,” lds.org/topics.
Ang kaminyoon tali sa lalaki ug sa babaye gi-orden sa Dios
Isulat ang mosunod nga doktrina sa pisara: “Ang kaminyoon tali sa lalaki ug sa babaye gi-orden sa Dios.” Pangutan-a ang mga estudyante unsay gipasabut sa pulong gi-orden niini nga sentence. (Ang posibling mga tubag maglakip sa mosunod: sa pagsugo, deklarasyon, o pagtudlo pinaagi sa gahum sa mas taas og awtoridad.) Pangutan-a ang mga estudyante sa unsa nga paagi nga kini nga depenisyon nakatabang nila nga makasabut sa kahulugan sa doktrina nga anaa sa pisara. Hangyoa ang mga estudyante nga basahon sa hilum ang Doktrina ug mga Pakigsaad 49:15–17 sa pagpangita og gipahayag pag-usab sa kasulatan bahin niini nga doktrina.
Dapita ang usa ka estudyante sa pagbasa og kusog sa Moises 3:21–24. Dapita ang klase sa pagpangita unsa ang importante nga lakang sa plano sa kaluwasan ang gihulagway niini nga mga bersikulo. (Samtang motubag ang mga estudyante, ipasabut nga ang pakisayran sa gusok ni Adan simbolo lang—ang Dios wala magkuha og gusok gikan ni Adan. Mahimo usab nga mosugyot ka nga ang mga estudyante mosulat sa mosunod nga depenisyon sa pulong mounong sa daplin sa ilang mga kasulatan: “maghimo og suod, malungtaron, ug lig-on nga panaghiusa.”)
Unsa sa inyong hunahuna ang gusto sa Dios nga itudlo nato pinaagi sa paghulagway sa pisikal nga paglalang ni Eva niining paagiha? (Si Elder Russell M. Nelson sa Korum sa Napulog Duha ka mga Apostoles mitudlo: “Ang gusok, nga gikan sa kilid, ingon og nagpakita og panag-uban. Ang gusok wala magpasabut nga dominyon ni ulipon, apan pareha nga relasyon isip managkauban, sa pagtrabaho ug sa pagpakabuhi, pagtambayayong” [“Lessons from Eve,” Ensign, Nob. 1987, 87].)
Unsay atong makat-unan gikan sa Moises 3:24? (Si Elder D. Todd Christofferson sa Korum sa Napulog Duha ka mga Apostoles miingon nga ang Dios “mihiusa kanila [Adan ug Eva] isip bana ug asawa. … Ni kita o laing mortal makausab niining balaang han-ay sa kaminyoon. Dili kini inimbento sa tawo” [“Nganong Kaminyoon, Nganong Pamilya,” Liahona, Mayo 2015, 52].)
I-display ang mosunod nga mensahe ni Elder David A. Bednar sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog. Hangyoa ang klase sa pagpangita og mga kaalam ngano nga ang Dios mi-orden nga ang kaminyoon alang lang tali sa usa ka lalaki ug usa ka babaye.
Imahe
Elder David A. Bednar
“Human sa paglalang sa kalibutan, si Adan gipapuyo sa Tanaman sa Eden. Labaw sa tanan, hinoon, miingon ang Dios ‘dili maayo nga kinahanglan ang tawo mag-inusara’ (Moises 3:18; tan-awa usab sa Genesis 2:18), ug si Eva nahimong asawa ug kaabag ni Adan. Ang talagsaong panaghiusa sa espiritwal, pisikal, mental, ug emosyonal nga kapasidad sa lalaki ug babaye gikinahanglan sa pagpahinabo sa plano sa kalipay. ‘Hinoon diha sa Ginoo ang babaye dili gawas sa lalaki ni ang lalaki gawas sa babaye’ (1 Mga Taga-Corinto 11:11). Ang lalaki ug babaye gituyo aron magkat-on, maglig-on, mopanalangin, ug maghingpit sa usag usa” (Kita Nagtuo sa Pagkaputli,” Liahona, Mayo 2013, 42).
Base sa inyong pagsabut sa plano sa Langitnong Amahan sa kalipay, ngano nga ang kaminyoon tali sa usa ka lalaki ug usa ka babaye Iyang gi-orden?
Unsay bili ang anaa sa pagsunod sa sundanan kon maghimo og sinina?
Unsay bili ang anaa sa pagtuon sa sakto nga sundanan sa kaminyoon?
Ipasabut nga ang kaminyoon ni Adan ug Eva nagpresentar sa sundanan sa Ginoo kon unsa ang kaminyoon. Hangyoa ang usa ka estudyante sa pagbasa og kusog sa Moises 3:18.
Unsa sa inyong pagsabut ang pulong “katabang”? (“Tabang” gihubad gikan sa kombinasyon sa duha ka Hebreohanon nga mga pulong [root word], ang usa nagpasabut sa pagluwas, ug ang lain nagpasabut og pagkalig-on. “Angayan” gihubad gikan sa Hebreo nga pulong nga nagsugyot og angay ug managsama. Sa ingon, ang “angayan nga katabang” mao ang usa ka tukma ug managsama nga kauban nga naghupot og gahum sa pagluwas. Isugyot nga kini nga depinisyon isulat sa mga estudyante sa ilang mga kasulatan tapad sa Moises 3:18. Tan-awa usab sa Howard W. Hunter, “Being a Righteous Husband and Father,” Ensign, Nob. 1994, 51.)
Unsa nga matang sa relasyon ang gisugyot niini nga pulong alang sa usa ka bana ug asawa? (I-summarize ang mga tubag sa mga estudyante pinaagi sa pagsulat sa mosunod nga doktrina diha sa pisara: Ang Langitnong Amahan mi-orden nga ang usa ka bana ug asawa managkauban.)
Unsa sa inyong hunahuna ang gipasabut sa usa ka bana ug asawa nga managkauban?
Bahina ang klase ngadto sa ginagmay nga mga grupo, tingali dunay tulo o upat ka mga estudyante sa usa ka grupo. Hangyoa ang mga estudyante sa pag-scan sa Moises 5:1–5, 12, ug 16, mangita og mga paagi diin si Adam ug Eva naningkamot isip managsama nga kauban, ug sa paghisgot sa ilang mga nakit-an uban sa ilang mga grupo.
I-display ang mosunod nga mga pamahayag ni Presidente Ezra Taft Benson (1899–1994) ug Sister Sheri L. Dew, kanhi magtatambag sa kinatibuk-ang kapangulohan sa Relief Society. Dapita ang usa ka estudyante sa pagbasa niini og kusog:
Imahe
President Ezra Taft Benson
“Gikan niining dinasig nga rekord [Moises 5:1–2, 4, 12, 16] atong makita nga si Adan ug si Eva naghatag kanato og hingpit nga ehemplo sa usa ka pakigsaad sa kaminyoon nga relasyon. Sila nag-uban sa paghago; nanganak; nag-uban sa pag-ampo; ug sila nagtudlo sa ilang mga anak sa ebanghelyo—nga nag-uban. Kini ang sundanan nga buot sa Dios nga sundon sa tanang matarung nga mga lalaki ug mga babaye” (Mga Pagtulun-an sa mga Presidente sa Simbahan: Ezra Taft Benson [2014], 219).
Imahe
Sheri L. Dew
“Palandunga ang mga istorya sa kasulatan ni Adan ug Eva ug tan-awa unsa ang itudlo sa Ginoo kaninyo nga makapalig-on sa inyong kaminyoon [ug] sa inyong pamilya. … Ang mga sundanan sa atong Amahan makatabang nato nga makalikay sa pagpangilad. Tan-aw ngadto sa Ginoo ug dili sa kalibutan alang sa inyong mga ideya ug mga sumbanan bahin sa mga lalaki ug mga babaye” (Sheri L. Dew, “It Is Not Good for Man or Woman to Be Alone,” Ensign, Nob. 2001, 14).
Kanus-a kamo nakakita og bana ug asawa nga nagtambayayong isip managkauban?
Unsa sa inyong hunahuna nga ang pagsabut sa balaang sundanan alang sa kaminyoon makaimpluwensya sa inyong umaabut?
Hatagi ang mga estudyante og pipila ka minuto sa paghimo og duha ka lista: (1) ang ilang mga kinaiya karon nga makatabang nila ngadto sa kaminyoon nga gi-orden sa Dios, ug (2) ang mga kinaiya nga kinahanglan nilang usbon aron makapaduol niana nga tumong. Ipadayag ang pagsalig nga ang Ginoo mopanalangin nila sa ilang mga paningkamot.
Ang mga pagtulun-an sa Ginoo bahin sa kaminyoon sa managsama og sekso
(Pahibalo: Pagsensitibo sa mga estudyante kinsa mopadayag og lain-laing mga opinyon niini nga isyu. I-focus ang panaghisgutan sa klase bahin sa mga pamahayag sa mga General Authority sa Simbahan.)
Sa unsa nga paagi nga ang sundanan sa Dios sa kaminyoon maapektahan kon ang mga gobyerno mopasar og mga balaod nga supak niini nga sundanan? (Samtang motubag ang mga estudyante, gamita ang Mormon 9:9 sa pagpakita nga ang Dios ug ang Iyang mga balaod dili mausab. Ang dili mausab nga kinaiya sa Dios makatabang nato nga makabaton og pagsalig ug hugot nga pagtuo Kaniya.)
Hatagi ang matag estudyante og kopya sa mosunod nga pamahayag gikan sa Unang Kapangulohan ug sa Korum sa Napulog Duha ka mga Apostoles, ug dapita ang mga estudyante sa pagpangita og mga rason ngano nga ang mga lider sa Simbahan namulong kabahin sa kaminyoon sa managsama og sekso:
“Ang legal nga mga kahimoan ug pamalaod sa pipila ka mga nasud mihatag og sibil nga pag-ila sa mga relasyon sa kaminyoon sa managsama og sekso, ug ang pangutana sa kaminyoon sa managsama nga sekso padayon nga gilantugian sa kadaghanan. Sa atong pagsupak niini ug sa ubang mga isyu, giawhag namo ang tanan nga ibutang sa hunahuna ang mga katuoyan sa atong Langitnong Amahan sa paglalang sa yuta ug paghatag sa atong mortal nga pagkatawo ug kasinatian dinhi isip Iyang mga anak [tan-awa sa Genesis 1:27–28; 2:24]. … Ang kaminyoon tali sa usa ka lalaki ug usa ka babaye gi-establisar sa Dios ug mao ang mahinungdanon sa Iyang plano alang sa Iyang mga anak ug alang sa kaayohan sa katilingban. Lig-ong mga pamilya, giniyahan sa usa ka mahigugmaong inahan ug amahan, nagsilbi nga sukaranang institusyon sa pag-amuma sa mga anak, pagtudlo og pagtuo, ug sa pagpaabut niini ngadto sa umaabut nga mga henerasyon sa moral nga mga kalig-on ug mga hiyas nga importante sa sibilisasyon ug mahinungdanon sa mahangturong kaluwasan.
“Ang mga kausaban sa sibil nga balaod dili, sa pagkatinuod dili, makausab sa moral nga balaod nga gitukod sa Dios. Ang Dios naglaum kanato nga mosuporta ug mosunod sa Iyang mga sugo bisan pa man sa managlahing mga opinyon ug mga uso sa katilingban. Ang Iyang balaod sa kaputli klaro: ang sekswal nga relasyon tukma lamang tali sa lalaki ug babaye kinsa legal nga naminyo isip bana ug asawa.” (kinutlo sa Mga Hilisgutan sa Ebanghelyo, “Same-Sex Marriage,” lds.org/topics).
Sa unsa nga paagi nga ang pagsabut sa plano sa Dios ug doktrina makatabang nato sa pag-ila sa kaimportante sa kaminyoon tali sa usa ka lalaki ug usa ka babaye?
Hatagi usab ang matag estudyante og kopya sa mosunod nga pamahayag, nga gikan sa dokumento nga gimantala sa Simbahan nga giulohan og “The Divine Institution of Marriage.” Hangyoa ang mga estudyante sa pagpangita og mga rason ngano nga ang depenisyon sa kaminyoon tali sa usa ka lalaki ug usa ka babaye kinahanglan mapreserbar diha sa mga balaod ug mga lagda:
“Ang kaminyoon mas labaw pa kay sa kontrata tali sa mga indibidwal sa pagmatuod sa ilang paghigugmaay ug makahatag og mutual nga mga obligasyon. Hinoon, ang kaminyoon usa ka mahinungdanon nga institusyon sa pag-amuma sa mga anak ug pagtudlo nila nga mahimong responsable nga mga hamtong. Sa tibuok kasaysayan, ang tanang matang sa gobyerno miila sa kaminyoon nga importante sa pagpreserbar sa sosyal nga kalig-on ug pagpadayon sa kinabuhi. Bisan unsa nga matang sa kaminyoon nga gipahigayon isip relihiyoso nga tulumanon o sibil nga seremonya, sa hapit tanang kultura ang kaminyoon gipanalipdan ug giendorso sa mga gobyerno ilabi na sa pagpreserbar ug pagpadayon sa institusyon nga labing mahinungdanon sa pag-amuma sa mga anak ug pagtudlo kanila sa moral nga mga hiyas nga nagsuporta sa sibilisasyon. …
“Sa pagtan-aw sa duol nga koneksyon nga dugay nang anaa tali sa kaminyoon, paglalang, gender, ug pagkaginikanan, ang kaminyoon sa managsama og sekso dili yanong makonsiderar nga paghatag og bag-ong ‘katungod.’ Layo na kaayo kini nga depenisyon sa matang mismo sa kaminyoon. Nagtimaan kini og sukaranang kausaban sa institusyon sa kaminyoon sa mga paagi nga supak sa mga katuyoan sa Dios alang sa Iyang mga anak ug makadaot sa malungtarung tinguha sa katilingban” (“The Divine Institution of Marriage,” mormonnewsroom.org/article/the-divine-institution-of-marriage).
Unsa ang pipila ka mga rason ngano nga ang mga katilingban tradisyunal nga miendorso ug nanalipod sa kaminyoon tali sa usa ka lalaki ug sa usa ka babaye?
Unsaon sa usa ka tawo nga makahibalo sa kamatuoran sa posisyon sa Simbahan niining importante nga isyu?
Awhaga ang mga estudyante sa pagkonsiderar sa unsa nga paagi nga ang ilang mga opinyon itandi sa mga pagtulun-an sa Dios bahin sa kaminyoon sumala sa gitudlo sa mga lider sa Simbahan. Ipakigbahin ang imong pagpamatuod nga ang pagtuo ug pagsuporta sa sundanan sa Dios alang sa kaminyoon makahatag og mahangturong mga panalangin.