Mahimong Manluluwas sa Bukid sa Zion

Pasiuna

Pinaagi sa buhat sa templo, ang Ginoo mihimo nga posible alang sa tanan nga namatay nga wala makahibalo sa ebanghelyo ni Jesukristo “sa pagbalik ngadto sa atubangan sa Dios ug alang sa mga pamilya nga magkahiusa sa kahangturan” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Niini nga leksyon, ang mga estudyante makat-on kon sa unsa nga paagi nga ang espiritu ni Elijah makadasig nato sa pag-apil sa buhat sa family history ug mahimong “manluluwas … sa bukid sa Zion” (Abdias 1:21).

Background nga Basahunon

David A. Bednar, “Ang mga Kasingkasing sa mga Anak Mobati,” Liahona, Nob. 2011, 24–27.
Quentin L. Cook, “Mga Gamut ug mga Sanga,” Liahona, Mayo 2014, 44–48.

Mga Sugyot alang sa Pagtudlo

Doktrina ug mga Pakigsaad 138:27–37, 58–59

Ang pangalagad ni Jesukristo didto sa kalibutan sa espiritu

Dapita ang mga estudyante sa pagkonsiderar pila ka buok sa ilang mga katigulangan ang namatay nga wala makadungog sa ebanghelyo o makadawat sa makaluwas nga mga ordinansa.

Pahinumdumi ang mga estudyante nga human mamatay ang Manluluwas, nagpakita Siya ngadto sa mga espiritu sa mga patay. Ang mga detalye niini nga pagbisita, sumala sa nakita sa panan-awon ni Presidente Joseph F. Smith (1838–1918), narekord sa Doktrina ug mga Pakigsaad 138. (Timan-i nga kini usa ka ehemplo sa pagtabang sa mga estudyante nga makasabut sa konteksto kon magtuon sa mga kasulatan.)

Hangyoa ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 138:27–37. Hangyoa ang klase sa pagsunod, nga mangita kon unsay gibuhat sa Ginoo panahon sa Iyang pangalagad didto sa kalibutan sa espiritu.

Giunsa sa Manluluwas pag-andam ang paagi alang sa mga espiritu sa mga patay nga matubos? (Hatagi og gibug-aton ang mosunod nga kamatuoran: Ang Manluluwas mitugot, misugo, ug miandam sa matarung nga mga espiritu sa pagsangyaw sa ebanghelyo ngadto niadtong atua sa bilanggoan sa espiritu.)
Sumala sa bersikulo 34, ngano nga kinahanglan gayud nga ang mga baruganan sa ebanghelyo isangyaw ngadto niadtong atua sa bilanggoan sa espiritu? (Ipasabut “nga sila unta mahukman sumala sa mga tawo diha sa unod” nagpasabut nga ang tanang mga anak sa Dios, buhi man o patay, adunay oportunidad nga modawat sa ebanghelyo ug makadawat sa makaluwas nga mga ordinansa aron nga ang tanan mahukman sa samang sumbanan. Tan-awa usab sa D&P 137:7–9.)

Hangyoa ang mga estudyante sa pagbasa sa Doktrina ug mga Pakigsaad 138:31, 58–59, mangita kon unsay buhaton sa mga indibidwal nga gitudloan sa ebanghelyo didto sa kalibutan sa espiritu aron mahimong “manununod sa kaluwasan.”

Sumala niini nga mga bersikulo, unsay kinahanglang buhaton sa mga espiritu sa mga patay aron mahimong “manununod sa kaluwasan”? (Tabang sa pagklaro niini nga baruganan: Human matudloi ang mga indibidwal didto sa bilanggoan sa espiritu sa mensahe sa ebanghelyo, makapili sila sa paghinulsol ug modawat sa mga ordinansa pinaagi sa pagpahigayon sa vicarious [puli] nga mga ordinansa diha sa mga templo.)

Ipakigbahin ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Ang pipila nasayop sa pagsabut ug naghunahuna nga ang nangamatay nga mga kalag ‘gibunyagan ngadto sa Mormon nga tinuohan nga sila wala kahibalo’ o nga ‘ang mga tawo nga kinsa sa makausa miyembro sa laing tinuhoan mapugos sa pagdawat sa Mormon nga tinuhoan.’ Sila naghunahuna nga kita tungod niana adunay gahum sa pagpugos sa usa ka kalag kabahin sa pagtuo. Sa tinuod, kita wala. Ang Dios naghatag sa tawo sa iyang kabubut-on gikan pa sa sinugdanan. ‘Ang patay kinsa naghinulsol pagatubson, pinaagi sa pagsunod sa mga ordinansa sa balay sa Dios’ [D&P 138:58], apan kon modawat lamang sila niadtong mga ordinansa” (“The Redemption of the Dead and the Testimony of Jesus,” Ensign, Nob. 2000, 10).

Dapita ang mga estudyante sa pagpares-pares ug mag-role-play magpasabut ngadto sa usa ka dili miyembro sa unsa nga paagi nga ang plano sa Dios nakahimo nga posible alang sa tanang mga indibidwal, buhi ug patay, nga makadawat sa ebanghelyo ug sa makaluwas nga mga ordinansa.

Abdias 1:21; Malaquias 4:5–6; Doktrina ug mga Pakigsaad 110:13–16; 128:18

Kinahanglan mahimo kitang mga “manluluwas … sa bukid sa Zion” (Abdias 1:21)

Dapita ang mga estudyante sa paglista og mga paagi diin makaapil kita sa buhat sa family history. (Pagpangita sa mga pangalan ug pagdala niini ngadto sa templo, pagkolekta ug pagpreserbar sa mga litrato sa pamilya ug mga istorya, pag-index, ug uban pa.)

Sa unsa nga paagi nga ang pag-apil sa buhat sa family history makaapekto sa atong mga pagbati ngadto sa namatay nga mga sakop sa pamilya?

Aron matabangan ang mga estudyante sa pag-ila niadto nga mga pagbati, i-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Si Elder Russell M. Nelson mitudlo nga ang Espiritu ni Elijah “usa ka pagpakita sa Espiritu Santo nga naghatag og pagsaksi sa balaanong kinaiya sa pamilya’ (‘A New Harvest Time,’ Ensign, Mayo 1998, 34). Kining talagsaong impluwensya sa Espiritu Santo nagdasig sa mga tawo sa pag-ila, pagrekord, ug paghinumdom sa ilang mga katigulangan ug mga sakop sa pamilya—kaniadto ug karon. Ang Espiritu ni Elijah nakaapekto sa mga tawo sa sulod ug gawas sa Simbahan” (“Ang mga Kasingkasing sa mga Anak Pabalikon,” Liahona, Nob. 2011, 25).

Ikonsiderar ang pagsulat sa mosunod nga depenisyon “sa Espiritu ni Elijah” diha sa pisara:

Ang Espiritu ni Elijah mao ang timailhan sa Espiritu Santo nga nag-impluwensya kanato sa pag-ila, pagdokumento, ug paghandom sa mga sakop sa atong pamilya kaniadto ug karon.

Hangyoa ang usa ka estudyante sa pagbasa og kusog sa Malaquias 4:5–6.

Sumala niini nga tudling, sa unsa nga paagi nga ang gisaad nga pagbisita ni propeta Elijah makaimpluwensya sa mga pamilya sa kalibutan ug sa buhat sa kaluwasan sa Ginoo sa ulahing mga adlaw? (Pahinumdumi ang mga estudyante nga ang nabanhaw nga si Elijah nagpakita ngadto ni Joseph Smith ug Oliver Cowdery niadtong Abril 3, 1836, didto sa Templo sa Kirtland ug mitugyan diha kanila sa mga yawe sa pagbugkos sa Melchizedek Priesthood [tan-awa sa D&P 110:13–16].)
Unsa man ang buot ipasabut nga ang kasingkasing sa mga amahan ug sa mga anak pabalikon ngadto sa usag usa?

Dapita ang usa ka estudyante sa pagbasa og kusog sa mosunod nga pamahayag niini nga mga bersikulo ni Propeta Joseph Smith (1805–44):

“Karon, ang pulong pabalikon dinhi kinahanglan nga hubaron nga pagabugkoson, o i-seal. Apan unsa ang katuyoan niining mahinungdanong misyon? o unsaon kini pagtuman? Ang mga yawe itugyan, ang espiritu ni Elijah moabut, … ug ang mga Santos motungas ingon nga mga manluluwas sa Bukid sa Zion [tan-awa sa Abdias 1:21].

“Apan unsaon nila nga mahimong mga manluluwas sa Bukid sa Zion? Pinaagi sa pagtukod sa ilang mga templo, pagpabarug sa ilang mga bunyaganan, ug pagpadayon ug pagdawat sa tanan nga mga ordinansa … alang sa ilang tanan nga mga katigulangan kinsa namatay, ug luwason sila … ug dinhi niini ang kadena nga nagbugkos sa mga kasingkasing sa mga amahan ngadto sa mga anak, ug sa mga anak ngadto sa mga amahan, nga natuman ang misyon ni Elijah” (Mga Pagtulun-an sa mga Presidente sa Simbahan: Joseph Smith [2007], 572–73).

Unsa ang gisulti ni Joseph Smith nga kita mamahimo samtang magdawat kita sa mga ordinansa sa templo alang sa atong patay nga mga katigulangan? (Mga Manluluwas sa Bukid sa Zion.)

I-display ang mosunod nga pamahayag gikan ni Presidente Gordon B. Hinckley (1910–2008), ug hangyoa ang usa ka estudyante sa pagbasa niini og kusog:

“Literal kitang mahimo nga mga Manluluwas sa Bukid sa Zion. Unsay ipasabut niana? Sama sa atong Manunubos nga mihatag sa Iyang kinabuhi isip puli nga sakripisyo alang sa tanang mga tawo, ug sa pagbuhat sa ingon nahimong Manluluwas, mao usab kita, sa gamay nga paagi, kon kita mohimo sa proxy didto sa templo, mahimo kitang mga manluluwas niadtong atua sa pikas bahin nga walay mouswag hangtud dunay buhaton dinhi alang kanila pinaagi niadtong ania sa yuta. (“Panapos nga Pakigpulong,” Liahona, Nob. 2004, 105).

Ipasabut nga si Jesukristo mipahigayon sa Pag-ula nga vicariously [pagpuli] alang kanato. Kon mopahigayon kita og vicarious nga mga ordinansa alang niadtong kinsa namatay, kita mahimong “mga manluluwas sa Bukid sa Zion.” Ang pulong nga “Bukid sa Zion” mahimong nagpasabut sa daghang mga dapit, lakip na sa langitnong siyudad sa Dios o sa siyudad sa Bag-ong Jerusalem (tan-awa sa Mga Hebreohanon 12:22; D&P 76:66; 84:2–4; 1 Mga Hari 8:1).

Sa unsa nga paagi nga ang pagsabut sa mga pulong “mga manluluwas sa Bukid sa Zion” modasig nato sa paghimo pa og dugang sa pagtabang sa mga sakop sa atong pamilya kaniadto ug karon nga makadawat og mga panalangin sa templo?

Isip kabahin sa panaghisgutan, mahimo nimong ipakigbahin ang mosunod nga pamahayag ni Elder D. Todd Christofferson:

“Pinaagi sa pag-ila sa atong mga katigulangan ug sa pagpahigayon alang kanila sa makaluwas nga mga ordinansa nga dili nila mapahigayon sa ilang kaugalingon, kita nagpamatuod sa walay kinutuban nga pagkaapil sa Pag-ula ni Jesukristo. Si Kristo ‘namatay alang sa tanan.’ [2 Mga Taga-Corinto 5:15.]” (“The Redemption of the Dead and the Testimony of Jesus,” Ensign, Nob. 2000, 10).

Ipasabut nga ang Doktrina ug mga Pakigsaad 128 nagrekord nga si Propeta Joseph Smith misulat ngadto sa mga Santos diin iyang gikutlo ang Malaquias 4:5–6 ug dayon mihatag og dinasig nga komentaryo niadto nga mga bersikulo.

Dapita ang mga estudyante sa pagbasa og hilum sa Doktrina ug mga Pakigsaad 128:18. Hangyoa sila sa pagmarka sa mga rason nga gihatag ni Joseph Smith alang sa pag-apil sa buhat sa pagtubos sa nangamatay nga mga sakop sa atong pamilya. Human mahisguti unsay nakit-an sa mga estudyante, hisguti ang mosunod:

Sa unsang paagi ang atong mga paningkamot sa paghatag sa makaluwas nga mga ordinansa alang sa atong katigulangan makahatag usab og kaluwasan kanato?

Sa pisara, isulat ang mosunod nga mga pulong: Pangitaa, Dad-a, ug Tudloi.

Hangyoa ang mga estudyante sa pagpasabut kon sa unsa nga paagi nga kiing tulo ka pulong makahulagway sa mga lakang nga giawhag nga atong buhaton samtang magpahigayon kita sa buhat sa templo ug family history. (Siguroha nga ang mga estudyante moila sa mosunod: Pangitaa ug andama ang mga pangalan alang sa ordinansa; dad-a kadto nga mga pangalan ngadto sa templo ug ipahigayon ang proxy nga mga ordinansa sa templo niadto nga mga indibidwal; tudloi ang uban sa pagbuhat sa ingon.)

Aron matabangan ang mga estudyante nga makasabut sa mga panalangin nga moabut sa pagsunod niini nga mga lakang, i-display ug hangyoa ang usa ka estudyante sa pagbasa og kusog sa mosunod nga pamahayag ni Elder David A. Bednar, o ipasalida ang video “The Promised Blessings of Family History” (lds.org/topics/family-history/fdd-cook/blessings-video). Samtang magbasa o manan-aw ang mga estudyante, dapita sila sa pagpangita sa gisaad nga mga panalangin nga moabut tungod sa pag-apil sa buhat sa family history work.

“Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na (tan-awa sa D&P 124:28–36). Ug awhagon ko kamo sa pagtabang sa ubang tawo sa pag-ila sa ilang mga family history.

Kon motuman mo niini nga pagdapit uban sa pagtuo, ang inyong kasingkasing mobati sa inyong mga amahan. … Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi” (“Ang mga Kasing kasing sa mga Anak Mobati,” 26).

Unsa nga mga panalangin ang moabut niadtong kinsa moapil sa buhat sa family history?

Pangutana kon adunay bisan kinsa nga estudyante ang mopakigbahin og personal nga mga kasinatian nga nakadawat og mga panalangin pinaagi sa pag-apil sa buhat sa family history.

Alang niadtong kinsa nakadawat og mga ordinansa alang sa katigulangan, unsa nga mga pagbati ang inyong ipakigbahin mahitungod sa pag-apil niining sagrado nga mga kasinatian?

Dapita ang mga estudyante sa pagsiksik sa ilang mga family history gamit ang mga kapanguhaan nga anaa sa FamilySearch.org ug sa pagpangayo og tabang sa family history consultant sa ilang ward kon gikinahanglan. Awhaga ang mga estudyante sa pagplano sa pagpangita sa mga pangalan sa ilang katigulangan, pagdala sa mga pangalan niini nga katigulangan ngadto sa templo ug sa pagpahigayon sa mga ordinansa alang kanila, ug sa pagtudlo sa uban sa pagbuhat sa ingon.

Mga Basahunon sa Estudyante

Abdias 1:21; Malaquias 4:5–6; Doktrina ug mga Pakigsaad 110:13–16; 128:18; 138:27–37, 58–59.
David A. Bednar, “Ang mga Kasingkasing sa mga Anak Mobati,” Liahona, Nob. 2011, 24–27.
Quentin L. Cook, “Mga Gamut ug mga Sanga,” Liahona, Mayo 2014, 44–48.