Leksyon 21: Ang Pag-amuma sa mga Anak pinaagi sa Gugma ug Pagkamatarung
21
Ang Pag-amuma sa mga Anak pinaagi sa Gugma ug Pagkamatarung
Pasiuna
“Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Ang mga ginikanan makatuman niini nga katungdanan sa ilang pagpadayag sa ilang gugma ug pagpamatuod sa pulong ug lihok ug moestablisar og regular nga mga kinaiya sa paghimo og family home evening, pag-ampo sa pamilya, ug pagtuon sa kasulatan sa pamilya.
Background nga Basahunon
Richard G. Scott, “Himoa ang Paggamit sa Inyong Pagtuo nga Inyong Unang Prayoridad,” Liahona, Nob. 2014, 92–95.
Jeffrey R. Holland, “Usa ka Pag-ampo alang sa mga Bata,” Liahona, Mayo 2003, 85–87.
Ang responsibilidad sa mga ginikanan sa paghigugma ug pag-atiman sa ilang mga anak
Ipakigbahin ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:
Imahe
Presidente Russell M. Nelson
“Sa dihang ang among kinamanghurang anak nga babaye mga kwatro anyos, nakauli ko gikan sa duty sa ospital nga gabii na kaayo. Nakita nako ang akong minahal nga asawa nga gikapoy kaayo. … Mao nga mitanyag ko nga ako ang mopakatulog sa among kwatro anyos. Nagsugod ko sa pagsugo: ‘Huboa ang imong sinina, ihayhay kini; isul-ob ang imong pajama; pagsipilyo; pag-ampo ug uban pa, nagsugo susama sa sarhento sa kasundalohan. Sa kalit iyang gilingo-lingo ang iyang ulo, mitan-aw nako ingon og dunay buot ipasabut, ug miingon, ‘Daddy, ikaw bay tag-iya nako?’
Gitudloan ko niya og importante nga leksyon. … Dili, dili kita tag-iya sa atong mga anak. Ang atong pribilehiyo isip ginikanan mao ang paghigugma kanila, sa paggiya kanila, ug buhian sila ” (“Listen to Learn,” Ensign, Mayo 1991, 22).
Unsa nga baruganan ang gitudlo ni Presidente Nelson niini nga kasinatian? (Ang mga ginikanan adunay pribilehiyo sa paghigugma ug paggiya sa ilang mga anak.)
Basaha o ipakita ang mosunod gikan sa pamahayag sa pamilya, ug hangyoa ang mga estudyante sa pagpangita sa importante nga mga pulong: “Ang bana ug asawa adunay ligdong nga kapangakohan sa paghigugma ug pag-amuma sa usag usa ug alang sa ilang mga anak. … Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug pagkamatarung” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Pangutan-a ang mga estudyante unsang importante nga mga pulong ang nakakuha sa ilang pagtagad ug ngano. Kon gikinahanglan, ipangutana:
Ngano kaha nga ang mga pulong “ligdong” ug “sagrado” gigamit sa paghulagway sa mga responsibilidad ug mga katungdanan sa mga ginikanan?
Sultihi ang mga estudyante nga ang Manluluwas mitudlo og sambingay nga nagpakita nga ang usa ka bata nga nagdako uban sa gugma makapadayon sa pagsalig sa iyang relasyon sa pamilya. Dapita ang mga estudyante sa pagbasa og hilum sa Lucas 15:11–20, mangita og ebidensya nga ang nawala nga anak nasayud nga gihigugma siya sa iyang amahan. Human sa igo nga panahon, dapita ang mga estudyante sa pagpakigbahin unsay ilang nakit-an.
Aron matabangan ang mga estudyante nga makasabut sa amahan niini nga sambingay, dapita ang usa ka estudyante sa pagbasa og kusog sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:
Imahe
Elder Robert D. Hales
“Sa sambingay sa anak nga usikan, makita nato ang mahinungdanon nga leksyon para sa mga pamilya ug ilabi na gayud sa mga ginikanan. Human ang manghud nga anak ‘naulian na sa panimuot’ [Lucas 15:17], nakahukom siya ng mouli.
“Giunsa man niya pagkasayud nga ang iyang amahan dili mosalikway niya? Kay nakaila man siya sa iyang amahan. Bisa pa man sa dili kalikayan nga dili pagsinabtanay, mga panag-away, ug mga kasaypanan sa pagkabatan-on sa iyang anak, akong mapanan-awan ang iyang amahan nga naa gayud didto nga may masinabtanon ug manggiloloy-on nga kasingkasing, tubag nga malumo, dunggan nga maminaw, ug mapasayloong paghangup. Ako usab nga mahunahuna ang iyang anak nga nasayud nga makapauli pa siya kay nahibalo siya sa matang sa panimalay nga naghulat kaniya” (“Inubanan sa Tanan nga Pagbati sa usa ka Malumo nga Ginikanan: Usa ka Mensahe sa Paglaum sa mga Pamilya,” Liahona, Mayo 2004, 90).
Unsa nga mga pagpadayag sa gugma gikan sa amahan ang nakita ni Elder Hales? Unsay laing mahimo sa ginikanan nga mosangpot ngadto sa mahigugmaon, maamuhon nga kahimtang? (Ikonsiderar ang pagamit sa Mga Taga-Efeso 6:4 sa pagdugang sa panaghisgutan sa klase alang niini nga pangutana.)
Unsa nga mga ehemplo ang inyong nakita sa mga ginikanan nga nagpakita og gugma alang sa ilang mga anak?
Unsay inyong gihimo karon sa pag-andam sa paghigugma ug pag-atiman sa inyong kaugalingong umaabut nga mga anak?
Ipakita sa mga estudyante ang usa ka litrato sa gamay nga bata, tingali imong kaugalingong bata.
Unsa ang importante nga mga pagtulun-an ang gikinahanglan sa usa ka bata aron makapalambo og pagkaespirituhanon?
Hangyoa ang mga estudyante sa pagkonsiderar niini nga pangutana samtang sila magtuon ug motandi sa mga pagtulun-an nga makita sa Doktrina ug mga Pakigsaad 93:36–40 ug 68:25–28. (Pahinumdom: “Ang usa ka tudling sa kasulatan o doktrina o baruganan sa kasagaran giklaro kon kini gitandi” sa laing tudling sa kasulatan [Gospel Teaching and Learning (2012), 22].)
Unsa nga baruganan kabahin sa mga responsibilidad sa mga ginikanan ang atong makat-unan gikan niini nga mga bersikulo? (Bisan mogamit sila og laing mga pulong, ang mga estudyante kinahanglang makasabut sa mosunod nga baruganan: Ang mga ginikanan mosunod sa sugo sa Ginoo kon ilang amumahan ang ilang mga anak diha sa kahayag ug kamatuoran. Ipasabut nga sa konteksto niini nga mga bersikulo, ang “kahayag” nagpasabut ngadto sa espirituhanon nga kahibalo ug pagsabut sa matarung nga mga baruganan.)
Ngano nga importante alang sa mga ginikanan sa pagtudlo sa mga anak sa mga baruganan ug mga ordinansa sa ebanghelyo ni Jesukristo diha sa panimalay?
Aron matabangan ang mga estudyante nga matubag niini nga pangutana, ipakigbahin ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles:
Imahe
Presidente Boyd K. Packer
“Ang mga kasulatan naghisgot sa ‘magdala sa panagang sa hugot nga pagtuo,’ miingon ang Ginoo, ‘ diin kamo makasagubang sa tanan nga nagdilaab nga mga pana sa dautan’ (D&C 27:17).
“Kining panagang sa hugot nga pagtuo maayo gayud pagkabuhat kon kini himoon diha sa [panimalay]. Samtang ang panagang mapanindot pa diha sa mga klase sa Simbahan ug sa mga kalihokan, gituyo kini nga pagabuhaton diha sa panimalay ug ipahaum sa matag indibidwal” (“Ayaw Kahadlok,” Liahona, Mayo 2004, 79).
Sa unsa nga paagi ninyo nakita ang mga ginikanan nga epektibong nagtudlo sa ilang mga anak sa matarung nga mga baruganan nga mogiya nila ngadto sa kahayag ug kamatuoran?
Unsa nga mga sangputanan ang gihisgutan sa Doktrina ug mga Pakigsaad 68:25 alang sa mga ginikanan nga nakahibalo sa ebanghelyo ni Jesukristo apan napakyas sa pagtudlo sa ilang mga anak sa mga baruganan sa ebanghelyo? (Tabangi ang mga estudyante nga makasabut sa mosunod nga baruganan: Ang mga ginikanan nga nakahibalo sa ebanghelyo ni Jesukristo may tulubagon ngadto sa Dios kon mapakyas sila sa pagtudlo sa ilang mga anak sa mga baruganan sa ebanghelyo.)
Ipasabut nga ang mga lider sa Simbahan balik-balik nga mitudlo sa matarung nga mga buhat nga kinahanglang himoon sa mga ginikanan sa ilang panimalay aron sa pagtudlo sa ilang mga anak sa mga baruganan sa ebanghelyo.
Iapud-apod ang handout nga makita sa katapusan sa leksyon ngadto sa matag estudyante, ug basahon ang mga intruksyon nga anaa sa handout. Human dunay igong panahon ug sa pag-aghat sa Espiritu Santo, ipangutana ang mosunod:
Sa unsa nga paagi kamo nakabenepisyo gikan niining tulo ka buhat sa pamilya?
Ngano sa inyong hunahuna nga importanting mopalambo og mga kinaiya sa pag-ampo, pagtuon sa mga kasulatan, ug paghimo og mga family home evening sa dili pa kamo magminyo ug magsugod og panganak?
Aron matabangan nga makasabut ang mga estudyante nga adunay ubang mga kahimtang diin ang mga ginikanan makatudlo sa mga baruganan sa ebanghelyo sa ilang mga anak, ipakigbahin ang mosunod nga mga pamahayag nila ni Elder David A. Bednar ug Jeffrey R. Holland:
Imahe
Elder David A. Bednar
“Ang mga ginikanan kinahanglan nga magmabinantayon ug sa espirituhanong paagi maminaw sa diha-diha nga mga oportunidad sa pagpamatuod ngadto sa ilang mga anak. Ang ingon nga mga okasyon dili kinahanglan nga planohon, i-iskedyul, o isulat. Gani, ang wala kaayo planoha nga miting sa pagpamatuod mao, ang mas dako og purohan alang sa pagkabalaan ug malungtaron nga epekto. …
“Sama pananglit, ang natural nga panghitabo sa panagsultihanay sa pamilya sa tingpanihapon tingali mao ang labing maayo nga panahon alang sa usa ka ginikanan sa pagbalik og sulti ug sa pagpamatuod sa piho nga mga panalangin nga iyang nadawat sulod niana nga panahon sa naandan nga mga kalihokan nianang adlawa.” (David A. Bednar, “Magtukaw uban sa Bug-os nga Pagkamapadayunon,” Liahona, Mayo 2010, 42).
Imahe
Elder Jeffrey R. Holland
“Pagpuyo sa ebanghelyo ingon nga makita og maayo kon mahimo. Tumana ang mga pakigsaad nga nahibaloan sa inyong mga anak nga inyong gihimo. Hatag og mga panalangin sa priesthood. Ug hatag sa inyong pagpamatuod! Ayaw pagtuo nga ang inyong mga anak makasabot ra sa inyong pagtuo sa ilang kaugalingon. …
“… Nahibalo ba ang atong mga anak nga nahigugma kita sa mga kasulatan? Ila ba kitang nakita nga nagbasa niini ug nagmarka niini ug nagsunod niini sa matag adlaw? Nakaabli ba sa pultahan ang atong mga anak nga wala tuyoa ug nakit-an tang nagluhod sa pag-ampo? Nakadungog ba sila natong nag-ampo uban kanila ug usab alang kanila tungod lamang sa yano nga gugma sa ginikanan ngadto sa mga anak? Nahibalo ba ang atong mga anak nga nagtuo kita sa pagpuasa … ? Nahibalo ba sila nga ganahan tang moadto sa templo … ? Nahibalo ba sila nga nahigugma kita ug nagpaluyo sa lokal ug kinatibuk-ang mga lider, dili man sila perpekto … ? Nahibalo ba kini nga mga anak nga kita nahigugma sa Dios sa atong tibuok kasingkasing ug nga naghandom kitang makakita sa panagway—ug mohikap sa mga tiil—sa Iyang Bugtong Anak? Nanghinaut ako nga sila nahibalo niini” (Jeffrey R. Holland, “Usa ka Pag-ampo alang sa mga Bata,”Liahona, Mayo 2003, 86–87).
Sa unsa nga paagi ang inyong mga ginikanan o laing mga ginikanan nga inyong nakita mipahimulos sa diha-diha nga mga oportunidad sa pagtudlo sa ebanghelyo?
Ngano nga importante alang sa mga ginikanan sa pagsunod sa ebanghelyo nga makita gyud?
Unsay inyong gibuhat karon sa pagpalambo sa inyong kahibalo sa ebanghelyo aron makatudlo kamo sa inyong mga anak sa kahayag ug kamatuoran?
Ipamatuod nga ang mga ginikanan “makaamuma sa ilang mga anak pinaagi sa gugma ug pagkamatarung” pinaagi sa paggiya kanila balik ngadto sa ilang Langitnong Amahan pinaagi sa paghigugma kanila, pagtudlo kanila nga mga baruganan sa ebanghelyo, ug pagpakita og maayong ehemplo.
Mga Panalangin sa Pag-ampo sa Pamilya, Pagtuon sa Kasulatan sa Pamilya, ug Family Home Evening
Ang Manwal sa Magtutudlo sa Mahangturon nga Pamilya—Leksyon 21
Samtang basahon ninyo ang mosunod nga mga pagtulun-an sa mga lider sa Simbahan, badlisi ang mga panalangin nga moabut gikan sa inadlaw nga pag-ampo sa pamilya ug pagtuon sa kasulatan ug sinemana nga family home evening.
Si Elder Richard G. Scott sa Korum sa Napulog Duha ka mga Apostoles mitudlo:
“Mga ginikanan, tabangi pagpanalipod ang inyong mga anak pinaagi sa paghatag nila og proteksyon buntag ug gabii nga maggikan sa pag-ampo. … Protektahi ang inyong mga anak gikan sa kalibutanong mga impluwensya kada adlaw pinaagi sa paglig-on kanila gamit ang gamhanang mga panalangin tungod sa pag-ampo sa pamilya. Ang pag-ampo sa pamilya kinahanglang mag-unang prayoridad sa inyong inadlaw nga kinabuhi.
“… Himoa [ang kasulatan] nga importante nga bahin sa matag adlaw nga kinabuhi. Kon ganahan mo nga ang inyong mga anak makaila, makasabut, ug makabuhat sa mga pag-aghat sa Espiritu, tun-i ang kasulatan uban nila. … Pinaagi sa inadlaw, padayon nga pagtuon sa kasulatan, duna moy kalinaw diha sa kagubot sa inyong palibut ug kalig-on sa pagbuntog sa mga tintasyon. Makapalambo mo og lig-ong pagtuo sa grasya sa Dios ug masayud nga pinaagi sa Pag-ula ni Jesukristo ang tanan mamaayo sumala sa kaugalingong panahon sa Dios” (“Himoa ang Paggamit sa Pagtuo nga Inyong Unang Prayoridad,” Liahona, Nob. 2014, 93–94).
Si Sister Linda S. Reeves sa kinatibuk-ang kapangulohan sa Relief Society mitudlo:
“Kinahanglan kong mopamatuod sa mga panalangin sa inadlawng pagtuon sa kasulatan, pag-ampo, ug sa sinemana nga family home evening. Mao gayud kini ang mga buhat nga makawagtang sa kakapoy, mogiya sa atong kinabuhi, ug sa dugang nga proteksyon sa atong panimalay” (“ Panalipod gikan sa Pornograpiya—usa ka Panimalay nga Nag-focus kang Kristo,” Liahona, Mayo 2014, 17).
Si Presidente Thomas S. Monson mideklarar:
“Ang pag-ampo sa pamilya mao ang labing maayong paagi sa paglikay sa sala, ug tungod niini mao ang labing epektibo nga makahatag og kamaya ug kalipay” (“Hallmarks of a Happy Home,” Ensign, Nov. 1988, 69).
Pamalandungi ang mosunod nga mga pangutana:
Hain niini nga mga panalangin ang inyong nasinati sa inyong pamilya o nakita sa ubang mga pamilya?
Unsay inyong mahimo karon aron mas hingpit ninyong madawat kini nga mga panalangin?