Ang Balaang mga Tahas ug mga Responsibilidad sa mga Lalaki

Pasiuna

Isip usa ka importanting bahin sa Iyang plano sa kalipay, ang Langitnong Amahan mitudlo sa mga lalaki nga mahimong mga bana ug mga amahan. Kini nga leksyon nag-focus sa ilang mga responsibilidad: “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarung ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).

Background nga Basahunon

Richard G. Scott, “Ang Mahangturong mga Panalangin sa Kaminyoon,” Liahona, Mayo 2011, 94–97.
D. Todd Christofferson, “Magpakalalaki Kita,” Liahona, Nob. 2006, 46–48.
Linda K. Burton, “Magdungan Kita’g Saka,” Liahona, Mayo 2015, 29–32.
Howard W. Hunter, “Being a Righteous Husband and Father,” Ensign, Nob. 1994, 66–70.
“Ang Sagradong mga Calling sa mga Amahan ug mga Inahan,” kapitulo 15 sa Mga Pagtulun-an sa mga Presidente sa Simbahan: Ezra Taft Benson (2014), 229-43.

Mga Sugyot alang sa Pagtudlo

Mga Taga-Efeso 5:25

Ang mga lalaki kinahanglang magminyo ug magmahal sa ilang mga asawa

Sugdi pinaagi sa pagpangutana:

Kinsa nga mga lalaki ang nakaimpluwensya sa inyong kinabuhi? Nganong duna silay epekto diha ninyo?

Ipasabut nga kini nga leksyon maghisgot sa balaang natudlo nga mga tahas sa mga lalaki. Walay laing mas importante nga mga tahas alang sa usa ka lalaki kay sa mga tahas sa bana ug amahan. Samtang ang mga lalaki magtinguha sa matarung nga paagi motuman niini nga mga tahas, mahimo silang mas sama sa ilang Amahan sa Langit.

Hangyoa ang usa ka estudyante sa pagbasa og kusog sa Mga Taga-Efeso 5:25.

Unsa nga baruganan ang inyong nakat-unan gikan niini nga kasulatan kon sa unsa nga paagi ang mga bana molihok? (Bisan og mogamit sila og lain-laing mga pulong, ang mga estudyante kinahanglang moila niini nga baruganan: Ang mga bana kinahanglang mohigugma sa ilang mga asawa sama nga gihigugma ni Jesukristo ang Simbahan.)
Unsa ang pipila ka mga paagi diin si Jesukristo nagpakita sa Iyang gugma alang sa Simbahan?
Unsa ang mahimo sa mga bana sa pagsunod ni Jesukristo sa paagi sa ilang pagtagad sa ilang mga asawa?

I-display ang mosunod nga pamahayag ni Presidente Spencer W. Kimball (1895–1985) ug hangyoa ang mga estudyante sa pagbasa niini og kusog:

“Gihigugma ni Kristo sa hilabihan ang simbahan ug ang mga katawhan niini nga boluntaryo niyang giantus ang mga pagpanglutos para kanila, giagwanta ang labihang kasakit nga magpaubos para kanila, mapailubong giantus ang kasakit ug pisikal nga pang-abuso para kanila, ug sa katapusan gitugyan ang bililhon niyang kinabuhi para kanila.

“Kon ang bana andam nga motratar sa iyang pamilya sa ingon niana nga paagi, dili lang kay ang asawa ra ang mosanong apan ang tibuok pamilya motuman sa iyang pagkapangulo” (“Home, the Place to Save Society,” Ensign, Ene. 1975, 5).

Unsa ang misulod sa inyong mga hunahuna samtang kamo mokonsiderar sa pamahayag ni Presidente Kimball?
Sa unsa nga paagi nga ang mga amahan mohimo og mga sakripisyo alang sa iyang pamilya sa atong panahon?

Ipamatuod nga ang Langitnong Amahan buot sa mga lalaki nga maningkamot nga mahimong matarung nga mga bana.

Mga Taga-Efeso 5:23; Doktrina ug mga Pakigsaad 121:36–46

Ang mga amahan kinahanglan nga mangulo sa pagkamatarung

Hangyoa ang mga estudyante sa pagsiksik sa ikapito nga paragraph sa “Ang Pamilya: usa ka Pamahayag ngadto sa Kalibutan” aron makat-on unsay gipaabut sa Langitnong Amahan sa mga amahan.

Unsa ang gipasabut sa pulong nga mangulo? (Sa paghatag og giya ug direksyon sa uban.)
Sa unsa nga paagi nga ang paghinumdom sa mga pulong “pinaagi sa balaan nga plano” makatabang sa usa ka lalaki sa pagtuman sa mga responsibilidad nga gihatag sa Dios ngadto sa mga amahan?

Aron matabangan ang mga estudyante nga mas makasabut sa unsa nga paagi nga ang usa ka amahan mangulo sa panimalay, hangyoa ang usa ka estudyante sa pagbasa og kusog sa Mga Taga-Efeso 5:23. Dayon paghangyo og laing estudyante sa pagbasa sa mosunod nga pamahayag ni Presidente Ezra Taft Benson (1899–1994):

“Si Apostol Pablo nagpasabut nga ‘ang bana mao ang ulo sa asawa, maingon usab nga si Kristo mao ang ulo sa simbahan’ (Mga Taga-Efeso 5:23; italics gidugang). Kana mao ang modelo nga kinahanglan nga atong sundon sa atong tahas sa pagdumala diha sa panimalay. Wala nato makita nga ang Manluluwas naggiya sa Simbahan sa isug o manakit nga kamot. Wala nato makita nga ang Manluluwas nagtagad sa Iyang Simbahan nga walay pagrespeto o pagpasagad. Wala nato makita ang Manluluwas nga naggamit og pwersa o pagpamugos sa pagtuman sa Iyang mga katuyoan. Bisan asa dili nato makita ang Manluluwas nga naghimo og bisan unsa apan kana nga naglig-on, nagbayaw, naghupay, ug naghimaya sa Simbahan. … Siya mao ang modelo nga kinahanglan gayud nga atong sundon samtang kita espirituhanong mogiya sa atong mga pamilya” (Mga Pagtulun-an sa mga Presidente sa Simbahan: Ezra Taft Benson [2014], 235).

Unsaon nimo pagsulti sa baruganan nga gitudlo ni Apostol Pablo ug ni Presidente Benson? (Ang mga estudyante kinahanglang mopahayag sa baruganan sama sa mosunod: Kon ang usa ka lalaki mogamit sa priesthood sa takus nga paagi sa iyang panimalay, matarung niyang maimpluwensya ang iyang asawa ug mga anak. Agig dugang, ipakigbahin kini nga baruganan uban sa mga estudyante: Samtang ang mga lalaki maningkamot sa pagtuman sa matarung nga paagi sa mga tahas sa bana ug amahan, mahimo silang mas sama sa ilang Amahan sa Langit.)

Sa pagpasabut og dugang kon sa unsa nga paagi nga ang usa ka bana ug amahan mangulo sa panimalay, ikonsiderar ang pagpakigbahin sa mosunod nga pamahayag ni Presidente Howard W. Hunter (1907–95):

“Pinaagi sa balaang pagtudlo, ang responsibilidad sa pagpangulo diha sa panimalay anaa sa tighupot sa priesthood (tan-awa sa Moises 4:22). Gituyo sa Ginoo nga ang asawa mahimong katabang alang sa lalaki (kaabag nagpasabut nga managkauban)—nga mao, usa ka kauban ug gikinahanglan diha sa hingpit nga panag-uban. Ang pagpangulo pinaagi sa pagkamatarung nagkinahanglan sa gipakigbahin nga responsibilidad tali sa bana ug sa asawa; mag-uban kamong maglihok nga may kahibalo ug pagduyog sa tanang may kalabutan sa pamilya. Alang sa usa ka lalaki nga molihok nga independente o nga walay pagtahud sa mga pagbati ug tambag sa iyang asawa sa pagdumala sa pamilya naggamit sa dili matarung nga kamandoan” (“Being a Righteous Husband and Father,” Ensign, Nob. 1994, 50–51).

Dapita ang mga estudyante sa pagpakli ngadto sa Doktrina ug mga Pakigsaad 121:36–46. Isugyot nga ilang i-cross-reference ang Mga Taga-Efeso 5:23, 25 uban niini nga mga bersikulo. (Tabangi ang mga estudyante sa pagpalambo og kahanas sa pagtuon sa kasulatan sa pag-cross-reference pinaagi sa pagdapit nila sa paghimo sa maong mga pakisayran bisan kanus-a nga kini angay.)

Hatagi ang mga estudyante og pipila ka minuto sa pagtuon sa Doktrina ug mga Pakigsaad 121:36–39 ug ikonsiderar sa unsa nga paagi nga ang pagpangulo nga gihulagway niini nga mga bersikulo supak sa matang sa pagpangulo nga gipakita ni Jesukristo.

Unsa sa inyong hunahuna ang gipasabut sa mga pulong nga “ang mga katungod sa pagkapari”? (Kon ang usa ka tawo makadawat sa priesthood, gitugyan sa Dios ang piho nga mga katungod ug mga awtoridad diha kaniya. Ang tawo makagamit niini nga mga katungod kon siya maglihok lamang diha sa pagkamatarung.)
Unsay mahitabo kon ang usa ka tighupot sa priesthood dili magpuyo sa matarung nga paagi? (Ang Dios mokuha sa mga gahum sa langit gikan niana nga tawo, ug ang tawo dili na makagamit sa awtoridad sa priesthood; ang Espiritu Santo magsubo.)

Aron masabtan sa unsa nga paagi nga ang amahan mogiya sa ilang pamilya, hangyoa ang pipila ka mga estudyante sa pagpuli-puli sa pagbasa og kusog sa Doktrina ug mga Pakigsaad 121:41-46.

Unsa ang pipila ka Kristohanong mga hiyas ang gihulagway niini nga mga bersikulo? Ngano kaha nga ang usa ka amahan nga aduna niini nga mga hiyas makahimo sa pagbaton sa mga gahum sa langit?
Sa unsa nga paagi nga kining Kristohanong mga hiyas makatabang sa mga amahan sa pagpangulo sa ilang mga pamilya? (Mahimo nimong klarohon nga kini nga Kristohanong mga hiyas mahimo usab nga palamboon sa mga babaye.)
Ihulagway kon unsa kaha ang bation nga mahimong kapikas o anak sa usa ka tawo kinsa naningkamot sa pagsunod sa ehemplo sa Langitnong Amahan ug ni Jesukristo sa paagi nga siya naggiya sa iyang pamilya.

I-display ug ipakigbahin ang mosunod nga pamahayag nga gisulat sa Korum sa Napulog Duha ka mga Apostoles niadtong 1973:

“Ang pagkaamahan mao ang pagpangulo, ang labing importante nga matang sa pagpangulo. Mao kana sukad pa kaniadto; mao usab kanunay sa hangtud. Ang amahan, uban sa panabang ug tambag ug awhag sa inyong mahangturong kompanyon, kamo mangulo diha sa panimalay. Wala kini gibase kon kamo labing takus o labing kwalipikado, apan gibase kini sa balaod ug [balaan] nga pagkatudlo” (“Father, Consider Your Ways,” Ensign, Hunyo 2002, 16).

Mga sister, unsay inyong mahimo sa pag-awhag sa mga batan-ong lalaki sa pagpalambo sa ilang balaan nga mga tahas ug mga responsibilidad sa ilang umaabut nga mga pamilya?
Unsa ang mahimo ninyo matag usa—mga lalaki ug mga babaye—karon nga mahimong mas makaandam sa paggiya sa inyong umaabut nga pamilya?

Mateo 2:13–16; 1 Timoteo 5:8; Doktrina ug mga Pakigsaad 75:28; 83:2, 4

Ang mga amahan kinahanglang mosangkap ug manalipod sa ilang mga pamilya

Hangyoa ang mga estudyante sa pagbasa sa 1 Timoteo 5:8 ug Doktrina ug mga Pakigsaad 75:28; 83:2, 4, ug pag-ila og laing importante nga katungdanan sa mga amahan. (Mahimo nimong isugyot nga ang mga estudyante mo-cross-reference niini nga mga tudling.)

Ngano kaha nga ang Ginoo nagpaabut sa mga amahan ngamosangkap sa mga kinahanglanon sa kinabuhi alang sa ilang mga pamilya? (Samtang motubag ang mga estudyante, itudlo nga sa panimalay uban sa single nga inahan, ang inahan makasangkap sa iyang pamilya.)
Unsa kahay ipasabut niini nga tudling alang sa usa ka batan-ong lalaki nga wala pa maminyo?

Hangyoa ang usa ka estudyante sa pagbasa sa mosunod nga pamahayag ni Presidente Gordon B. Hinckley (1910–2008):

“Trabaho alang sa edukasyon. Kuhaa ang tanang training kutob sa inyong mahimo. Sa kasagaran kamo bayaran unsay hunahuna sa employer nga kamo angayan. … Inyong nag-una nga obligasyon ang pagsangkap sa inyong pamilya” (“Living Worthy of the Girl You Will Someday Marry,” Ensign, May 1998, 50).

Hatagi og gibug-aton ngadto sa mga estudyante nga alang sa seguridad sa umaabut sa ilang mga pamilya, importante alang sa batan-ong mga lalaki ug babaye sa pagpahimulos niining panahon sa ilang kinabuhi nga makaeskwela og maayo ug makabansay sa panarbaho kutob sa mahimo.

Itudlo nga sa pamahayag sa pamilya, ang mga lider sa Simbahan nagtudlo nga ang mga amahan mao ang mosangkap ug manalipod sa ilang mga pamilya.

Unsa ang pipila ka mga kakuyaw nga naghulga sa mga pamilya karon?
Sa unsa nga paagi inyong nakita nga ang matarung nga mga amahan nanalipod sa ilang mga pamilya?

I-display ang mosunod nga pamahayag ni Presidente Howard W. Hunter, ug hangyoa ang usa ka estudyante sa pagbasa niini og kusog:

“Ang usa ka matarung nga amahan manalipod sa iyang mga anak pinaagi sa iyang panahon ug presensya diha sa ilang sosyal, edukasyonal, ug espiritwal nga mga kalihokan ug mga responsibilidad” (“Being a Righteous Husband and Father,” Ensign, Nob. 1994, 51).

Sa unsa nga paagi nga inyong magamit kini nga tambag sa inyong umaabut nga pamilya o sa inyong pamilya karon?

Dapita ang mga estudyante sa pagkonsiderar kon unsaon nila paglig-on ug pagpanalipod sa ilang mga pamilya ug dayon irekord ang ilang mga impresyon.

Ipasabut nga makat-on kita og importante nga baruganan gikan sa pag-atiman ni Jose sa batang si Jesus. Hangyoa ang usa ka estudyante sa pagbasa sa Mateo 2:13–16, mangita unsay gibuhat ni Jose sa pagpanalipod sa bata nga si Kristo gikan sa kakuyaw.

Sultihi ang mga estudyante nga dili sila kinahanglan nga mobalhin aron makapanalipod sa ilang mga pamilya, ilang mapahisama o magamit kini nga mga bersikulo sa ilang kaugalingon pinaagi sa pag-analisar sa pipila ka importante nga mga detalye:

Unsa ang gisulti sa Ginoo ngadto ni Jose sa bersikulo 13?
Kanus-a ug sa unsa nga paagi gitubag ni Jose kini nga pasidaan?
Sa unsa nga mga paagi ang mga amahan mosunod sa mga ehemplo ni Jose sa pagpanalipod sa ilang mga pamilya? (Siguroha nga ang mga estudyante nakasabut niini nga baruganan: Samtang ang mga amahan magtinguha ug magsunod sa giya gikan sa Ginoo, mas mapanalipdan nila ang ilang mga pamilya.)

Ang mga Lalaki ug mga Babaye Kinahanglan nga Motuman sa Plano sa Ginoo

I-display ang mosunod nga pamahayag ni Elder Richard G. Scott sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Kon kamo usa ka batan-ong lalaki nga sakto na sa edad ug wala pa maminyo, ayaw pag-usik og panahon sa walay mga kapuslanan. Padayon sa kinabuhi og pag-focus sa pagminyo. Ayaw pagpuyo nga walay gihimo niining panahona sa kinabuhi. Batan-ong mga lalaki, pagserbisyo og angay nga misyon. Dayon himoa ang kinatas-an ninyong prayoridad ang pagpangita og usa ka takus, mahangturong kapikas. …

“…Ang kaminyoon naghatag og sulundon nga kahimtang alang sa pagbuntog sa bisan unsa nga kalagmitan sa pagkahakog o paghunahuna sa kaugalingon. Sa akong hunahuna usa sa mga rason nga kita gitambagan nga magminyo og sayo aron malikayan ang pag-ugmad og sayop nga mga kinaiya nga lisud usbon” (“Ang Mahangturong mga Panalangin sa Kaminyoon,” Liahona, Mayo 2011, 95–97).

Sa kalibutan karon, unsa nga mga babag ang anaa alang sa mga batan-ong lalaki ug babaye aron langayon ang kaminyoon?
Ngano nga ang kaaway nagtinguha sa pagbalda sa mga batan-ong lalaki ug babaye sa pagpadayon sa mga relasyon nga mosangpot ngadto sa kaminyoon ug pagpanganak?
Ngano kaha nga ang mga lider sa Simbahan kanunay nga nagtambag sa mga batan-ong lalaki sa pagpaningkamot sa aktibong paagi og mga relasyon nga mosangpot ngadto sa kaminyoon?

(Pahinumdom: Atol niini nga panaghisgutan, pagsensitibo sa kamatuoran nga ang pipila ka mga batan-ong lalaki sa inyong klase dili gayud magminyo o mahimong mga amahan tungod sa mga sirkumstansya nga dili nila makontrol.)

Sa imong pagtapos, hunahunaa ang mga sirkumstansya sa imong mga estudyante. Unsay imong ihatag nga hagit sa imong mga lalaki nga estudyante nga himoon aron matuman ang ilang mga obligasyon nga mahimong matarung nga mga bana ug mga amahan? Mahimo nimong dapiton ang imong tanang mga estudyante sa pag-focus sa pagpalambo og piho nga Kristohanon nga hiyas, sama sa pailub o pagpadayag og gugma ngadto sa uban, nga makaayo sa ilang mga pamilya.

Mga Basahunon sa Estudyante

Mateo 2:13–16; Mga Taga-Efeso 5:23, 25; 1 Timoteo 5:8; Doktrina ug mga Pakigsaad 75:28; 83:2, 4; 121:36–46.
D. Todd Christofferson, “Magpakalalaki Kita,” Liahona, Nob. 2006, 46–48.
Linda K. Burton, “Magdungan Kita’g Saka,” Liahona, Mayo 2015, 29–32.
“Ang Sagradong mga Calling sa mga Amahan ug mga Inahan,” kapitulo 15 sa Mga Pagtulun-an sa mga Presidente sa Simbahan: Ezra Taft Benson (2014), 229-43.