Leksyon 11: Pagpangandam alang sa Mahangturong Kaminyoon
11
Pagpangandam alang sa Mahangturong Kaminyoon
Pasiuna
Samtang ang mga young single adult magsunod sa ebanghelyo ni Jesukristo, makapaabut sila sa umaabut ug magpuyo sa ilang kinabuhi uban ang paglaum. Ang Langitnong Amahan mogiya nila sa ilang mga desisyon bahin a mahangturong kaminyoon samtang magtinguha sila og direksyon gikan Kaniya. Kini nga leksyon makatabang sa mga estudyante sa paghunahuna sa kaminyoon uban sa mas dako nga pagsalig, nakahibalo nga makadawat sila og balaang tabang gikan sa Ginoo.
Background nga Basahunon
Dieter F. Uchtdorf, “The Reflection in the Water” (Church Educational System devotional, Nob. 1, 2009), lds.org/media-library.
Hangyoa ang mga estudyante sa pag-isa sa ilang mga kamot kon sila nakabuhat ba og lista sa mga kinaiya nga ilang gipangita alang sa umaabut nga kapikas. Dapita ang pipila ka mga estudyante nga mopakigbahin sa mga kinaiya diha sa ilang mga lista.
I-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder David A. Bednar
“Pipila sa mga batan-on ingon og dunay shopping list sa mga kinaiya nga ilang gusto sa usa ka kompanyon ug mosukod sa ilang potensyal: ‘Anaa ba nimo ang tanang mga butang nga akong gikinahanglan?’ Kon naglaum kamo nga makabaton og mahangturong kompanyon kinsa aduna sa piho nga espirituhanon nga mga hiyas, nan kinahanglan kamong maningkamot sa pagpalambo niadtong espirituhanon nga mga hiyas sa inyong kaugalingon. Dayon kadtong kinsa aduna niadto nga mga hiyas madani nganha nimo” (“Understanding Heavenly Father’s Plan,” LDS.org).
Unsa nga baruganan ang atong makat-unan gikan sa pamahayag ni Elder Bednar? (Siguroha nga ang mga estudyante makaila sa mosunod nga baruganan: “Kon naglaum kamo nga makabaton og mahangturong kompanyon kinsa adunay piho nga espirituhanon nga mga hiyas, nan kinahanglan kamong maningkamot sa pagpalambo niadtong espirituhanon nga mga hiyas sa inyong kaugalingon.”)
Hangyoa ang mga estudyante sa pagbasa sa Doktrina ug mga Pakigsaad 88:40, nga mangita kon sa unsa nga paagi nga kini nga bersikulo nagsuporta sa baruganan nga bag-o lang nga nakit-an.
Sa unsa nga paagi nga ang mga indibidwal kinsa naningkamot nga maminyo makagamit niini nga mga kamatuoran nga narekord niini nga bersikulo?
Sa unsa nga paagi ninyo nakita ang mga kamatuoran niini nga bersikulo magamit sa mga pagpili nga gihimo sa kabatan-onan bahin sa ilang mga higala?
Hangyoa ang mga estudyante sa pagkonsiderar sa mga hiyas nga gusto nilang makita sa ilang umaabut nga kapikas. Dapita ang mga estudyante sa pagkonsiderar kon aduna ba sila niadtong sama nga mga hiyas. Hangyoa sila sa pagkonsiderar kon unsaon nila sa paggamit ang mga baruganan sa Doktrina ug mga Pakigsaad 88:40 aron mas makaandam sa ilang kaugalingon alang sa kaminyoon.
Unsa ang pipila ka mga butang nga makaingon nga mahadlok ang kabatan-onan sa kaminyoon? (Isulat ang mga tubag sa pisara.)
Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, ug hangyoa ang klase sa pagpaminaw sa mga rason ngano nga pipila sa kabatan-onan mahadlok sa kaminyoon.
Imahe
Elder Jeffrey R. Holland
“Sa nanobrang mga sitwasyon nahadlok sila nga ang kalibutan hapit na matapos diha sa mga kalamidad ug mga gubat—usa ka kahimtang nga dili nila gustong magbaton og kapikas o anak. Sa dili kaayo grabe, mas sagad nga mga sitwasyon, nahadlok sila nga mosamut lang kalisud ang kalibutan, lisud na unya pangitaon ang trabaho, ug nga ang tawo kinahanglang wala na mag-eskwela, wala nay utang, adunay trabaho, ug nanag-iya og balay sa dili pa mokonsiderar sa kaminyoon. …
“Dugang pa, daghang batan-ong mga tawo nga akong nakaistorya nahadlok nga kon sila magminyo mahimong moresulta lang kini sa diborsyo. … Ilakip kana nga pagpanagana mahitungod sa kalampusan sa kaminyoon uban sa ubos kaayo, law-ay, kasagaran yawan-on nga pagbiay-biay sa kaputli ug kamaunungon ug kinabuhi sa pamilya nga kanunayng gipakita sa salida sa sine ug telebisyon ug inyong makita ang problema” (“Ayaw Kahadlok Sumalig ka Lamang” [gabii uban ni Elder Jeffrey R. Holland, Peb. 6, 2015], lds.org/broadcasts).
Pila kaninyo ang nakaila og tawo nga nahadlok sa kaminyoon tungod sa usa sa mga rason nga gihisgutan ni Elder Holland?
Dapita ang mga estudyante sa pagbasa sa Doktrina ug mga Pakigsaad 6:36 ug ikonsiderar kon sa unsa nga paagi nga ang tambag sa Ginoo ngadto ni Oliver Cowdery magamit sa pagpangandam alang sa kaminyoon. Dayon dapita ang usa ka estudyante sa pagbasa og kusog sa Marcos 5:35–36. Ipasabut nga si Jairo, ang punoan sa sinagoga, miduol ngadto ni Jesus naglaum nga Siya moayo sa iyang anak nga babaye. Hangyoa ang klase sa pagkonsiderar kon sa unsa nga paagi nga ang awhag sa Manluluwas ngadto ni Jairo mahimong magamit niadtong nangandam alang sa kaminyoon.
Sa unsa nga paagi nga ang pagtan-aw ngadto sa Ginoo “sa matag hunahuna” makatabang nato nga “dili magduha-duha, dili mahadlok” sa atong paghunahuna sa atong umaabut?
Sa unsa nga paagi nga ang tambag sa Ginoo ngadto ni Oliver Cowdery ug Jairo makatabang sa mga indibidwal kinsa adunay mga kahadlok nga magminyo? (Samtang motubag ang mga estudyante, isulat ang mosunod nga baruganan diha sa pisara: Kon kita motan-aw ngadto ni Jesukristo pinaagi sa hugot nga pagtuo, mabuntog nato ang kahadlok ug makabaton og pagsalig sa umaabut.)
Ipakigbahin ang mosunod nga pamahayag ni Elder Jeffrey R. Holland. Hangyoa ang klase sa pagpaminaw ngano nga si Elder ug Sister Holland nagkinahanglan og hugot nga pagtuo sa pagpili nga magminyo sa dihang gihimo nila kini.
Imahe
Elder Jeffrey R. Holland
“Sa dihang si [Sister Holland ug ako] naminyo parehas kami nga mga undergraduate sa BYU, diin walay usa sa among mga ginikanan ang nakatabang kanamo sa pinansyal nga paagi, wala pa makahunahuna sa tanang graduate education nga kuhaunon pa namo, ug $300 dolyares lamang ang among kwarta sa adlaw sa among kasal! Karon dili tingali kana ang labing maayong paagi sa pagsugod og kaminyoon, apan pagkanindot niini nga kaminyoon ug pagkadako sigurado sa nawala namo kon among gilangay og bisan usa lang ka adlaw ang among pagminyo sa higayon nga among nasayran nga kana nga kaminyoon mao ang husto. … Apan nangurog ko sa paghunahuna unsa kaha ang nawala kanamo kon kami ‘mipatalinghug sa among mga kahadlok,’ sama sa balik-balik nga gisulti ni Presidente James E. Faust kanako nga dili gayud angayng buhaton nako ug ni binsa kinsa” (“Ayaw Kahadlok, Sumalig Ka Lamang”).
Sa unsa nga paagi nga ang sitwasyon ni Elder and Sister Holland susama sa sitwasyon sa daghang kabatan-onan karon?
Unsa ang gipasabut sa pagpatalinghug sa inyong mga kahadlok? Ngano nga kini dili maayong paagi sa paghimo og mga desisyon?
Dapita ang usa ka estudyante sa pagbasa og kusog niini nga pagpamatuod ug saad gikan ni Presidente Thomas S. Monson:
Imahe
President Thomas S. Monson
“Minahal kong mga kaigsoonan, ayaw kahadlok. Pagmaya. Ang umaabut sama kahayag sa inyong hugot nga pagtuo” (“Pagmaya,” Liahona, Mayo 2009, 92).
Unsa ang inyong mga hunahuna ug mga pagbati bahin sa umaabut samtang mamalandong kamo niining mapanagnaon nga awhag?
Tabangi ang mga estudyante sa paghunahuna unsaon nila paggamit kini nga bahin sa leksyon pinaagi sa paghangyo nila sa pagkonsiderar kon duna ba silay kahadlok nga magminyo. Dapita sila sa pagpamalandong unsaon nila nga mapulihan ang bisan unsa nga mga kahadlok bahin sa umaabut uban sa hugot nga pagtuo sa Ginoo.
Pagtinguha og balaan nga direksyon sa pagpili kinsa ang minyoan
I-display ang mosunod nga pamahayag gikan ni Presidente Gordon B. Hinckley (1910–2008), ug hangyoa ang usa ka estudyante sa pagbasa niini og kusog:
Imahe
President Gordon B. Hinckley
“Mao kini ang labing importante nga desisyon sa inyong kinabuhi, ang indibidwal nga inyong minyoan. Walay makapuli sa pagminyo diha sa templo. … Minyoi ang hustong tawo diha sa hustong dapit uban sa hustong awtoridad” (“Life’s Obligations,” Ensign, Peb. 1999, 2).
Unsaon ninyo nga makahimo og sakto nga desisyon bahin kon kinsa ang minyoan?
Parisparisa ang klase. I-assign ang matag paris sa pagbasa sa mosunod nga mga tudling sa kasulatan: Doktrina ug mga Pakigsaad 6:22–23; 8:2–3; 9:7–9; 11:12–14. (Kini nga mga bersikulo mao ang mga ehemplo sa nagbalik-balik nga tema kon unsaon nga makadawat og pagpadayag, nga makita sa unang mga seksyon sa Doktrina ug mga Pakigsaad. “Ang mga tema mao ang labaw, ug nagbalik-balik, ug naghiusa nga mga kalidad og mga ideya” [David A. Bednar, “A Reservoir of Living Water” (Brigham Young University nga fireside, Peb. 4, 2007), 6, speeches.byu.edu].)
Hangyoa ang mga estudyante sa pagkonsiderar sa mosunod nga sitwasyon samtang magtuon sila sa mga bersikulo nga gikan sa Doktrina ug mga Pakigsaad: Hunahunaa nga ang imong higala taud-taod nang nakig-date og usa ka tawo ug miduol nimo nga nagpatambag kon makigminyo ba siya o dili niana nga tawo. Unsay inyong itambag nga buhaton sa inyong higala?
Human ang mga estudyante may panahon sa pagtuon sa mga kasulatan, hangyoa ang usa ka estudyante sa matag paris nga maoy modala sa papel sa higala kinsa adunay relasyon sa pagpakig-date. Hangyoa ang ubang estudyante sa matag paris sa pagpasabut sa unsa nga paagi nga kini nga mga bersikulo makatabang sa higala sa paghimo og desisyon. Human makompleto kini nga kalihokan, siguroha nga ang mga estudyante nakasabut sa mosunod nga mga baruganan bahin sa paghimo og mga desisyon: Kinahanglan nga atong “tun-an” ang usa ka desisyon sa atong mga hunahuna, mohimo sa labing maayong desisyon kutob sa atong mahimo, ug dayon mangutana sa Dios kon ang desisyon sakto ba. Dayon, kon ang kalinaw ug kalipay moabut sa atong mga kasingkasing, ang desisyon maayo. Hatagi og gibug-aton ang mosunod nga baruganan: Sa atong pagtinguha sa giya sa Ginoo samtang maghimo kita sa atong mga desisyon, mosulti Siya sa atong mga hunahuna ug mopuno sa atong mga kalag uban sa kalinaw ug kalipay kon ang atong mga pagpili sakto.
Giunsa ninyo pagkahibalo sa kamatuoran sa unsay gitudlo niini nga mga bersikulo bahin sa pagdawat og personal nga pagpadayag?
Hangyoa ang mga estudyante sa pagkonsiderar unsaon nila sa pagtubag ang mosunod nga sitwasyon: ang tawo nga nagsige na og date mipasabut nga siya misunod na niini nga proseso sa paghimo og mga desisyon ug nakadawat og impresyon nga kamong duha kinahanglang magminyo.
I-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder Dallin H. Oaks
“Nakadungog ko sa mga sitwasyon diin ang usa ka batan-ong lalaki misulti sa usa ka batan-ong babaye nga kinahanglang makigminyo siya kaniya tungod kay nakadawat siya og pagpadayag nga siya ang mahimo niyang mahangturong kompanyon. Kon kini usa ka tinuod nga pagpadayag, direkta kining ikumpirma ngadto sa babaye kon siya nagtinguha nga masayud. Sa pagkakaron, wala siyay obligasyon sa pagpaminaw niini. Kinahanglan nga magtinguha siya sa iyang kaugalingong giya ug mohimo sa iyang kaugalingon desisyon. Ang lalaki makadawat og pagpadayag sa paggiya sa iyang kaugalingong mga aksyon, apan dili siya makadawat og pagpadayag sa paggiya sa babaye. Ang babaye anaa sa gawas sa pagkatinugyanan sa lalaki” (“Revelation” [Brigham Young University nga debosyonal, Sept. 29, 1981], 6, speeches.byu.edu).
Ipamatuod nga ang mga estudyante mobati og kalinaw samtang sila magpaabut sa mahangturong kaminyoon uban sa bug-os nga pagtuo. Awhaga sila sa paggamit sa mga baruganan nga nahisgutan niini nga leksyon aron makaandam sa mahimayaong oportunidad sa mahangturong kaminyoon.