Leksyon 6: Ang Pamilya Mao ang Sentro sa Plano sa Langitnong Amahan
6
Ang Pamilya Mao ang Sentro sa Plano sa Langitnong Amahan
Pasiuna
Ang moderno nga mga propeta ug mga apostoles mipahayag nga “ang pamilya mahinungdanon ngadto sa plano sa Tiglalang alang sa walay katapusan nga destinasyon sa Iyang mga anak” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Kini nga leksyon makatabang sa mga estudyante nga makakita nga “labaw nga makugihon ug mabuhaton diha sa panimalay” (D&P 93:50) mahimo nila nga ang ilang mga pamilya mas mahinungdanon sa ilang mga kinabuhi.
Background nga Basahunon
Robert D. Hales, “The Eternal Family,” Ensign, Nob. 1996, 64–67.
David A. Bednar, “Labaw nga Makugihon ug Mabuhaton diha sa Panimalay,” Liahona, Nob. 2009, 17–20.
Handbook 2: Administering the Church [2010], 1.1.1, 1.1.4, ug 1.4.1 (kon anaa).
Mga Sugyot alang sa Pagtudlo
Ang pamilya mao ang sentro sa plano sa Langitnong Amahan
Hisguti sa imong klase nga ang tanang mga hilisgutan nga mga pakigpulong sa bag-ong kinatibuk-ang komperensya, ang pamilya apil sa mga hilisgutan nga labing gihisgutan kanunay.
Ngano sa inyong hunahuna nga ang mga lider sa Simbahan kanunay nga mamulong bahin sa pamilya?
Isulat ang mosunod nga kamatuoran gikan sa pamahayag sa pamilya diha sa pisara, ug hangyoa ang mga estudyante sa pagpakigbahin unsay gipasabut niini ngadto kanila:
“Ang pamilya mahinungdanon ngadto sa plano sa Tiglalang alang sa mahangturong destinasyon sa Iyang mga anak.”
Aron sa pagtabang sa mga estudyante nga mas makasabut kon sa unsa nga paagi nga ang pamilya mahinungdanon ngadto sa mahangturong destinasyon, iapud-apod ang mga kopya sa handout sa katapusan niini nga leksyon. Bahina ang klase ngadto sa gagmayng mga grupo. I-assign ang matag grupo sa pagbasa sa usa sa tulo ka mga seksyon sa handout ug sa paghisgot sa mga pangutana nga gilakip. Siguroha nga ang matag seksyon gi-assigned.
Human sa igo nga panahon, pagdapit og usa ka tawo nga na-assign sa matag seksyon sa handout sa pagpakigbahin og overview sa ilang gamay nga grupo nga panaghisgut uban sa klase. Ipamatuod ang mosunod nga kamatuoran: Ang pamilya mahinungdanon nga bahin sa plano sa Dios alang sa kinabuhi nga wala pa dinhi sa yuta, sa pagkamortal, ug kinabuhing dayon.
Unsa nga mga kasinatian ang nakatabang ninyo nga mobati sa pagkamahinungdanon sa pamilya sa plano sa Langitnong Amahan?
Andama ang mga estudyante nga makat-on gikan sa Doktrina ug mga Pakigsaad 93 pinaagi sa pagpasabut nga kini nga seksyon nagrekord, uban sa laing mga butang, sa intruksyon sa Ginoo bahin sa kaimportante sa pag-amuma sa mga anak diha sa “kahayag ug kamatuoran” ug paghimo sa atong mga pamilya nga prayoridad. Isulat ang mosunod nga mga reference diha pisara:
Hangyoa ang mga estudyante sa pagbasa sa dili moubos usa sa mga reference (siguroha nga ang matag reference gibasa sa dili mominus sa usa ka estudyante). Hangyoa ang mga estudyante sa pagpangita kinsa ang gipakigsultihan sa Ginoo ug unsa nga intruksyon ang Iyang gihatag. Human sa igong panahon, hangyoa ang mga estudyante sa pagreport sa unsay ilang nakat-unan. Siguroha nga ang mga estudyante nakaila nga ang upat ka mga tawo nga gipakigsultihan mao ang Unang Kapangulohan ug ang bishop sa Simbahan sa Ohio; sa ingon, kini nga mga kasulatan nagpahinumdom sa tanang mga miyembro sa Simbahan, bisan kadtong anaa sa mga katungdanan sa pagpangulo, sa paghimo sa ilang mga pamilya nga prayoridad. Mahimo nimong isugyot ngadto sa mga estudyante nga ilang markahan ang gibalik-balik o ang sumbanan nga nakita niini nga mga bersikulo—ang mga miyembro sa Simbahan kinahanglan nga “mopahimutang diha sa kahusay” sa ilang mga pamilya (tan-awa sa mga bersikulo 43, 44, ug 50).
Sumala sa mga bersikulo 42, 48, ug 50, unsay atong mahimo sa pagpahimutang sa atong mga pamilya diha sa kahusay? (Ang mga estudyante kinahanglang moila sa mosunod: magtudlo sa mga anak diha sa kahayag ug kamatuoran, maghinulsol, magsalikway sa dili matarung nga mga butang, magmakugihon ug mabuhaton sa panimalay, ug mag-ampo kanunay.)
Isulat ang mosunod nga baruganan diha sa pisara: Nagtabang kita sa pagtuman sa sugo sa Ginoo sa pagpahimutang sa atong mga pamilya sa kahusay kon kita magmakugihon ug mabuhaton sa panimalay.
Unsay mabuhat sa usa ka young adult nga mas magmakugihon ug magmabuhaton sa panimalay?
I-display ang mosunod nga pamahayag gikan sa usa ka sulat nga gisulat sa Unang Kapangulohan niadtong 1999, ug paghangyo ug usa ka estudyante sa pagbasa niini og kusog:
“Ang panimalay mao ang basihan sa usa ka matarung nga kinabuhi, ug walay laing himan ang makahulip sa dapit niini o makatuman sa importanting mga gamit niini sa pagpadayon niining hinatag sa Dios nga responsibilidad.
“Motambag kami sa mga ginikanan ug mga anak sa paghatag og pinakataas nga prayoridad sa pag-ampo sa pamilya, family home evening, pagtuon ug panudlo sa ebanghelyo, ug maayo nga mga kalingawan sa pamilya. Bisan unsa ka takus ug angay ang ubang mga buluhaton o mga kalihokan, kini kinahanglang dili tugutan sa pagkuha sa balaang hinatag nga responsibilidad nga ang mga ginikanan ug mga pamilya lamang ang igong makabuhat” (First Presidency letter, Peb. 11, 1999, quoted sa Handbook 2: Administering the Church [2010], 1.4.1).
Sa inyong kasinatian, unsa ang pipila ka “importanting mga gamit” ug “balaang hinatag nga responsibilidad” nga labing maayong mahimo diha sa pamilya?
I-display ang mosunod nga pamahayag, ug awhaga ang mga estudyante sa pagkonsiderar sa mga panalangin nga moabut kon ang matag sakop sa pamilya maningkamot sa pagtuman sa balaang hinatag nga mga responsibilidad:
“Bisan asa magpuyo ang mga sakop sa Simbahan, kinahanglang moestablisar sila og panimalay diin anaa ang Espiritu. …
Usa ka panimalay nga adunay mahigugmaon ug maunungon nga mga ginikanan mao ang dapit diin ang espirituhanon ug pisikal nga panginahanglan sa mga anak labing epektibong mahatag. Usa ka panimalay nga nagsentro ni Kristo nagtanyag sa mga hamtong ug mga bata og usa ka dapit sa pagpanalipod batok sa sala, dangpanan gikan sa kalibutan, pagkaayo gikan sa emosyonal ug ubang mga kasakit, ug mapasaligon, tinuod nga gugma” (Handbook 2: Administering the Church,1.4.1).
Unsaon ninyo paghimo og panimalay nga nasentro ni Kristo alang sa inyong pamilya?
Unsa nga kalainan ang nahatag niini sa inyong pamilya?
I-display ang mosunod nga mensahe ni Elder M. Russell Ballard sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Elder M. Russell Ballard
“Ang tanan ninyong gibuhat gawas sa panimalay ipaubos ug ipasuporta sa kalihokan sulod sa inyong panimalay. Hinumdumi ang tambag ni Presidente Harold B. Lee nga “ang labing importante nga … buhat nga inyong buhaton mao ang anaa sulod sa inyong mga panimalay’ … ni Presidente David O. McKay sa walay paglubad nga ‘Walay laing kalampusan nga ikahulip sa kapakyasan sa panimalay’” (“Unta Makit-an ang Nawala,”Liahona, Mayo 2012, 99).
Hatagi og higayon ang mga estudyante sa pagsulat og pipila ka mga butang nga ilang mabuhat aron mahimong mas makugihon ug mabuhaton sa panimalay ug sa paghimo sa ilang pamilya nga mao ang sentro sa ilang mga kinabuhi. Awhaga ang mga estudyante sa paghimo og tumong nga sundon uban sa usa ka ideya nga ilang gisulat. Ipamatuod nga samtang ang mga estudyante mohimo sa ilang tumong, ang Ginoo molig-on kanila sa espirituhanon ug motabang kanila nga makakita sa unsa nga paagi nga ang ilang mga buhat makapalig-on sa ilang mga pamilya.
Robert D. Hales, “The Eternal Family,” Ensign, Nob. 1996, 64–67.
David A. Bednar, “Labaw nga Makugihon ug Mabuhaton diha sa Panimalay,” Liahona, Nob. 2009, 17–20.
Ang Atong Kinabuhi sa Wala pa Dinhi sa Yuta, Pagkamortal, ug Mahangturong mga Pamilya
Ang Mahangturong Pamilya—Leksyon 6
Ang Atong Kinabuhi sa Wala pa Dinhi sa Yuta
“Ang pamilya gi-orden sa Dios. Pinakaimportante kini nga unit karon ug sa kahangturan. Bisan sa wala pa kita matawo sa yuta, kabahin na kita sa usa ka pamilya. Ang matag ‘usa ka hinigugmang espiritu nga anak nga lalaki o babaye sa langitnong mga ginikanan’ nga may ‘kinaiya sa pagkadios ug kalagmitan nga mahimong usa ka dios’ [‘Ang Pamilya: Usa ka Pamahayag sa Kalibutan,’ Liahona, Nob. 2010, 129]. Ang Dios mao ang atong Langitnong Amahan, ug kita nagpuyo sa Iyang atubangan isip kabahin sa Iyang pamilya sa kinabuhi nga wala pa dinhi sa yuta. Didto nakat-unan nato ang atong unang mga leksyon ug naandam alang sa pagkamortal (tan-awa sa D&P 138:56)” (Handbook 2: Administering the Church [2010], 1.1.1).
“Gisimba nato ang gamhanang Dios kinsa milalang sa uniberso. Siya ang atong Amahan sa langit. Natawo kita tungod kaniya; kita iyang espiritu nga mga anak. Nagpuyo kita uban kaniya sa kinabuhi nga wala pa dinhi sa yuta sa usa ka relasyon sa pamilya. Personal kitang nakaila kaniya ug sama sa atong pagkaila sa atong mortal nga mga amahan niining mortal nga kinabuhi” (Bruce R. McConkie, How to Worship, Brigham Young University Speeches of the Year [Hulyo 20, 1971], 2).
Mga Pangutana nga Pagahisgutan:
Sa unsa nga paagi nga ang pamilya mahinungdanon nga bahin sa atong kinabuhi sa wala pa dinhi sa yuta?
Sa unsa nga paagi nga makatabang nga makahibalo nga ang Dios mao ang inyong Amahan ug nga kamo hinigugma nga sakop sa Iyang pamilya didto sa kalibutan nga kinabuhi sa wala pa dinhi sa yuta?
Unsa ang inyong mahunahuna sa inyong inter-aksyon uban sa inyong Langitnong mga Ginikanan?
Ang Atong Mortal nga Pamilya
“Isip kabahin sa plano sa atong Langitnong Amahan, natawo kita ngadto sa mga pamilya. Gi-establisar Niya ang mga pamilya aron sa paghatag kanato og kalipay, sa pagtabang kanato nga makakat-on sa hustong mga baruganan diha sa mabinationg palibut, ug sa pag-andam kanato alang sa kinabuhing dayon.
“Ang mga ginikanan adunay importante nga responsibilidad sa pagtabang sa ilang mga anak nga makaandam sa pagbalik ngadto sa Langitnong Amahan. Ang mga ginikanan motuman niini nga responsibilidad pinaagi sa pagtudlo sa ilang mga anak sa pagsunod ni Jesukristo ug pagsunod sa Iyang ebanghelyo” (Handbook 2: Administering the Church,1.1.4).
“Ang Dios ang tigdisenyo sa pamilya. Tuyo Niya nga ang labing dako nga kalipay, ang labing makatagbaw nga mga aspeto sa kinabuhi, ang pinakalawom nga mga kalipay kinahanglang magagikan sa atong mga relasyon ug sa atong pagpakabana alang sa usag usa isip mga amahan ug mga inahan ug mga anak” (Gordon B. Hinckley, “What God Hath Joined Together,” Ensign, May 1991, 74).
Mga Pangutana nga Pagahisgutan:
Sa unsa nga paagi nga ang pamilya mahinungdanon nga bahin sa atong mortal nga kinabuhi?
Unsa kaha ang nakalahi sa kinabuhi sa yuta kon gipadala pa kita isip mga indibidwal nga walay mga relasyon sa pamilya—walay amahan, inahan, mga igsoon, mga katigulangan, o kaliwatan?
Unsa nga mga kasinatian ang nakatabang kaninyo nga masabtan ang tahas ug kaimportante sa mortal nga pamilya?
“Samtang ang indibidwal nga kaluwasan gibase sa atong indibidwal nga pagkamasulundon, importante usab nga makasabut kita nga ang matag usa nato importante ug mahinungdanon nga bahin sa usa ka pamilya ug ang labing taas nga mga panalangin madawat lamang sulod sa usa ka mahangturong pamilya. Kon ang mga pamilya maglihok sumala sa plano sa Dios, ang mga relasyon nga makita niini mao ang pinakabililhon sa pagkamortal. Ang plano sa Amahan mao nga ang gugma sa pamilya ug panag-uban magpadayon ngadto sa kahangturan. Ang pagkasakop sa usa ka pamilya adunay dako nga responsibilidad sa pag-atiman, paghigugma, pagbayaw, ug pagpalig-on sa matag sakop sa pamilya aron nga ang tanan matarung nga makalahutay hangtud sa katapusan dinhi sa pagkamortal ug magpuyo sa tibuok kahangturan. Dili igo ang pagluwas lang sa atong mga kaugalingon. Importante usab nga ang mga ginikanan, mga igsoong lalaki, ug igsoong mga babaye maluwas sa atong mga pamilya. Kon kita mopauli nga mag-inusara ngadto sa atong Langitnong Amahan, pangutan-on kita, ‘Hain ang uban sa pamilya?’ Mao kini nganong nagtudlo kita nga ang mga pamilya mahangturon. Ang mahangturong kinaiya sa usa ka indibidwal mahimong mahangturong kinaiya sa pamilya” (Robert D. Hales, “The Eternal Family,” Ensign, Nob. 1996, 65).
Mga Pangutana nga Pagahisgutan:
Sa unsa nga paagi nga ang pamilya mahinungdanon nga bahin sa atong mahangturong kapalaran?
Unsa ang pipila ka matarung nga mga buhat nga mahimo sa mga sakop sa pamilya sa pagtabang nga mapahinabo ang kaluwasan sa uban?
Kanus-a ang usa ka sakop sa pamilya mibayaw o milig-on ninyo sa paagi nga nakapadasig kaninyo sa paglahutay hangtud sa katapusan?