Ang Pagpasiugda sa Pamilya ingon nga Sukaranan nga Yunit sa Katilingban

Pasiuna

Ang moderno nga mga propeta mideklarar: “Kami nagtawag sa may kapangakohan nga mga lumulupyo ug mga opisyal sa gobyerno bisan asa sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Kini nga leksyon makatabang sa mga estudyante nga makasabut unsaon nila sa pagsunod ug pagpanalipod kining mapanagnaon nga tambag.

Background nga Basahunon

Thomas S. Monson, “Magmakusganon Ka ug Magmaisug,” Liahona, Mayo 2014, 66–69.
Dallin H. Oaks, “Pagbalanse sa Kamatuoran ug Pagkamatugtanon,” Liahona, Peb. 2013, 29–35.
L. Tom Perry, “Nganong ang Kaminyoon ug Pamilya Importante—Bisan Asa sa Kalibutan,” Liahona, Mayo 2015, 39–42.
“Transcript of News Conference on Religious Freedom and Nondiscrimination” (Jan. 27, 2015), mormonnewsroom.org/article/publicstatement-on-religious-freedom-and-nondiscrimination.

Mga Sugyot alang sa Pagtudlo

Alma 43:9, 30, 45, 48

Ang atong katungdanan sa pagpanalipod sa doktrina ug moral nga mga pundasyon sa pamilya

Andama ang mga estudyante alang niini nga leksyon pinaagi sa pagsulti nila nga kini nagtutok sa atong responsibilidad sa pagpanalipod sa pamilya. Ipakigbahin ang mosunod nga pamahayag ni Elder Bruce D. Porter of the Seventy:

“Ang Simbahan gamay ra nga institusyon itandi sa kalibutan sa kinatibuk-an. Bisan pa niana, ang mga Santos sa Ulahing mga Adlaw isip katawhan kinahanglang dili mopaubos sa gahum sa atong ehemplo, ni sa atong kapasidad sa pagdani sa opinyon sa publiko, pag-usab sa negatibo nga pamahayag, o modapit sa nagpangita nga mga tawo sa pagsulod sa ganghaan ug molakaw sa gipili sa Ginoo nga dalan. Kinahanglan natong ihatag ang atong labing maayong paningkamot, sa pakigtambayayong sa mga tawo o institusyon nga adunay susama nga mga hunahuna, sa pagpanalipod sa pamilya ug pagpataas sa tingog sa pasidaan ug pagdapit sa kalibutan” (“Defending the Family in a Troubled World,” Ensign, Hunyo 2011, 18).

Unsay inyong hunahuna bahin sa responsibilidad sa mga Santos sa Ulahing mga Adlaw sa pagpanalipod sa pamilya sa kalibutan karon?

Sultihi ang mga estudyante nga sa lain-laing mga panahon, ang mga Nephite nakakita nga ang ilang relihiyuso nga kagawasan ug mga mithi sa pamilya nahulga sa mga Lamanites. Pinaagi sa pagtuon sa ilang mga kasinatian, makakat-on kita sa mga baruganan nga mapahisama sa atong panahon. (Ang pagpahisama sa mga kasulatan sa atong kaugalingon usa ka kahanas sa pagtuon sa kasulatan nga imong mahatagan og gibug-aton niini nga leksyon.) Ipasabut nga usa sa kasinatian sa mga Nephite narekord sa Alma 43.

Isulat ang Alma 43:9, 30, 45, 48 diha sa pisara, ug hangyoa ang mga estudyante sa pagsiksik sa mga pulong nga makatabang nato nga makasabut sa kaimportante sa pagpanalipod sa mga mithi sa pamilya ug relihiyuso nga kagawasan sa kalibutan karon. Isugyot ngadto sa mga estudyante nga markahan nila kini nga mga pulong.

Unsa nga mga pulong ang nagpakita sa kaimportante sa pagpanalipod sa mga mithi sa atong pamilya ug relihiyuso nga kagawasan? Unsa nga baruganan ang inyong nakat-unan bahin sa kaimportante sa pagpanalipod sa mga mithi sa atong pamilya ug relihiyuso nga kagawasan? (Ang mga tubag kinahanglang maglakip sa mosunod nga baruganan: Kita adunay sagrado nga katungdanan sa pagpanalipod ug pagpasiugda sa atong mga mithi sa pamilya ug relihiyuso nga kagawasan.)
Ngano kaha nga importante alang sa mga miyembro sa Simbahan sa pagpasiugda ug pagpanalipod sa pamilya sa ilang mga komunidad?
Unsaon nato sa pagpasiugda ug pagpanalipod sa pamilya pinaagi sa social media?

Ipakita ang mosunod nga pamahayag ni Elder L. Tom Perry (1922–2015) sa Korum sa Napulog Duha ka mga Apostoles:

“Gusto natong madungog ang atong tingog batok sa tanang mga panglimbong ug alternatibong estilo sa kinabuhi nga nagtinguhang moilis sa organisasyon sa pamilya nga giestablisar mismo sa Dios. Gusto usab natong madungog ang atong tingog sa pagsuporta sa kalipay ug katagbawan nga anaa sa tradisyunal nga mga pamilya. Kinahanglang ipadayon nato ang pagpadungog niana nga tingog sa tibuok kalibutan sa pagpadayag nganong ang kaminyoon ug pamilya importante kaayo, ug nganong kanunay kining importante” (“Nganong ang Kaminyoon ug Pamilya Importante—Bisan Asa sa Kalibutan,” Liahona, Mayo 2015, 42).

Sumala ni Elder Perry, unsay atong ideklarar bahin sa pamilya?
Unsay inyong naobserbahan nga gibuhat sa uban sa pagbarug ug pagmatuod sa kaimportante sa pamilya o sa pagpanalipod batok sa mga pang-ataki sa pamilya? (Itudlo nga ang pagpanalipod sa pamilya naglakip sa paghimo og lig-on nga pamilya ingon man usab sa pagpanalipod sa pamilya sa publiko kon gikinahanglan.)

Ipakigbahin ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Bag-ohay lang, nakig-istorya ko sa usa ka Laurel gikan sa Estados Unidos. Mokutlo ko gikan sa iyang email:

“‘Niining milabayng tuig pipila sa akong mga higala sa Facebook misugod na og pang-post sa ilang opinyon bahin sa kaminyoon. Daghan ang mipabor sa kaminyoon sa managsama og sekso, ug pipila sa LDS nga mga kabatan-onan ‘mi-like’ sa mga gi-post. Wala ko mokomentaryo.

“‘Nakahukom ko nga akong ipahayag ang akong pagtuo bahin sa tradisyonal nga kaminyoon sa mahunahunaong paagi.

“‘Gamit ang akong profile picture, gidugang nako ang caption nga “Mituo ako sa kaminyoon tali sa usa ka lalaki ug usa ka babaye.” Ingon og diha-diha dayon nakadawat ko og mga mensahe. “Hakog ka.” “Mahukmanon ka.” Ang usa mitandi kanako sa usa ka tigpanag-iya og ulipon. Ug nadawat nako kini nga post gikan sa suod nga higala nga lig-ong miyembro sa Simbahan: ‘Kinahanglan mouyon-uyon ka sa dagan sa panahon. Ang mga butang nag-usab-usab ug busa kinahanglang usbon nimo ang kinaraang hunahuna.”

“‘Wala ko makiglalis,’ siya miingon, ‘apan wala nako tangtanga ang akong pamahayag.’

“Siya mitapos: ‘Usahay, sama sa giingon ni Presidente Monson, ‘Kamo kinahanglan nga mobarug nga mag-inusara.” Unta isip mga kabatan-onan, kita maghiusang mobarug nga matinuoron sa Dios ug sa mga pagtulun-an sa Iyang buhi nga mga propeta’” (“Espirituhanong mga Alimpulos,” Liahona, Mayo 2014, 19–20).

Unsa nga mga kasinatian ang inyong nasinati sa pagpasiugda ug pagpanalipod sa pamilya?
Unsa ang epekto sa inyong mga pulong ug aksyon ngadto sa uban?

Ipamatuod nga kita dunay positibo nga impluwensya sa atong mga komunidad ug pagpadayon sa mga katuyoan sa plano sa atong Langitnong Amahan sa atong pagpasiugda ug pagpanalipod sa mga pamaagi nga makapalig-on sa mga pamilya.

Alma 46:10–13, 16; 48:7–13

Pagpanalipod sa pamilya uban sa tabang sa Dios ug sa pagtahud sa uban

Sultihi ang mga estudyante nga sa mga kapitulo 46 ug 48 sa Alma narekord nga ang mga Nephite gihulga na usab sa mga Lamanite. Tungaa ang klase. Hangyoa ang katunga sa klase sa pagtuon sa Alma 46:10–13, 16, ug ang laing katunga sa pagtuon sa Alma 48:7–13. Hangyoa ang mga estudyante sa pag-ila unsaon nga kita makasunod sa ehemplo ni Kapitan Moroni sa sakto nga paagi sa pagpasiugda og mga paagi sa pagpadayon ug pagpalig-on sa pamilya. Human sa igong panahon, tabangi ang mga estudyante sa pagpahisama niini nga mga tudling sa atong panahon pinaagi sa pagpangutana sa mosunod:

Sa unsa nga paagi nga ang mga paningkamot ni Amalickiah ug sa iyang mga sumusunod mapahisama ngadto sa mga paningkamot niadtong nang-ataki sa pamilya karon?
Unsa ang atong makat-unan gikan sa mga aksyon ni Kapitan Moroni? (Tabangi ang mga estudyante nga makasabut sa mosunod nga baruganan: Kon magtinguha kita sa tabang sa Dios ug maningkamot sa paggamit sa tanan natong mga kapanguhaan, makadawat kita og kaalam ug kalig-on sa pagpanalipod sa atong mga pamilya, sa atong relihiyon, ug sa atong kagawasan.)
Unsa ang pipila ka angay nga mga paagi diin atong mapasiugdahan ang mga pamaagi sa pagpalig-on ug sa pagpanalipod sa atong mga pamilya?

Ikonsiderar ang paggamit sa mosunod nga pamahayag ni Presidente Gordon B. Hinckley (1910–2008) ug Elder Dallin H. Oaks sa Korum sa Napulog duha ka mga Apostoles sa pagdugang sa panaghisgutan sa nag-una nga pangutana:

“Moapil kita sa maayong mga kawsa sa komunidad. Mahimong dunay mga sitwasyon diin, uban sa seryusong moral nga mga isyu nga nalambigit, dili kita mahimong monunot sa mga butang nga dunay kalabutan sa baruganan. Apan sa maong mga kahimtang kita mahimong matinahuron nga dili mouyon nga dili masinupakon. Mahimo natong ilhon ang kasinsero niadtong kansang mga posisyon dili nato madawat. Mahimo kitang maghisgot og mga baruganan imbis nga mga personalidad.” (Teachings of Gordon B. Hinckley [1997], 131).

“Kon ang tumutuo mosuporta sa ilang gibarugan diha sa publiko, sila kinahanglan nga kanunayng magmatugtanon sa mga opinyon ug gibarugan niadtong dili sama nila og pagtuo. Ang mga tumutuo kinahanglang mamulong uban sa gugma ug mopakita og pailub, pagsabut, ug kalooy ngadto sa ilang kaatbang. Ang mga Kristiyanong tumutuo anaa ubos sa sugo sa paghigugma sa ilang mga silingan (tan-awa sa Lucas 10:27) ug sa pagpasaylo (tan-awa sa Mateo 18:21–35). Sila kinahanglang mohinumdom sa pagtulun-an sa Manluluwas ‘higugmaa ninyo ang inyong mga kaaway ug pag-ampo kamo alang sa mga magalutos [kanila]’ (Mateo 5:44)” (Dallin H. Oaks, “Pagbalanse sa Kamatuoran ug Pagkamatugtanon,” Liahona, Peb. 2013, 34–35).

Unsaon kaha ninyo nga inyong mapraktis ang mga baruganan nga gitudlo ni Presidente Hinckley ug Elder Oaks?

Hatagi ang mosunod nga baruganan: Sa atong pagpasiugda og mga paagi sa pagpanalipod ug paglig-on sa pamilya, kinahanglang mopakita kita og pagtahud ngadto sa uban ug pagkamatugtanon sa ilang mga opinyon.

Pagpasiugda og mga paagi nga makapalig-on sa pamilya

Ipakita ang mosunod nga pamahayag ug hangyoa ang usa ka estudyante sa pagbasa niini og kusog:

“Kami nagtawag sa may kapangakohan nga mga lumulupyo ug mga opisyal sa gobyerno bisan asa sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129).

Sultihi ang mga estudyante nga niadtong Enero 2015, ang mga lider sa Simbahan mipahigayon og opisyal nga press conference diin ilang gitawag nga ang mga opisyal sa gobyerno mopasar og mga balaod nga manalipod sa relihiyuso nga kagawasan ug mobantay sa kabalaanon sa pamilya. Ipasabut nga bisan ang mga lider sa Simbahan pihong naghisgot sa pagpanalipod sa relihiyuso nga kagawasan niini nga pamahayag, ang ilang pulong magamit usab sa pagpanalipod sa mga mithi sa pamilya. Daghang relihiyuso nga kagawasan direktang may kabahin sa pamilya, sama sa pagkabalaan sa kaminyoon.

Ipakigbahin sa mga estudyante ang mosunod nga pamahayag ni Elder Dallin H. Oaks isip summary sa unsay gipresentar sa press conference:

“Ang Simbahan ni Jesukristo sa mga Santos sa Ulahing mga Adlaw mopatigbabaw sa mosunod nga mga baruganan base sa mga pagtulun-an ni Jesukristo, ug sa kaangayan sa tanan, lakip ang katawhan sa pagtuo:

“1. Giangkon namo alang sa tanan ang hinatag sa Dios ug Batakang Balaod nga katungod sa pagpuyo sa ilang pagtuo sumala sa pagmando sa ilang kaugalingong tanlag, nga dili makadaot sa panglawas o kasiguroan sa uban.

“2. Giila namo ang sama nga kagawasan sa tanlag nga kinahanglang magamit sa mga lalaki ug mga babaye bisan asa sa pagsunod sa pagtuo nga ilang gipili, o bisan wala kon maoy ilang gipili.

“3. Nagtuo kami sa mga balaod nga ilatid sa pagkab-ot og balanse sa pagpanalipod sa kagawasan sa tanang mga tawo samtang nagtahud niadtong adunay lahi nga mga mithi.

“4. Gisalikway namo ang pagpanggukod ug panimalos sa bisan unsa nga matang, lakip sa pagpanggukod base sa kaliwat, relihiyuso nga pagtuo, ekonomikanhong kahimtang o kalainan sa sekso o sexual orientation” (Dallin H. Oaks, “Transcript of News Conference on Religious Freedom and Nondiscrimination” [Ene. 27, 2015], mormonnewsroom.org/article/publicstatement-on-religious-freedom-and-nondiscrimination).

Unsay inyong nakat-unan gikan niini nga pamahayag nga makatabang kaninyo sa pagpasiugda sa mga paagi nga makapalig-on sa pamilya isip sukaranang yunit sa katilingban? (Isip kabahin niini nga panaghisgutan, hatagi og gibug-aton nga ang pagpadako og mga anak sa pamaagi sa Ginoo, pagsuporta sa ubang mga pamilya, pagpalambo sa mga calling sa Simbahan, ug pagpalig-on sa atong mga komunidad mga pamaagi ang tanan nga magpasiugda sa pamilya.)

Dapita ang mga estudyante sa pagkonsiderar unsay ilang mahimo sa pagpasiugda og mga paagi nga makapalig-on ug makapanalipod sa pamilya.

Mga Basahunon sa Estudyante

Alma 43:9, 30, 45, 48; 46:11–16; 48:9–13.
Thomas S. Monson, “Magmakusganon Ka ug Magmaisug,” Liahona, Mayo 2014, 66–69.
Dallin H. Oaks, “Pagbalanse sa Kamatuoran ug Pagkamatugtanon,” Liahona, Peb. 2013, 29–35.
L. Tom Perry, “Nganong ang Kaminyoon ug Pamilya Importante—Bisan Asa sa Kalibutan,” Liahona, Mayo 2015, 39–42.