Ang Sugo sa Pagsanay ug Pagpuno sa Yuta

Pasiuna

Ang sugo sa pagsanay ug pagpuno sa yuta usa ka importante nga bahin sa mahangturong plano sa Langitnong Amahan ug nagpabilin nga ipatuman. Kini nga leksyon makatabang sa mga estudyante nga makakita nga sila magiyahan sa ilang mga aksyon bahin sa pagdala og mga anak nganhi sa kalibutan samtang magtuon sila sa mga pulong sa buhi nga mga propeta ug magtinguha sa giya sa Langitnong Amahan pinaagi sa pag-ampo.

Background nga Basahunon

Neil L. Andersen, “Mga Bata,” Liahona, Nob. 2011, 28–31.
Russell M. Nelson, “Aborsyon: Usa ka Pag-ataki ngadto sa Walay Ikapanalipod,” Liahona, Okt. 2008, 14–19.

Mga Sugyot alang sa Pagtudlo

Genesis 1:27–28; 9:1; 35:11

Ang sugo sa pagpanganak nagpabilin nga ipatuman

Isulat ang mosunod nga mga linya gikan sa “Ang Pamilya: Usa ka Pamahayag ngadto sa Kalibutan” sa pisara sa dili pa ang klase:

“Ang unang sugo nga gihatag sa Dios ngadto ni Adan ug Eva mao ang mahitungod sa posibilidad alang kanila isip bana ug asawa nga mahimong mga ginikanan. Kami mopahayag nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”

Sugdi ang klase pinaagi sa pagpangutana:

Unsay inyong mga hunahuna samtang ikonsiderar ninyo kining duha ka mga sentence?

Dapita ang mga estudyante sa pagsiksik sa Genesis 1:27–28, Genesis 9:1, ug Genesis 35:11, mangita sa mga pangalan sa mga indibidwal nga gisugo sa Dios sa pagpasanay ug pagpuno sa yuta. Mahimo nimong awhagon ang mga estudyante sa pagsumpay niini nga mga pakisayran diha sa ilang mga kasulatan, maghimo og kutay sa kasulatan. Siguroha nga ang mga estudyante makasabut nga kini nga sugo gihatag sa matag dispensasyon sa ebanghelyo.

Ipakita ang mosunod nga mensahe ni Elder Neil L. Andersen sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Usa kini ka talagsaong pribilehiyo sa bana ug asawa kinsa makapanganak aron makahatag og mortal nga lawas alang niining espiritung mga anak sa Dios. Nagatuo kita sa mga pamilya, ug nagatuo kita sa mga anak.

“Kon ang usa ka bata matawo sa usa ka bana ug asawa, nagtuman sila og bahin sa plano sa atong Langitnong Amahan sa pagdala og mga anak dinhi sa yuta” (“Mga Bata,” Liahona, Nob. 2011, 28).

Hatagi og gibug-aton ang katapusan nga sentence niini nga pamahayag pinaagi sa pagpresentar sa mosunod nga baruganan: Kon ang bana ug asawa magdala og anak dinhi sa kalibutan, nagtuman sila og bahin sa plano sa Langitnong Amahan sa kalipay. I-refer ang mga sentence nga anaa sa pisara, ug pangutana:

Ngano kaha nga ang Ginoo, pinaagi sa Iyang moderno nga mga propeta, misubli sa sugo sa “pagsanay ug pagpuno sa yuta” sa atong moderno nga mga panahon? (Isip usa ka ehemplo, mahimong nimong sultihan ang mga estudyante nga sukad niadtong 1960, ang pagpanganak sa minyo nga mga inahan sa Estados Unidos sa Amerika mikunhod og 45 porsinto.)
Unsa ang posible nga mga rason ngano nga dunay kalagmitan nga ang mga magtiayon magbaton og diyutay nga mga anak? (Ang mga tubag mahimong maglakip sa maong mga butang sama sa kakulang sa kwarta, ug naghulat nga makasugod og trabaho.)
Sa unsa nga paagi nga ang pagsabut sa plano sa Dios alang sa Iyang mga anak makatabang sa usa ka bana ug asawa nga nagsabut kanus-a manganak ug pila ka buok?

Ipasabut nga ang mga bana ug mga asawa makadawat og mga panalangin gikan sa Dios nga makapahimo nila sa pagsunod sa sugo sa pagpanganak, bisan sa malisud nga mga kahimtang. Ipakigbahin ang mosunod nga kasinatian gikan sa kinabuhi ni Elder James O. Mason sa Seventy, nga giistorya ni Elder Neil L. Andersen:

“Si Elder Mason dunay laing kasinatian mga semana pa lang human sa iyang kaminyoon nga nakatabang kaniya nga unahon ang iyang mga responsibilidad sa pamilya. Siya miingon:

“‘Si Marie ug ako nangatarungan nga aron makapadayon ko sa akong pag-eskwela sa pagkadoktor gikinahanglan nga magpadayon siya og trabaho. Bisan og dili kini ang [gusto] namong buhaton, ang pagbaton og mga anak unya na lang. [Samtang nagtan-aw sa magasin sa Simbahan didto sa balay sa akong mga ginikanan] nakakita ko og artikulo ni Elder Spencer W. Kimball, nga kaniadto sa Korum sa Napulog Duha, [naghatag og gibug-aton] sa mga responsibilidad inubanan sa kaminyoon. Sumala pa ni Elder Kimball, usa sa sagradong responsibilidad mao ang pagsanay ug pagpuno sa yuta. Ang balay sa akong mga ginikanan duol ra sa Church Administration Building. Dali kong miadto sa mga opisina, ug 30 minutos human mabasa ang iyang artikulo, didto na ko naglingkod atbang sa lamesa ni Elder Spencer W. Kimball.’ (Dili na kini sayon karon.)

“‘Mipasabut ko nga gusto kong mahimo nga doktor. Walay laing kapilian kon dili ang pagpugong sa pagbaton og mga anak. Si Elder Kimball mapailubong naminaw ug dayon mitubag sa hinay nga tingog, “Brother Mason, gusto kaha sa Ginoo nga supakon nimo ang usa sa iyang importante nga mga sugo aron lang mahimo kang doktor? Uban sa tabang sa Ginoo, makapanganak kamo ug mahimo gihapon kang doktor. Asa man ang imong hugot nga pagtuo?’”

“Si Elder Mason mipadayon: ‘Ang una namong anak natawo wala dangti og usa ka tuig human niadto. Ako ug si Marie mitrabaho og maayo ug ang Ginoo miabli sa mga bintana sa langit.’ Ang mga Masons gipanalanginan og duha pa ka anak sa wala pa siya mogradwar sa pagkadoktor upat ka tuig human niadto” (“Mga Bata,” 29).

Unsa ang nakapadani kaninyo niini nga kasinatian?

Hatagi og gibug-aton nga ang pagminyo usa ka importante nga bahin sa pagsunod sa sugo sa pagpanganak. Basaha ang mosunod nga pamahayag gikan sa pamahayag sa pamilya:

“Ang mga anak adunay katungod nga matawo ngadto sa mga ginikanan kinsa naminyo, ug maamumahan sa usa ka amahan ug sa usa ka inahan nga nagtahud sa mga panaad sa kaminyoon uban sa hingpit nga pagkamaunungon.”

Unsa ang mga bintaha sa mga anak kon sila matawo “sa mga ginikanan nga naminyo”?
Unsay inyong mga hunahuna ug mga pagbati bahin sa pagtabang sa Langitnong Amahan nga matuman ang Iyang plano pinaagi sa pagdala og mga anak nganhi sa kalibutan?

1 Nephi 15:11; Doktrina ug mga Pakigsaad 29:6

Tinguhaa ang giya sa Ginoo

Ipakita ang mosunod nga pamahayag gikan ni Elder Neil L. Andersen, ug hangyoa ang usa ka estudyante sa pagbasa niini og kusog:

“Kanus-a gustong magkaanak ug pila ka buok anak mga pribado nga desisyon nga himoon tali sa bana ug asawa ug sa Ginoo. Sagrado kini nga mga desisyon—mga desisyon nga kinahanglang buhaton uban sa sinserong pag-ampo ug buhaton uban sa hugot nga pagtuo.” (“Mga Bata,” 28; italics gidugang).

Unsa ang gipasabut nga kini nga mga desisyon kinahanglan nga “buhaton uban sa hugot nga pagtuo”?

Hangyoa ang mga estudyante sa pagtuon sa 1 Nephi 15:11 ug Doktrina ug mga Pakigsaad 29:6 aron makat-on og pipila ka mga baruganan nga magamit sa mga bana ug mga asawa kon nagtinguha sila og mga tubag sa pangutana bahin sa kanus-a gustong magkaanak ug pila ka buok anak.

Unsa nga mga baruganan ang inyong nakit-an niini nga mga tudling nga makatabang sa mga bana ug mga asawa nga makahukom kanus-a manganak ug pila ka buok anak? (Hatagi og gibug-aton ang mosunod nga baruganan: Samtang ang bana ug asawa magpakita og hugot nga pagtuo ug magtinguha sa Ginoo diha sa pag-ampo, mogiya Siya nila sa ilang mga desisyon bahin sa pagpanganak.)
Ngano kaha nga importante alang sa mga bana ug mga asawa nga magpakitambag sa Ginoo niining mga butanga?

Ipakita ang mosunod nga mensahe ni Elder Dallin H. Oaks sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Pila ka buok anak ang kinahanglan nga maangkon sa magtiayon? Ang tanan nga maatiman nila! Dayag lang, ang pag-atiman sa mga anak nagpasabut nga dili lang paghatag nila og kinabuhi. Kinahanglang higugmaon ang mga anak, amumahan, tudloan, pakan-on, sininaan, balayan, ug maayong pagkasugod sa ilang mga kapasidad nga mahimong buotang mga ginikanan sa ilang kaugalingon” (“The Great Plan of Happiness,” Ensign, Nob. 1993, 75).

Sa unsa nga paagi nga ang mga pagtulun-an ni Elder Oaks makatabang sa magtiayon kon pila ka anak ang batunan?

Panahon niini nga leksyon, mahimong sensitibo niadtong mga estudyante kinsa walay oportunidad nga mahimong mga ginikanan niini nga kinabuhi. Ang mosunod nga pamahayag gikan ni Elder Neil L. Andersen makatabang:

“Ang pagpanganak … usa ka subo nga hilisgutan alang sa matarung nga mga magtiayon kinsa nagminyo ug wala gayud makaanak sumala sa ilang gipaabut o alang sa bana ug asawa nga nagplano sa paghimo og dakong pamilya apan gipanalanginan og gamay ra nga pamilya.

“Dili nato kanunay mapasabut ang mga kalisdanan sa atong mortalidad. Usahay ang kinabuhi ingon og dili gayud makiangayon—ilabi na kon ang atong pinakatinguha mao ang paghimo gayud sa unsay gisugo sa Ginoo. Isip sinugo sa Ginoo ako mopaniguro kaninyo nga kini nga saad sigurado: ‘Ang matinud-anong mga miyembro kansang mga kahimtang wala motugot kanilang makadawat sa mga panalangin sa mahangturong kaminyoon ug pagkaginikanan niining kinabuhia makadawat sa tanang gisaad nga mga panalangin sa kahangturan, [samtang] gihuptan nila ang mga pakigsaad nga ilang gihimo ngadto sa Dios’ [Handbook 2: Administering the Church (2010), 1.3.3]” (“Mga Bata,” 30).

Salmo 127:3; Doktrina ug mga Pakigsaad 59:6

Ang kabalaan sa kinabuhi

Hangyoa ang usa ka estudyante sa pagbasa og kusog sa Salmo 127:3.

Unsay gipasabut nga “ang mga kabataan mao ang panulundon sa Ginoo”? (Ang kabataan mao ang gasa gikan sa Dios.)

Basaha ang mosunod gikan sa pamahayag sa pamilya: “ Kami mopamatuod sa pagkabalaan sa kinabuhi ug sa iyang pagkamahinungdanon diha sa walay katapusan nga plano sa Dios.” Ipamatuod kini nga baruganan: Kon makasabut kita nga ang kabataan gasa gikan sa Dios, masabtan nato ang kabalaan sa ilang mga kinabuhi. Sa daghang mga bahin sa kalibutan, ang aborsyon giisip nga madawat, ug daghang minilyon nga mga aborsyon gipahigayon matag tuig. Aron matabangan ang mga estudyante nga makasabut sa lagda sa Simbahan bahin sa aborsyon, ipakigbahin ang mosunod nga pamahayag ug hangyoa ang mga estudyante sa pagpaminaw sa mga kahimtang nga ang aborsyon mahimong makatarunganon:

“Ang kinabuhi sa tawo sagrado nga gasa gikan sa Dios. Ang pagpili og aborsyon alang sa personal o sosyal nga kasayon supak sa kabubut-on ug sugo sa Dios. … Ang mga propeta sa ulahing mga adlaw nanghimaraut sa aborsyon, nagpasabut sa deklarasyon sa Ginoo, ‘Dili ka … magpatay, ni magbuhat sa bisan unsa nga butang nga sama niini’ (D&P 59:6). Ang ilang tambag bahin niini klaro: Ang mga miyembro sa Ang Simbahan ni Jesukristo sa mga Santos sa Ulahing mga Adlaw kinahanglang dili mopahigayon, moawhag, mobayad, o mopahimutang og aborsyon. Ang mga miyembro sa Simbahan nga moawhag og aborsyon sa bisan unsa nga paagi mahimong ipaubos og pagdisiplina sa Simbahan.

“Ang mga lider sa Simbahan nag-ingon nga ang pipila ka walay labut nga mga sitwasyon mahimong mohatag og kaangayan sa aborsyon, sama kon ang pagmabdos mao ang resulta sa pakighilawas sa duol nga kabanay o paglugos, kon ang kinabuhi o panglawas sa inahan gihukman sa batid nga awtoridad sa mediko nga namiligro, o kon ang bata sa tiyan nahibaloan sa batid nga awtoridad sa mediko nga adunay malisud nga mga depekto nga dili motugot sa masuso nga mabuhi lapas sa pagkahimugso. Apan bisan kini nga mga sitwasyon dili diha-diha mohatag og katarungan sa aborsyon. Kadto kinsa nag-atubang sa ingon nga mga sitwasyon kinahanglan mohunahuna lamang sa aborsyon human sa pagkonsulta sa ilang lokal nga mga lider sa Simbahan ug sa pagdawat og panghimatuod pinaagi sa kinasingkasing nga pag-ampo” (Gospel Topics, “Abortion,” lds.org/topics).

Ubos sa unsay dili kasagaran nga mga kahimtang nga ang aborsyon makatarunganon?
Bisan kadtong mga kahimtang anaa, unsa nga tambag ang tinguhaon niadtong naghunahuna og aborsyon?

Ipakigbahin ang mosunod nga pamahayag aron matabangan ang mga estudyante nga makasabut nga ang pagpasagop usa ka dili hinakog nga alternatibo kay sa aborsyon:

“Atong … ipadayag ang atong suporta sa wala makasal nga mga ginikanan kinsa mopasagop sa ilang mga anak sa arang-arang nga panimalay nga dunay usa ka inahan ug amahan. Gipadayag usab nato ang atong suporta sa minyo nga mga inahan ug mga amahan kinsa mosagop niini nga mga bata.

“… Ang pagbaton og sigurado, maamumahon, ug kanunay nga relasyon sa amahan ug inahan importante sa pagkatawo sa bata. Kon mopili nga ipasagop, ang wala makasal nga mga ginikanan mihatag sa ilang mga anak niining labing importante nga panalangin. Ang pagpasagop usa ka dili hinakog, mahigugmaong desisyon nga mopanalangin sa bata, sa mga ginikanan sa bata, ug sa nagsagop nga pamilya niini nga kinabuhi ug sa tibuok kahangturan” (First Presidency statement, Okt. 4, 2006, as cited in Ensign, Okt. 2008, 37).

Sa imong pagtapos sa leksyon, ipakigbahin ang imong pagpamatuod sa kalipay nga gidala sa mga bata sa imong kinabuhi. Awhaga ang mga estudyante nga mangandam nga takus alang sa sagrado nga oportunidad sa pagdala og mga bata nganhi sa kalibutan.

Mga Basahunon sa Estudyante

Genesis 1:27–28; 9:1; 35:11; Salmo 127:3; 1 Nephi 15:11; Doktrina ug mga Pakigsaad 29:6; 59:6; Moises 2:27–28.
Neil L. Andersen, “Mga Bata,” Liahona, Nob. 2011, 28–31.
Russell M. Nelson, “Aborsyon: Usa ka Pag-ataki ngadto sa Walay Ikapanalipod,” Liahona, Okt. 2008, 14–19.