Ang mga propeta ug mga apostoles mipasidaan nga “ang tagsa-tagsa kinsa makalapas sa mga pakigsaad sa kaputli, kinsa moabuso sa ilang kapikas o mga anak, o kinsa mapakyas sa pagtuman sa mga kapangakohan sa pamilya moabut ang adlaw nga mobarug nga adunay tulubagon sa atubangan sa Dios” (“Ang Pamilya: Usa ka Pamahayag ngadto sa Kalibutan,” Liahona, Nob. 2010, 129). Kini nga leksyon nagsuhid kon sa unsa nga paagi nga kining seryoso nga kalapasan sa balaod sa Dios makahatag og mga sangputanan niini nga kinabuhi ug sa sunod. Naghatag usab kini og gibug-aton nga ang Pag-ula ni Jesukristo naghatag og paglaum ug pag-ayo ngadto sa mahinulsulon.
Background nga Basahunon
Jeffrey R. Holland, “Ang Pinulongan sa mga Anghel,” Liahona, Mayo 2007, 16–18.
Richard G. Scott, “Aron Pag-alim sa Makadaot nga mga Resulta sa Pang-abuso,” Liahona, Mayo 2008, 40–43.
Ang kalapasan sa mga pakigsaad sa kaputli, abuso, ug kapakyas sa pagtuman sa mga responsibilidad sa pamilya
Pahinumdumi ang mga estudyante nga sa miaging mga leksyon ilang nakat-unan ang kaimportante sa mga responsibilidad sa pamilya, lakip sa mosunod: (1) ang bana ug asawa adunay responsibilidad sa paghigugma ug pag-amuma sa usag-usa, (2) pagpatubo sa ilang mga anak pinaagi sa gugma ug katarung, ug (3) mga ginikanan kinahanglang mosangkap sa panginahanglan sa ilang pamilya.
Unsa kaha ang mahitabo sa usa ka pamilya kon ang mga kapikas ug mga ginikanan mobaliwala niini nga mga responsibilidad?
Aron matabangan ang mga estudyante nga makadiskobre unsay gisulti sa moderno nga mga propeta sa pagtuman sa mga kapangakohan sa pamilya, hangyoa ang usa ka estudyante sa pagbasa og kusog sa paragraph 8 sa “Ang Pamilya: Usa ka Pamahayag ngadto sa Kalibutan.” Hatagi og gibug-aton ang mosunod nga baruganan: “Ang tagsa-tagsa kinsa makalapas sa mga pakigsaad sa kaputli, kinsa moabuso sa ilang kapikas o mga anak, o kinsa mapakyas sa pagtuman sa mga kapangakohan sa pamilya moabut ang adlaw nga mobarug nga adunay tulubagon sa atubangan sa Dios.”
Unsay buot ipasabut nga ang mga indibidwal nga makalapas niini mobarug nga adunay tulubagon sa atubangan sa Dios? (Sa Adlaw sa Paghukom mobarug kita sa atubangan sa Dios ug motubag ngadto Kaniya sa mga sala nga wala nato mahinulsuli; tan-awa sa Pinadayag 20:11–15; 2 Nephi 9:15–16.)
Basaha ang mosunod nga pamahayag ni Elder Dennis B. Neuenschwander sa Seventy:
Imahe
Elder Dennis B. Neuenschwander
“Ang atong tulubagon ngadto sa Dios, isip atong Amahan ug tiglalang, mao ang labing sukaranan nga mga leksyon sa ebanghelyo” (“The Path of Growth,” Ensign, Dis. 1999, 15).
Sa unsa nga paagi nga ang baruganan sa pagkamay tulubagon ngadto sa Dios alang sa atong mga aksyon makatabang nato nga motubo sa espirituhanong paagi?
Isulat ang mosunod nga mga pulong diha sa pisara isip ulohan sa tulo ka kolum:
Pagsupak sa mga Pakigsaad sa Kaputli
Pag-abuso sa Kapikas o Kaliwat
Pagkapakyas sa Pagtuman sa mga Responsibilidad sa Pamilya
Bahina ang klase og katulo. Dapita ang one-third sa klase sa pagbasa sa Doktrina ug mga Pakigsaad 42:22–25, ang laing one-third sa pagbasa sa Mateo 18:1–6, ug ang katapusang one-third sa pagbasa sa Doktrina ug mga Pakigsaad 93:39–44. Hangyoa ang mga estudyante sa pagpahaum sa ilang scripture passage ngadto sa sakto nga ulohan sa pisara. Hangyoa sila sa pagpangita sa mga pulong nga nagtudlo bahin sa kaseryoso niini nga mga kalapasan. Human sa igong panahon, dapita ang mga estudyante sa pagpakigbahin sa unsay ilang nakat-unan. (Samtang motubag ang mga estudyante isulat ang mga pakisayran sa kasulatan ubos sa angay nga mga ulohan.)
Unsa nga mga pulong niini nga mga tudling nga nagtudlo bahin sa kaseryoso niini nga kalapasan?
Ikonsiderar ang pagtudlo sa matag ulohan diha sa pisara ug pagpangutana sa mosunod nga mga pangutana nga may kalabutan sa matag kalapasan. Samtang nagtubag ang mga estudyante, isulat ang ilang mga tubag ubos sa matag ulohan.
Unsa ang pipila ka mga kinaiya o batasan nga, kon dili makontrol, mosangpot nga ang tawo makahimo og kalapasan? (Pananglitan, ang mga tubag sa kalapasan sa pag-abuso og kapikas o kaliwat mahimong maglakip sa walay pailub sa uban, kalagmitan nga manaway sa uban, ug motuo sa dili sakto nga nabatasan bahin sa mga lalaki ug mga babaye.)
Unsa nga tambag ang inyong ihatag ngadto sa usa ka tawo nga magpakita niini nga mga kinaya o batasan?
Unsaon sa usa ka miyembro sa Simbahan pagbuntog niini nga mga kinaiya o batasan? (Samtang ang mga estudyante mopakigbahin sa ilang mga tubag, tabangi sila nga makasabut nga kon kita magsunod og mga baruganan sa ebanghelyo sama sa paghinulsol, Kristohanon nga pag-alagad, pagsabut, pailub, ug pagpasaylo, makapaduol kita sa makaabag nga gahum sa Pag-ula.)
Paglaum alang sa paghinulsol, pagpasaylo, ug kausaban
Ipamatuod nga ang ebanghelyo ni Jesukristo naghatag og paagi sa mga indibidwal ug mga pamilya nga magmalampuson ug makatagamtam og buhong nga kinabuhi. Bisan pa niana, kitang tanan makahimo og dili maayo nga mga pagpili, ug ang uban niini adunay malungtarong mga epekto sa atong kaugalingon ug sa uban. Apan adunay paglaum.
Ipasabut nga pipila ka miyembro sa Simbahan nabiktima sa uban—sama sa dili matinud-anon nga kapikas o abusado nga kapikas o ginikanan—ug ang mga biktima naghunahuna unsay ilang mahimo bahin sa ilang mga kahimtang. Hangyoa ang usa ka estudyante sa pagbasa sa mosunod nga pahayag ni Elder Richard G. Scott sa Korum sa Napulog Duha ka mga Apostoles:
Imahe
Elder Richard G. Scott
“Kon kamo naabusohan, si Satanas maningkamot sa pagdani kaninyo nga wala na gayuy solusyon. Gani hingpit man siyang nasayud nga aduna gayud. Si Satanas nasayud nga ang pagkaalim moabut pinaagi sa walay pagduhaduha nga gugma sa Langitnong Amahan alang sa tanan Niyang mga anak. Nakasabut sab siya nga ang gahum sa pag-alim apil na sa Pag-ula ni Jesukristo. Busa, ang iyang pamaagi mao ang pagbuhat kutob sa iyang mahimo sa pagpalayo kaninyo gikan sa Amahan ug sa Iyang Anak. Ayaw itugot nga si Satanas makadani kaninyo nga kamo dili na gayud matabangan” (“Aron Pag-alim sa Makadaot nga mga Resulta sa Pang-abuso,” Liahona, Mayo 2008, 41).
Ngano nga si Satanas maningkamot sa pagkombinser niadtong giabusuhan nga motuo nga walay kasulbaran sa ilang mga problema?
Unsa ang mahimong mga resulta kon ang mga tawo motuo nga walay paglaum o kasulbaran sa ilang mga problema?
Ipakigbahin ang mosunod nga pagpamatuod ug tambag gikan ni Elder Richard G. Scott:
Imahe
Elder Richard G. Scott
“Ako mopamatuod nga may nailhan akong mga biktima sa seryosong pang-abuso kinsa malampusong nakahimo og malisud nga panaw ngadto sa hingpit nga pagkaalim pinaagi sa gahum sa Pag-ula. Human masulbad ang ilang kaugalingong kahimtang pinaagi sa iyang hugot nga pagtuo sa makaalim nga gahum sa Pag-ula, usa ka batan-ong babaye kinsa grabeng giabusuhan sa iyang amahan mihangyo kanako og laing interbyu. Pagbalik niya may kuyog siyang mas tigulang nga magtiayon. Akong gibati nga iyang gihigugma pag-ayo kining duha. Ang iyang nawong misilaw sa kalipay. Misugod siya, ‘Elder Scott, kini ang akong amahan. Ako siyang gihigugma. Nabalaka siya mahitungod sa ubang mga butang nga nahitabo sa akong pagkabata. Kini dili na problema alang kanako. Mahimo ba imo siyang tabangan?’ Unsa gayud ka gamhanan nga kumpirmasyon sa kapasidad sa Manluluwas sa pag-alim! Siya wala na mag-antus gikan sa mga sangputanan sa pang-abuso, tungod kay aduna na siyay igong pagsabut sa Pag-ula, igong hugot nga pagtuo, masulundon sa Iyang balaod. Samtang kamo makugihong magtuon sa Pag-ula ug mopakita sa inyong hugot nga pagtuo nga si Jesukristo adunay gahum sa pag-alim, kamo makadawat sa sama nga makalipay nga kahupayan. …
“Ang pagkaalim mahimong magsugod uban sa mahunahunaon nga bishop o stake president o sa usa ka maalamon nga propesyonal nga counselor. Kon nabalian kamo og tiil, dili ka gayud mohukom nga ikaw ang moayo. Sa seryoso nga pag-abuso makaayo usab ang tabang nga gikan sa usa ka propesyonal” (“Aron Pag-alim sa Makadaot nga mga Resulta sa Pang-abuso,” 40–42).
Sa unsa nga paagi nga ang dinasig nga tambag ni Elder Scott makatabang og usa ka tawo kinsa nag-antus og pang-abuso?
Ipakita ang mosunod nga mensahe ni Presidente Boyd K. Packer sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:
Imahe
Presidente Boyd K. Packer
“Ang kalooy ug grasya ni Jesukristo dili lang limitado niadtong nakahimo og sala nga gibuhat o wala buhata, apan kini naglangkob sa mga saad sa walay katapusang kalinaw ngadto sa tanan kinsa modawat ug mosunod Kaniya ug sa Iyang mga pagtulun-an. Ang Iyang kalooy mao ang gamhanan nga mananambal, bisan sa inosenting samaran” (“Ang Rason sa Atong Paglaum,” Liahona, Nob. 2014, 7).
Sa unsa nga paagi nga ang Pag-ula ni Jesukristo naghatag og paglaum ug pag-ayo? (Samtang ang mga estudyante mopakigbahin sa ilang mga tubag, tabangi sila nga makasabut sa mosunod nga baruganan: Ang tanan nga mosunod ni Jesukristo ug sa Iyang mga pagtulun-an makaangkon og kaayohan ug walay katapusang kalipay pinaagi sa Iyang kalooy ug grasya.)
Aron matudloan ang mga estudyante sa unsa nga paagi nga ang Pag-ula ni Jesukristo makatabang sa mga indibidwal nga nag-abuso sa uban o nagpasakit kanila sa ubang mga paagi, basaha ang 2 Mga Taga-Corinto 5:17–21 pagdungan isip klase.
Unsay gipasabut nga mahimong “bag-ong binuhat” diha ni Kristo? (Posible nga mga tubag naglakip sa ideya nga agig tubag sa atong makugihon nga pagsunod sa mga sugo sa Ginoo, mopanalangin Siya kanato sa mga gasa sa Espiritu, nga mao ang balaan nga mga hiyas. Kini nga mga gasa makahatag og importante nga mga kausaban kanato, ug kita mahimong bag-ong binuhat nga sama sa Dios.)
Sumala sa bersikulo 21, sa unsa nga paagi kini mahitabo? (Si Jesus wala gayuy sala, apan gidala Niya sa Iyang Kaugalingon ang atong mga sala aron nga ubos sa kondisyon sa atong paghinulsol, mahimo kitang matarung pinaagi Kaniya. Nahimo Siyang sakripisyo alang kanato. Samtang kita maghinulsol ug magtinguha sa pagsunod sa Iyang ehemplo, makagamit kita sa Iyang gahum sa pagtabang nato nga mahimong bag-ong binuhat.)
Unsa ang kahulugan sa pulong nga magpasig-uli [reconcile] sa bersikulo 18? (Ang “magpasig-uli mao ang proseso sa pagtubos sa tawo gikan sa iyang kahimtang sa pagpakasala ug sa espirituhanong kangitngit ug sa pagpahiuli kaniya ngadto sa usa ka kahimtang sa panag-uyon ug panaghiusa uban sa Makagagahum. Pinaagi niini ang Dios ug tawo dili na kaaway” [Bruce R. McConkie, Doctrinal New Testament Commentary, 3 vols. (1965–73), 2:422].)
Pangutan-a ang mga estudyante kon nakaila ba sila ni bisan kinsa nga nakasinati sa paglaum ug pagkaayo nga gihimong posible pinaagi sa Pag-ula ni Jesukristo. Dapita ang pipila ka mga estudyante sa pagpakigbahin sa ilang mga ehemplo kon gibati nila nga komportable ug kon ang mga ehemplo dili kaayo personal.
Ipakigbahin ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Wala ko masayud kon si kinsa kaninyo karon, ang kinahanglang makadungog sa mensahe sa pagpasaylo niini [sa sambingay sa mga mamumuo sa parrasan]; tan-awa sa Mateo 20:1–15], apan bisan nagtuo ka nga ulahi ka na, bisan pila pa ka mga oportunidad wala ninyo mapahimusli, mga sayop nga inyong nahimo o mga talento nga wala ninyo, o unsa ka kalayo sa panimalay ug pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangturong kahayag sa Pag-ula ni Kristo dili moabut kaninyo. …
“Busa kon kamo may pakigsaad, tumana kini. Kon wala pa, buhata kini. Kon may pakigsaad na kamo ug dayon wala matuman, hinulsuli kini. Dili pa gayud ulahi samtang ang Agalon sa ubasan miingon aduna pay panahon. Palihug paminawa ang mga pagdasig sa Balaang Espiritu kaninyo karon, niining higayona, nga kinahanglan ninyong dawaton ang gasa sa pag-ula sa Ginoong Jesukristo ug moapil sa Iyang buhat” (“Mga Mamumuo sa Ubasan,” Liahona, Mayo 2012, 33).
Dapita ang mga estudyante sa pagrekord unsay gikumpirmar sa Balaang Espiritu ngadto kanila.