“Lesson 8 Materyal ng Titser: Pagsisikap na Maunawaan ang Pagkaakit sa Kaparehong Kasarian at Mahalin ang Ating mga Kapatid na LGBT,” Materyal ng Titser para sa Walang-Hanggang Pamilya (2022)
“Lesson 8 Materyal ng Titser,” Materyal ng Titser para sa Kursong Ang Walang-Hanggang Pamilya
Lesson 8 Materyal ng Titser
Pagsisikap na Maunawaan ang Pagkaakit sa Kaparehong Kasarian at Mahalin ang Ating mga Kapatid na LGBT
Bilang mga disipulo ni Jesucristo, inaanyayahan tayo na “manguna sa pagpapahayag ng pagmamahal, habag, at paglilingkod” sa mga taong nakararanas ng pagkaakit sa kaparehong kasarian o tinatawag na bakla, lesbiana o tomboy, o bisexual (Quentin L. Cook, “Let Us Be at the Forefront” [video], ChurchofJesusChrist.org). Sa lesson na ito, magkakaroon ang mga estudyante ng pagkakataong matukoy, matalakay, at maipamuhay ang mga katotohanan ng ebanghelyo na makatutulong sa kanila na tumugon nang may pagmamahal, pagtanggap, at paggalang sa mga nakararanas ng pagkaakit sa kaparehong kasarian o tinatawag na LGBT.
Mga Mungkahi sa Pagtuturo
Pagpapahusay ng Ating Pagtuturo at Pag-aaral
Magturo nang may pang-unawa at pagkahabag. Habang naghahanda ka para sa klase, mag-ukol ng oras na pagnilayan ang pagkaunawa mo tungkol sa pagkaakit sa kaparehong kasarian at ang saloobin mo sa mga taong tinatawag na bakla, lesbiana o tomboy, o bisexual. Paano mo matutulungan ang mga estudyante na makadama ng pagmamahal, pagtanggap, at paggalang sa lahat ng anak ng Diyos?
Iniutos ni Jesucristo sa Kanyang mga disipulo na mahalin ang isa’t isa tulad ng pagmamahal Niya sa atin.
Sabihin sa mga estudyante na isipin kunwari na isang young adult na nagngangalang Jean ang dumalo sa institute class na ito sa unang pagkakataon. Nang malaman ni Jean na ang tatalakaying paksa ay tungkol sa pagkaakit sa kaparehong kasarian, agad siyang naging balisa at gustong umalis, dahil tinatawag siyang lesbiana. Talakayin kung bakit kaya nabalisa si Jean at ano ang magagawa ng mga miyembro ng klase para tulungan siya at ang iba na madama na walang dapat ipangamba sa talakayang ito.
Sabihin sa mga estudyante na basahin ang Mateo 22:37–39 at Juan 13:34–35, at alamin kung bakit mahalaga sa Ama sa Langit at kay Jesucristo na mahalin ang ating kapwa. Isulat sa pisara ang sumusunod na katotohanan: Iniuutos sa atin na mahalin ang isa’t isa tulad ng pagmamahal ni Jesucristo sa atin.
-
Bakit mahalagang mahalin ng mga disipulo ni Jesucristo ang iba tulad ng pagmamahal Niya?
-
Sa paanong mga paraan ipinakita ni Jesucristo ang perpektong pagmamahal Niya noong Kanyang mortal na ministeryo? (Bilang bahagi ng talakayan, ipaalala sa mga estudyante na ang pagmamahal sa iba ay hindi nangangahulugan na dapat tayong sumang-ayon o mag-endorso ng mga pag-uugali na labag sa mga kautusan ng Diyos. Magiliw na itinuro ng Tagapagligtas ang doktrina ng Kanyang Ama nang buong tapang at kalinawan.)
-
Paano tayo magagabayan ng halimbawa ng pagmamahal ng Tagapagligtas sa ating talakayan tungkol sa pagkaakit sa kaparehong kasarian?
Maaari tayong tumugon sa mga nakararanas ng pagkaakit sa kaparehong kasarian nang may kabaitan, pagtanggap, at paggalang.
Hatiin ang klase sa maliliit na grupo. Ipaliwanag na sa loob ng ilang minuto ay tatalakayin ng bawat grupo ang isang sitwasyon na kinapapalooban ng pagkaakit ng isang tao sa kaparehong kasarian. Ipaliwanag na ang sitwasyong ito ay katulad ng mga karanasan sa tunay na buhay ng ilang miyembro ng Simbahan. Upang matulungan ang mga estudyante na ibatay ang kanilang mga talakayan sa mga alituntunin ng ebanghelyo, maaari mong sabihin sa bawat miyembro ng grupo na rebyuhin muna ang isa sa mga bahagi sa materyal sa paghahanda.
Matapos marebyu ng mga estudyante ang kanilang mga bahagi, bigyan ang bawat estudyante ng kopya ng handout na matatagpuan sa katapusan ng lesson na ito. Sabihin sa mga estudyante na basahin nang tahimik ang sitwasyon at pagkatapos ay talakayin ang mga kasunod na tanong sa kanilang grupo.
Matapos talakayin nang maraming oras ng mga estudyante ang sitwasyon at mga tanong, anyayahan sila na ibahagi ang natutuhan o nadama nila sa kanilang talakayan. Kapag nagbahagi na ang mga estudyante ng kanilang mga ideya, maaari kang magtanong ng mga bagay na makatutulong sa kanila na mapalalim ang kanilang pang-unawa sa paksang ito. Narito ang ilang halimbawa ng mga follow-up na tanong:
-
Paano nakaimpluwensya ang kaalaman/katotohanan/alituntuning iyan …
-
Kailan mo nadama/nakita/naranasan …
-
Ano ang halimbawa ng …
-
Paano ka kikilos nang may pananampalataya sa …
Pagkatapos ng talakayan, itanong sa mga estudyante kung may mga tanong o alalahanin sila tungkol sa pagkaakit sa kaparehong kasarian na hindi nasagot.
Upang matulungan ang mga estudyante na ipamuhay ang natutuhan nila, maaari mong ipakita ang mga sumusunod na tanong at anyayahan ang mga estudyante na pumili ng isa o mahigit pa na nauugnay sa kanila. Hikayatin ang mga estudyante na pag-isipan ang kanilang tanong (o mga tanong) at isulat ang anumang impresyon na maaaring matanggap nila.
-
Ano ang kailangan kong baguhin tungkol sa paraan ko na mag-isip at kumilos para mapakitunguhan ko ang lahat ng tao, kabilang ang mga nakararanas ng pagkaakit sa kaparehong kasarian, nang may higit na pagmamahal, pagtanggap, at paggalang? Paano ako makaaasa sa Tagapagligtas habang ginagawa ko ang mga pagbabagong ito?
-
Bilang isang taong nakararanas ng pagkaakit sa kaparehong kasarian, paano ako matutulungan ng pagtutuon sa Tagapagligtas at sa Kanyang ebanghelyo na mamuhay nang may higit na pag-asa at kaligayahan? Kung hindi ko pa naibahagi ang aking karanasan sa sinuman, sino ang mahihingan ko ng tulong? (Paalala: Kung magpapasiya kang talakayin ang nadarama mong pagkaakit sa kaparehong kasarian, mapanalanging pag-isipan kung kanino mo sasabihin ito at kung paano mo ibabahagi ang aspetong ito ng iyong karanasan sa buhay na ito.)
Kuwento ni Jackson
Materyal ng Titser para sa Kursong Ang Walang-Hanggang Pamilya—Lesson 8
Lumaki si Jackson sa isang pamilya ng matatapat na miyembro ng Ang Simbahan ni Jesucristo ng mga Banal sa mga Huling Araw. Mayroon siyang mapagmahal na mga magulang at malapit lalo na sa kanyang kapatid na si Selena.
Mahal ni Jackson ang ebanghelyo at may patotoo tungkol kay Jesucristo at sa Pagpapanumbalik. Kilala siya sa pagiging masayahin at aktibo. Gayunman, kamakailan, ang kanyang pagkamasayahin ay napalitan ng kalungkutan, at lalo pa niyang inilayo ang kanyang sarili sa iba. Si Jackson ay may lihim at hindi alam kung ano ang gagawin tungkol dito.
Basta’t ang alam niya, mas naaakit siya sa mga lalaki kaysa sa mga babae. Sa loob ng maraming taon sinikap niyang balewalain ang mga damdaming ito o nagkunwaring hindi niya nararamdaman ang mga ito. Dahil ang paksang ito ay hindi kailanman pinag-usapan sa kanyang tahanan, nadama niya na ito ay isang ipinagbabawal na paksa. Kung minsan nagsasalita ng mapanlait na mga salita ang kanyang mga kaibigan tungkol sa mga bakla. Ang tanging naaalala niyang narinig niya mula sa mga titser at lider sa simbahan ay mabigat na kasalanan ang homoseksuwalidad.
Bago ang kanyang misyon paulit-ulit na nagsumamo si Jackson sa Diyos na alisin ang kanyang pagkaakit sa mga lalaki. Tiwala siya na kung magmimisyon siya, magbabago ang kanyang damdamin. Gayunman, mula nang matapos ni Jackson ang kanyang misyon, naaakit pa rin siya sa mga lalaki. Gustung-gustong makipag-usap ni Jackson sa isang tao, ngunit hindi niya ito magawa dahil natatakot siya.
Napansin ni Selena ang paglayo ng kanyang damdamin sa kanilang pamilya. Nakikita niya sa mga mata nito ang sakit na nadarama nito. Nagdarasal siya para kay Jackson at para malaman kung paano ito tutulungan.
Ngayong umaga tinanong ni Selena si Jackson kung puwede silang maglakad-lakad sa labas. Atubili siyang pumayag. Habang naglalakad sila, pinag-usapan nila ang mga nangyayari sa araw-araw. Napangiti pa nga ni Selena si Jackson. Sa huli, sinabi ni Selena, “Jackson, alam kong may problema ka. Nakikita ko sa mga mata mo. Sabihin mo naman sa akin. Nag-aalala ako sa iyo.”
Matagal na hindi tuminag sa pagkakatayo si Jackson. Nagsimulang dumaloy ang mga luha sa kanyang pisngi. Sa huli, nailabas niya ang kanyang itinatagong matinding damdamin, at sa tinig na garalgal, sinabi niya, “Selena, bakla ako at matagal ko nang alam ito. Hindi ko alam kung ano ang gagawin ko. Natatakot ako sa sasabihin nina Inay at Itay kung malalaman nila. Ikakahiya ba ako ng iba pa nating kamag-anak? Gusto pa rin kaya ng mga kaibigan ko na kasama ako kapag nalaman nila na bakla ako? Ano ang mangyayari sa pagiging miyembro ko sa Simbahan kung sasabihin ko ito sa bishop? Hindi ko nakikita kung paano ako magiging masaya at magkakaroon ng pamilya. Pakiramdam ko ay pinabayaan na ako ng Diyos.”
Iniyukod ni Jackson ang kanyang ulo at tumitig sa lupa. Matapos ang mahabang katahimikan, mahina niyang sinabi, “Selena, pasensya ka na binigo kita. Pakiusap huwag mong sabihin kaninuman. Litung-lito na ako at di alam ang gagawin.”
Mga Tanong sa Talakayan
-
Ano ang nadama mo habang iniisip mo ang karanasan ni Jackson? Bakit maaaring mahirap pag-usapan ang nadaramang pagkaakit sa kaparehong kasarian sa isang kapamilya, malapit na kaibigan, o lider ng Simbahan?
-
Ano kaya ang mararamdaman mo kung ikaw si Selena? Ano ang magagawa ni Selena para makatugon nang may pang-unawa at pagkahabag?
-
Paano makatutulong kina Selena at Jackson ang tamang pagkaunawa sa mga turo ng Panginoon tungkol sa pagkaakit sa kaparehong kasarian? Bakit kaya mahirap minsan na tanggapin ang mga turong ito?
-
Paano uunawain nina Jackson at Selena ang pagkaakit sa kaparehong kasarian nang may walang-hanggang pananaw?
-
Saan maaaring bumaling si Jackson para makatanggap ng karagdagang patnubay, panghihikayat, at tulong?
© 2022 ng Intellectual Reserve, Inc. All rights reserved.
Kuwento ni Jackson
Para sa Susunod
Sabihin sa mga estudyante na habang pinag-aaralan nila ang materyal sa paghahanda para sa lesson 9 ay mag-ukol din sila ng kaunting oras sa pag-aaral tungkol sa kanilang mga ninuno sa FamilySearch.org o sa Family Tree app. Hikayatin silang pag-isipan ang mga pagpapalang ipinangako sa mga taong tumutulong sa kanilang mga ninuno na tumanggap ng nakapagliligtas na mga ordenansa sa templo.