1 Ā ināianei, i nui anō ngā mea i kōrero ai a Hākopa ki tōku iwi i taua wā; hei aha koa koinei anake ngā mea kua meinga e au kia tuhia ai, nā te mea ko ngā mea kua tuhia e au e ranea ana i ahau.

2 Ā ināianei au, a Nīwhai, e tuhi atu anō i ngā kupu a Īhāia, nā te mea e kaingākau ana tōku wairua i ana kupu. Nā, māku ana kupu e whakataurite atu ki tōku iwi, ā, māku ērā e tuku atu ki āku tamariki katoa, nā, i tino kite ia i tōku Kaihoko, pērā i taku kitenga atu i a ia.

3 Ā, ko taku teina, a Hākopa, i kite anō i a ia pērā i taku kitenga atu i a ia; nā reira, māku ā rāua kupu e tuku atu ki āku tamariki kia whakaatu atu ki a rātou e pono ana aku kupu. Nā reira, mā ngā kupu a te tokotoru, kua kī te Atua, māku taku kupu e whakapūmau. Hei aha koa, e tono mai ana te Atua i ngā kaiwhakaatu anō, ā, e whakaatuhia ana e ia āna kupu katoa.

4 Nana, e kaingākau ana tōku wairua i te whakaaturanga atu ki ngā tāngata i te pono o te haerenga mai a te Karaiti; nā te mea, mō tēnei take i homai ai te ture a Mohi; me ngā mea katoa kua homai nei e te Atua mai i te tīmatanga rā anō o te ao, ki te tangata, e tohu ana mōna.

5 Ā, e kaingākau anō ana tōku wairua i ngā kawenata a te Ariki kua meatia nei ki ō tātou matua; āe rā, e kaingākau ana tōku wairua i tōna atawhai, me tōna tika, me tōna mana, me tōna aroha i roto i te mahere nui mau tonu mō te whakaoranga i te mate.

6 Ā, e kaingākau ana tōku wairua i te whakaatu atu ki tōku iwi, nā, hāunga te Karaiti e haere mai ai ka mate ngā tāngata katoa.

7 Nā te mea ki te kore he Karaiti kāore he Atua; ā, ki te kore he Atua kāore tātou, nā te mea kua kore i taea he hanganga. Engari he Atua, ā, he Karaiti, ā, ka haere mai ia i te tutukitanga o tōna ake wā.

8 Ā ināianei, e tuhi ana au i ētahi o ngā kupu a Īhāia, kia ara ake ai ngā ngākau o te hunga o tōku iwi e kite ai i ēnei kupu, ā, kia whakahari ai mō ngā tāngata katoa. Ināianei, koinei ngā kupu, ā, e pai ana kia whakatauritetia ai ēnā ki a koe me ngā tāngata katoa.