1 Auē te mate mō te hunga e whakapuaki nei i ngā whakapuakitanga hē, ā, e tuhituhi nei i te tinihanga kua whakaritea nei e rātou;

2 Hei whakapeau atu i te hunga tuakoka mai i te whakawākanga, me te muru atu i te tikanga mai i te rawakore o tōku iwi, kia noho ai ngā pouaru hei pārurenga mō rātou, ā, kia taea ai e rātou te hunga matua kore te pāhua!

3 Ā, ka aha koutou i te rā o tana toronga, ā, i te whakangaromanga ka pā mai i tawhiti? ka tahuti atu koutou ki a wai hei āwhina? ā, ka mahue i a koutou tō koutou korōria ki hea?

4 Ki te kore au ka tuohu iho rātou ki raro iho i ngā mauhere, ā, ka hinga iho rātou ki raro i te hunga kua patua. Nā tēnei katoa kāore tōna riri i tahuritia atu, engari e torona tonutia atu tōna ringa.

5 E te Ahiriana, ko te tokotoko o taku riri, me te rākau i tō rātou ringa ko tō rātou whakatakariri tika.

6 Māku ia e tuku atu ki tētahi iwi ngutu kau, ā, māku ia e tuku tohu atu kia tīkina ai te parakete, me te tiki i te pāhua, me te takahi iho i a rātou pērā ki te paru o ngā tiriti.

7 Heoi anō kāore e pēnā ana ōna whakaaro, kāore rānei tōna ngākau e whakaaro pērā ana; engari kei tā tōna ngākau he whakangaro, he hātepe atu i ngā iwi, ehara i te ruarua.

8 Nā, e kī ana ia: Ehara rānei aku wheao katoa i te kīngi?

9 Ehara rānei a Karano i te rite ki a Karakemihi? Ehara rānei a Hamata i te rite ki a Arapara? Ehara rānei a Hamāria i te rite ki a Ramahiku?

10 E rite ana ki tā tōku ringa whakatū i ngā kīngitanga o ngā whakapakoko, ā, i nui ake ō rātou whakaahua tārai i ō rātou i Hiruharama me Hamāria;

11 Me kore rānei au, e pērā ki tāku ki Hamāria me ōna whakapakoko, pērā anō ki Hiruharama me ōna whakapakoko?

12 Nā reira ka pahawa ake, nā, ina whakamahia e te Ariki i tana mahi katoa i runga o Maunga Hīona, i runga anō i Hiruharama, māku e whakawhiu ngā hua o te ngākau kaha o te kīngi o Ahiria, me te korōria o ana tirohanga whakakake.

13 Nā, e kī ana ia: Nā te kaha o tōku ringa, ā, nā tōku mōhiotanga au i mahi ai i ēnei mea; nā te mea he matatau ahau; ā, nāku ngā rohenga o tōku iwi i nuku, ā, kua tāhaetia ō rātou taonga, ā, nāku te hunga kainoho i turaki iho e rite ana ki tētahi tangata mārohirohi;

14 Ā, kua kimihia e tōku ringa ngā rawa o te iwi ānō nei he kōhanga; ā, ānō nei tētahi e kohikohi hua manu ana nāku te rohe katoa i whakakao; ā, karekau tētahi i oraora ai i te parirau, i huakina rānei te māngai, i tioro rānei.

15 Ka whakahīhī te toki i a ia anō ki te tangata nāna nei ia i whakamahi ai? Ka whakanui te kani i a ia anō ki te tangata nāna nei ia i whakaoreore ai? Me te mea nei me oreore te tokotoko i a ia anō ki te hunga e hāpai ake ai i a ia, me te mea nei rānei me hāpai ake te rākau i a ia anō me te mea nei ehara ia i te rākau!

16 Nō reira me tuku e te Ariki, te Ariki o ngā Mano, ki waenganui i ōna mea mōmona, te whīrokitanga; ā, ka whakakāhia e ia o raro i tōna korōria tētahi muranga e rite ana ki te muranga o tētahi ahi.

17 Ā, ka ai te māramatanga o Iharaira kia rite ki tētahi ahi, ā, ko tōna Mea Tapu kia rite ki tētahi kāpura, ā, ka tahutahu, ā, ka horohoro i ana tūmatakuru me ana tātarāmoa i te rangi kotahi;

18 Ā, ka whakapaua te korōria o tana ngahere, me ō tana māra mōmona, ko te wairua me te tīnana tahi; ā, ka pērā ana ki tētahi kaihāpai-kara kua ngohe te ngākau.

19 Ā, ka ruarua noa ngā toenga rākau o tana ngahere, he pērā rawa, ka taea rātou te tuhi e tētahi tamaiti.

20 Ā, ka pahawa ake i taua rā, nā, ko ngā toenga o Iharaira, ā, me te hunga pērā kua puta atu i te whare o Hākopa, kua kore anō rātou e whakawhirinaki ki a ia nāna rātou i patu, engari ka whakawhirinaki ki te Ariki, te Mea Tapu o Iharaira, i roto i te pono.

21 Ka hoki mai te toenga, āe rā, ko te toenga pū anō o Hākopa, ki te Atua Kaha Rawa.

22 Nā, ahakoa he pērā tō iwi a Iharaira ki te onepū o te moana, ka hoki rawa mai tētahi toenga o rātou; ka puhaketia te whakapaunga kua whakatauhia i runga i te tika.

23 Nā, ka whakamahia e te Ariki te Atua o ngā Mano tētahi whakapaunga, ka whakatauhia pū anō ki te whenua katoa.

24 Nō reira, ko te kupu tēnei a te Ariki te Atua o ngā Mano: E tōku iwi e noho ana i Hīona, kaua e wehi i te Ahiriana; māna koe e patu ki tētahi tokotoko, ā, ka hāpaingia tana rākau ki a koe, i runga i te āhuatanga o Ihipa.

25 Nā, mō tētahi wā tino iti, ā, ka mutu te whakatakariri tika, me taku riri i tō rātou whakangaromanga.

26 Ā, ka whakatutū ake te Ariki o ngā Mano i tētahi whakawhiunga mōna e ai ki te parekura o Miriana i te toka o Orepe; ā, he pērā ki tana tokotoko i runga i te moana, ina, ka pērā anō tana hāpai ake i a ia i runga i te āhuatanga o Ihipa.

27 Ā, ka pahawa ake i taua rā, nā, ka tangohia atu tana pikaunga i tō pokohiwi, ā, ko tana ioka i tōna kakī, ā, ka whakangaromia te ioka nā te whakawāhinga.

28 Kua haere mai ia ki Aiata, kua hipa atu ia ki Mikirono; kua whakatakotohia ōna hāriata i Mikimaha;

29 Kua whakawhiti atu rātou i te whakawhitinga; kua whakanohoia e rātou a Kepa; e mataku ana a Rama; kua tahuti atu nei a Kipea o Haora.

30 Hikina ake tō reo, E te tamāhine a Karimi; meinga kia rangona atu i Raihi, Ka aroha hoki e Anatoto.

31 Kua tangohia a Maramena; e hui tahi ana ngā tangata o Kepimi i a rātou anō kia tahuti atu ai.

32 Nō naia tonu nei ka noho ia i Nopo hei taua rā; ka rūrū tōna ringa ki te maunga o te tamāhine o Hīona, te puke o Hiruharama.

33 Nana, ka tapahi te Ariki, te Ariki o ngā Mano i te peka ki te whakawehi; ā, ka tuaina iho ngā mea e whakatiketike ana; ā, ka whakaitia te hunga whakakake.

34 Ā, māna ngā rākau pūruru o ngā ngahere e poro iho ki te rino, ā, ka hinga a Repanona i te mea kaha rawa.