1 Nana, i pahawa ake nāku, nā Nīwhai, i karanga ake ki te Ariki, ki tōku Atua, nā te riri o ōku tuākana.

2 Engari nana, ka nui haere tō rātou riri ki ahau; nā konā ka whai rātou ki te muru i tōku oranga.

3 Āe rā, ka amuamu mai rātou ki ahau, e mea ana: E whakaaro ana tā tātou teina ki te whakahaere tikanga ki runga i a tātou; ā, he nui anō ō tātou mamae i a ia; nā reira, tukua ianei tātou kia patua ai ia, kia kore ai tātou e mamae anō i ana kupu. Nana rā, e kore tātou e pai ai ki a ia hei rangatira mō tātou; nō tātou kē, nō ngā tuākana nei te tikanga mō te whakahaere tikanga i runga i tenei iwi.

4 Kāore ianei ahau e tuhituhi ki runga i ēnei papa i ngā kupu katoa i amuamu mai ai rātou ki ahau. Engari, kāti noa māku e kī, i whai rātou ki te muru i tōku oranga.

5 Ā, i pahawa ake, ka whakatūpato te Ariki ki ahau, me mawehe ahau, a Nīwhai, i a rātou, ā, ka rere atu ki roto i te koraha, me te hunga katoa i pai ai kia haere tahi ai me ahau.

6 Nā reira, i pahawa ake nāku, nā Nīwhai, i mau ki tōku whānau, ko Hōrama anō hoki me tōna whānau, ā, ko Hāmi tōku tuakana me tōna whānau, ā, ko Hākopa rāua ko Hōhepa, ōku teina, me ōku tuāhine anō hoki, me ngā tāngata katoa i pai ai kia haere tahi ai me ahau. Ā, ko te hunga katoa i pai ai kia haere tahi me ahau, koia anō te hunga i whakapono ai ki ngā whakatūpatoranga me ngā whakakitenga a te Atua; nā reira, i whakarongo mai rātou ki aku kupu.

7 Ā, ka kawe mātou i ō mātou tēneti me ngā mea katoa i taea ai e mātou te kawe, ā, i haere ai mātou i te koraha mō te takiwā o ngā rā maha. Ā, nō muri mai i tā mātou haeretanga mō te takiwā o ngā rā maha ka whakatū mātou i ō mātou tēneti.

8 Ā, ka hiahia tōku iwi kia whakahua ai mātou i te ingoa o taua wāhi ko Nīwhai; nā reira, i whakahua ai mātou i a ia ko Nīwhai.

9 Ā, ko te hunga katoa i ahau i hiahia kia whakahua ai rātou i a rātou anō ko te iwi o Nīwhai.

10 Ā, ka ū mātou ki te pupuri i ngā whakawākanga, me ngā ture, me ngā whakahaunga a te Ariki i ngā mea katoa, e ai ki te ture a Mohi.

11 Ā, i a mātou anō te Ariki; i nui rawa anō tō mātou whaioranga; nā te mea i rui purapura mātou, ā, i ranea anō tā mātou kotinga. Ā, i tīmata mātou ki te whakatupu rāngai, me ngā kāhui, me ia tū kararehe, me ia tū kararehe.

12 Ā, ko au, ko Nīwhai, i mauria anōtia mai ngā tuhinga kua whaohia i runga i ngā papa parāhe; me te poi anō hoki, arā, te kāpehu, i whakaritea nei mō tōku matua e te ringa o te Ariki, e ai ki tērā kua tuhia nei.

13 Ā, i pahawa ake, i nui haere tō matou whaioranga, ā, ka tokomaha haere mātou i runga i te whenua.

14 Ā nāku, nā Nīwhai, i tiki atu i te hoari a Rāpana, ā, e ai ki tana āhuatanga ka hangaia ngā hoari maha, kei tūpono noa mai te iwi kua huaina ināianei ko ngā Rāmana e whakaeke mai ai, ā, ka whakamate i a mātou; nā taku mōhio ki tō rātou mauāhara ki ahau, ki aku tamariki, ki te hunga anō hoki kua huaina nei ko tōku iwi.

15 Ā, ka whakaako ahau i tōku iwi ki te waihanga whare, me te mahi i ngā mahinga katoa o te rākau, o te rino, o te kapa, o te parāhe, o te maitai, o te koura, o te hiriwa, o ngā oa utu nui anō, koia nei e ranea nui ana.

16 Ā, nāku, nā Nīwhai, i hanga tētahi temepera; ā, i rite taku hanganga ki te whakamahinga o te temepara a Horomona, heoi, kāore i hangaia ki ngā mea utu nui maha; kāore hoki ērā i kitea i runga i te whenua, nā reira, kīhai i taea te hanga kia rite ai ki tā Horomona temepara; engari, ko te whakamahinga o te hanganga e pērā ana anō ki te temepara o Horomona; ā, he tino pai rawa atu hoki tō reira whakamahinga.

17 Ā, i pahawa ake nāku, nā Nīwhai, i mea i tōku iwi hei iwi mamahi, ā, kia mahi ai ki ō rātou ringaringa.

18 Ā, i pahawa ake, i hiahia rātou ko ahau hei kīngi mō rātou. Engari nāku, nā Nīwhai, i hiahia ai kia kore rātou e whai kīngi; hei ahakoa, i mahi ahau i ērā i taea ai e ahau.

19 Ā nana, kua ea ngā kupu a te Ariki ki ōku tuākana, i kōrerotia e ia e pā ana ki a rātou, kia waiho ko ahau tō rātou kaiwhakahaere, tō rātou kaiwhakaako hoki. Nā reira, kua waiho ko ahau tō rātou kaiwhakahaere, to rātou kaiwhakaako, e ai ki ngā whakahaunga a te Ariki, ā, tae noa ki te wā i whai ai rātou ki te muru i tōku oranga.

20 Nā reira, i ea te kupu a te Ariki i kōrero ai ia ki ahau, e mea ana: Ina kore rātou e whakarongo ki ō kupu, ka hātepea atu rātou i te aroaro o te Ariki. Ā nana, i hātepea atu rātou i tōna aroaro.

21 Ā, kua meinga e ia te kanga kia tau ai ki runga i a rātou, āe rā, he kanga nanakia, nā ō rātou kino. Nana rā, i whakapakeke ratou i ō rātou ngākau ki a ia, kua taurite haere rātou ki te kiripaka; nā reira, i te mea he kiritea rātou, he ātaahua rawa anō, he āhuareka rawa anō, kia kaua noa mai ai e whakapoapoa ai ki tōku iwi ka meinga rātou e te Ariki te Atua kia tau ai he kiri mangu ki runga i a rātou.

22 Ā, e pēnei ai tā te Ariki te Atua: Ka meinga anō rātou e ahau he mea whakarihariha ki tō iwi, māna, ka rīpenetā rātou i ō rātou hara.

23 Ā, ka kanga hoki te uri o te tangata e hanumi ana ki ō rātou uri; nā te mea ka kangaia rātou ki taua kanga anō. Ā, i kīa ake e te Ariki, ā, i tutuki.

24 Ā, nā te kanga i runga nei i a rātou ka meinga he iwi māngere rātou, e kī katoa ana i te tinihanga me te nukarau, ā, ka rapu kararehe pārurenga i te koraha.

25 Ā, ka kī mai te Ariki te Atua ki ahau: Ka waiho rātou hei whakawhiu ki ō uri, hei whakaoho ake i a rātou kia mahara mai ki ahau; ā, ki te kore rātou e mahara i ahau me te whakarongo mai ki aku kupu ka whakawhiu rātou i a rātou tae noa ki te whakangaromanga.

26 Ā, i pahawa ake nāku, nā Nīwhai, i whakatapua ai a Hākopa rāua ko Hōhepa hei pirihi, hei kaiwhakaako i runga i te whenua o tōku iwi.

27 Ā, ka noho mātou i te āhuatanga o te harikoa.

28 Ā, kua pahemo atu ngā tau e toru tekau mai i te wā i mawehe atu ai mātou i Hiruharama.

29 Ā, nāku, nā Nīwhai, i mau ngā tuhituhinga ki runga i aku papa, i hangaia nei e ahau, mō tōku iwi ā mohoa noa nei.

30 Ā, i pahawa ake, i kī mai te Ariki te Atua ki ahau: Hangaia anōtia ētahi papa; ā, ka whaohia e koe ngā mea maha ki runga e pai nei ki taku titiro, hei painga mō tō iwi.

31 Nā reira ahau, a Nīwhai, kia ngohengohe ai ki ngā whakahaunga a te Ariki, i haere ahau, ā, i hangaia ēnei papa kua whaohia nei e ahau ēnei mea ki runga.

32 Nā, i whao ahau i tērā e āhuareka nei ki te Atua. Ā, mehemea e āhuareka ana tōku iwi ki ngā mea o te Atua, ka āhuareka anō hoki rātou ki aku whaowhaonga i runga nei i ēnei papa.

33 Ā, mehemea e hiahia ana tōku iwi kia mōhio ai ki te tino wāhi o te hītori o tōku iwi, me rapu ērā atu papa āku.

34 Ā kāti anō māku te kī, kua pahemo ngā tau e whā tekau, ā, kua tū kē atu ngā pakanga me ngā tautohenga ki ō mātou tuākana.