1 Ko te kupu i kitea ai e Īhāia, te tama a Amoho, e pā ana ki a Hura me Hiruharama:

2 Ā, ka pahawa ake hei ngā rā whakamutunga, ina whakapūmautia te maunga o tō te Ariki whare i te kōtihi o ngā maunga, ā, ka whakateiteitia i runga ake i ngā puke, ā, ka rere ngā iwi katoa ki a ia.

3 Ā, ka haere ngā tāngata tokomaha me te kī, Haere mai koutou, ā, tukua tātou kia haere ake ki te maunga o te Ariki, ki te whare o te Atua o Hākopa; ā, māna tātou e whakaako mō ana tikanga, ā, ka hīkoi tātou i ana ara; nā, atu i a Hīona te ture e puta atu ai, me te kupu a te Ariki mai i Hiruharama.

4 Ā, ka whakawā ia i waenganui i ngā iwi, ā, ka kohete i ngā tāngata tokomaha: ā, ka patupatua e rātou ā rātou hoari hei hea-parau, ā, ko ā rātou tao hei perehūka manga—e kore tētahi iwi e hāpai hoari ki tētahi iwi, e kore rānei rātou e ako tonu ki te pakanga.

5 E te whare o Hākopa, haere mai koutou, ā, tukua tātou kia hīkoi ai i te māramatanga o te Ariki; āe rā, haere mai, nā te mea kua kōtiti katoa atu koutou, tēnā me tēnā i ana ara whakarihariha.

6 Nō reira, E te Ariki, kua whakarērea tō iwi, te whare o Hākopa, nā te mea kua whakakahangia rātou mai i te rāwhiti, me te whakarongo ki ngā tohunga matakite pērā i ngā Pirihitini, ā, e whakakoa ana rātou i a rātou anō ki ngā tamariki a tangata kē.

7 E kī ana anō hoki tō rātou whenua ki te hiriwā me te koura, kāore rānei he mutunga o ā rātou taonga; e kī ana tō rātou whenua i ngā hōiho, kāore hoki he mutunga o ō rātou hāriata.

8 E kī ana tō rātou whenua i ngā whakapakoko; e koropiko ana rātou ki te whakamahinga a ō rātou ake ringaringa, ki tērā i hangaia nei e ō rātou matihao.

9 Ā, kāore te ware e tuohu iho ki raro, ā, kāore te tangata kaha e whakaiti i a ia anō, nō reira, kaua e muru i a ia.

10 E te hunga whakarihariha, kuhuna atu te toka, ā, hunaia koe i te puehu, nā te mea ka patua koe e te wehi o te Ariki me tōna korōria.

11 Ā, ka pahawa ake, nā, ka whakaitia iho ngā tirohanga whakapehapeha a te tangata, ā, ka whakapikoa iho te whakakaketanga a te tangata ki raro, ā, ka whakateiteingia te Ariki anake hei taua rā.

12 Nā, e whakatata wawe mai ana te rā o te Ariki o ngā Mano ki ngā iwi katoa, āe rā, ki runga i ngā mea katoa; āe rā, ki runga i te hunga whakahīhī me te hunga whakapehapeha, ā, ki runga i ngā tāngata katoa kua neke ake, ā, ka whakaitia iho ia ki raro.

13 Āe rā, ka tae mai hoki te rā o te Ariki ki runga i ngā hīta o Repanona, nā te mea kua tiketike rātou, ā, kua neke ake rātou; ā, kei runga i ngā ōki katoa o Pahana;

14 Ā, i runga i ngā maunga tiketike katoa, ā, i runga i ngā puke katoa, i runga hoki i ngā iwi kua neke ake, ā, i runga i ia iwi, ia iwi;

15 Ā, i runga i ia pourewa tiketike, ia pourewa tiketike, ā, i runga i ia taiapa kaha, ia taiapa kaha;

16 Ā, i runga i ngā kaipuke katoa o te moana, ā, i runga i ngā kaipuke katoa o Tarahihi, ā, i runga i ngā whakaahua āhuareka katoa.

17 Ā, ka whakapikoa iho te whakapehapehatanga o te tangata ki raro, ā, ka whakaitia iho te whakakakenga o te tangata; ā, ka whakateiteingia te Ariki anake hei taua rā.

18 Ā, ka whakakorehia katoatia e ia ngā whakapakoko.

19 Ā, ka kuhu atu rātou i ngā kōhao toka, ā, ki roto i ngā ana o te whenua, nā te mea ka tau iho te wehi o te Ariki ki runga i a rātou, ā, ka patua rātou e te nui o tōna korōria, ina ara ake ia ki te whakangāueue kino nei i te whenua.

20 Hei taua rā ka whiu tētahi tangata i ana whakapakoko hiriwā, me ana whakapakoko koura, kua hangaia nei e ia hei koropikotanga mōna, ki ngā kiore, ā, ki ngā pekapeka;

21 Kia kuhu atu ai i ngā kapiti o ngā toka, ā, ki roto i ngā tihi o ngā toka taratara, nā te mea ka tau iho te wehi o te Ariki ki runga i a rātou, ā, ka patua rātou ki te nui o tōna korōria, ina ara ake ia ki te whakangāueue kino nei i te whenua.

22 Kāti tāu i te tangata, kei ōna ponaihu tōna ngā; ka pēhea rā ia te whakaaro mōna?