Upoko 7
Ka pānui tonu a Hākopa i Īhāia: Ka kōrero whakamīhaia a Īhāia—I te Mīhaia te arero o te hunga matatau—Ka tuku Ia i Tōna tuarā ki ngā kaipatu—E kore Ia e whakapōauautia—Whakatauritehia Īhāia 50. Takiwā 559–545 M.K.
1 Āe rā, ko te kupu tēnei a te Ariki: Kua whakarērea rānei koe, kua makaia atu rānei koe mō āke tonu atu? Ko te kupu tēnei a te Ariki: Kei hea te pira o tā tō koutou whaea whakarerenga? Kua whakarērea koutou ki a wai, kua hokona atu rānei koutou ki tēhea kaituku moni āku? Āe rā, kua hokona atu koutou ki a wai? Nana, nā ō koutou hara kua hokona atu koutou i a koutou anō.
2 Nā reira, i taku haerenga mai, kāore he tangata; i taku karangatanga atu, āe rā, kāore i reira tētahi tangata kotahi hei whakautu. E te whare o Iharaira, kua whakapotongia rā tōku ringa, tē taea te hoko mai, kāore rānei ōku kaha ki te whakaora? Nana, i taku kohete e whakamaroke au i te moana, ka meinga ō rātou awa he koraha, ā, ka pirau ā rātou ika nā te whakamaroketanga o ō rātou wai, ā, ka mate rātou nā te hemowai.
3 E whakakākahu nei au i ngā rangi ki te mangumangu, ā, e mahi nei au i te kahu taratara hei uhi mō rātou.
4 Kua homai nei e te Ariki te Atua ki ahau te arero o te hunga matatau, e mōhio ai au me pēhea te kōrero atu i te kupu hei te wā e tika ana ki a koe, E te whare o Iharaira. I a koe e ngenge ana ka oho ia i ia ata, i ia ata. Ka whakaoho ia i tōku taringa kia rongo ai pērā i tā te hunga matatau.
5 Kua whakatūwhera te Ariki te Atua i tōku taringa, ā, kīhai au i tutū, kīhai rānei i tahuri atu.
6 I tuku atu au i tōku tuarā ki te kaipatu, me ōku pāpāringa ki te hunga e hutihuti atu i ngā makawe. Kīhai au i huna i tōku kanohi i te whakamā me te tuhanga.
7 Nā te mea mā te Ariki te Atua au e āwhina, nō reira kua kore pea au e whakapōauautia. Nō reira kua waiho nei e au tōku kanohi hei kiripaka, ā, e mōhio ana au kua kore au e whakamā.
8 Ā, e tata ana te Ariki, ā, e whakatikatika ana ia i ahau. Ko wai e tohe mai ki ahau? Tukuna kia tū tahi ai tātou. Ko wai tōku hoariri? Tukuna kia haere tata mai ia ki ahau, ā, māku ia e patu ki te kaha o tōku māngai.
9 Nā te mea mā te Ariki te Atua au e āwhina. Ā, ko te hunga katoa e whakahē ai i ahau, nana, ka tawhitohia katoatia rātou ānō he kākahu, ā, ka kai te pūrehurehu i a rātou.
10 Ko wai i waenga i a koutou e wehi nei i te Ariki, nā, e whakarongo ana ki te reo o tana pononga, e hīkoi ana i te pōuritanga, ā, kāore ōna māramatanga?
11 Nana koutou e tahu ana i te ahi, e karapoti ana i a koutou ki ngā korakora, hīkoia i te māramatanga o tō ahi, i ngā korakora hoki i whakangihaia nei e koutou. Koinei tā tōku ringa mō koutou—ka takoto iho koutou i te pōuri.