1 Waihoki, i kī mai te kupu a te Ariki ki ahau: Tīkina atu e koe tētahi rōra nui, ā, tuhia i roto ki tētahi pene tangata, e pā ana ki a Mahere-harara-ha-paha.

2 Kātahi au ka tiki i ngā kaiwhakaatu pono kia tuhia ai, ko Ūria te tohunga, me Hakaraia te tama a Teperekia.

3 Kātahi au ka haere ki te poropiti wahine; ā, ka hapū ia, ā, ka whānau tama ia. Kātahi te Ariki ka kī mai ki ahau: Karangahia tōna ingoa, ko Mahere-harara-ha-paha.

4 Nana rā, kāore he mōhioranga tō te tamaiti ki te karanga, E tōku matua, e tōku whaea, i mua i te tangohanga atu i ngā rawa o Ramahiku me ngā parakete o Hamāria i te kīngi o Ahiria.

5 I kī anō mai te Ariki ki ahau, e mea ana:

6 Nō te mea e pēnei ana ki tēnei iwi e whakakore ana i ngā wai o Hiroa e āta rere ana, ā, e koa i a Rētini me tā Remāria tama;

7 Nō reira ināianei, nana, ka takina mai nei e te Ariki i runga i ngā wai o te awa, he kaha, ā, he maha, ko te kīngi o Ahiria pū anō me ōna korōria katoa; ā, ka puhake ake ki runga i ōna whakatakere, ā, ka rere iho ki tua i ōna tahatika katoa.

8 Ā, ka haere mā roto i a Hura; ka puhake ia, ā, ka rere iho ki tua, ka toro atu pū anō ia ki te kakī; ā, ka kī te whānuitanga o tō whenua i te toronga atu o ōna parirau, E Emanuera.

9 Huihui koutou, E koutou ngā iwi, ā, ka pakaru iho koutou hei kongakonga; ā, kia whai taringa koutou katoa nō ngā whenua tawhiti; whītikiria koutou, ā, ka pakaru iho koutou hei kongakonga; whītikiria koutou, ā, ka pakaru iho koutou hei kongakonga.

10 Whakatakotoria he whakaaro, ā, ka kore he aha e pahawa; kōrerotia te kupu, ā, kua kore ia e tū; nā te mea i a tātou te Atua.

11 Nā te mea i kōrero pēnei mai te Ariki ki ahau i runga i te ringa kaha, ā, i tohua mai ahau kia kaua au e hīkoi i te āhuatanga o tēnei iwi, e mea ana:

12 Kaua koe e kī, He haumitanga, ki te hunga katoa e kīa nei e tēnei iwi, He haumitanga; kaua rānei koe e wehi i tō rātou wehi, kaua rānei e mataku.

13 Whakatapua te Ariki o ngā Mano ko ia ake, ā, tukuna ia hei tā koutou e wehi ai, ā, tukuna ia hei tā koutou e pāwera ai.

14 Kātahi ka ai ia hei āhurutanga; engari hei toka tatutatu, ā, hei kōhatu kōkiri ki ngā whare e rua o Iharaira, hei rore, ā, hei māhanga ki ngā kainoho o Hiruharama.

15 Ā, he tokomaha i waenganui i a rātou ka tatutatu, ā, ka hinga, ā, ka pakaru, ā, ka māhangatia, ā, ka whakamaua.

16 Takaia ake te whakaaturanga, hīria te ture i waenganui i aku ākonga.

17 Ā, ka tatari au ki te Ariki, e huna nei i tōna mata i te whare o Hākopa, ā, ka kimi au mōna.

18 Nana, ko mātou ko ngā tamariki i homai nei e te Ariki ki ahau hei tohu, ā, hei mea whakamīharo i Iharaira nō te Ariki o ngā Mano, e noho nei i Maunga Hīona.

19 Ā, ina kī mai rātou ki a koe: Whāia te hunga he wairua taunga ō rātou, ā, ki ngā tohunga e kōwhetewhete ana, ā, e ngurunguru ana—me kore rānei te iwi e whai atu ai i te Atua mō te hunga ora kia rongo ai i te hunga mate?

20 Ki te ture me te whakaaturanga; ā, ki te kore rātou e kōrero e ai ki tana kupu, he mea nā te mārama kore i roto i a rātou.

21 Ā, ka haere mā roto i a ia e tino ruha ana, ā, e hiakai ana; ā, ka pahawa ake, nā, ina hiakai rātou, ka whakawhererei rātou anō, ā, ka kangaia tō rātou kīngi me tō rātou Atua, ā, ka titiro whakarunga.

22 Ā, ka titiro atu rātou ki te ao, ā, ka kitea te whakapāweratanga, me te pōuritanga, te makarotanga o te auhi, ā, ka aia atu ki te pōuritanga.