1 Ā, nana ianei, e aku teina aroha, e hiahia ana ahau ki te kōrero ki a koutou; nā tōku, tō Nīwhai, hiahia kia kore ai koutou e whakapono ka nui ake tō koutou tika i tō ngā Tauiwi. Nana rā, ki te kore koutou e pupuri i ngā whakahaunga a te Atua ka rite tahi tā koutou matenga; ā, me kore koutou e whakapono nā ngā kupu kua kōrerotia nei, nā, ka whakangaromia katoatia ngā Tauiwi.

2 Nana rā, ko tāku ki a koutou, nā, ko ngā Tauiwi katoa e rīpenetā ana, he iwi kawenata rātou nō te Ariki; ā, ko ngā Hūrai katoa e kore nei e rīpenetā, ka makaia atu; nā te mea kāore te Ariki e kawenata ki tētahi hāunga ia te hunga e rīpenetā ai me te whakapono i tana Tama, ko ia te Mea Tapu o Iharaira.

3 Ā ināianei, ka āhua poropiti atu anō au e pā ana ki ngā Hūrai me ngā Tauiwi. Nā, nō muri i te whakaputanga o te pukapuka kua kōrerotia nei e au, ā, ka tuhia ki ngā Tauiwi, ā, ka hīria ake anō ki te Ariki, he tokomaha ngā mea e whakapono ai ki ngā kupu kua tuhia nei; ā, mā rātou ēnā e kawe atu ki ngā mōrehu o ō tātou uri.

4 Kātahi ngā mōrehu o ō tātou uri e mōhio e pā ana ki a tātou, i pēhea tā tātou putanga mai i Hiruharama, ā, he uri rātou nō ngā Hūrai.

5 Ā, ka whakapuakina te rongopai a Ihu Karaiti ki waenganui i a rātou; nā reira, ka whakamōhiotia anōtia rātou ki te mātauranga ki ō rātou mātua tīpuna, ā, ki te mātauranga anō o Ihu Karaiti, i mau ai i ō rātou mātua tīpuna.

6 Kātahi rātou ka hari; nā te mea ka mōhio rātou he manaakitanga ia nā te ringa o te Atua; ā, ka marere iho ngā unahi pōuriuri i ō rātou karu; ā, kāore he maha ngā whakatupuranga e pahure ai i a rātou, engari ka meinga rātou hei iwi urutapu, hei iwi āhuareka anō.

7 Ā, ka pahawa ake, nā, ka tīmata ngā Hūrai kua whakamararatia atu nei ki te whakapono i te Karaiti; ā, ka tīmata tā rātou huihui ki runga i te mata o te whenua; ā, ko te hunga katoa e whakapono ai i te Karaiti ka meinga he āhuareka anō hoki.

8 Ā, ka pahawa ake, nā, ka tīmata te Ariki te Atua i ana mahi ki waenganui i ngā iwi katoa, i ngā hapū, i ngā reo, me ngā huihuinga tāngata, kia whakatakotoria ai he putanga mō te whakahokinga o tana iwi i runga i te whenua.

9 Ā, mā runga i te tika te Ariki te Atua e whakawā ai i te hunga rawakore, me te tātā i runga i te mana taurite hei painga mō te hunga māhaki o te whenua. Ā, māna te ao e patu ki te tokotoko o tōna māngai; ā, mā te hā o ōna ngutu ia e whakamate i te hunga whakarihariha.

10 Nā, e hohoro mai ana te wā e meatia ai e te Ariki te Atua he wehenga nui i waenganui i te iwi, ā, ko te hunga whakarihariha māna e whakangaro; ā, māna tana iwi e tohu, āe rā, ahakoa mēnā rā ia e tika ana me whakangaro te hunga whakarihariha e ia ki te ahi.

11 Ā, ko te tika hei whītiki mō ōna hope, ko te whakapono hei whītiki mō ōna whatumanawa.

12 Kātahi ka noho tahi te wūruhi rāua ko te reme; ā, ka takoto tahi te reparo rāua ko te kūao koti, me te kūao kau, me te kūao raiona, me te mea mōmona, hei kāhui kotahi; ā, mā tētahi tamaiti nohinohi rātou e ārahi.

13 Ā, ka kai tahi te kau me te pea; ka takoto tahi iho ā rāua kūao; ā, ka kai kakau wīti te raiona e rite ana ki te ōkiha.

14 Ā, ka tākaro te tamaiti ngote ū i runga i te rua o te nākahi iti, ā, ka pā atu te ringa o te tamaiti kua whakamutua te kai ū i runga i te nohonga o te neke paitini.

15 Kua kore rātou e whakamamae, e whakangaro rānei i tōku maunga tapu katoa; nā, ka kikī te ao i te mātauranga o te Ariki e pērā ana ki te wai e uhia ana te moana.

16 Nā reira, ka whakamōhiotia ngā mea o ngā iwi katoa; āe rā, ka whakamōhiotia ngā mea katoa ki ngā tamariki a te tangata.

17 Kāore he mea muna engari ia ka huraina atu; kāore he mahinga pōuriuri engari ia ka whakakitea i roto i te māramatanga; ā, kāore he mea hīria ake i runga i te whenua engari ia ka wetekina atu.

18 Nā reira, ko ngā mea katoa kua huraina nei ki ngā tamariki a te tangata e huraina ake ai hei taua rā; ā, kāore tonu ō Hātana kaha i runga i ngā ngākau o ngā tamariki a te tangata, mō tētahi wā roa. Ā ināianei, e aku teina aroha, ka whakamutu au i aku kōrero.