Upoko 16
Ka kite a Īhāia i te Ariki—Ka murua ngā hara o Īhāia—Ka karangatia ia ki te poropiti—Ka poropiti ia mō te whakaparahakotanga a ngā Hurai i ngā whakaakoranga a te Karaiti—Ka hoki atu tētahi hunga mōrehu—Whakatauritehia Īhāia 6. Takiwā 559–545 M.K.
1 I te tau i mate ai a kīngi Ūtia, i kite au i te Ariki e noho ana i runga i tōna torona, he tiketike, ā, he mea hāpai ake ki runga, ā, i kī ai te temepara i tōna tapanga kahu.
2 I tū ai te herapima i runga; e ono ngā parirau tō tētahi, tō tētahi; i hīpokina e ia tōna mata ki ngā mea e rua, ā, i hīpokina e ia ōna waewae ki ngā mea e rua, ā, i rere ai ia ki ngā mea e rua.
3 Ā, i tangi tētahi ki tētahi atu, ā ka kī: He tapu, he tapu, he tapu, te Ariki o ngā Mano; kua kī te ao katoa i tōna korōria.
4 Ā, i hūnuku ngā pou o te kūaha i tō te reo nāna i karanga, ā, ka kī te whare i te pawa.
5 Kātahi au ka kī: Auē te mate mōku! nā te mea kua ngaro au; nā te mea he tangata ngutu poke au; ā, e noho ana au i waenganui i tētahi iwi ngutu poke; nā, kua kite ōku karu i te Kīngi, te Ariki o ngā Mano.
6 Kātahi ka rere mai tētahi o te herapima ki ahau, e pupuri ana i tētahi waro mura i tōna ringa, kua tangohia e ia ki ngā kokopi mai i te āta;
7 Ā, i whakatakotohia e ia i runga i tōku māngai, ā ka kī: anana, kua pā tēnei i ōku ngutu; ā, kua murua atu ō hē, ā, kua whakamākia ō hara.
8 I rongo anō hoki au i te reo o te Ariki, e mea ana: Ko wai tāku e tono ai, ā, ko wai e haere ai mō tātou? Kātahi au ka kī: Kei konei au; ngarea au.
9 Ā ka kī mai ia: Haere me te kī atu ki tēnei iwi—e rongo mārika koutou, engari kāore rātou i mārama; ā, e kite mārika koutou, engari kāore rātou i aro.
10 Whakamōmonahia te ngākau o te iwi, ā, whakataumahahia ō rātou taringa, ā, katia ō rātou karu—kei kite rātou ki ō rātou karu, me te rongo ki ō rātou taringa, me te mārama ki tō rātou ngākau, ā, ka tahuritia, ā, ka whakaorangia.
11 Kātahi au ka kī: E te Ariki, kia pēhea te roa? Ā, ka kī ia: Kia ururuatia rā anō ngā pā kua kore he kainoho, ā, kia kore rā anō he tangata mā roto i ngā whare, ā, ka tino mōwai rawa te whenua.
12 Ā, kia whakamatarahia ngā tāngata e te Ariki, nā, ka ai he whakarērenga nui i waenganui i te whenua.
13 Engari ka ai he whakatekau, ā, ka hoki atu rātou, ā, ka kaingia rātou, ānō nei he rākau teira, ā, ānō nei he oka ko tōna matū kei roto nei i a rātou inā māturu atu ō rātou rau; kia tū ai te kākano tapu hei matū mō reira.