1 Ā ināianei, nana, e aku teina aroha, e whakapono ana au kei te āhua whakaaroaro koutou i roto i ō koutou ngākau e pā ana ki tērā e mahi ai ina kuhu atu koutou i runga i te huarahi. Engari, nana, he aha koutou e whakaaroaro ai i ēnei mea i roto i ō koutou ngākau?

2 Kāore rānei koutou e mahara ana ki tāku ki a koutou, nā, hei muri iho i tā koutou whiwhi i te Wairua Tapu ka taea e koutou te kōrero ki te arero anahera? Ā ināianei, me pēhea e taea ai e koutou te kōrero ki te arero anahera hāunga ia mā te Wairua Tapu?

3 E kōrero ana ngā anahera mā te mana o te Wairua Tapu; nā reira, e kōrero ana rātou i ngā kupu a te Karaiti. Nā reira, i kī ake au ki a koutou, e hākari koutou i ngā kupu a te Karaiti; nana rā, ka whakamōhio atu ngā kupu a te Karaiti ki a koutou he aha ngā mahi me mahi e koutou.

4 Nā reira, anā, hei muri i taku kōrerotanga atu i ēnei kupu, mehemea kāore e taea ana ēnā te mārama e koutou, ka pēnāhia nā te mea kāore koutou e pātai ai, kāore rānei e pātōtō atu; nā reira, kāore koutou e kumea mai ki roto i te māramatanga, engari me mate i roto i te pōuritanga.

5 Nana rā, ka kī atu anō au ki a koutou mēnā ka kuhu atu koutou mā te huarahi, me te whiwhi i te Wairua Tapu, māna e whakaatu ki a koutou ngā mea katoa e mahi ai koutou.

6 Nana, koinei te whakaakoranga a te Karaiti, ā, kāore he whakaakoranga anō e tukuna ai kia mutu ai tana whakakitenga i a ia anō i roto i te kikokiko. Ā, ina whakakite i a ia anō ki a koutou i roto i te kikokiko, ko ngā mea e kī ake ai ia ki a koutou ka mahia rawatia e koutou.

7 Ā ināianei au, a Nīwhai, tē taea he kōrero i tua atu; kua kati te Wairua Tapu i taku puakitanga, ā, kua waiho nei au kia tangi ai nā te whakapono kore, me te whakarihariha, me te kūaretanga, me te kakī mārōtanga o te tangata; nā te mea e kore rātou e rapu mātauranga, e mārama rānei i ngā mātauranga nui, ina tukuna atu ki a rātou i runga i te mārama, ko te mārama pū anō e taea ana e te kupu.

8 Ā ināianei, e aku teina aroha, kei te kite au e whakaaroaro tonutia ana e koutou i roto i ō koutou ngākau; ā, e pōuri ana au i te mea me kōrero atu anō au e pā ana ki tēnei mea. Nā te mea mēnā ka whakarongo koutou ki te Wairua e whakaakona ana te tangata ki te inoi, kua mōhio koutou me inoi koutou; nā te mea kāore te wairua kino e whakaako ana i te tangata ki te inoi, engari e whakaakona ana ia me kaua e inoi.

9 Engari nana, ko tāku atu ki a koutou me inoi i ngā wā katoa, ā, kaua e ngoikore; nā, kia kaua koe e mahi i tētahi mahi ki te Ariki hāunga tuatahi ia ka inoi ki te Matua i runga i te ingoa o te Karaiti, kia whakatapua e ia tāu meatanga mōu, nā, hei painga tō meatanga mō tō wairua.