1 Ināianei au, a Nīwhai, e āhua kōrero nei e pā ana ki ngā kupu kua tuhi nei au, kua kōrerotia e te māngai o Īhāia. Nana rā, i kōrero a Īhāia i ngā mea maha i uaua mō te tokomaha o tōku iwi ki te mārama; nā te mea kāore rātou e mōhio ana e pā ana ki te āhua o te poropititanga i waenganui i ngā Hūrai.

2 Nā te mea kāore ahau, a Nīwhai i whakaako i a rātau e pā ana ki te āhua o ngā Hūrai; nā te mea ko ā rātou mahinga he mahinga pōuri, ā, ko ā rātau meatanga he meatanga mōrikarika.

3 Nā reira, e tuhi nei au ki tōku iwi, ki te hunga katoa e whiwhi ai i ēnei mea e tuhi nei au a tōna wā, kia mōhio ai rātou ki ngā whakawākanga a te Atua, nā, ka tau iho ki runga i ngā iwi katoa, e ai ki te kupu kua kōrerotia nei.

4 Nā reira, whakarongo, E tōku iwi, koinei nō te whare o Iharaira, ā, kia anga mai ō koutou taringa ki aku kupu; nā te mea kāore e mārama ana ngā kupu a Īhāia ki a koutou, hei aha koa e mārama ana ēnā ki te hunga katoa e kī ana i te wairua poropititanga. Engari kei te tuku atu ahau i tētahi poropititanga ki a koutou, e ai ki te wairua kei roto nei i ahau; nā reira māku e poropiti e ai ki te māramatanga i ahau nei mai i te wā i puta mai au i Hiruharama me taku matua; nana rā, e kaingākau ana tōku wairua i te māramatanga ki tōku iwi, kia ako ai rātou.

5 Āe rā, e kaingākau ana anō tōku wairua i ngā kupu a Īhāia, nā te mea i puta mai au i Hiruharama, ā, kua kitea e aku karu ngā mea o ngā Hūrai, ā, e mōhio ana au kei te mārama pū ngā Hūrai ki ngā mea a ngā poropiti, ā, korekau he iwi anō e mārama ana ki ngā mea i kōrerotia ki ngā Hūrai pērā ki a rātou, hāunga ia kua whakaakona rātou i runga i te āhuatanga o ngā mea Hūrai.

6 Engari nana, ko au, ko Nīwhai, kua whakaako i aku tamariki i runga i te āhuatanga o ngā Hūrai; engari nana, ko au, i au anō, kua noho i Hiruharama, nā reira e mōhio ana au e pā ana ki ngā rohe huri noa; ā, kua kī atu au ki aku tamariki e pā ana ki ngā whakawākanga o te Atua, kua pahawa ake nei i waenganui i ngā Hūrai, ki aku tamariki, e ai ki ērā kua kōrero nei a Īhāia, ā, kāore au i te tuhituhi i ērā mea.

7 Engari nana, ka kōkiri ake au i tāku ake poropititanga, e ai ki tōku māramatanga; nō konā rā e mōhio ana au kāore e taea e tētahi tangata te pōhēhē; hei aha koa, hei ngā rā e whakatutuki ai i ngā poropititanga a Īhāia ka mōhio pū ngā tāngata, hei ngā wā e pahawa ake ai ēnei mea.

8 Nā reira, he mea utu nui ēnei ki ngā tamariki a te tangata, ā, ko te tangata e mea ana kua kore he aha ēnei mea, ka hāngai pū atu taku kōrero ki a rātou, ka whakawhāiti haere au i ngā kupu ki tōku ake iwi; nā te mea kei te mōhio ahau ka tino utu nui ēnei ki a rātou hei ngā rā whakamutunga; nā te mea ka mārama rātou ki ēnei hei taua rā; nā reira, mō tō rātou painga au i tuhituhi ai i ēnei.

9 Ā, nā te mea kua whakangaromia tētahi whakatipuranga i waenganui i ngā Hūrai, ahakoa tonu kua whakangaromia mai i tētahi whakatipuranga ki tētahi whakatipuranga e ai ki ō rātou hara; ā, kīhai rawa i whakangaromia tētahi hāunga i poropititia rātou e ngā poropiti a te Ariki.

10 Nā reira, kua kōrerotia rātou e pā ana ki te whakangaromanga ka tau iho ki runga i a rātou, whai muri tata pū i te wehenga atu a tōku matua; hei aha koa, i whakapakekehia ō rātou ngākau; ā, kua whakangaromia rātou e ai ki taku poropititanga, hāunga te hunga kua kahakina hereheretia atu ki Papurona.

11 Ā, e kōrero nei ianei au i tēnei nā te wairua kei roto nei i ahau. Ā, ahakoa kua kahakina atu rātou ka hoki mai anō rātou, ā, ka nohoia te whenua o Hiruharama; nā reira, ka whakahokia anōtia rātou ki tō rātou whenua tuku iho.

12 Engari, nana, ka ai ngā pakanga, me ngā pūrongo pakanga; ā, ina tata mai te rā e whakaatu atu ai te Tama Kotahi a te Matua, āe rā, ko te Matua pū anō o te rangi me te whenua i a ia anō i roto i te kikokiko, nana, ka whakaparahako rātou i a ia, nā ō rātou hara, me te pakeketanga o ō rātou ngākau, me te mārō o ō rātou kakī.

13 Nana, ka rīpekatia ia e rātou; ā, whai muri iho i tana whakatakotoranga iho ki roto i tētahi ana tūpāpaku mō te takiwā o ngā rā e toru ka ara ake ia mai i te mate, he whakaoranga i ōna parirau; ā, ka whakaorangia te hunga katoa e whakapono ai ki a ia i roto i te kīngitanga o te Atua. Nā reira, e kaingākau ana tōku wairua ki te poropiti atu e pā ana ki a ia, nā te mea kua kite au i tēnei rā, ā, kei te whakanui tōku ngākau i tōna ingoa tapu.

14 Ā nana, ka pahawa ake, nā, hei muri i te aranga ake o te Mīhaia mai i te mate, me te whakaatu atu i a ia anō ki tōna iwi, ki te hunga katoa e whakapono ana ki tōna ingoa, nana, ka whakangaromia anōtia a Hiruharama; nā te mea, auē mō te hunga e whawhai nei ki te Atua me ngā iwi o tōna hāhi.

15 Nā reira, ka whakamararatia atu ngā Hūrai ki waenganui i ngā iwi katoa; āe rā, ka whakangaromia anō hoki a Papurona; nā reira, ka whakamararatia atu ngā Hūrai e ngā iwi kē atu.

16 Ā, whai muri i tā rātou whakamararatanga, me tā te Ariki te Atua whakawhiunga i a rātou mā ngā iwi kē atu mō te takiwā o ngā whakatipuranga maha, āe rā, mai i tētahi whakatipuranga ki tētahi whakatipuranga tae atu ana ki tā rātou whakapakepaketanga kia whakapono ai ki te Karaiti, te Tama a te Atua, me te whakamārietanga, koia he mea mutunga kore mō ngā tāngata katoa—ā, ina tae mai taua rā e whakapono ai rātou i te Karaiti, me te koropikotia te Matua i tōna ingoa, i runga anō i te ngākau mā me ngā ringaringa mā, me te aro kore atu rātou ki mua mō tētahi Mīhaia kē atu, hei reira, hei taua wā, ka tae mai te rā me tika pū ia kia whakapono ai rātou i ēnei mea.

17 Ā, ka whakatau iho te Ariki i tōna ringa mō te wā tuarua kia whakahokia ai tōna iwi mai i tō rātou āhuatanga ngaro, ā, i tō rātou āhuatanga taka. Nā reira, ka haere tonu ia ki te mahi i ngā mahi nui whakamīharo ki waenganui i ngā tamariki a te tangata.

18 Nā reira, māna āna kupu e kawe atu ai ki a rātou, koinei kupu e whakawākia ai rātou hei te rā whakamutunga, nā te mea ka tukuna ērā ki a rātou mō te take o te whakapakepake i a rātou ki te Mīhaia pono, i whakaparahakotia e rātou; hei whakapakepake anō i a rātou me kore tonu rātou e titiro ki mua kia haere mai ai tētahi Mīhaia, nā te mea me kore tētahi e haere mai, hāunga tētahi Mīhaia teka hei tinihanga i te iwi; nā te mea kotahi anake te Mīhaia kua kōrerotia e ngā poropiti, ā, ko taua Mīhaia te mea ka whakaparahakotia e ngā Hūrai.

19 Nā, e ai ki ngā kupu a ngā poropiti, ka haere mai te Mīhaia i ngā tau e ono rau mai i te wā i wehe atu taku matua i Hiruharama; ā, e ai ki ngā kupu a ngā poropiti, me ngā kupu anō hoki a te anahera a te Atua, ko Ihu Karaiti tōna ingoa, te Tama a te Atua.

20 Ā ināianei, e aku teina, kua mārama tāku kia kaua ai koutou e pōhēhē. Ā, e ora ana te Ariki te Atua nāna a Iharaira i kawe ake i waho i te whenua o Īhipa, ā, i hoatu ki a Mohi te mana kia rongoātia ai ngā iwi whai muri iho i tā ngā nākahi paitini ngaunga i a rātou, ki te titiro atu ō rātou karu ki te nākahi nāna i hāpai ake ki mua i a rātou, i hoatu mana hoki ki a ia kia patua ai te toka e puta mai ai te wai; āe rā, nana tāku e kī atu nei ki a koutou, nā, e pērā ana ki te pono o ēnei mea, ā, e ora ana te Ariki te Atua, kāore he ingoa kē atu kua tukuna i raro i te rangi hāunga ia ko tēnei Ihu Karaiti, koia nei tāku i kōrero ai, mā reira whakaorangia ai te tangata.

21 Nā reira, mō tēnei take i whakaaria mai ai e te Ariki te Atua ki ahau, nā, ka puritia, ā, ka tiakina ēnei mea e tuhituhi atu nei ahau, ā, ka tukuna iho ki ōku uri, mai i tētahi whakatipuranga ki tētahi whakatipuranga, kia ea ai te kupu whakaari ki a Hōhepa, kia kore ai ōna uri e hemo atu mō ngā wā katoa e toitū ana te whenua.

22 Nā reira, ka tukuna atu ēnei mea mai i tētahi whakatipuranga ki tētahi whakatipuranga mō ngā wā katoa e toitū ana te whenua; ā, ka tukuna ēnā e ai ki te hiahia me te kōingo o te Atua; ā, ka whakawākia ngā iwi e mau ai ēnā e ēnā mea e ai ki ngā kupu kua tuhituhia nei.

23 Nā, e kaha ana tā mātou ngana ki te tuhi, kia whakapakepake i ā mātou tamariki, me ō mātou huānga, kia whakapono ai i te Karaiti, ā, kia houhia ai te rongo ki te Atua; nā, e mōhio ana mātou mā te aroha noa tātou e whakaora ai, nō muri rawa mai i ā tātou e taea ai te mahi.

24 Ā, ahakoa e whakapono ana mātou i te Karaiti, e puritia ana e mātou te ture a Mohi, ā, e ū ana tā mātou titiro whakamua ki te Karaiti, tae atu ana ki te whakatutukitanga i te ture.

25 Nā te mea, mō konei rā te ture i homai ai; nā reira kua meinga te ture kia mate ki a mātou, ā, kua meinga mātou kia ora i te Karaiti nā tō mātou whakapono; heoi, e puritia ana e mātou te ture nā ngā whakahaunga.

26 Ā, e kōrerorero mātou mō te Karaiti, e hari ana mātou i te Karaiti, e kauhau ana mātou mō te Karaiti, e poropiti mātou mō te Karaiti, ā, e tuhituhi ana mātou e ai ki ā mātou poropititanga, kia mōhio ai ā mātou tamariki ki tēhea puna e kimi ai hei murunga i ō rātou hara.

27 Nā reira, e kōrero ana mātou e pā ana ki te ture kia mōhio ai ā mātou tamariki ki te matenga o te ture; mā konei rātou, e mōhio ana ki te matenga o te ture, ka taea te titiro whakamua ki te oranga kei roto nei i te Karaiti, ā, ka mōhio he aha te take i tukuna mai ai te ture. Ā, nō muri mai i te whakatutukitanga i te Karaiti, nā, me kore rawa rātou e whakapakeke i ō rātou ngākau ki a ia i te mea e tika ana kia whakakorehia atu te ture.

28 Ā, nana ināianei, e tōku iwi, he iwi kakī mārō koutou; nā reira, kua mārama tāku ki a koutou, kia kore ai koutou e pōhēhē. Ā, ka tū ngā kupu kua kōrerotia nei e ahau hei whakaaturanga ki a koutou; nā te mea kua rānei ēnei hei whakaako i te tangata i te huarahi tika; nā te mea ko te huarahi tika, ko te whakapono i te Karaiti me te whakaparahako kore i a ia; nā te mea mā te whakaparahako i a ia, ka whakaparahako anō koutou i ngā poropiti me te ture.

29 Ā, nana ianei, ko tāku ki a koutou ko te huarahi tika, ko te whakapono i te Karaiti, me te whakaparahako kore i a ia; ā, ko te Karaiti te Mea Tapu o Iharaira; nā reira me tuohu iho koutou i tōna aroaro, me te koropiko i a ia i runga katoa i ō ngoi, ō whakaaro, me ō kaha, me ō wairua katoa; ā, ki te pēnei koutou kua kore rawa koutou e peia atu.

30 Ā, inā hoki me tika pū ia, me pupuri e koutou ngā meatanga me ngā karakia tapu o te Atua tae atu ana ki te wā e tūtuki ai i te ture kua hoatu nei ki a Mohi.