1 Engari nana, ka tokomaha rawa—hei taua rā ina haere tonu taku mahi i ngā mahi nui whakamīharo i waenganui i a rātou, kia mahara ai au i aku whakahaunga kua meatia nei e au ki ngā tamariki a te tangata, kia tau anō ai taku ringa kia whakahokia tuaruatia ai tōku iwi; ko rātou nei nō te whare o Iharaira;

2 Waihoki, kia mahara au i ngā whakaari kua whakaaria nei e au ki a koe, e Nīwhai, ā, ki tō matua anō hoki, kia mahara au i ō uri; ā, kia puta atu ngā kupu a ō uri i tōku māngai ki ō uri; ā, ka whakahihī atu aku kupu ki ngā tōpito o te ao, hei kara ki taku iwi, ko rātou nei nō te whare o Iharaira;

3 Ā, nā te mea ka whakahihī atu aku kupu—ka kī ake ngā Tauiwi tokomaha: He Paipera! He Paipera! Kei a mātou he Paipera, ā, kāore e taea he Paipera atu anō.

4 Engari, ko te kupu tēnei a te Ariki te Atua: E te hunga kūare; ka whai Paipera rātou; ā, ka puta atu i ngā Hūrai, ko tōku iwi kawenata onamata. Ā, ka pēhea tā rātou whakawhetai i ngā Hūrai mō te Paipera kua whiwhi nei i a rātou? Āe rā, he aha tā ngā Tauiwi tikanga? E mahara ana rātou i ngā ngaukinotanga, me ngā mahinga, me ngā mamaetanga o ngā Hūrai, me tō rātou ū pono ki ahau, i te whakaputanga mai i te whakaoranga ki ngā Tauiwi?

5 E koutou ngā Tauiwi, kua mahara koutou i ngā Hūrai, ko taku iwi kawenata onamata? Kāo; engari nāu rātou i kanga, nāu anō rātou i mauāhara, ā, kāore i whai kia whakahokia mai ai rātou. Engari nana, māku katoa ēnei e whakahoki atu ki runga i ō koutou ake upoko; nā te mea kāore ahau te Ariki kia wareware noa i taku iwi.

6 E te kūare, ka kī ake: He Paipera, kei a mātou tētahi Paipera, ā, kāore ō mātou hiahia anō ki tētahi Paipera. Kua whiwhi Paipera koutou hāunga e ngā Hūrai?

7 Kāore koutou e mōhio ana he nui kē atu ngā iwi i te mea kotahi? Kāore koutou e mōhio ana nāku, te Ariki tō Atua, i hangaia ai ngā tāngata katoa, ā, e mahara ana anō au i te hunga kei ngā moutere o te moana; ā, e kīngi ana au i ngā rangi o runga me te whenua o raro; ā, e kawea mai ana e au taku kupu ki ngā tamariki a te tangata, āe rā, ki runga i ngā iwi pū anō o te ao?

8 He aha koutou e amuamu ai, nā te mea ka nui ake tā koutou whiwhi i taku kupu? Kāore koutou e mōhio ana he kaiwhakaatu te whakaaturanga o ngā iwi e rua ki a koutou ko au te Atua, nā, e mahara ana au i tētahi iwi pērā i tētahi atu? Nā reira, e rite ana ngā kupu e kōrero nei au ki tētahi iwi ki ngā kupu e kōrero nei au ki tētahi atu. Ā, ina haere ngātahi ngā iwi e rua ka haere ngātahi ngā whakaaturanga o ngā iwi e rua anō hoki.

9 Ā, e pēnei ana ahau kia whakaatu atu ki te tokomaha ko au tonu ahau inānahi, ināianei, ā, āke tonu atu; ā, e kōrero ana ahau i ngā kupu e ai ki tāku e āhuareka ai. Ā, nā te mea kua kōrero nei ahau i te kupu kotahi me kaua koutou e whakapono kāore e taea e au te kōrero i tētahi atu; nā, kāore anō kia oti taku mahi; e kore rānei e pēnā kia tae rā anō ki te mutunga o te tangata, e kore rānei i taua wā āke tonu atu.

10 Nā reira, nā te mea kei a koutou tētahi Paipera me kore koutou e whakapono e mau nei i a ia aku kupu katoa; me kore rānei koutou e whakapono kīhai i meatia e au kia tuhia ake ai he kupu anō.

11 Nā, e whakahau ana au i ngā tāngata katoa, i te rāwhiti ngātahi me te uru, i te raki anō, i te tonga anō, ā, i ngā moutere o te moana, kia tuhia ai ngā kupu e whakahaua ai e ahau ki a rātou; nā, ka whakawā au i te ao mai i ngā pukapuka e tuhia ai, ko ia tangata, ia tangata e ai ki āna mahinga, e ai ki ērā kua tuhituhia nei.

12 Nana rā, māku e kōrero ki ngā Hūrai, ā, ka tuhia ia e rātou; ā, ka kōrero anō ahau ki ngā Nīwhai, ā, ka tuhia ia e rātou; ā, ka kōrero anō au ki ērā atu iwi nō te whare o Iharaira, kua ārahina atu nei e au, ā, ka tuhia ia e rātou; ā, ka kōrero atu au ki ngā iwi katoa o te ao, ā, ka tuhia ia e rātou.

13 Ā, ka pahawa ake, nā, ka mau i ngā Hūrai ngā kupu a ngā Nīwhai, ā, ka mau i ngā Nīwhai ngā kupu a ngā Hūrai; ā, ka mau i ngā Nīwhai me ngā Hūrai ngā kupu a ngā iwi ngaro o Iharaira; ā, ka mau i ngā iwi ngaro o Iharaira ngā kupu a ngā Nīwhai me ngā Hūrai.

14 Ā, ka pahawa ake, nā, ko taku iwi, ko rātou nei nō te whare o Iharaira, ka huihuia ki tō rātou kāinga ki ngā whenua o ō rātou tuku ihotanga; ā, ka huihuia anōtia taku kupu kia kotahi ai. Ā, māku e whakaatu atu ki te hunga e whawhai ana ki taku kupu, ki taku iwi anō hoki, ko rātou nei nō te whare o Iharaira, ko te Atua ahau, ā, nāku i kawenata ki a Aperahama ka mahara au i ōna uri āke tonu atu.