1 Ko ngā kupu a Hākopa, te teina o Nīwhai, koirā i kōrerotia e ia ki te iwi o Nīwhai:

2 Nana, e aku teina aroha, ko ahau, ko Hākopa, kua karangatia nei e te Atua, ā, kua whakaritea nei ki te ritenga o tōna ritenga tapu, ā, kua whakatapua e tōku tuakana, e Nīwhai, e titiro nei koutou ki a ia hei kīngi, hei kaitiaki rānei, ā, e whakawhirinaki ana koutou ki a ia hei oranga mō koutou, nana, e mōhio ana koutou he tino maha ngā mea kua kōrerotia e ahau ki a koutou.

3 Hei aha koa, ka kōrero anō ahau ki a koutou; nā te mea e hihiri nuitia ana e ahau te oranga o ō koutou wairua. Āe rā, he nui tōku mānukanuka mō koutou; ā, e mōhio ana anō koutou kua roa e pēnei katoa ana. He kaha nui nōku ki te whakahauhau i a koutou; ā, i whakaakona koutou e ahau ki ngā kupu a tōku matua; i kōrero ano hoki ahau ki a koutou mō ngā mea katoa kua tuhituhia nei, nō te hanganga rā anō o te ao.

4 Ā ināianei, nana, ka kōrero atu ahau ki a koutou mō ngā mea o nāianei me ngā mea e takoto ake nei; nā reira, ka pānui ahau ki a koutou i ngā kupu a Īhāia. Ā, ko ngā kupu ēnei i hiahia ai tōku tuakana kia kōrerotia ai e ahau ki a koutou. Ā, ka kōrero ahau ki a koutou mō ō koutou oranga, kia ako ai koutou, kia whakakorōria ai anō hoki i te ingoa o tō koutou Atua.

5 Ā ināianei, ko ngā kupu e pānui atu nei ahau koinā ngā mea i kōrero ai a Īhāia e pā ana ki te whare katoa o Iharaira; nā reira, e taea ana kia whakatauritehia ai ki a koutou, nō te mea nō te whare koutou o Iharaira. Ā, he maha anō ngā mea i kōrerotia ai e Īhāia e taea ana te whakataurite atu ki a koutou, nō te mea nō te whare koutou o Iharaira.

6 Ā ināianei, koinei ngā kupu: Ko te kupu tēnei a te Ariki te Atua: Nana, ka ara ake tōku ringa ki ngā Tauiwi, ka whakatūria ake hoki tōku kara ki ngā iwi; ā, ka mauria mai e rātou ō tama i roto i ō rātou ringaringa; ka kawea mai hoki ō tamāhine i runga i ō rātou pokohiwi.

7 Ā, ko ngā kīngi ō rātou matua atawhai, ā, ko ō rātou kuini ngā whaea atawhai; ka piko iho rātou ki a koe e tāpapa iho ana ō rātou mata ki te whenua, ā, ka mitimiti i te puehu o ō waewae; ā, ka mōhio koe ko ahau te Ariki; nō te mea e kore e whakamā te hunga e tatari mai ana ki ahau.

8 Ā ināianei au, a Hākopa, ka kōrero e pā ana ki ēnei kupu: Nā te mea kua whakakitea mai e te Ariki ki ahau ko te hunga i noho ai i Hiruharama, te wāhi i ahu mai ai tātou, kua whakamatea, kua kahakina mauheretia atu.

9 Hei aha koa, kua whakaatu mai te Ariki ki ahau ka hoki anō rātou. Ā, nāna hoki i whakaatu mai ki a au, ka puta te Ariki te Atua, te Mea Tapu o Iharaira, ki a rātou i te kikokiko; ā i muri iho i tana putanga, ka whakawhiua ia e rātou, ka rīpekatia ia, e ai ki ngā kupu a te anahera nāna ia i kōrero mai ki ahau.

10 Ā, i muri i tā rātou whakapakeketanga i ō rātou ngākau me tā rātou whakamārōtanga i ō rātou kakī ki te Mea Tapu o Iharaira, nana, ko ngā whakawākanga a te Mea Tapu o Iharaira ka tau ki runga i a rātou. Ā, ka haere mai te rā, e patua ai, e whakamamaetia ai rātou.

11 Nā reira, a muri iho i tā rātou ainga ki wī, ki wā, e ai tā te anahera, he tokomaha ka whakamamaetia i te kikokiko, ā, e kore rātou e tukua kia mate ai, nā ngā inoi a te hunga whakapono; ka whakamararatia rātou, ka whakawhiua, ka mauāharatia; Hei aha koa, ka whakaaroha te Ariki ki a rātou, nā, ina tae rātou ki te mātauranga ki tō rātou Kaihoko, ka whakaminea ngātahitia anō rātou ki ō rātou whenua tuku iho.

12 Ā, e manaakitia nei ngā Tauiwi, ko rātou ērā kua tuhituhia ai e te poropiti; nā te mea nana, ki te rīpenetā rātou me te whawhai kore ki a Hiona, me te kore e whakahono ki taua hāhi nui whakarihariha, ka whakaorangia rātou; nā te mea ka whakatutuki te Ariki te Atua i āna kawenata i mahi ai ia ki āna tamariki; ko te take tēnei i tuhituhia ai ēnei mea e te poropiti.

13 Nā reira, ko rātou e whawhai nei ki a Hiona me te iwi kawenata a te Ariki ka mitimiti ake i te puehu o ō rātou waewae; ā, e kore te iwi o te Ariki e whakamākia. Nā te mea ko te iwi a te Ariki ko te hunga rātou e tatari ana ki a ia; kei te tatari tonu rātou ki te haerenga mai o te Mīhaia.

14 Ā nana, e ai ki ngā kupu a te poropiti, ka anga mai anō te Mīhaia mō te wā tuarua ki te whakahoki i a rātou; nā reira, ka puta mai ia ki a rātou i runga i te mana me te korōria nui, tae atu ana ki te whakangaromanga o ō rātou hoariri, ina puta mai taua rā e whakapono ai rātou ki a ia; ā, kua kore ia e whakangaro i tētahi e whakapono ana ki a ia.

15 Ā, ko te hunga kāore e whakapono ki a ia, ka whakangaromia tahitia e te ahi, e te tūpuhi hoki, e ngā rū hoki, e ngā whakahekenga toto hoki, e te mate urutā hoki, e te hemokai hoki. Ā, ka mōhio rātou ko te Ariki te Atua, te Mea Tapu o Iharaira.

16 Nā te mea tērā rānei e tangohia ai ngā taonga parau i te tangata kaha, e whakaorangia rānei te tangata kua tika nei tana hereherenga?

17 Engari, ko te kupu tēnei a te Ariki: Ka tangohia pū anō atu ngā herehere a te tangata kaha, ka whakaputaina ngā taonga parau a te nanakia; nā te mea ka whakaputa te Atua kaha i tana iwi kawenata. Nā te mea e pēnei ana te kupu a te Ariki; ka ngangare ahau ki a rātou e ngangare ana ki a koe—

18 Ā, ka whāngaia atu rātou e ahau e whakatupu kino ana ki a koe, ki ō rātou ake kikokiko; ā, ka haurangi rātou i ō ratou ake toto me te mea nei ko te waina reka; ā, ka mōhio ngā kikokiko katoa ko ahau ko te Ariki tō Kaiwhakaora me tō Kaihoko, te Mea Kaha o Hākopa.