1 Nā, ko ahau, ko Nīwhai, ka kōrero mō ngā poropititanga i kōrerotia e tōku matua, mō Hōhepa i mauria atu rā ki roto i Ihipa:

2 Nana rā, i poropiti pono ia e pā ana ki ōna uri katoa. Ā, ko ngā poropititanga i tuhi ai ia, kāore he maha i tua atu. Nā, i poropiti ia e pā ana ki a tātou, me ō tātou whakatupuranga anamata; ā, i tuhia aua mea ki runga i ngā papa parāhe.

3 Nā reira, i muri iho i te whakakapinga kōrero a tōku matua e pā ana ki nga poropititanga a Hōhepa, i karanga ia ki ngā tamariki a Rāmana, ki āna tama, me āna tamāhine, ā, ka kī atu ki a rātou: Nana, e aku tama, me aku tamāhine, koia nei ngā tama me ngā tamāhine a taku mātāmua, e hiahia ana ahau kia whaitaringa mai koutou ki aku kupu;

4 Nā te mea, kua kī mai te Ariki te Atua: Ina pupuri koutou i aku whakahaunga ka whaioranga koutou i runga i te whenua; ā, ina kore koutou e pupuri i aku whakahaunga, ka hātepea atu koutou i mua i tōku aroaro.

5 Engari nana, e aku tama me aku tamāhine, kāore ahau e kaha ki te heke iho ki taku rua kōiwi ki te kore e waiho e ahau he manaakitanga ki runga i a koutou; nana rā, e mōhio ana ahau ki te whakatupuria ake koutou i te huarahi e haere ai koutou, e kore koutou e mawehe atu.

6 Nā reira, mehemea kua kangaia koutou, nana, ka waiho e ahau taku manaakitanga ki runga i a koutou, kia tangohia mai ai te kanga i runga i a koutou, ā, ka utaina ki runga ki ngā upoko o ō koutou mātua.

7 Nā reira, nā taku manaakitanga e kore ai koutou e tukua e te Ariki te Atua kia mate ai koutou; nā reira, ka whakaaroha ia ki a koutou, ki ō koutou uri anō hoki, āke ake tonu atu.

8 Ā, i pahawa ake, i muri iho i te whakakapinga kōrero a tōku matua ki nga tama me ngā tamāhine a Rāmana, ka meinga e ia kia kawea ai ngā tama me ngā tamāhine a Remuere ki tōna aroaro.

9 Ā, i kōrero atu ia ki a rātou, e mea ana: Nana, e aku tama me aku tamāhine, koia nei ngā tama me ngā tamāhine a taku tama tuarua; nana, ka waiho e ahau ki a koutou taua manaakitanga anō i waiho nei e ahau ki ngā tama me ngā tamāhine a Rāmana; nā reira, e kore koe e whakangaromia katoatia, engari hei te mutunga iho ka manaakitia ō uri.

10 Ā, i pahawa ake, nā, i te whakakapinga kōrero a tōku matua ki a ratou, nana, ka kōrero atu ia ki ngā tama a Ihimaera, āe rā, ki tōna whare katoa.

11 Ā, i muri iho i tana whakakapinga kōrero ki a rātou, ka kōrero ia ki a Hāmi, e mea ana: Kua manaakitia koe, me ō uri; nā te mea ka tukuna iho te whenua ki a koe pērā ki tō teina a Nīwhai. Ā, ka tatauria ngātahitia ō uri me ōna uri; ā, ka pērā koe ki tō teina; ka pērā anō hoki ō uri ki ōna uri, ā, ka manaakitia koe i ō rā katoa.

12 Ā, i pahawa ake, i muri iho i tā tōku matua, tā Rīhai, kōrero ki tōna whare katoa, e ai ki ngā kare ā-roto o tōna ngākau me te Wairua o te Ariki i roto nei i a ia, ka koroheketia ia. Ā, i pahawa ake, ka mate ia, ā, ka tāpuketia.

13 Ā, i pahawa ake, kāore i maha ngā rā i muri iho i tōna matenga, ka riri a Rāmana rātou ko Remuere, ko ngā tama a Ihimaera ki a au nā ngā kohetetanga a te Ariki;

14 Nāku rā, nā Nīwhai, i akiakina ai kia kōrero atu ai ki a rātou, e ai ki tana kupu; nā te mea he maha nga mea i kōrero ai ahau ki a rātou, me tōku matua anō hoki, i mua i tōna matenga; ā, he maha o ērā mea kua tuhia ki runga i ērā atu papa āku; nā te mea kua tuhia te wāhi nui o te hītori ki runga i ērā atu papa.

15 Ā, e tuhituhi ana ahau ki runga i ēnei nga mea o tōku wairua, me nga karaipiture maha kua whaongia ki runga ki ngā papa parāhe. Nō te mea, e kaingākau ana tōku wairua i ngā karaipiture, ā, e whakaaroarohia ana e tōku ngākau, me te tuhituhi anō hei akoranga, hei painga mō aku tamariki.

16 Nana, e kaingākau ana tōku wairua i ngā mea o te Ariki; me tōku ngākau anō e whakaaroaro tonu ana i ngā mea i kite ai, i rongo ai ahau.

17 Hei aha koa, ahakoa te atawhainga nui a te Ariki, i tana whakaaturanga mai ki ahau i āna mahi nunui whakamīharo, e whakapāha ana tōku ngākau: Auē e tūreikura ana ahau! Āe rā, e pōuri ana tōku ngākau mō tōku kikokiko; e mōteatea ana tōku wairua mō ōku hē.

18 E karapotia ana ahau, nā ngā whakawainga me ngā hara e whakararu noa iho nei i ahau.

19 Ā, ina hiahia ahau ki te whakamanamana, ka ngunguru ake tōku ngākau nā ōku hara; hei ahakoa, e mōhio ana ahau ki tāku i whakawhirinaki ai.

20 Kua waiho ko te Atua hei whakawhirinakitanga mōku; nāna ahau i ārahi i runga i ōku mamaetanga i te koraha; nāna ahau i tiaki i runga i ngā wai o te rire nui.

21 Kua whakakīa ahau e ia ki tōna aroha, tae atu ana ki te whakapaunga ake i ōku kikokiko.

22 Kua whakapōauau ia i ōku hoa riri, nā konā ka tūoioi rātou i tōku aroaro.

23 Nana, kua whakarongo mai ia ki taku tangi i te ao, ā, kua homai he mātauranga mā ngā whakakitenga ki ahau i te pō.

24 Ā, kua māia haere ahau ki te inoi kaha i te rā; āe rā, kua tukua ake tōku reo ki runga ki ngā ikeike; ka heke iho mai nei ngā anahera, ā, ka minitatia mai ahau.

25 Kua kahakina atu tōku tinana i runga i ngā parirau o tōna Wairua ki runga i ngā maunga tiketike rawa. Kua kite ōku karu i ngā mea nunui, āe rā, he nui rawa atu nei mō te tangata; nō reira i whakahaua ahau kia kaua ai au e tuhi.

26 Ā tēnā, mehemea kua kite ahau i ēnei mea nunui; mehemea ko te Ariki i runga i tōna tapatuhanga ki ngā tamariki a te tangata kua toro ki ngā tangata i runga i te aroha nui; he aha e tangi ai tōku ngākau, e whakawhēauau ai tōku wairua i te whārua o te pōuri, e memeha ai ōku kikokiko, e ngoikore ai tōku kaha, nā ōku mamaetanga?

27 Ā, he aha ahau e tuku ai ki te hara, nā ōku kikokiko? Āe rā, he aha ahau e tuohu ai i ngā whakawainga kia whai wahi ai te mea kino ki roto i tōku ngākau, e whakangaro ai i tōku rangimārie, ā, hei whakamamae i tōku wairua? He aha au e riri ai i tōku hoariri?

28 Maranga, e tōku wairua! Kāti noa te pōuri i runga i te hara. Kia hari, E tōku ngākau, kaua e tuku wāhi atu mō te hoariri o tōku wairua.

29 Kaua e riri anō i ōku hoariri. Kaua e ngoikore tōku kaha i ōku mamaetanga.

30 Kia hari, E tōku ngākau, ā, karanga ake ki te Ariki, ā, me kī ake: E te Ariki, ka whakamoemiti ahau ki a koe ake tonu atu; āe rā, ka hari tōku wairua i roto i a koe, e tōku Atua, ā, e te toka o tōku whakaoranga.

31 E te Ariki, ka hokona rānei e koe tōku wairua? Ka whakaputaina rānei e koe ahau i roto i nga ringaringa o ōku hoariri? Ka meinga rānei e koe ahau kia tūoioi ai i te āhuatanga o te hara?

32 Kia tūtakina tonutia atu ngā kūwaha o te ao rēwera i mua i ahau, nō te mea, he ngākau marū tōku, he wairua iro! E te Ariki, kia kaua koe e tūtaki i ngā kūwaha o tō tika i mua i ahau, kia haere ai ahau i te ara o te whārua whakararo, kia tōtika ahau i te huarahi papatairite!

33 E te Ariki, kia karapoti koe i a au ki te kahu o tō tika! E te Ariki, kia meinga e koe he whakaputanga mōku i te aroaro o ōku hoariri! Kia whakatikaia e koe tōku huarahi i mua i ahau! Kia kaua e waiho e koe he tūtukitanga waewae i tōku ara—engari kia whakawātea koe i tōku huarahi, ā, kaua e ārai i tōku huarahi, engari ko ngā huarahi o tōku hoariri.

34 E te Ariki, kua whakawhirinaki ahau ki a koe, ā, ka whakawhirinaki anō ahau ki a koe, āke tonu atu. E kore ahau e whakawhirinaki atu ki te ringaringa o te kikokiko; nō te mea e mōhio ana ahau kua kangaia te tangata e whakawhirinaki ana ki te ringaringa o te kikokiko. Āe rā, kua kangaia ia e whakawhirinaki ana ki te tangata, ā, e meinga ana rānei te kikokiko hei ringaringa mōna.

35 Āe rā, e mōhio ana ahau ka hoatu noa iho nei e te Atua ki te tangata e inoi ana. Āe rā, ka homai e tōku Atua ki ahau, ki te kore e hē taku inoi; nō reira ka hāmama ake tōku reo ki a koe; āe rā, ka karanga ake ahau ki a koe, e tōku Atua, e te toka o tōku tika. Nana, ka kake ake tōku reo ki a koe, ake tonu atu, e tōku toka, e tōku Atua Ora Tonu. Āmine.