1 Ko te pīkaunga o Papurona, i kitea nei e Īhāia te tama a Amoho.

2 Hāpainga ake e koe tētahi kara ki runga i te maunga tiketike, whakakahangia te reo ki a rātou, rūrūhia te ringa, kia kuhu atu ai rātou i ngā kēti o ngā ariki.

3 Kua whakahaua aku mea kua whakatapuhia, kua karangatia hoki aku mea mārohirohi, nā te mea kāore tōku riri e tau ai ki runga i a rātou e whakakoa ana i tōku teiteitanga.

4 E rite ana te pāoroorotanga a te tini i ngā maunga ki tā tēnā o tētahi iwi nui, he pāoroorotanga nui o ngā kīngitanga kua whakatōpū tahitia, e whakakao ana te Ariki o ngā Mano i ngā ope tauā mō te whawhai.

5 E haere mai nei rātou mai i tētahi whenua tawhiti, mai i te pito whakamutunga o te rangi, āe rā, ko te Ariki, me ana tū rākau whawhai o tōna whakatakariri tika, ki te whakangaro i te whenua katoa.

6 E auē koutou, nā te mea e tata mai ana te rā o te Ariki; ka tae mai ānō nei he whakangaromanga mai i te Mea Kaha Rawa.

7 Nō reira ka ngoikore ngā ringaringa katoa, ka rewa tō ia tangata ngākau;

8 Ā, ka mataku rātou; ka mau pū rātou i ngā pākinitanga me ngā pāpōuritanga; ka mīharo rātou ki a rātou anō; ka ai ō rātou mata ānō nei he kāpura ahi.

9 Nana, e haere mai ana te rā o te Ariki, he nanakia i runga i te pukuriri me te tino riri nui, kia whakamōwai i te whenua; ā, māna ngā kaihara o reira e whakangaro atu i reira.

10 Nā, kāore ngā whetū o te rangi me ō reira kāhui e tuku i ō rātou māramatanga; ka whakapōurihia te rā i tana putanga atu, ā, kāore te marama e mea ai kia whiti ai tōna māramatanga.

11 Ā, māku te ao e whakawhiu mō te kino, ā, e te hunga whakarihariha mō ō rātou hara; ka meinga e au te whakahīhītanga o te hunga whakahīhī kia mutu ai, ā, ka whakatakotohia iho e au te whakakakenga o te hunga tūkino.

12 Ka meinga e au te utu o te tangata kia nui kē ake i tō te kōura pai; te tangata pū anō i tō te ora kōura o Opira.

13 Nō reira, māku ngā rangi e whakaoioi, ā, ka nuku atu te ao i tōna tūranga, i te pukuriri o te Ariki o ngā Mano, ā, i te rā o tōna tino riri nui.

14 Ā, ka pērā ia ki te aneterope e whāia ana, ā, pērā ki te hipi kāore tētahi hei whakahuihui ake; ā, ka tahuri atu rātou i ia tangata, ia tangata ki tōna ake iwi, ā, ka tahuti atu ngā tāngata katoa ki tōna ake whenua.

15 Ka werohia rawatia te hunga whakapehapeha katoa; āe rā, ka hinga ngā mea katoa e hono tahi ana ki te hunga kino i te hoari.

16 Ka taia kongakongahia ā rātou tamariki i mua i ō rātou karu; ka pāhuatia ō rātou whare, ā, ka pāwheratia ā rātou hoawahine.

17 Nana, ka whakatutū ake au i ngā Meri ki a rātou, he hunga kāore nei e whaiwhakaaro ana mō te hiriwā me te kōura, kāore rānei rātou i koa i a ia.

18 Ka taia kongakongahia ā rātou taiohi tāne i ā rātou kōpere; ā, kāore rātou e aroha atu ki te hua o te kōpū; kāore ō rātou karu e tohu i ngā tamariki.

19 Ā, ko Papurona, te korōria o ngā kīngitanga, te ātaahua o tō ngā Karari hiranga, ka pērā ki te wā i turaki te Atua i Horoma me Komora.

20 Kua kore rawa ia e whakanohoia āke tonu atu, kua kore rānei ia e nōhia mai i tētahi whakatipuranga ki tētahi whakatipuranga: kua kore rānei te Arapiana e whakatū tēneti i reira; kua kore rānei ngā hēpara e whakatū pātiki i reira.

21 Engari ka takoto iho ngā kararehe mohoao i reira; ā, ka kī ō rātou whare i ngā kararehe kino; ā, ka noho ngā rūrū i reira, ā, ka kanikani ngā hataia i reira.

22 Ā, ka tangi ngā kararehe mohoao o ngā motu i roto i ō rātou whare, me ngā tarakona i ō rātou wāhi āhuareka; ā, kua tata mai tōna wā, ā, kāore e whakaroahia tōna rā. Nā, ka whakangaro wawe au i a ia; āe rā, nā, ka whakaaroha atu au ki tōku iwi, engari ka mate te hunga kino.