1 Ā, ka puta mai tētahi tokotoko i te kakau o Hehe, ā, ka whanake mai tētahi peka i ana aka.

2 Ā, ka tau iho te Wairua o te Ariki ki runga i a ia, te wairua o te mōhiotanga me te māramatanga, te wairua o te whakatakoto whakaaro me te kaha, te wairua o te mātauranga, ā, o te wehi ki te Ariki;

3 Ā, ka meinga ia kia mārama wawe ai i te wehi ki te Ariki; ā, ka kore ia e whakawā i runga i te āhuatanga o ōna karu, ka kore rānei e kohete i runga i te āhuatanga o ōna taringa.

4 Engari i runga i te tika tāna whakawā i te hunga rawakore, me te kohete i runga i te tika i te hunga māhaki o te ao; ā, ka patu ia i te ao ki te tokotoko o tōna māngai, ā, mā te hā o ana ngutu ia e whakamate ai i te hunga whakarihariha.

5 Ā, ka ai te tika hei whītiki mō ōna hope, ā, ko te whakaponohanga hei whītiki mō ōna whatumanawa.

6 Ka noho tahi te wuruhi me te reme, ā, ka takoto tahi te reparo me te kuao koti, ā, ko te kuao kau me te kuao raiona me te mea mōmona tahi; ā, ka ārahi te tamaiti i a rātou.

7 Ā, ka kai tahi te kau me te pea; ka takoto tahi iho ā rāua kuao; ā, ka kai kakau witi te raiona e rite ana ki te kau.

8 Ā, ka tākaro te tamaiti ngote ū i runga i te rua o te nākahi, ā, ka toro atu te ringa o te tamaiti kua whakamutua tana ngote ū ki runga i tō te neke rua.

9 E kore rātou e tūkino, e whakangaro rānei i tōku maunga tapu katoa, nā te mea ka kī te ao i te mōhiotanga o te Ariki, e rite ana ki te wai e taupoki nei i te moana.

10 Ā, ka ai tētahi kakau o Hehe i taua rā, ka tū nei hei kara mō te iwi; ki a ia e rapu ai ngā Tauiwi; ā, ka whaikorōria tōna okiokinga.

11 Ā, ka pahawa ake i taua rā, nā, ka tau atu te Ariki i tōna ringa mō te wā tuarua ki te whakahoki i te toenga o tōna iwi ka mahue iho, mai i Ahiria, ā, mai i Ihipa, ā, mai i Patoro, ā, mai i Kuhu, ā, mai i Erama, ā, mai i Hinara, ā, mai i ngā moutere o te moana.

12 Ā, māna e whakarite tētahi kara mō ngā iwi, ā, ka whakatōpū i ngā rāwaho o Iharaira, ā, ka whakatōpū tahi te hunga i whakamararatia o Hura mai i ngā kokonga e whā o te ao.

13 Ka wehe atu te pūhaehae o Eparaima, ā, ka hātepea atu ngā hoariri o Hura; kua kore a Eparaima e pūhaehae ki a Hura, ā, ka kore a Hura e tūkino i a Eparaima.

14 Engari ka rere rātou i runga i ngā pokohiwi o ngā Pirihitini ki te uru; ka pāhuatia tahitia rātou i te rāwhiti; ka tau atu tō rātou ringa ki runga i a Eroma me Moapa; ā, ka whakarongo mai ngā tamariki a Amona ki a rātou.

15 Ā, ka whakangaromia rawatia te arero o te moana Ihipiana; ā, mā tōna hau kaha ka rūrū i tōna ringa ki runga i te awa, ā, ka patua ia i roto i ngā manga e whitu, ā, ka meinga ngā tāngata kia whakawhiti maroke atu ai.

16 Ā, ka ai tētahi huarahi matua mō te toenga o tōna iwi ka mahue nei, mai i Ahiria, e pērā ana i tāna ki a Iharaira i te rā i puta mai ai ia i te whenua o Ihipa.