1 Whakarongo mai ki ahau, e koutou e whai ana i te tika. Titiro ki te toka i haua mai ai koutou, ki te kōhao hoki o te rua i kēria mai ai koutou.

2 Titiro ki a Aperahama, tō koutou matua, ki a Hera hoki, nāna koutou i whānau ai; nā te mea i karanga ahau i a ia anake, ā, i manaakitia ia.

3 Nā, ka whakaāio te Ariki i a Hīona, ka whakaāio ia i ōna wāhi ururua; ā, ka meinga e ia ōna koraha kia rite ki Erene, me ōna wāhi tītōhea kia rite ki te kāri o te Ariki. Ka kitea te koa me te hari i reira, te whakawhetai me te reo waiata.

4 Whakarongo mai ki ahau, e ōku tāngata; ā, kia whai taringa mai ki ahau, E tōku iwi; nā te mea ka puta atu tētahi ture i ahau, ā, ka meinga e au taku whakawākanga kia tau ai hei māramatanga mō ngā tāngata.

5 Kua tata mai tōku tika; kua puta whakamua atu tōku whakaoranga, mā tōku ringa ngā tāngata e whakawā. Ka tatari mai ngā motu ki ahau, ā, hei runga i tōku ringa tō rātou whakawhirinakitanga.

6 Hīkina ake ō koutou karu ki ngā rangi, ā, tirohia iho te whenua i raro; nā te mea ka memeha atu ngā rangi ānō nei he pawa, ā, ka tawhitohia te whenua ānō nei he kākahu; ā, ka mate pērā anō te hunga e noho ana i reira. Engari ka mau tonu tōku whakaoranga, ā, kāore tōku tika e whakakorengia.

7 Whakarongo mai ki ahau, e koutou e mōhio ana ki te tika, ko ngā tāngata i tuhia nei e ahau tōku ture i ō rātou ngākau, kaua e wehi i te tāwai a te tangata, kaua e mataku rānei i ā rātou taunutanga.

8 Nā te mea ka kainga ake rātou e te pūrehurehu ānō nei he kahu, ā, ka kainga ake rātou e te huhu ānō nei he wūru. Engari ka mau tonu tōku tika, me tōku whakaoranga mai i tētahi whakatipuranga ki tētahi whakatipuranga.

9 E oho, e oho! Whakakākahuria te kaha, E te ringa o te Ariki; E oho, kia rite ki ngā rā onamata. Ehara oti i a koe nāna a Rahapa i kokoti, ā, i whara te tarakona?

10 Ehara oti i a koe nāna te moana i whakamaroke, ngā wai o te hōhonutanga nui; nāna ngā hōhonutanga o te moana hei huarahi e whakawhiti atu ai te hunga kua oti te hoko?

11 Nō reira, ka hoki mai te hunga hokona a te Ariki, ā, ka haere mai me te waiata ki a Hīona; ā, ka tau iho te koa mau tonu me te tapu i runga i ō rātou upoko; ā, ka whiwhi rātou i te hari me te koa; ka rere atu te pōuri me te auē.

12 Ko au ia; āe rā, ko au ia e whakaāio ana i a koe. Nana, ko wai rā koe, e wehi ai i te tangata, koia ka mate, ā, i te tama a te tangata, ka meinga ia ānō nei he pātītī?

13 Ā, ka wareware ki te Ariki tō kaihanga, nāna ngā rangi i hora atu, ā, i whakatakotoria ngā tūāpapa o te ao, ā, kua pāwera tonu koe ia rā, ia rā, nā te riri o te kaiwhakapēhi, me te mea nei e rite ana ia ki te whakangaro? Ā, kei hea te riri o te kaiwhakapēhi?

14 E tākare tonu ana te whakapakohanga a te herehere, kia wetekina ai ia, ā, kia kaua ia e mate i te rua, kia kaua rānei tana paraoa e whakakorea.

15 Engari ko au te Ariki tō Atua, i haruru nei āna ngaru; ko te Ariki o ngā Mano tōna ingoa.

16 Ā, nāku aku kupu i puru i tō māngai, ā, kua uhia koe i te maru o tōku ringaringa, nā, kia whakatōkia ai ngā rangi me te whakatakoto i ngā tūāpapa o te ao, me te kī atu ki a Hīona: Nana, ko koe tōku iwi.

17 E oho, e oho, e tū ake, E Hiruharama, kua inumia nei nā te ringaringa o te Ariki te kapu o tōna riri—kua inumia ngā para o te kapa kōtētē ihotanga o te wiri—

18 Ā, kāore kau tētahi o ana tama katoa kua whānau mai i a ia hei arataki i a ia; kāore rānei tētahi hei pupuri atu i tana ringa, o ana tama katoa kua whakatupuria e ia.

19 Kua haere mai nei ēnei tama tokorua ki a koe, ko wai e pōuri mōu—tō ururuatanga me tō whakangaromanga, ā, ko te matekai me te hoari—ā, ko wai tōku hei whakaāio i a koe?

20 Kua hemo ō tama, hāunga tēnei tokorua; e takoto ana rāua i te ahunga mai o ngā huarahi katoa; ānō nei he puru mohoao i te kupenga, e kī ana rāua i te riri o te Ariki, te kohete a tō Atua.

21 Nō reira whakarongo ianei ki tēnei, e koe, e whakamamaetia ana, ā, e haurangi ana, ā, ehara i te waina.

22 Ko te kupu tēnei a te Ariki, e whakakuene te Ariki, ā, tō Atua i te kaupapa o tana iwi; nana, kua tangohia atu e au i tō ringa te kapu wiriwiri, ngā para o te kapu o tōku riri, e kore koe e inu anō i tēnā.

23 Engari ka puru atu au i tō te ringaringa o te hunga whakawhiu i a koe; kua mea nei ki tō wairua: E piko iho nei ki raro, kia haere mātou i runga—ā, kua takotohia e koe tō tīnana ki raro, ā, hei huarahi atu mō te hunga i haere atu rā.

24 E oho, e oho, whakamaua tō kaha, E Hīona; whakamaua ō kākahu ātaahua, E Hiruharama, te pā tapu; nā te mea kua kore e haere mai ki a koe te hunga kokoti kore me te hunga poke ināianei, ā, haere ake nei.

25 Ruia iho te puehu i a koe; e ara, e noho ki raro, E Hiruharama; wetekina koe mai i ngā here o tō kakī, E te tamāhine herehere o Hīona.