1 Ā ināianei, nana, e aku teina, kua kōrero atu nei ahau ki a koutou, e ai ki tā te Wairua akiaki i ahau; nā reira, e mōhio ana ahau kāore e kore ka pahawa ake ēnā.

2 Ā, ka nui te utu o ngā mea ka tuhia atu mai i te pukapuka ki ngā tamariki a te tangata, ā, ki ō tātou uri pū anō, koia he mōrehu nō te whare o Iharaira.

3 Nā, ka pahawa ake i taua rā, nā, ko ngā hāhi kua hangaia ake nei, ā, kāore ki te Atua, ka kī atu tētahi ki tētahi atu: Nana, ko au, ko au tā te Ariki; ā, ka kī ake ērā atu: Ko au, ko au tā te Ariki; ā, ka pēnei te kōrero o ia mea, o ia mea kua hangaia ake ngā hāhi, ā, kāore ki te Ariki—

4 Ā, ka ngangare tētahi ki tētahi; ā, ka ngangare ō rātou pirihi tētahi ki tētahi, ā, ka whakaako rātou i runga i tō rātou mātauranga, ā, ka whakakore i te Wairua Tapu, māna nei e whakapuakina ai.

5 Ā, e whakakore nei rātou i te mana o te Atua, te Mea Tapu o Iharaira; ā, ka mea atu rātou ki te iwi: Whakarongo mai ki a mātou, ā, whakarongo ki tā mātou tohutohu; nā te mea nana, kāore he Atua i tēnei rā, nā, kua oti i te Ariki, ā, i te Kaihoko tāna mahi, ā, kua hoatu tana mana ki ngā tāngata;

6 Nana, whakarongo koutou ki taku tohutohu; mehemea ka kī ake rātou kua puta he merekara i te ringa o te Ariki, kaua e whakapono; nā te mea kāore ia i te Atua merekara i tēnei rā; kua oti i a ia tāna mahi.

7 Āe rā, ka tokomaha ngā mea e kī ake ai: E kai, e inu, kia hari, nā te mea hei āpōpō tātou mate ai; ā, ka pai tēnā mō tātou.

8 Ā, ka tokomaha ngā mea e kī ake ai: E kai, e inu, kia hari; hei aha koa, e wehi ki te Atua—ka whakamurua e ia tētahi hara iti; āe rā, me rūkahu iti, me tinihanga i tētahi nā runga i āna kupu, me keri i tētahi rua mō tō hoa nohotata; kāore he hē i tēnei; ā, me mahi ēnei mea katoa, nā te mea hei āpōpō tātou mate ai; ā, mehemea rā ia kua hē tātou, ka patua tātou e te Atua ki ngā whiunga torutoru, ā, hei te mutunga iho ka whakaorangia tātou i te kīngitanga o te Atua.

9 Āe rā, ka tokomaha ngā mea e whakaako ai i runga i tēnei āhuatanga, he teka, ā, he parau, ā, he whakaakoranga rorirori, ā, ka kikī ake ō rātou manawa, ā, ka ngana hōhonu nei kia hunaia ā rātou whakatakotoranga whakaaro i te Ariki; ā, kei roto i te pōuritanga ā rātou mahinga.

10 Ā, ka karanga ngā toto o te hunga tapu mai i te whenua hei whakahē i a rātou.

11 Āe rā, kua haere katoa atu rātou i te huarahi; kua meinga nei rātou he mea tūkinohia.

12 Nā te whakapehapeha, ā, nā ngā kaiako teka, me ngā whakaakoranga teka, kua pokea ō rātou hāhi, ā, kua neke ake ō rātou hāhi; nā te whakapehapeha kua kikī ake rātou.

13 E pāhuatia ana e rātou te hunga rawakore nā ō rātou whare karakia papai; e pāhuatia ana e rātou te hunga rawakore nā ō rātou kākahu papai; ā, e whakahāweatia e rātou te hunga māhaki me te hunga ngākau whakaiti, nā te mea e kikī ake ana rātou i tō rātou whakapehapeha.

14 E mau ana i a rātou ngā kakī mārō me ngā māhunga tiketike; āe rā, nā te whakapehapeha, me te whakarihariha, me ngā mahi mōrikarika, kua kōtiti kē atu rātou katoa hāunga ētahi mea torutoru, ko rātou ngā kaiaru māhaki o te Karaiti; hei aha koa, e ārahina ana rātou, nā, he maha ā rātou kōtititanga nā te mea e whakaakona ana rātou e ngā tohutohu o te tangata.

15 E te hunga mōhio, me te hunga matatau, me te hunga whairawa, e kikī ake ana i te whakapehapehatanga o ō rātou ngākau, me te hunga katoa e kauhau ana i ngā whakaakoranga teka, me te hunga katoa e mahi pūremu ana, me te rāweke kino nei i te huarahi tika o te Ariki, auē, auē, auē te mate mō rātou, e ai tā te Ariki te Atua Kaha Rawa, nā te mea ka makaia iho rātou ki te ao rēwera!

16 Auē te mate mō te hunga e whakapeau i te hunga tika me te mea he mea kore noa iho, ā, e tāwai ana i ērā e pai ana, me te kī ake he mea kāore ōna pai! Nā te mea ka tae mai te rā e torona wawetia ai te Ariki te Atua ki ngā tāngata o te ao; ā, ka mate rātou i taua rā e pakari katoa ana rātou i te hara.

17 Engari nana, mēnā ka rīpenetā ngā tāngata o te ao i ō rātou whakarihariha me ā rātou mahi mōrikarika ka kore rātou e whakangaromia, e ai tā te Ariki o ngā Mano.

18 Engari nana, ko taua hāhi nui mōrikarika, ko te wahine pūremu o te ao katoa, me tānuku iho ki te whenua, ā, me nui anō tō reira hinganga.

19 Anā, me tūoioi te kīngitanga o te rēwera, ā, me tika pū ia kia whakaohokia ake te hunga nō konā ki te rīpenetātanga, ka mau rānei rātou i te rēwera me ana mekameka mau tonu, ā, ka whakaohokia rātou ki te riri, ā, ka mate;

20 Nana rā, ka haruru ia i taua rā i roto i ngā ngākau o ngā tamariki a te tangata, ā, ka whakaohokia rātou ki te riri ki ērā mea pai.

21 Ā, ka whakamārietia ētahi atu e ia, ka whakaoriorihia atu rātou i roto i te āhurutanga o te ao, kia kī ake ai rātou: He pai katoa ngā mea i Hīona; āe rā, kei te whai pai a Hīona, kei te pai katoa—ā, e pēnei ana tā te rēwera tinihanga i ō rātou wairua, ā, e āta ārahina iho rātou ki te ao rēwera.

22 Ā nana, ka whakapatipatihia atu ētahi, ā, ka mea atu ki a rātou kāore he ao rēwera; ā, ka kī ake ia ki a rātou: Ehara au i tētahi rēwera, nā te mea kārekau tētahi—ā, e pēnei ana tana kōhimuhimu i ō rātou taringa, tae atu ana ki tana whakamau i a rātou ki āna mekameka mōrikarika, kāore he whakaputanga mai i reira.

23 Āe rā, kua mau rātou i te mate, me te ao rēwera; ā, me tū te mate, me te ao rēwera, me te rēwera me ērā mea katoa kua murua i reira ki mua i te torona o te Atua, ā, ka whakawākia e ai ki ā rātou mahi, mai i reira ka haere rātou ki roto i te wāhi kua whakaritea mō rātou, arā, ki tētahi roto ahi whānāriki, koia anō ko te mamae mutunga kore.

24 Nō reira, auē te mate mō te tangata e noho noa iho ana i Hīona!

25 Auē te mate mō te tangata e hāmama atu ana: Kei te pai katoa!

26 Āe rā, auē te mate mō te tangata e whakarongo ana ki ngā tohutohu a te tangata, me te whakaparahako i te mana o te Atua, me te takohatanga o te Wairua Tapu!

27 Āe rā, auē te mate mō te tangata e kī ake ana: Kua whiwhi mātou, ā, kāore he mea anō e hiahia nei mātou!

28 Ā kāti, auē te mate mō te hunga e wiri ana, ā, e riri ana nā te pono o te Atua! Nana rā, ka hari pū te whiwhinga o te tangata kua waihanga ki runga i te toka; ā, ka wiri te tangata kua waihanga ki runga i tētahi tūāpapa onepū kei hinga ia.

29 Auē te mate mō te tangata ka kī ake: Kua whiwhi mātou i te kupu a te Atua, ā, kāore ō mātou hiahia mō te kupu a te Atua, nā te mea he nui kei a mātou!

30 Nana rā, ko te kupu tēnei a te Ariki te Atua: Māku e hoatu ki ngā tamariki a te tangata he akoranga i runga i te akoranga, he tohutohu i runga i te tohutohu, he iti i konei, he iti i konā; ā, ka manaakitia te hunga e whakarongo nei ki aku tohutohu, me te tuku taringa ki aku whakatakotoranga whakaaro, nā te mea ka ako rātou i te mōhioranga; nā, māku e hoatu anō ki te tangata e whiwhi; ā, mai i te hunga e kī ake ana, He nui kei a mātou, ka murua pū anō mai i a rātou ērā mea kei a rātou.

31 Ka kangaia te tangata e whakawhirinaki ana ki te tangata, e mea ana rānei i te kikokiko hei ringaringa mōna, e whakarongo ana rānei ki ngā tohutohu a te tangata, hāunga ā rātou tohutohu e tohua ai e te mana o te Wairua Tapu.

32 Auē te mate mō ngā Tauiwi, e ai tā te Ariki o ngā Mano! Nā te mea ahakoa taku whakaroatanga atu i taku ringa ki a rātou mai i tētahi rā ki tētahi rā, ka whakaparahako rātou i ahau; hei aha koa, ka ngākau aroha au ki a rātou, e ai tā te Ariki te Atua, ki te rīpenetā rātou me te haere mai ki ahau; nā, kua whakaroahia taku ringa i te rā katoa, e ai tā te Ariki te Atua o ngā Mano.