Ko te Pukapuka Tuarua a Nīwhai

1 Ā ināianei, i pahawa ake i muri iho i tāku, tā Nīwhai, whakamutu i taku whakaako i ōku tuākana, ko tō mātou matua, a Rīhai, i kōrero anō hoki i ngā mea maha ki a rātou, ā, i whakaharatau ia ki a rātou, anō te nui o ngā mea i mahia ai e te Ariki mō rātou i tana kawenga mai i a rātou i waho i te whenua o Hiruharama.

2 Ā, i kōrero anō ia ki a rātou e pā ana ki ō rātou tutū i runga i ngā wai, me ngā whakaarohatanga o te Atua i tana tohu i ō rātou oranga, nā konā kīhai rātou i horomia ake i te moana.

3 Ā, ka kōrero anō ia ki a rātou e pā ana ki te whenua whakaari, kua whiwhi nei rātou—anō te aroha nui o te Ariki nāna mātou i whakatūpato kia tahuti atu mātou i te whenua o Hiruharama.

4 Nana, rā, i kī ai ia, kua kite au i tētahi kitenga, nō konei e mōhio ana ahau kua whakangaromia a Hiruharama, ā, mehemea kua noho tonu tātou i Hiruharama kua hemo anō hoki tātou.

5 Engari, i kī ai ia, ahakoa ō tātou mamaetanga, kua whiwhi tātou i tētahi whenua whakaari, he whenua e kōwhiringia ake i runga i ērā atu whenua katoa; he whenua kua kawenatatia tahitia e te Ariki te Atua me ahau, ka noho hei whenua tuku iho mō ōku uri. Āe rā, kua kawenatatia e te Ariki tēnei whenua ki ahau, me aku tamariki mō āke tonu atu, ā, ki te hunga katoa e ārahina atu ai i ērā atu whenua e te ringa o te Ariki.

6 Nā reira, ahau, a Rīhai, e poropiti nei e ai ki ngā whakamahinga a te Wairua kei roto nei i ahau, nā, kua kore tētahi e haere mai ai ki tēnei whenua hāunga rātou e ārahina mai nei e te ringa o te Ariki.

7 Nā reira, kua whakatapua tēnei whenua ki ērā e mau mai ai ia. Ā, ki te mea ka koropiko rātou ki a ia e ai ki ngā whakahaunga kua homai nei e ia, ka noho hei whenua herekore ki a rātou; nā reira, e kore rawa rātou e whakaraua iho ki te hereheretanga; ki te pērā, ka pērā nā te haututū; nā te mea mēnā ka nui te haututū ka kangaia te whenua mō rātou, engari ki te hunga tika, ka manaakitia ia mō āke tonu atu.

8 Ā nana, he mōhiotanga ia kia hunaia ai tēnei whenua i tēnei wā i te mātauranga o ērā atu iwi; nana rā, mēnā rānei he maha ngā iwi kua horapangia te whenua, nā, kua kore he wāhi hei tuku ihotanga.

9 Nā reira, ahau, a Rīhai, kua whiwhi i tētahi kupu whakaari, nā, ina pupuri te hunga e ārahina mai ai e te Ariki i waho i te whenua o Hiruharama i ana whakahaunga, ka whai oranga rātou i runga i te mata o tēnei whenua; ā, ka hunaia rātou i ērā atu iwi katoa, kia nohoia ai tēnei whenua e rātou anake. Ā, ki te mea ka pupuri rātou i āna whakahaunga ka manaakitia rātou i runga i te mata katoa o tēnei whenua, ā, kua kore tētahi hei raweke i a rātou, hei muru atu rānei i te whenua o tō rātou tukunga ihotanga; ā, ka noho haumaru rātou mō āke tonu atu.

10 Engari nana, ina tae mai te wā e memeha atu i te whakapono kore, i muri iho i ngā manaakitanga maha kua whakawhiwhia nei rātou e te ringa o te Ariki—e mau ana tētahi mātauranga o te hanganga o te ao, me ngā tāngata katoa, e mōhio ana ki ngā mahi nui whakamīharo a te Ariki mai i te hanganga rā anō o te ao; i a rātou te mana kua hoatu nei ki a rātou kia mahi ai i ngā mea katoa mā runga i te whakapono; i a rātou ngā whakahaunga katoa mai i te tīmatanga, ā, kua kawea mai e tōna painga mutunga kore ki roto i tēnei whenua tongarewa o te whakaari—nana, ko tāku, mēnā ka tae mai te rā e whakaparahako ai rātou i te Mea Tapu o Iharaira, te Mīhaia pono, tō rātou kaihoko me tō rātou Atua, nana, ka tau iho ngā whakawākanga a te mea e tika ana ki runga i a rātou.

11 Āe rā, māna ētahi atu iwi e kawe mai ki a rātou, ā, māna he kaha e hoatu ki a rātou, ā, māna ō rātou whenua me ō rātou rawa e muru atu, ā, māna rātou e meinga ai kia whakamararatia ai, kia patua ai anō hoki.

12 Āe rā, i tētahi whakatipuranga e pahemo atu ana ki tētahi atu ka ai he whakahekenga toto, me ngā torotoronga nui i waenganui i a rātou; nā reira, e aku tama, e mea ana ahau kia mahara koutou; āe rā, e mea ana ahau kia whakarongo mai koutou ki aku kupu.

13 Auē kia oho rā pea koutou; kia oho ake i te moe au, āe rā, i te moe pū anō o te ao rēwera, me te ruirui iho i ngā meka whakarihariha e herea nei koutou, koia nei ngā mekameka e herea nei ngā tamariki a te tangata, nā, ka kahakina iho rātou ki te tawhā mutunga kore o te pōuri me te auē.

14 E oho! me te ara ake i te puehu, me te rongo i ngā kupu a tētahi mātua wiriwiri, ko ōna iwi meāke whakatakotoria iho e koutou ki roto i te rua wahangū, makariri hoki, tē taea e tētahi te hoki mai i reira; he ruarua anō ngā rā kātahi ka haere au i te huarahi o te ao katoa.

15 Engari nana, kua hokona e te Ariki tōku wairua i te rēinga; kua kite au i tōna korōria, ā, kua karapotia āke tonu atu au i ngā ringa o tōna aroha.

16 Ā, e hiahia ana ahau kia mahara ai koutou kia ngohengohe ai ki ngā ture me ngā whakawākanga a te Ariki; nana, koinei te mānukanuka o tōku wairua mai i te tīmatanga.

17 Kua pēhia iho tōku ngākau e te pōuri mai i tētahi wā ki tētahi wā, he wehi nōku, kei puta mai te Ariki tō koutou Atua i runga i te raneatanga o tōna riri ki runga i a koutou nā te pakeketanga o ō koutou ngākau, nā, kia hātepea atu koutou, ā, ka whakangaromia āke, ake ake;

18 Ka tau iho rānei tētahi kanga ki runga i a koutou mō te takiwā o ngā whakatipuranga maha; ā, ka torongia koutou ki te hoari, ā, ki te hemokai, ā, ka mauāharatia, ā, ka ārahina e ai ki te hiahia me te hereherenga a te rēwera.

19 Auē e aku tama, kia kore ai e tau iho ēnei mea ki runga i a koutou, engari kia meinga koutou hei iwi kōwhiria, ā, hei iwi makau nō te Ariki. Engari nana, ka meatia tāna e pai ai; nā te mea ko ōna huarahi he tika āke, ake, ake.

20 Ā, kua kī mai ia: Ina pupuri koutou i aku whakahaunga ka whaioranga koutou i te whenua; engari ina kore koutou e pupuri i aku whakahaunga ka hātepea atu koutou i tōku aroaro.

21 Ā, kia hari ai ianei tōku wairua i roto i a koe, ā, kia wehe atu ai tōku ngākau i tēnei ao i runga i te koa i a koe, kia kore ai au e kumea iho ai e te huamo me te pōuri ki te rua kōiwi, e ara ake i te puehu, e aku tama, ā, kia tū tāne ai, ā, kia ū ai i runga i te whakaaro kotahi me te manawa kotahi, e kotahi ana i ngā mea katoa, nā, kia kore ai koutou e heke iho ai ki roto i te hereherenga;

22 Kia kore ai koutou e kangaia ai ki te kanga nui; ā, waihoki, kia kore ai koutou e kukume mai ai i te riri o te Atua tika ki runga i a koutou, tae atu ana ki te whakangaromanga, āe rā, ko te whakangaromanga tonutanga o te wairua tahi me te tinana.

23 E oho, e aku tama; kākahuria ki ngā kahu whawhai o te tika. Ruiruia iho ngā mekameka e herea nei koutou, ā, puta mai ki waho i te pōuritanga, ā, ara ake i te puehu.

24 Whakamutua atu te haututū ki tā kōrua teina, kua whaikorōria ōna kitenga, ā, kua pupuri ia i ngā whakahaunga mai i te wā i wehe tātou i Hiruharama; ā, kua noho ia hei taputapu i roto i ngā ringaringa o te Atua, i te mauranga mai i a tātou ki roto i te whenua whakaari; nā, me i kore ia, kua mate rawa tātou i te hemokai i te koraha; hei aha koa, i whai kōrua ki te muru atu i tōna oranga; āe rā, he nui anō ōna pōuritanga i a kōrua.

25 Ā, he nui tōku wehi me taku wiri i a kōrua, kei pāmamae anō ia; nana rā, kua whakapaea ia e kōrua i te whai atu ia kia whaimana ai, kia whaikaha ai ia i runga i a kōrua; engari e mōhio ana ahau kāore ia i whai atu ai kia whaimana ai, kia whaikaha ai rānei ia i runga i a kōrua, engari kua whai atu ia i te korōria o te Atua, me ō kōrua ake painga tonutanga.

26 Ā, kua amuamu kōrua nā te mea he mārama tāna ki a kōrua. Kei te kī mai kōrua he mea koi tāna; kei te kī mai kōrua i riri ai ia ki a kōrua; engari nana, ko tōna koi ko te koi o te mana o te kupu a te Atua, koia i roto nei i a ia; ā, ko tā kōrua e kī nei he riri, ko te pono ia e ai ki tērā kei roto nei i te Atua, kīhai i taea e ia te pēhi, e whakaatu māia atu ana e pā ana ki ō kōrua hara.

27 Ā, me tika pū ia kia waiho rawa te mana o te Atua i a ia, tae atu ana ki tana whakahau pū anō i a kōrua kia whakarongo ai kōrua. Engari nana, ehara i a ia, engari ko te wairua o te Ariki i roto nei i a ia, nāna nei tana māngai i whakatūwhera hei whakapuakanga, nā, kīhai i taea e ia te kokopi iho.

28 Ā, ināianei e taku tama, e Rāmana, koutou ko Remuere, ko Hāmi, ko aku tama anō hoki koia nei ngā tama a Ihimaera, nana, ki te whakarongo koutou ki te reo o Nīwhai e kore koutou e ngaro. Ā, ki te whakarongo koutou ki a ia ka waiho e au tētahi manaakitanga, āe rā, ko tōku manaakitanga tuatahi pū anō.

29 Engari ki te kore koutou e whakarongo ki a ia ka tangohia taku manaakitanga tuatahi, āe rā, ko tōku manaakitanga pū anō, ā, ka tau iho ki runga i a ia.

30 Ā ināianei, e Hōrama, ka kōrero au ki a koe: Nana, ko koe te pononga a Rāpana; hei aha koa, kua kawea mai koe ki waho i te whenua o Hiruharama, ā, e mōhio ana au he hoa pūmau koe nō taku tama, a Nīwhai, āke tonu atu.

31 Nā reira, nā tō ū, ka manaakitia ngātahitia ō uri me ōna uri, kia noho roa ai i te pai i runga i te mata o tēnei whenua; ā kāore he mea, hāunga te hara i waenganui i a rātou, e whakakino, e whakararuraru rānei i tō rātou whaioranga i runga i te mata o tēnei whenua āke, ake, ake.

32 Nā reira, ki te pupuri koutou i ngā whakahaunga a te Ariki, kua whakatapu te Ariki i tēnei whenua hei whenua haumaru mō ō uri tahi me ngā uri o taku tama.