1 Nana rā, ko tā te Ariki, te Ariki o ngā Mano, he muru atu mai i Hiruharama, mai i Hura anō hoki, te tītoko me te tokotoko, te tokotoko paraoa katoa, me te tītoko wai katoa—

2 Te tangata mārohirohi, me te tangata pakanga, te kaiwhakawā, me te poropiti, me te ruānuku, me te kaumātua;

3 Te rangatira o te rima tekau, me te tangata whakahōnore, me te kaunihera, me te tohunga māminga, me te kaikōrero matatau.

4 Ā, ka hoatu e ahau he tamariki ki a rātou hei wheao, ā, ka whakahaere tikanga ngā kōhungahunga i runga i a rātou.

5 Ā, ka whakapēhia ngā tāngata, tētahi tangata e tētahi tangata, ā, tētahi tangata e tōna kiritata; ka whakahīhī te tamaiti ki te kaumātua, ā, ka tū atu te mea e whakahāweatia ana ki te mea whakahōnore.

6 Ina mau i tētahi tangata tōna tuakana nō te whare o tōna matua, me te kī ake: He kākahu ōu, māu hei kaiwhakahaere mō mātou, ā, kaua e tukuna tēnei ngaronga i raro i tō ringa—

7 Ka kī taurangi ia hei taua rā, e mea ana: E kore au hei kaitākai; nā te mea kāore he parāoa rānei, he kākahu rānei i tōku whare; kaua e meinga ahau hei kīngi mō tōku iwi.

8 Nā, kua turakina a Hiruharama, ā, kua hinga a Hura, nā te mea kua whawhai ō rātou arero me ā rātou mahinga ki te Ariki, hei whakapātaritari i ngā karu o tōna korōria.

9 E whakaatu tauaro atu ana te āhuatanga o ō rātou kanohi ki a rātou, ā, e whakapūaki ana i ō rātou hara e pērā ana ki ō Horoma, ā, e kore e taea e rātou te huna i a ia. Auē te mate mō ō rātou wairua, nā te mea kua whakautua rātou e rātou anō ki te kino!

10 E kī atu ki te hunga tika e pai ana mō rātou; nā te mea ka kai rātou i te hua o ā rātou mahinga.

11 Auē te mate mō te hunga whakarihariha, nā te mea ka mate rātou; nā te mea ka tau iho te utu a ō rātou ringaringa ki runga i a rātou!

12 Ā, ko tōku iwi, ko ngā tamariki ō rātou kaipēhi, ā, ka whakahaere tikanga ngā wāhine i runga i a rātou. E tōku iwi, nā te hunga e ārahi nei i a koutou te hunga e whakararu ana, ā, e whakangaro ana i te āhuatanga o ō koutou huarahi.

13 E tū ake ana te Ariki ki te totohe, ā, e tū ake ana ki te whakawā i te iwi.

14 Ka tīmata tā te Ariki whakawā i ngā kaumātua o tōna iwi me ngā wheao o reira; nā te mea kua kainga ake e koutou te māra waina me te pāhuatanga o ngā rawakore i ō koutou whare.

15 He aha tā koutou? Ka kurua kongakongahia nei e koutou tōku iwi, ā, ka kauorohia ngā kanohi o ngā rawakore, e ai tā te Ariki te Atua o ngā Mano.

16 Waihoki, e kī ana te Ariki: Nā te mea e whakakake ana ngā tamāhine a Hīona, me te hīkoi kakī toro-mua me ngā karu karihika, e hīkoi ana, ā, e hīkoi ririki ana, i a rātou e haere ana, ā, e tatangi ana ō rātou waewae—

17 Nō reira ka haua e te Ariki ki te pātito, te tumuaki o ngā upoko o ngā tamāhine a Hīona, ā, ka kitea e te Ariki ō rātou wāhi ngaro.

18 Hei taua rā ka muru atu te Ariki i te ātaahua o ā rātou whakakai tatangi, me ngā mea whakapaipai māhunga, me ngā mea porowhita e rite ana ki te marama;

19 Ngā mekameka me ngā poroporo, me ngā ārai kanohi;

20 Ngā pōtae, me ngā whakakai waewae, me ngā tīpare, me ngā mea whakakakara, me ngā mau taringa;

21 Ngā rīngi, me ngā taonga whakapaipai ihu;

22 Ngā kākahu whitiwhiti whakapaipai, me ngā koraka, me ngā pōtae wahine, me ngā pine whakamingi makawe;

23 Ngā whakaata, me ngā rinena pai, ngā pōtae huri, me ngā ārai.

24 Ā, ka pahawa ake, mahue he kakara reka ka pirau kē; ā, mahue he whītiki, he tawhetawhe; ā, mahue ngā makawe papai, he pākirahanga; ā, mahue he tātua whakapaipai, he kahu taratara; mahue te ātaahua he weranga.

25 Ka hinga ō tangata i te hoari, me ō mārohirohi i te pakanga.

26 Ā, ka tangi hotuhotu, ka mōteatea ōna kēti; ā, ka mokemoke kau ia, ā, ka noho iho i runga i te papa.