1 Ā, whai muri iho i te aranga ake o te Karaiti i te mate ka whakaatu atu ia i a ia anō ki a koutou, e aku tamariki, me aku huānga aroha; ā, ko ngā kupu e kōrerotia atu ai e ia ki a koutou ko te ture me mahi e koutou.

2 Nana rā, tāku ki a koutou kua kite au ka pahure atu ngā whakatipuranga maha, ā, ka nui ngā pakanga me ngā tautohetohenga i waenganui i tōku iwi.

3 Ā, whai muri iho i te haerenga mai a te Mīhaia ka hoatu he tohu ki tōku iwi mō tana whānautanga mai, ā, mō tana matenga hoki me tana aranga; ā, he nui whakarihariha taua rā mō te hunga kino, nā te mea ka hemo rātou; ā, ka hemo nei rātou nā tā rātou makanga atu i ngā poropiti, me te hunga tapu, ā, ka ākina ki te kōhatu, ā, ka whakamate i a rātou; nā reira ka kake ake ngā toto o te hunga tapu ki te Atua mai i te whenua hei whakahē i a rātou.

4 Nā reira, ko te hunga whakakake katoa, e mahi nei i te kino, ka tahuna ake rātou i taua rā e haere mai ana, e ai tā te Ariki o ngā Mano, nā, ka rite rātou ki te kakau wīti.

5 Ā, ko rātou e whakamate nei i ngā poropiti, me te hunga tapu, ka horomia ake rātou e te hōhonutanga o te whenua, e ai tā te Ariki o ngā Mano; ā, ka ūhia rātou e ngā maunga, ā, ka kahakina atu rātou e ngā hau āwhiowhio, ā, ka hinga iho ngā pourangi ki runga i a rātou, ā, ka mongamonga rātou hei kongakonga, ā, ka kauorohia rātou hei puehu.

6 Ā, ka torongia rātou ki ngā whatitiri, me ngā uira, me ngā rū, me ngā tūmomo aituā katoa, nā te mea ka tahutahungia te ahi o te riri o te Atua hei whakahē i a rātou, ā, ka rite rātou ki te kakau wīti, ā, ka pau rātou i taua rā e haere mai ana, e ai tā te Ariki o ngā Mano.

7 Auē te mamae, me te pōuri o tōku wairua i te ngaronga o te hunga mate o tōku iwi! Nā nāku, nā Nīwhai, i kite atu ai i a ia, ā, e tata pau ana ahau i a ia i te aroaro o te Ariki; engari me karanga atu au ki tōku Atua: E tika ana ō huarahi.

8 Engari nana, ko te hunga tika e whakarongo ana ki ngā kupu a ngā poropiti, me te whakangaro kore i a rātou, engari ka ū te titiro whakamua ki te Karaiti mō ngā tohu kua hoatu nei, ahakoa ngā whakahāweatanga katoa—nana, ko rātou te hunga e kore nei e hemo.

9 Engari ka puta mai te Tama o te Tika ki a rātou; māna rātou e whakaora, ā, ka āio tahi rātou me ia, kia pahure atu ai ngā whakatipuranga e toru, ā, ka nui anō te hunga nō te whakatipuranga tuawhā e pahure atu ai i runga i te tika.

10 Ā ina pahure atu ēnei mea ka tae mai te whakangaromanga wawetanga ki tōku iwi; nā, ahakoa ngā mamae o tōku wairua, nāku ia i kite; nā reira, e mōhio ana ahau ka pahawa ake; ā, ka hoko atu rātou i a rātou anō mō te kore; nā te mea, ka rongo rātou i te whakangaromanga hei utu mō tō rātou whakapehapeha me tō rātou kuaretanga; nā, nā tā rātou tukunga atu ki te rēwera me te whiriwhiri i ngā mahinga pōuri kē atu i te mārama, nō reira me haere iho rātou ki te ao rēwera.

11 Nā, kāore te Wairua o te Ariki e totohe tonu ki te tangata. Ā, ina mutu tā te Wairua totohe ki te tangata hei reira tae mai ai te whakangaromanga wawetanga, ā, he mea pōuri tēnei ki tōku wairua.

12 Ā, he pēnei anō ki tāku i kōrero ai e pā ana ki te whakapakepaketanga i ngā Hūrai, nā, ko Ihu te tino Karaiti, me tika pū ia kia whakapakepakehia anōtia ngā Tauiwi ko Ihu te Karaiti, te Atua Ora Tonu;

13 Ā, ka whakaatu ia i a ia anō ki te hunga katoa e whakapono ana ki a ia, mā te mana o te Wairua Tapu; āe rā, ki ngā iwi katoa, ngā hapū, ngā reo, me ngā tāngata, e mahi merekara nunui ana, ngā tohu, me ngā whakamīharotanga, i waenganui i ngā tamariki a te tangata e ai ki tō rātou whakapono.

14 Engari nana, e poropiti ana ahau ki a koutou e pā ana ki ngā rā whakamutunga; e pā ana ki ngā rā e whakaputa mai ai te Ariki te Atua i ēnei mea ki ngā tamariki a te tangata.

15 Whai muri iho i tā ōku uri me ngā uri o ōku tuākana memeha haeretanga i te whakapono kore, ā, ka oti hoki te patupatu a ngā Tauiwi i a rātou; āe rā, hei muri i tā te Ariki te Atua karapotinga huri noa i a rātou me tana whakapaenga i a rātou ki te parepare, me te whakarewa ake i ngā taiapa ki a rātou; ā, hei muri iho i tā rātou kukume ihotanga ki raro iho i te puehu, kia kore noa iho rātou he aha, heoi anō, ka tuhituhia ngā kupu a te hunga tika, ā, ka rangona ngā inoi a te hunga whakapono, ā, kāore e warewaretia te hunga katoa kua memeha haere i te whakapono kore.

16 Nā, ka kōrero mai te hunga ka whakangaromia i te whenua, ā, ka puta pū tā rātou kōrerotanga i raro iho i te puehu, ā, ka rite anō tō rātou reo ki tētahi he wairua taunga tōna; nā, ka tuku mana atu te Ariki te Atua ki a ia, kia taea e ia te kōhimuhimu e pā ana ki a rātou, me te mea nei i te whenua; ā, ka kōhimuhimu tā rātou kōrerotanga i te puehu.

17 Nā, ko te kōrero tēnei nā te Ariki te Atua: Ka tuhituhi rātou i ngā mea ka oti te mahi i waenganui i a rātou, ā, ka tuhia, ā, ka hīria ake i tētahi pukapuka, ā, kāore e riro ēnei mea ki te hunga kua memeha haere i te whakapono kore, nā te mea e whai ana rātou kia whakangaromia ai ngā mea o te Atua.

18 Nā reira, e pērā ana ki te hunga kua whakangaromia, kua whakangaromia wawetia; ā, ka rite te marea o te hunga nanakia ki te pāpapa e ngaro atu ana—āe rā, ko te kupu tēnei a te Ariki te Atua: Ka ai pū i tētahi wā poto rawa atu, ka ohorere—

19 Ā, ka pahawa ake, nā, ka patua te hunga kua memeha haere i te whakapono kore e te ringa o ngā Tauiwi.

20 Ā, ka neke ake ngā Tauiwi i runga i te whakapehapeha o ō rātou karu, ā, kua tatutatu, nā te nui o tō rātou tutukitanga waewae, nā konā kua hangaia ake ngā hāhi maha; hei aha koa, e whakapēhi iho ana i te mana me ngā merekara a te Atua, ā, e kauhau atu ana ki a rātou anō i ā rātou ake mōhiotanga me ā rātou ake mātauranga, kia whai pūtea ai rātou, ā, kia kauoro atu i runga i te mata o te hunga rawakore.

21 Ā, he maha ngā hāhi kua hangaia ake nāna i hua ai ngā pūhaehae, me ngā tohenga, me te mauāhara.

22 Ā, i reira hoki ngā huihuinga muna, e pērā ana ki ngā rā o mua, e ai ki ngā huihuinga a te rēwera, nā, ko ia te pūtake o ēnei mea katoa; āe rā, ko te pūtake o te kōhuru me ngā mahinga a te pōuritanga; āe rā, e ārahina ana rātou e ia mā te kakī ki te aho muka, tae atu ana ki te wā ka hereherea rātou ki ngā aho kaha mō āke tonu atu.

23 Nana rā, e aku teina aroha, ko taku kupu tēnei ki a koutou, nā, kāore te Ariki te Atua e mahi i roto i te pōuritanga.

24 Kāore ia mō te mahi i tētahi mea hāunga ia hei painga mō te ao; nā te mea e arohaina ana te ao e ia, nō konā pū anō ka whakatakotoria iho tōna ake oranga kia kukume katoa mai ai i ngā tāngata katoa ki a ia. Nā reira, kāore ia mō te whakahau i tētahi kia kaua rātou e pā ai ki tōna whakaoranga.

25 Nana, e karanga ana ia ki ētahi, e mea ana: Mawehe atu i ahau? Nana, ko tāku ki a koutou, Kāo; engari ko tāna: Haere mai ki ahau e ngā tōpito katoa o te ao, hokona he waiū me te mīere, kaua he moni, kaua he utu.

26 Nana, kua whakahau rānei ia i ētahi kia mawehe atu ai i ngā whare karakia Hūrai, i ngā whare koropiko rānei? Nana, ko tāku ki a koutou, Kāo.

27 Kua whakahau rānei ia i ētahi kia kaua e pā atu ki tōna whakaoranga? Nana ko tāku ki a koutou, Kāo; engari kua homai noa e ia mō ngā tāngata katoa; ā, kua whakahau ia i tana iwi, nā, me whakapakepake rātou i ngā tāngata katoa kia rīpeneta ai.

28 Nana, kua whakahau rānei te Ariki i ētahi kia kaua e pā atu ki tōna painga? Nana ko tāku ki a koutou, Kāo; engari e arohaina ana ngā tāngata katoa, e rite ana tētahi ki tētahi, ā, kāore tētahi e whakakāhoretia atu.

29 E whakahau nei ia kia kore ai he tohungatanga teka; nana rā, ko tā te tohungatanga teka he kauwhau atu te tangata me te whakatū i a ia anō hei māramatanga mō te ao, kia whai pūtea ai, ā, kia whai hōnore ai i te ao; engari kāore rātou i te whaiwhai atu i te painga o Hīona.

30 Nana, kua whakakāhoretia e te Ariki tēnei mea; nā reira, kua homai nei e te Ariki te Atua he whakahaunga kia aroha noa ai ngā tāngata katoa, ko taua aroha noa koia anō te aroha. Ā, ki te kore tō rātou aroha noa kua kore noa iho rātou. Nā reira, ki te whai aroha noa rātou kua kore rātou e tuku kia mate ai te kaimahi i Hīona.

31 Engari ka mahi te kaimahi i Hīona mō Hīona; nā te mea ki te mahi rātou mō te moni ka mate rātou.

32 Ā, waihoki, kua whakahau te Ariki te Atua kia kaua te tangata e kōhuru; kia kaua e rūkahu; kia kaua rātou e tāhae; kia kaua rātou e whakahua noa i te ingoa o te Ariki tō rātou Atua; kia kaua rātou e pūhaehae; kia kaua rātou e mauāhara; kia kaua rātou e totohe atu tētahi ki tētahi; kia kaua rātou e mahi pūremu; ā, kia kaua rātou e mahi i tētahi o ēnei mea; nā te mea ka mate te hunga e mahi ai i ēnei mea.

33 Nā, kāore tētahi o ēnei hara i ahu mai i te Ariki; nā te mea ka mahi ia i ngā mea pai i waenganui i ngā tamariki a te tangata; ā, kāore ia e mahi nei i tētahi mea hāunga ia he mārama ki ngā tamariki a te tangata; ā, e pōhiri ana ia i a rātou kia haere mai ai rātou ki a ia kia pā ai ki tōna painga; ā, kāore ia mō te whakakore i tētahi e haere mai nei ki a ia, te mangumangu me te kiritea, te herehere me te herekore, te tāne me te wahine; ā, ka maumahara ia ki te tangata mohoao; ā, e rite ana te katoa ki te Atua, Hūrai mai, Tauiwi mai.